Kei pui hi rapthlak vak pawhin ka in hre lo nain thil rapthlak leh danger zet zet hi ka tawng thei riau a,sawi duh ila sawi tur ka nei nual mai.. In rap ve leh rap ve loh chu ka hre lo nain thil pakhat, thil thleng khat, sapin ‘ once in a lifetime’ an tih pawh a thleng meuh lo hi ka tawng pek a, in lo chhiar peih takin ka misual thiante ka han share leh zawk teh ang che u.
Hmanni lawk khan Kawnpui leh a chhehvel chanchin in rawn post kha ka lo chhiar ve a, ka buailai a nia, ka comment hman lova pawi ka ti hle a, tlai khaw hnuah ka Kawnpui dai experience ka theihnghilh ngai loh hi sawi lovin ka awm thei si lo a nih hi.
Ni 6 Aug 1981 khan kan tawnawmte truck Silchar kal tur, haw leh mai tum chu kan thiandunin kan zui ve mai mai a, kan la naupangin ngaihtuah pawh a la tawi hle. Zan kan riak a, a tuk ni 7 chuan Aizawl lam kan pan chho a, kalkawngah hian MST bus ZRX-82 nen hian kan in lehpel chho zak zak a, Baghaah kan ding hova, kan thenawm (awm leh)nula pawh a lo chuang ve a, kan inbe luam hman. Kan tlan chhuak hmasa a, Vairengteah min tlan pel a, Kolasibah (Chaw an ei a ni mai thei) kan tlan pel leh a, Kawnpuiah kan din lain min tlan pel leh a, minute 15 vel hnuah kan zui ve ta a ni.
Kalkawng a lan thui theih lai chuan hla deuhah bus chu kan hmu thin a, kan motor a that vak loh avangin kan tlan chak thei lo. Kawnpui chhukthla kan tih mai ah an chesual ta a, a thawm pawh driver chuan hriain a insawi. A zawn kan thlen thlak ve chuan kawngsir lo pe deuh hun kan hmu a, kan driver chuan an chesual anih ringin a ding ve nghal a, a hmanraw ken ang ang, chempui, hruizen, etc vel chu a khawm zung2 a, tui kan keng bawk a, hlau chung2in kan vak thla ta a, hnim karah a bus pawh kan zu hmuthei riai ruai a ni. A tlakna hi a sang lutuk lova, thi an awm pawh kan ring lo nain la naupang ta chu ka hlau ru hle a, pa lo min tih ka hlauh avangin ka chhuk thla ve hram a ni e.
A hmun kan zu thlen chuan pa pakhat ram kal/feh ni awm tak hi a lo awm karh2 tawh a, thleng hmasa ber dawttu kan nih chu.Ri nuai2 awm tak a reh duk mai zu nia. Kan han enkual vel ta chu damchhunga theihnghilh tawh loh tur hlir mai a lo ni. Nu pakhat thing bula lo thu a chhak bera mi chuan ‘tui in rawn keng em?’ a lo ti vat a, hliam a tuar nual avangin tui in vak a tha lo tih kan hr eve a, mahse ani chuan ‘Naute u, ka thi tho tho dawn a, chumi hmain tui duhtawka in ka chak em mai’ a ti a, bottle khat kan pe a, ‘zu chhuk rawh u, tanpui ngai an tam hle ang’ a ti a, he nu hi reiloteah a lo chatthla ta tak tak a ni awm e..Lawk, hemi hma hian pa pakhat rawn vak chho kan hmu hmasa a, hliam tuar vak pawhin a lang lo,’Ka tha e, ka lo chhuak chho ang a, motor-te pawh ka lo phar ding dawn nia’ a tih avangin kan kalsan a, hepa pawh hi kan chhoh leh chuan thi zingah an lo zalh reng tawh bawk.
