mi(sual).com

Mathaia 28:19 thu hi?

Matthaia 28:19 thu a Pa leh Fapa leh Thlarau Thianghlim hmingah chuan baptist ula tih hi thupek ropui, “The Great Commission” tih hial a chhal huam chhung ami a nih avang hian zir chian ngai tak a ni a. He tawngkam hmakhalhtu chu kal ula tih leh hnam tina mi zirtirahte siam ula tih hi a ni a. Heng tawngkam te hi imperative sentence a nih avangin thupek a ni.

Thupetu chu tunge? Heta thupek tawngkam hmangtu hi a hma chiah chang a, “Lei leh vana thuneihna zawng zawng ka hnenah pek a ni tawh” titu Lal Isua a ni a, thihna hneha a thawhleh hnua a thupek a ni. Tute hnena he thupek hi sawi nge a nih? Chang 16 ah chuan he thu hi kan hmu a, “zirtir sawm leh pakhatte chu Galili ramah, Isuan tlang a ruatsakah chuan an kal a.” Heta tanga chiang ta em em chu thupek dawngtute chu zirtir sawm leh pakhatte (Isua mantirtu Juda Iskariota tel lovin) an ni.

Kan hriat reng tur chu Apostle Mathaia hian Mathaia 28:19 hi a ziah a nih bakah Peter rual khan Pentecost ni-ah khan a ding ve a, Petera sermon lai khan Mathaia hi a awm ve reng a ni. Thu ngaithlatu lam atanga zawhna, “Unaute u engtin nge kan tih tak ang?” tih hi apostol-te hnena zawh a ni (Tirh. 2:37).

Petera khan mipui ho kha Isua hminga baptisma chang tura a tih khan chhanna diklo ni ta sela (Tirh. 2:38), Mathaia hian Petera hi a tidik ngei ang. Peter hian Mathaia 28:19 a Isua thusawi hi a hria a, tin, Mathaia hian Tirh. 2:38 a Paula thsawi hi a hre bawk a, tin, kar hnih/khat lekin he hun hi a then bawk a.

Chiang tak maiin tirhkoh pahnih-te hian he thu pahnih hi a inkawprem chiah a ni  tih hi an hre chiang hle ang. Tin, kan hriat reng tur chu Chanchin Tha Mathaia ziak hi Pentecost ni a Petera thusawi leh tirhkohte’n rawngbawla Kohhran-te an din hnu fe a ziah chauh a ni tih hi hriat tel a tha awm e.

Baptist ula:

Kan sawi tak ang khan helai thu a thupetu hi Lal Isua a ni a, a thupek dawngtute chu a zirtirte (Apostol-te) an ni. Lal Isuan a zirtirte chu kal chhuak tur leh hnam tin a mite chu zirtirahte siam a, chutianga zirtirahte an siam te chu baptist zel turin thu a pe a ni. Heta tang a thil lang chiang tak pakhat chu “Kristian Mission” ah hian baptisma hi a tel tlat a ni tih hi a ni.

Mahse helai thu-ah hian tu hmingin nge zirtira kan siam takte chu kan baptist ang tihah hian inhnialna tawp thei lo a hringchhuak tlat ta si a ni. Thenkhatin Pa leh Fapa leh Thlarau Thianghlim, Pathian pakhata minung pathum hming a baptist tur tiin kan inzirtir a, thenkhat lahin thupetu Isua hming ngeia baptist tur a ni e kan lo ti ve mek zel bawk a.

Mahse, Kohhran tihdan (Church tradition) leh Bible tihdan (Biblical tradition) hi kan khaikhin fo a tul awm e. Bible-in sawi a tum leh a kawh tum te, a zirtirna te hi Kohhran tihdan nen a inmil em tih hi kan ngaihtuah fo a pawimawh ang a, kum zabi pakhatnaa Kohhrante tih dan leh vawiin ni a kohhran te tih dan hi a inmil em, a inhmu rem thei em tih hi chhut tham tak a ni.

Hmingah  chuan?

Kan sawi tak angin Mathaia ziaka Lal Isua sawi tum hre chiang tur in a tawkam bulpui kan chhut a ngai awm e. Helai thu ah hian Lal Isuan Pa leh Fapa leh Thlarau Thianghlim hmingah chuan Baptist ula a ti a. Hmingah tia Mizo Bible-in a lehlin hi la chhuak ila, in zirchiang teh ang. Chutiangin zirtira siamte baptist-na tur hming chungchanga inhnialnaah chuan ngaihdan dik leh tha zawk kan siam ve theih ang.

Helai thu a hmingah tih hi plural form ni lovin singular form a ni a. Greek tawngah chuan onoma a hmang a. He thu hming (Gk. onoma) hi [nominative singular neuter] a ni a. Nominative chu thil titu nihna sawina a ni a, singular chu pakhat sawina a ni a, neuter chu a pa lam emaw a nu lam emaw pawh sawi chuang lo, ni kawp thei ve ve sawina a ni. Chuvang chuan he tawngkam onoma hian pakhat hminga baptist tur tih a tichiang zawk a, chu mi pakhat chu Pathian pawh a nihzia a tilang chiang hle a, a chhan chu Pathian hi (sexless) mipa emaw hmeichhia emaw pawh a ni lo a ni. Chuvang chuan Pathian famkim nihna neitu Isua, thupetu ni bawk, chu hming ngei chuan baptist tur a ni zawk a ni.

