mi(sual).com

Artice ngaihnawm tak tak karah, thlarau lam thu te pawh hi ngaihthlak kan mamawh ve tho awm e.

Mihringte hi chuan, hausak leh retheih te, zirsan leh san loh te, hmelthat leh that loh te etc. kan in enna leh tehna pakhat a nih laiin, Pathian chuan, ‘fing leh finglo’ hi mihringte min enna ber pakhat a ni in a lang.

Lal Isua khan, mi fing leh mi ‘a’ chungchang a sawi ngun hle. Mi a han tih mai ai pawh-in ‘mi mawl’ kan tih te hi a kawk zawk awm e. Thil hre ve si, a nihna tak tak pawh pha lo, ni hmingpu ve si, nih tur ang (quality) ni thleng pha si lo te hi an ni ber awm e.

Tehkhin thu ah pawh, nula panga ‘fing’ leh nula panga ‘a’ te chungchang a sawi kha (Mt 25:1-13). Nula thianghlim sawm zinga panga te, mo neitu alo thlen hun a ruai chaw kil tura in peih te kha mi fingah a chhiar mai a. Panga dangte erawh kha chu, nula thianghlim 10 zingah mite ni mahse, ‘fing’ a chhiar tel an ni ve ta lo. A awmzia chu, Kristian ni ve ngawt mahse, Lalpa tawk turin an inpeih ve hman ta lo va. Ti chuan, Mo neitu khan tute nge an nih a hre bik ta lo a ni – a rapthlak hle.

Mizote hi, Pathian khawngaihna-in min rawn zawng chhuak a, ‘Lu’ la hnam ni thin kha, ‘Kristian ram’, a ma ram ah min seng lut a – Pathian hmangaih thuk tak leh khawngaihna avang liau liau in, ‘Kristian’ hming kan lo put ve tak bakah, ‘Kristian ‘State’ tih hial kan lo hlawh ve a. Kohhran te thahnem ngaihna leh in pekna azarah- missionary pawh tamtak kan lo tir chhuak ta a. Kan Kristianna rei ve tawh zia te leh, Kristian State hming pu hial thei leh missionary tamtak tir chhuak ram kan nih te, Pathian thu kan hriat thuk leh sawi thiam zia ngaihtuahin – ram dang/State dangte tan a ‘en tawn tlak’ leh ‘awh-awm’ ram kan nih hi a hun ta viau.

Bible-in ‘Kristian’ a tih te hi, Lal Isua hnungzuitu tak tak te, mi rinawm leh ‘Lal Isua’ chhandamtu tan a ‘nung’, ‘thu hretu’(witness) leh ‘a lokal leh hun nghaka in peih tak tak te’, ‘midangte tan a entawn tlak a nung te’ an ni. Tunlai kan kristianna nen han teh khin ta i la….kan rinawmloh zia leh kan dawt heh zia te, mahni hma kan sial zia te han thlirin – Bible-in Kristian a tih te – ni phak kan tlem hle awm e. Hriatril leh in hriat-thuk siak ringawt hi Pathian hnen thlenna nise a tha tur…mahse a ni dawn si lo.

Biblein Kristiana a sawite hi, Krista tan a mi huaisen te an nih avangin, Pathian tan pawh an hlu a. Mi tamtakin, kristian hming kan han pu ve ta ringawt pawh hi a lawmawm hle. Mahse, Lal Isua’n mifingte zinga min chhiar tel loh vaih chuan, a pawi hle dawn a ni. Ram hruaitu leh sorkar hnathawk pam-ham, party leader mahni hmasial te leh, rawngbawltu leh beram pu pawh kan danglamna a tlem ta hle. Rawngbawltu leh berampu kan nih ve na te hian van ram min thlen lovang tih a hlauhawm ta. Politician te lah hian, kum 5 chhunga kan in hai vur ve theihna a nih dawn chuan, “Mizo hming chhiat’ te, ‘Kristian hming chhiat’ te, ‘Zoram chhiat zawh vek’ pawh kan pawisa phal meuh ta lo. Mizo kristian te hian, Bible a ‘Kristian hming mawi tak’ leh ‘thianghlim’ ‘hlu tak’ hi, kan ti hming hliau (common) zo dawn – fimkhur a hun ta. Bible-in, ‘Pathian chhungte chu, Pathian nung kohhran ho, thutak ban leh in nghahna chu an ni’ (I Timothy 3:15) a tih kha.