Ka rilruah kan thenawmnu Bagha a ka hmuh Pari a lo lang zawk a, mahse ka hmu mai thei lo, ka thil hmuh chuan mi rap thlu ngang a, dik taka sawi chuan ka tiril a khur nasa hle, thisuk erawh chu ka lo nei lo hlauh a, ka mualpho lo chauh a ni e. Tam tak chu an hmel a hriat chian theih lova, taksa bung lek2 ka hmu nual a, a then an rawn harh tan a, an tap zel ni tain ka hria, a thenin an chuanpuite an zawng a,lo tanpui vak ngaihna pawh ka hre lo, hliam nasa zual phei chu ka khawih ngam lo a ni e, pawnfen in hlim vek erawh chu ka khuh sak ve! Aa, ka tangkai tam lo a ni ber e.Midang pawh an rawn thlengthla ta zel a, ka thlamuang sawt mai, an tlawmngai hlawmin an ngam hi kan ti khawp a, accident-a tel ve ang maiin thi an kai ve zeih zuih mai a ni.
Keini a naupang deuh ho chu min chhoh tir a,kawngpui kan thlen chuan kawng sirah ruang 8/9 vel an lo tlar hman tawh a ni.A hnuah kan driver-te chu thu eng eng emaw an zawt nual a, keini thiandun chu kan ngawi hle2 mai a ni.Kan thenawm nula Pari pawh a thi nghal zingah a lo tel ve a, a ruang lumen naah pawh ka zu tel ve a, mahse kan tlaivar pui kha Pari ni lovin veng danga mi a lo ni a, a tuk ah an inthleng leh an ti, hei hian he chetsualna hi a namai lo tih a ti chiang awm e.Kan veng pa, a khalhtu Pu Chhuanvawra te nupa pawh an thi ve ve a, an fanu pawh kan school a lut a lo ni reng mai.Kha tih lai boruakin Aizawl a tuam dan kha senior deuh tawh chuan in hre vekin ka ring, ar pawh a khuang lo an ti.
Tun hnuah helai hmun hi vawi duai lo kan tlan pel leh tawh a, helai zawn ka thlen hi chuan ka thlir thla vawng2 thin a, ka ngaihtuahna chu kum 1981 ah a let vawn vawn thin. Khatiang kha tawng leh ta ila kha tih lai ai ngawt kha chuan ka che tha tawh zawk ang tih chu ka hrechiang hle nain tawn leh ni hi her chhuak tawh lo se tih hi ka duhthusam ber pakhat a ni.
Coming Soon- My Last Flight Experience
Similar Posts:
- Thlahrang
- Mizoram kawng kam quarry
- Tunlai Mizo Nulate leh Scooty (Feminizing the city/town space)
- Before and After Accident
- Ngaihtuah neuh neuh atan nge ho mai mai..?
August 26th, 2010 at 11:50 am
Chhiar hma pawhin ka hlau lutuk ka khur joih joih mai
Report this comment
August 26th, 2010 at 12:00 pm
A va rapthlak ve le.
Report this comment
August 26th, 2010 at 12:02 pm
A hunlaia a hmuna awm ve ang mai leh, hliam zinga tal ve ang maia suangtuahna mitthla nen ka’n chhiar chu le. I ziak ngaihnawmin, thinlung a khawih hle mai. Khami tum khan mi engzat nge bus-ah chuanga, engzat nge thi ta le?
Report this comment
August 26th, 2010 at 12:05 pm
A ngaihnawm hle mai. Thi ta te kha an khawngaihthlak tak zet a ni. La thalai tak tak an ni hlawm bawk sia. Chhiat tawh chang hian Mizo nih hi a nuam thin a ni.
Report this comment
August 26th, 2010 at 12:06 pm
Hemi tum hi ka la hre reng mai. Kan la te khawp a, Ka nu hi a damlo a, Mithi hi an tam lutuk a, Midang ho zawng zawng chu mithi inah an insemdarh a, ka nuin, ka naute pahnih nen, kei nen min awmpui a, ka hlau lutuk hi ka khur zawih zawih reng mai a, ka nu che hlek hi ka zui zel a, kha thil tleng zet kha chu, a rapthlak ber awm e.
