Awm-har hnemtu
Nipui lo thaw lawm a, lentupui hring-no nghulh mai chuan khawlum hrehawm tur chu a vawng dai thung. Chu hun nuam tak mai chu rannung hram thei tawh phawt te chuan an aw neih ang angin, ‘it’s my life’ ti ve ni awm fahranin hram tliar tliar bawk.
Heng rannung tam tak zinga pakhat: Thereng hi a dangdai riau. Patling kutzungpui tiat vel a ni awm e, a taksa a dum tial a. A thla erawh langtlang thei leh rawng dumin a tial thung. Eng atan mah kan hmang tangkai lo na’ngin kan hunawl min hnawhkhah saktu a ni ve tlat.
Mawngtawlh hla
Ka la theihnghilh ngai lo. Hunawl neih changin, dai hnaia thing kungah heng thereng hram lai kan tawn fuh tawh chuan kan kalsan mai ngai lo va. He ruahtham loh hla ngei hian thereng chu ka lem kual thin.
Thereng aw mawng tawlh mawng tawlh
A lu lamah ral awm e
Thereng aw mawng tawlh mawng tawlh
Tia kan han zai hlarh hlarh tawh chuan, Thereng chu thahnemngai taka hram reng chungin kan hla sak awmzia hrethiam ve niawm tak chuan a mawng tawlh sawt sawt a. Kan bul a rawn tawlh thleng ta maw tihah kan man mai thin. A chang chuan, a kar laklawhah a’n ding khawmuang vel thin a. Thian-za-hova man kan tum chang phei chuan; pakhatin Thereng fukna thingzarah a han lawn chilh te te a. Leia mi te chuan uar tak leh thahnemngai takin mawngtawlh hla kan sa thin.
Mawngtawlh chhan?
Thereng mawng tawlh chhan hi engnge ni ta ang? Mawngtawlh hla kha a hrethiam ve nge? A, awihawm loh lutuk; Therengin hla a hriatthiam ngawt ngaihna a awm lo kan ti thei. Mah reng reng se, tuin nge maw mawngtawlh hla saka thereng mawng tawlh dan thuruk hi lo hmuchhuak reng reng le? In naupan laiin in sa ve ngai em?
Thereng
Source: lawrkhawm.com (Photographer : dula)
Similar Posts:
- Kan value system
- Hnehna hlado chham ang u..
- Thimthainu
- Tial Tial
- Negro ho intih sexy ve dan, Mawng tih len!
March 21st, 2013 at 12:55 pm
First phawt ang
Report this comment
March 21st, 2013 at 1:53 pm
Thereng hian mawngtawlh hla hi a hrethiam ve an ti, a ngaina ve hle a ni awm e
Naupanlai a ngaihawm thin hle mai
Report this comment
March 21st, 2013 at 2:09 pm
Thereng hi daihlim hnuai tanga ngaihthlak cuan anuam veng veng, mahse, hlo thlawh nisat lai a kan bul a thahnem ngai tak a an hram ngheng mai hi chu aw….
Report this comment
March 21st, 2013 at 3:08 pm
Kan naupan laiin ‘Thereng aw mawngtawlh’ tih naupang thenkhatin an sak chu ka hria a, mahse a mawngtawlh tak2 tih chu ka lo hre ngai hauh lo.
Thereng hi chi hrang2 a awm lo maw – Nipui thereng, Losul thereng tih te? Thereng chanchin i hriat apiang han ziak zel teh. Nisat laia a hram ri ral2 hi mawi ka ti teh mai.
Report this comment
March 21st, 2013 at 3:08 pm
mizo te hian thereng chi hrang eng zat nge kan neih le..?
Report this comment
March 21st, 2013 at 4:07 pm
Thereng hram ri hriatlohna pawh a rei ta hle mai
Report this comment
March 21st, 2013 at 7:59 pm
Ka lung avan tileng mai mai tak em!
Report this comment
March 21st, 2013 at 11:17 pm
@ Emi… Ralkhata kan thiante’n thereng zaia an awi ri kha ka bengah hian a la cham reng thin.
Nia, thereng chi hrang hrang chu a awm awm e. Hre chiang zawk an awm ang em aw?
Thereng hi man an awl viau a, Chepchep hi an phakar hle thung..
Report this comment
March 23rd, 2013 at 11:27 pm
Chhun nisat vanglai tak maia an hram ral2 hi chuan lung a ti leng, a hram erawh hriat lohna rei ta hle mai, kan naupan lai min ti ngai, kan man ve nasa thin mahse mawngtawlh khi kan sa ve ngai miah lo.
Report this comment
March 25th, 2013 at 3:46 pm
Lu lamah ral a awm e,mawng lamah kei ka awm e….kan ti thin. Ti hian a thluk pawh a dik zaih a,sak pawh a nuam sawt lawmni?
Report this comment
March 25th, 2013 at 3:47 pm
Lu lamah ral a awm e,mawng lamah kei ka awm e….kan ti thin. Ti hian a thluk pawh a dik zaih lawmni?
Report this comment