Khawvel hi a kalphung pang ngai a a kal muah muah reng dawn a, chu bakah,he khawvel hi mi chitin inpawlhna leh lemchanna khawvel a nih tlat avangin ‘mi fing’ leh ‘mi a’ te hi, thliar-hran leh hai then mai an harsa rih hle, mahse, ‘mahni tuh rah seng na khawvel’ a nih ve tlat avangin, hun leh hmun-in, tute nge an nih a rawn hai lang tho tho thin. Mi a (Pathian thu zawm lo) deuh te hi chu, minister an ni emaw, party hruaitu an ni emaw, berampu an ni emaw etc. khawvel mit hmuhah an mualpho fo dawn. Thlarau lam hi chu, chatuan thil a nih tlat avangin, khawvel nawmna leh hausakna te, lalna te hian, chatuan hremhmunah min hnuk lut dawn a nih chuan, a man hla lemlo hle ang. Tumah he khawvel a dam kumhlun tur kana wm si lo.

Mi fing te hi chu, khawvel ‘thli’ chi hrang hrang pawh lo tleh mahse, van lam ropuina chang ve turin an ding nghet tlat a, he khawvel ‘ropuina’ chuai leh mai tur hi an thla hlel ve lo. Mifing kan tih te hi, hun lo la awm tur thlir-lawk thiam a, lo in hmakhua lawk mite hi an ni. Mi a te hi chu vawiin a ei teuh, vaw in a nawmsak, naktuk a ral leh mai tur – thlahlel mite an ni.

Bible chuan, kan thih hnuah (he khawvel kan chhuahsan hnuah) pawh, kan nunna (thlarau) erawh chu a la tawp dawn loh thu min hrilh a, chuvangin ‘chatuan nunna a pawimawh’ hle. Chu chatuan nunna nei tur chuan, tun kan dam chhung hun hi ‘duhthlan na hun’ a ni, a pawi mawh khawp mai. Kan thlan fuh chuan, mi fing kan ni a nga, chatuanin Pa hnenah kan cheng tawh ang. Kan thlan fuh loh chuan, mi a kan ni a nga, kum 5 chhung (term) tih ang reng a ni ve lo, inti fing tak leh hausa takin, meidil-ah, chatuanin i cheng tawh ang. Chumi chatuan nunna ilo chan tawh humhim tur chuan, vawiin ni a hun i hman dan kha a pawimawh hle. Bible-in,“Ngai teh u, tun hi hun lawmawm chu a ni a; ngai teh u tun hi chhandamna ni chu a ni” (2 Kor. 6:2) a tih kha.

Khawvel thilah pawh midang te bum theih, pawisa tlem te a thlem thluk theih te hi mifing an tling pha lo. Chutiang bawkin, mite tihder a, an ‘thil hlu’ neih, sum tlem te a thlemthluk tumtu te hi, ‘bumtu’ ‘mi verther’ ‘mi tenawm’ an ni.

Thlarau lam thilah pawh, Satana leh a pawl te hi, chatuan hremhmuna min hruai luh tum a, sum leh lalna tawktarh (bait) a, min veh, min vehtu an ni a, ‘kristian’ thlarau lam a ‘muthlu’, satana’n sum leh lalna hmanga a bum thluk theih te hi a lawm, Lal Isuan mi A a tih te chu. Lal Isua lo lan hunah ‘nula thianghlim panga ‘A’ te ang khan, an la che chhe viau dawn a ni. Lal Isua’n mifinga a chhiarte zingah tel ve pha ngei turin –i in enfiah thin ang u.

Hebrai lehkhathawn ah, ‘Nimahsela, keini zawng boral tura hnungtawlh pawla mi kan nilo va; nunna humhim tura rinna nei pawla mi kan ni zawk’ (He.10:39) a tih kha, i hre reng ang u. Amen.

Similar Posts:

• Sunday thuchah
• Kristian Chi 2 Te {Sunday Pual}
• Thlarau Khawvel
• A ram leh a felna zawng hmasa la engkim a pe ang che.
• Kristian sakhua leh Mizo hnam sakhua danglamna

Recent Posts:

• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games
• Sehrep thenfai dan awlsam
• American flag thui hmasaber tu chu tunge?
• mi(sual).com hi!

This entry was posted on Sunday, August 1st, 2010 at 9:43 am and is filed under More than words, Religion. You can follow any responses to this entry through the RSS 2.0 feed. You can leave a response, or trackback from your own site.