Report this comment
August 26th, 2010 at 12:07 pm
Kha boruak zet kha chuan a hunlai khan Zoram a chiah hneh alawm, tunlai angin sarthi sawi tur a la tam lo bawk nen; a rapthlak em bawk a ni. Thleng tawh lul teh suh se.
Report this comment
August 26th, 2010 at 12:08 pm
Hetiang accident rapthlak, theihnghilh leh ngai tawh loh tur chungchang chiang taka nangma tawn hriat i rawn sawi hi a thra ka ti khawp mai…mahse i tawn hriat chauh ni lovin a fact and figures hrang hrang te nen han pawlh thei ta la chuan document tha tak a tling ngei ang..
Report this comment
August 26th, 2010 at 12:13 pm
chhiar zawm zel chakawm ve
Report this comment
August 26th, 2010 at 12:15 pm
Ava rapthlak tak ve aw.!
Report this comment
August 26th, 2010 at 12:22 pm
A sei hle mai… sei rau2 ah chuan nula sam sei hi a nalh, sei over lo se
Report this comment
August 26th, 2010 at 12:27 pm
Vanduaina rapthlak tak ni nachungin a ziak a ngaihnawm reuh hle mai a.
He accident hi em ni, kan tet laia Kawnpui dai accident-na hmun hrang an thin kha le aw??
Report this comment
August 26th, 2010 at 12:29 pm
Hre ve hman lo mah ila, i sawi thiam bawk a ka mitthla thiam, a rapthlak hle mai.
“Ri nuai2 awm tak a reh duk mai zu nia” he thu hian mi râp
Report this comment
August 26th, 2010 at 12:31 pm
Kan thenawmte nufa thi zingah khan an tel ve a,an lainatawm teh a nia aw.An kalsan tak an chhungte ka mitthla ah an la cham reng mai,an tuar thiamlo,thiam chi pawh a nilo bawk lah tak a.
Report this comment
August 26th, 2010 at 12:33 pm
A va chiang duh om ve oo..tumah hian kan tawn tur hi kan hre lawk mang silo ah..!!! a thlalak hmuh a chakom ka ti kei chu…
Report this comment
August 26th, 2010 at 12:37 pm
@Princess:Thlalak post dan hi ka thiam lova,thiam ila chu engemaw chu rawn post ka duh khawp mai
Report this comment
August 26th, 2010 at 12:41 pm
#15, hei hi lo en teh
https://misual.life/2009/06/.....iamlo-tan/
Report this comment
August 26th, 2010 at 12:44 pm
Kha motor accident-ah khan mi 64 vel an chuang an ti a, mi 33? vel an thi niin an sawi ka hria. Ka hre sual deuh mai thei. Ruang inthleng leh an sawi kha Republic veng leh Dinthar veng niin an sawi bawk. A rapthlak khawp ang.
Report this comment
August 26th, 2010 at 12:47 pm
Thil rapthlak tak pawh ngaihnawm ti takin min chhiar tir thei a lawm le..ziak ngaihnawm thiam hle mai. Accident hi chu tu chungah mah hian thleng lo se ka ti.Mahse, kan thu a ni si lo a…
Report this comment
August 26th, 2010 at 12:50 pm
Mizoramah hian hliam tuar khawichet bawrh bawrh,sawi nawk nawk, kaihkuah a kalpui tum tih ang reng te hi an ching hle a, first aid in zir loh vang pawh ani thei ang. Mumal taka hlang hmanga zawn chhuah ni ta se thi tam tak khi an dam chhuak maithei ani. A bikin ring leh kawng ruh hi che thei lo tura siam hmasak a pawi mawh ber, spinal chord kalna ani si a.