Onoma hi singular a ni. Thuthlung Hlui hrilhlawkna nen a inmil thei chiah a ni (Isaia 52:6, Zakaria 14:9). Pa leh Fapa leh Thlarau Thianghlim tih hian Pathian pakhat, hming pakhat nei a kawk chiah a ni. Hming zawng zawnga chungnung ber, vawiin nia kan chhandamna atana Pathianin a tihlan (reveal) chu enge ni ta ang? Tirh 4:12 hi in bih teh ang, “Mi dang tuma hnenah chhandamna a awm lo; van hnuaia mihring sak zingah, min chhandam tur hming dang reng a awm lo.” He thu sawitu hi Pentecost ni-a thusawitu Petera bawk a ni tih hi hre bawk ila. Isuan Pa hming a tilang (John 17:6, 26). Thuthlung Hlui chuan Messia-in Pathian hming a tihlan tur thu hi a hrillawk bawk a ni (Psalm 22:22; Hebrews 2:12).

Pa, Fapa, Thlarau Thianghlim:

Bible-ah hian Pa tih te Fapa tih te, Thlarau Thianghlim tih te kan hmu nual a. Heng te hi ngun tak a kan en chuan Bible hian hming angin a sawi ngai lo a, Pathian nihna leh a hnathawh mihringte hnena puanchhuahna atan a hmang thin zawk a ni. Pa tih te, Fapa tih te, Thlarau Thianghlim tihte hi hming a ni lo hrim hrim a, nihna a ni tih tih hi kan chiang hle tur a ni. Chuvang chuan Pa, Fapa, Thlarau Thianghlim, hming chu kan zawn chhuah a lo ngai ta a nih chu. Tin, kan zawn chhuah rualin heng nihna te nei vek tu hi kan hmu nghal thei bawk dawn a ni.

Awle, Pa hming chu eng nge? Lal Isua ngeiin a rawn kal dan a sawinaah chuan “Ka pa hmingin ka lo kal a nih hi” (Jn. 5:43) a ti a, chuti a nih chuan Isua tih chu Pa hming a ni tihna a lo ni ta a ni. A chhan chu Hebrai 1:4 ah chuan Isua chuan a hming chu a rochun a ni tih min hrilh a. Isua tih hi Greek tawng chuan Iesous tih a ni a , chumi awmzia chu Jehova chu Chhandamtu a ni tih a ni a. Isuan chu hming ngei chu chhawmin a rochhung ta a ni. Thuthlung hlui hunah hian mimal hming hian an nihna a keng tel nghal thin a.

Pathian Jehova kha a nihna chu Chhandamtu a ni a, Isaiah 43:11 &12 ah chuan heti hian kan hmu a, “Kei, keimah ngei hi, LALPA chu ka ni; keimah lo chu chhandamtu rêng rêng an awm lo…Keimahin ka sawi a, ka chhandam a, ka hriattir a.” Chutiangin Isua he khawvela a lo pian khan vantirkoh chuan heti hian a lo puang chhuak nghe nghe a ni: “Vawiinah hian in tan Davida khuaah Chhandamtu a piang ta, Lal Krista chu (Luke 2:11)” tiin. Chhandamtu tur (future tense) hmang lovin Chhandamtu (Gk. swth.r [Savior, Redeemer, Deliverer] noun nominative masculine singular) a ti a ni. Chuvang chuan Isua hian chu hming chu chhawmin a rochung ta a, Pa chhandamtu, Awm tawha, Awm meka leh lola Awm tura, Jehova hming chu Isua a ni tihna a lo ni ta a nih chu.

Tin, Fapa tih hi hming ni lovin Lal Isua nihna bawk a ni a, chuvangin Mathaia 1:21 a kan hmuh angin Fapa hming chu Lal Isua bawk a ni: “Fapa a hring anga, a hmingah ISUA i sa ang: ani chuan a mite an thil tihsual lakah a chhandam dawn si a.” Tin, Thlarau Thianghlim tih pawh hi hming nilovin nihna tihlanna tho a ni a. Thianghlim tih chuan Thlarau dinhmun a tarlang mai a ni (Lev. 11:44).

Pathian chu Thlarau (Jn. 20:24) a ni a, Thlarau chu pakhat chauh a awm thu kan hmu bawk a (I Kor. 12:11), chuvangin Pathian Thlarau chuan amah Pathian atang chuan hming hran neiin a awm thei lo a ni tih chiang tak in a lang a. He thu hi Lal Isuan sawiin, “Tin, Thlamuantu, Thlarau Thianghlim, Pain ka hminga a rawn tirh tur khan..(Jn. 14:26)” a ti a. Lal Isua chu a Pa hming a rawn kal a nih a, Thlarau Thianghlim chu a hminga rawn tirh a nih bawk si chuan Thlarau Thianghlim hming chu Isua tho a ni tihna a ni.

