mi(sual).com

Hmanlai kan pi leh pute hunlai khan an pasalthate raldo leh ramchhuak chu an va chhuahna hmunah an hlawhtling a ni tih entirnan kawtchhuahah hlado an han chhama,silai an kap bawk a..khawchhunga awmte tan chuan awm hle hle theih a ni tawh lo. An lo hmuaka,zu bel an lo pu chhuak a,nulate lah chuan an duhtak te arkeziak ban tumin an lo chhuak bawk a. Pasalthate tan pawh awm hle hle a har tawh ngawt ang..khawchhung lama hmuaktu hmuh an chakawm tawh dawn si a.

Ni e,kan pi leh pute khan pasalthate kha an ngaisang em em a. Khaw humhimtu,ral leh sakawlh laka khawtlang thlamuanna anni tih an hai lo hle. Pasalthate pawh khan mipuite himnan an theihna zawng zawng an chhuaha. Mipuite hlimna kha an ngaipawimawh bawk avangin raldo leh rammu an lo haw a an hlawhtlin thu pawh kawtchhuah atangin an rawn hrilh hre thin a ni.

Ni e, kawtchhuah kha a va pawimawh em. Ram kal tur an inghahkhawmna,an lenna hmun a ni a. Tin,kutni vangthlaa chhawnghnawtna hmun atan pawh an hmang thin a ni.Hun a lo kal zel a kawtchhuah,hlado an chhamna hmun atang khan khawchhung an rawn pawngkah a,kawtchhuah atang khan khua an rawn lut a,khua an rawn hal tan thin. Kha rambuai kha chu a rapthlak tak meuh meuh a ni. Mizoram hring mawi em em thin kha thlan hmunah an rawn chhuah a,luikawrah te khan thisen an rawn luantir a nih kha. Mizoram hi hrehawmnain a tuam chhuak vek a tihtheih hial awm e.

Chu rambuai chu rei fe hnuah a reh a..kan tha an chah te kha sum hmangin min rawn zawm sak an tum a,sum hrawmin min rawn vawm ta a nih kha. Tha chat kal hleitheilo kha artui hlawhin min kaltir an tuma,keini lahchuan awmhmunah kan lo ban bawk si. Kal duh lovin kan thu tlat a,kal min zirtir an tum lahin kan tho duh tawh bik si lo. Chutah pek a pek a duhloh laia ban zuau zuau tih ang deuhin kaldan min zirtir an tum laia ding duh lo kha state nihna mahni a inchawm thei turin min dah ta. Kal zirtir tumlaia kan thut tlat avangin thu chungin mahni inchawm a ngai ta si. Mizoram chuan hmasawnna tur kan va ngah em!

Mahni kal duh lovin kan mawngtawlh a. Hmasawnna kan um a,umphak thei lovin min tlansan zel bawk si. Ram hruaitute lah mahni inchawmthei tura ram hmasawn duhna thinlung an nei lo a maw tih mai turin kal min zirtir chu sawiloh an mawngtawlh pawh khalh ngai khawpin an chaurau bawk si. Mipuite hnenah ‘kal zir a hun tawh e’ tih a hun tawh tehlul nen mawngtawlh pawhin min tawlh that pui thei tawh lova,kan bawkvak lo chauh a ni tawh ber e.

A khalh ngiltu tur mipuite lah hian min bawhvah pui teuh tehlul nen kan party mi alawm tiin thil diklo ti mahse kan la tahngai lungpui sa vawn tlat bawk si. An hnungah chaurau takin kan tawlh hne hne a,an ei bang a ningnawi kan chhar a,hlim takin kan hmawm a,a dang chhar turin kan zui zel a nih hi. Kan ram hruaitu kal pawh min zirtir thiamlo te hnunga chaurau taka mawngtawlh tawh lovin khawizu leh hnute tui luan theihna turin kan thawhkhalh thei tawh lawmni?

Kan thalaite chungchang sawi leh teh ang. Milar nih duhin kan awm a,milar nih theihnan theihtawp kan chhuah peih leh thung si lo. Mawngtawlha kan la tawlh laiin hnamdang a tlan a tlan tawh te tihdan kan entawn a. La kal thiamlo khan mi an tlanna hmanraw tha tak tak leh an incheina nen lamin kan neiin kan inchei a. Mawngtawlha kan tawlh tlat avangin a mawng kan la tawlh pawp pui thuai dawn. Hawh u,an tlanna hmanrua leh an incheina kan inbela,kan nei ve duh a nih chuan thawh a hun tawh e.

Chutianga mawngtawlha kan tawlh reng lai chuan pawl hrang hrang kan siam a,kan tawlh mai mai avang erawh chuan ram ropui inthlen a har si. Thenkhat chu mawngtawlh pawh engtia tih thuloh hnamdang sum ringa pawl nung chang chang..hnamdang awm ta lo se pawl a thi nghal dawn tihna a ni. Kan mawng pilh hrutin kan la tawlh dawn khawp mai.

Kan media lam te hi mawngtawlh chunga kan kal e ti lo chuan hma kan sawn khawp mai a. Mizoram chu thawha,kaltir tumin an bei tang tang a,amaherawhchu thawha kal a nawmzia kan man thiam bawk si lo. Hetiang renga kan awm chuan kan mawng a la khamin a la na thuai anga,mawngtawlh peihloh hun a la awm dawn..chutih hunah chuan kan din a,kal kan thiamloh chuan kan la bawkvak dawn khawp e..harh a hun ta.

Hmanah khan kal min zirtir an tum a,kan duh lo a. Zeng tihdam pawh khan kal a zir hmasa lo..a thei tih a hriaa,a kal tawp mai a nih kha. Keini pawh hmanah kea kal min zirtir an tum a,kan duh lo a,min zirtir an tum chuan kein a kal theih tih a hriat a..tho ila,ke han pen chhin ila,kan kal thei ngei ang..chuan kan pipute hlado lo chham thinna hmun atang khan Hnehna hlado kan chham dawn u nia!

Similar Posts:

• Thereng
• Mizoram Larsap MM Lakhera Thuchah hnuhnung
• Khawi chinah nge ramri kham tur?
• Abraham Lincoln-a Lehkha Thawn
• Vangchhia-ah i zin ang hmiang…

Recent Posts:

• ZO NUNMAWI HLUTNA
• NGAIHNAWM KAWLEKSAWN – 1 :
• Kawnpui dai sex video a leakout!
• Ka Zirtirtu
• Zirtirtu Isua{Teachers’ Day Special}.

This entry was posted on Wednesday, August 18th, 2010 at 3:39 pm and is filed under Health, Mizoram. You can follow any responses to this entry through the RSS 2.0 feed. You can leave a response, or trackback from your own site.