Report this comment
August 26th, 2010 at 12:54 pm
Rapthlak awm hle mai hetiang lampang hi chu ka hmuh chak loh zawng tak ani
Report this comment
August 26th, 2010 at 12:57 pm
Nikum khuangleng dai a farkawn bus chesual pawh kha rapthlak khawp mai a hmun ah pa6 an thi nghal a khuangleng a tang km2 na chiah vel a ni,2nd driver in a khalha a mah lah chu him pial leh nghal
Report this comment
August 26th, 2010 at 1:09 pm
Kan naupan laiin kan Aizol kal Kolasib panin zanah kan ho a, konpui dai khami Mizoram Accident rapthlak ber tih lungphun zonah chiah khan kan motor a chhia mo le…nuam lo ve tho…motor trangin min chhuktir a ka U nen..kan zon chiahah lungphun kha kan hmuthut chu…..*&^%$#@ motor nor ngaisia, ke in min chhoh tir, peng thleng khan…..saaala..
Report this comment
August 26th, 2010 at 1:10 pm
@ lonelyboy vuak nat tlak nih chu..
Report this comment
August 26th, 2010 at 1:22 pm
Kan nau a tel ve a,a malpui ruh a tliak a.Vanneihthlak takin Damchhuak zingah a tel hlauh a.A la naupang ve deuh a.A landan chuan a thran a thrut phah an ti a.Palianlo tak kebaih in a la dam a.Office Head Asst. hnathawkin Aizawlah a awm a.Puitling rilru pu pha tan chuan a chuang ve chhungte nih kha a rapthlak awm teh asin.A hmai bawr hliam vung vel pawh nasa tak a ni..
Report this comment
August 26th, 2010 at 1:29 pm
rapthlak khawp mai.
Report this comment
August 26th, 2010 at 1:30 pm
Khithil aimaha rapthlak zawk ka tih:-
Mizoram police-in Inner Line Permit nei lo an man, tunhnaia Cachar-a thawn haw tur 50 zinga pawisa neite chu `500 chawitir an nih hnuah thawn lêt loin, kawng lakah an chhuah thin nia thudawn a ni.
ILP nei lo thawn lêt turte hi police-te chuan Vairengte thlang, state ramri-ah an chhuah thin a;tunhnai khan ILP nei lo mi 50 vel chu motor-ah phurin, Silchar an panpuina kawng, Durtlang khaw tawpa SoG Camping Centre bulah mi 10 vel chu an chhuahtir nia thudawn a ni.
Heng an mi chhuahte hian police hnenah `500 an pek vanga chhuah an nih thu an sawi.
https://www.vanglaini.org/index.....8;Itemid=2
Kan ram riangte tak hi chu awww. Sum duhna hian min va tibuai tak em…. Ka rilru ana khawp mai. ILP hi rs500 a lei chi anilo
Report this comment
August 26th, 2010 at 2:27 pm
IPL mai lo pawh Burma mi Jail tang, tan hun hmang zo tawh te pawh khilam ram ri a phurh chhoh tur pawh Police motor in an phur chho a kawng lakah pawisa nei leh chawi tur nei chu an chhuah zel.
Report this comment
August 26th, 2010 at 2:54 pm
ILP hi khawia atanga an pek nge? kar khat emaw thla khat vel cham tur hian ILP neih kher angai em? Mizo nilo tan, a hria chuan min han chhang teh u.. Pls;)
Report this comment
August 26th, 2010 at 3:05 pm
Ni e kha thil kha chu a rapthlak a ni e. Kha thil thlengina a hrinchhuah pakhat, ‘kawnpui dai accident na a hrang’ tih erawh kha chu pawi ka ti khawp mai. Vawitam ka kal in fiah ngei tumin tum thum lai ka thawkchhuak, kei chuan a hranna ka hre lo. Hrang anga kan han sawi vak mai kha chu, kha chhiattawhna a vanduai ta te chhung te tan chuan a rilru nat thlak lehzual angem aw! ka ti thin. Khami tum khan a ni lawm ni Pu B. Sanghnuna (IAS Rtd.) leh a nau te kha an chetthat viau kha?
Report this comment
August 26th, 2010 at 4:04 pm
Khang hunlai khan ka la piang ve lova, mahse a chanchin kha chu ka hreve khawp mai. Kan khua atangin a hla lemlo bawka, tin, Shillonga ka zin changa khami chhiattawhna hmun kan kal pelh hian chhiattawhna rapthlak kha ka hrechhuak ve ziah thin.