Thlarau Thianghlim hian Lal Isua chu amah ringtute hnena thlarauva khawvel tawp thleng pawha a chenna tur leh hna a thawhna tur a entir a bawk a ni: “chu chu Thlarau dik tak a ni; khawvelin chu mi chu an nei thei lo, amah an hmuh lohva an hriat hek loh avangin; nangnin ani chu in hria e, in hnenah a awm reng si a, nangmahniah chuan a awm dawn a ni. Fahrahin ka kalsan lo vang che u; in hnenah ka lo kal leh ang (Jn. 14: 17&18)… Kei kumkhuain, khawvel tawp thleng pawhin, inhnenah ka awm zel ang (Mat. 28:20b).”

Isua hming bawkin a ni Thlarau Thianghlim kan dawn thin bawk ni. Chuvang tak chuan alawm chhandamna hming awmchhun amah Isua hming ngei hian in baptist turin Lal Isuan apostol-te kha thu a lo pek ni.

Isua thuneihna?

Isua hminga in baptist tih hian Isua thuneihna zawka in baptist tur tia ngaihdan siam theih tak a ni awm e. Mahse kan hriat atana tha chu Pathian hming hian Pathian thuneihna leh thiltihtheihna a tarlang nghal bawk thin a ni tih hi hriat a tha awm e. Hemi dikna chu Thuthlung Hlui huna Pathianin mihringte hnena a inpuanchhuahna hming atang leh mihring ten Pathian an koh thinna atangin a chiang hle a ni.

Awle, Tirhkohte Thiltih 2:38, 8:16 leh 10:48 a preposition KJV a ‘in the name’ tia lehlin hi Greek tawngah chuan ‘epi’ tih a ni a. A hmasa bera epi hi dative case a hman a ni a, tin a pahnihna hi accusative case a ni a, tin, a tawp ber hi dative case bawk a hman a ni leh a. Tichuan Tirh. 2:38 ah hian epi hi dative case-in a hmang a.

Hetiangin epi to onomati Iesou Christou, a awmzia ni ta chu “on or in the name of Jesus Christ” tihna a ni. A Greek-English Lexicon of the New Testament by Bauer, Arndt, Gingrich, and Danker tih bu hi Greek-English Dictionary rintlak pawl tak a ni a, helai thu epi dative case a hmanna hi heti hian a hrilfiah a, “tu emaw hming lamrik emaw koh emaw tu hming sawi emaw” tiin a sawifiah a ni. Hmun danga epi dative case a hmanna ten en hian han khaikhin a tha awm e, chung te chu zirtirtu dik lo ten Isua hming an hmannaahte (Mathaia 24:5, Marka 13:6, Luka 21:8), tin, Apostolten Isua hming an lam leh Isua hminga an zirtir thinnaah te (Tirh. 4:17, 18; 5:28, 40).Tin, Luka 24:47 ah te pawh hman a ni bawk a ni.

Davidan Goliatha Pathian chakna leh thiltihtheihna hmanga a hmachhawn khan heti hian a ti a nih  kha, “Nang zawng khandaih te, fei te, feite te kengin i lo thawk a; kei zawng sipaite LALPA (Jehovah/Yehweh), Israel sipaite Pathian i chova hmingin ka lo thawk zawk a ni” (I Sam. 17:45). Davida hian Jehovah hming a lam ngei a ni. Isuan kohhran hote chu ramhuai a hminga hnawhchhuah te leh damlote a hminga tawngtai damsak  theihna nei turin thiltihtheihna leh thuneihna a pe a ni (Marka 16:17-18; Jakoba 5:14). Engtin nge kohhrante chuan he thiltihtheihna leh thuneihna hi an hman tak? kan tih chuan Tirhkohte Thiltih bu kan chhiar chuan Isua hming vekin a nih thu kan hmu thei a ni.

A chhan chu Pathian hming hian A thiltihtheihna leh A thuneihna a keng tel thin a ni. Baptisma hi chhandamna kan chhan theihna atana serh leh sang pawimawh tak, Sual ngaihdam nan a ni (Acts 2:38; 22:16; I Peter 3:21). Isua hming hi chhandamna hming awmchhun leh sualte ngaihdamna atana hming awmchhun a ni(Acts 4:12; 10:43; I John 2:12). Mahse hei hian Isua hming hi hman tur a nilo tihna a ni hran lo. Isua hminga in baptist hian Isua thuneihna leh thiltihtheihna hmanga in baptist-na a ni nghal bawk a ni. Chutiangin, Pathian thuneihna leh A thiltihtheihna kan lantirna leh kan hriattheihna chu A hming kan lam hian a ni.

Chhiartute Lalpa’n malsawm che u rawh se.

Similar Posts:

• Pentecost pualin
• Tu hminga Baptis tur nge?
• Tunlai ka mutmawh hnarmawh.
• Ho mai mai
• Pathian Kut Dinglam {Sunday Pual}

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Sunday, August 1st, 2010 at 12:12 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.