A hunlai khan a van lo na dawn tak em!!
Citybus Sihphir a tlan kha leitan thlang deuhvah a accident a. Mi pakhat a thi. Hliam na tak tuar 2 an awm bawka. Kha kha chu ka hre ve hman ta. Khami ringawt pawh kha Sihphir miho tan chuan a thlabarthlak ania, Kawnpui daia accident hi chu ahun lai nena ngaihtuah phei chuan a rapthlak ngawt ang le…
Report this comment
August 26th, 2010 at 4:45 pm
Kha thil thleng kha ka hre ve hman. Ruang rawn phur ho kha zanah YMA-in kan lo hmuak a, a va rapthlak teh lul em! Kha tiang kha thleng tawh lul suh se tiin ka han tuihnih ve teh ang.
Report this comment
August 26th, 2010 at 4:47 pm
Pu Ultimate.. Aug. nilovin July a ni lo maw???? Hei hi kawnpui bus accident lar am am kha a ni in a lang.
Kei chu hetiang ah hianka kal ve ngai vak lo. Mi ruang hmel diklo tak tak leh taksa kim lo tih vel te ka hmuh chuan kar khat deuh thaw te ka mu thei thin lo. Ka hlauh vang ni maw.. ka hre law.. Chuvangin accident ah hi chuan ruang la chhuak tu ah hi chuan ka tel ngai meuh lo ani.
Report this comment
August 26th, 2010 at 5:31 pm
@mermaid: Indian citizen zin ringawt tur tan chuan Lengpui airport ah hming ziah a ni mai. Vairengte lam chu ka hrelo.
foreigner tan chuan ILP a ngai. Solomon’s Cave thlanga travel agent (Quality nilo zok, a hming ka theihnghilh) te hian an tihsak thei.
Report this comment
August 26th, 2010 at 5:40 pm
Ka Office hlanin ka thil post an lo release a, ka hawn hnuah ka hmu ve chauh. In comment-nate ka lo hmu a, ka lawm e. Kha tih lai khan engmah ziaka chhinchhiah thlip thlep ka nei lova, a ni leh thla te pawh hi ka chiang zan lo. A thi zat pawh kha a hnua thi leh ta te nen 35 an ni lawm ni kha aw!Michuagte kha an over load hle an ti.
Report this comment
August 26th, 2010 at 5:42 pm
@ Ultimate, nia MST Bus (Medium) ah hian seat 42 a awm a, mi 60 vel an chuang an ti.
Report this comment
August 26th, 2010 at 9:52 pm
@Ultimate: kha accident kha a hun lai khan kan la naupang deuha, kan awmna ten a zir lo a, kan hriatdan a chiang lo hle. A hmuna zuk hmu a hliam tuar te zuk bawihsawm ve ang mai in i thil ziah ka chhiar hian a thuah hian ka cheng tlat mai. Khatiang ang chhiatna rapthlak kha thleng leh tawh lul suh se.
Report this comment
August 27th, 2010 at 2:10 am
Rapthlak e mawle. Kawnpui dai khi chu motor rit deuhva kal chuan a hahthlak emmm ani. Gear a laklawh si. Khawhar chhungte ka tuarpui.
Aryan sawi ka thlawp ve tlat tun tum chu. Accident kher lovah pawh.. Mizo chu Crime scene ang te hi kan khawih chingpen vek zel.
First aid te hi nurse ho chauh thiam tur anilo. Mimal tin in kan thiam ve vek angai ani. Ka lawm e. Maian post ka chhiar dawn
Report this comment
August 27th, 2010 at 11:41 pm
Kawnpui bus accident kha chu ka hre ve deuh riai ruai, Krismas dawn vel chu niin ka hria, kan chhungte thi pawh a hmel a hmuh tlak loh tih an sawi vel chu ka la hre ve,kan hlau lutuk tih chu ka la hria.
Report this comment