mi(sual).com

AIDS natna hlauhawm tak hian Mizoram hi kum 10 ai tam vel zet a chamchilh ta. A rawn lut ve ani tih an sawi tantirh (1990) khan, keini ram arhmai tiat lek leh mihring inhriat tawn vekna ramah te chuan darh chak em em thei turah kan lo ngai lova. AIDS dona kha a tantirh phat atangin mi zawng zawng hriat atan, chanchinbuah te, kan Media hrang hrangah an ti ri nghal a. Sum hmantur India leh Foreign atangin a rawn lut nghal vat bawk ani tih hriat anih phei kha chuan, hlawhtling nghal mai turah ka dah thla rawk a.

Sum hian thil a ti thei a, AIDS dona tur anih phawt chuan, Sorkar laipui leh International lam pawh an inphal viau an tihte kan lo hria a. AIDS chu hetiang a kawng hrang hrang a dorawn a nih chuan, khuahkhirh theih leh darh zau theilo tura ngaihna kan neih laiin, kan ramah ngei hian alo pung ta em em mai zawk hi alo ni a. A vei tamna ram a chhiar theih kan lo ni ta der mai, kan percentage 1% a tling tlat alawm.

AIDS chanchin sawifiah hi kei mimawl hian ka thiam dawn lo a, a chanchin te chu a dona campaign-ah kan ngaithla ning hlei hlui tawh. Kan tana hriat tur pawimawh rawn sawinawn ka duh erawh chu ‘a tihdam theih loh’ tih hi a ni. A darh dan pawh kan hria: AIDS veiin nau a neihin, thisen inpekna, hmeichhiat mipat hmanna leh chhan mumal sawichhuah lohah a ni. Hetiang a hriat chian ni si engtinnge a darh chak viau si?

Thisen inpek lamah chuan a inpekna hmun kan Hospital-te an fimkhur em em tawh a. Thisen lak tur endikna te pawh an uluk em em a ni tih kan hria; sawisel tur an awm lo. Drugs ti hian an hriau hmante an tihfai ngai lemloh avangin rangtakin an inkai reng bawk; mahse anni hi chu kan control-na piah lam an ni. A darhna pakhat zawk hmeichhia leh mipa inpawlna hi zu thlur bing ka duh ta a, heihi kan rama AIDS darhna bulpui ber a ni miau a. Kan lo sawi na deuh anih leh kan tawngkamte a ngaihmawhawm anih pawhin, a ngaihdam lam lo chak deuh mai teh u.

AIDS natna vei mipa leh hmeichhia an inpawlin, AIDS an inkai nghal thin zat (chance) chu 0.1- 1.0% chauh ani tih mithiam ten an sawi a. Hetah pawh hian mipa chu AIDS vei zawk anihin hmeichhiain a kai sam bik. Hmeichhia chu AIDS vei zawk nita sela, a inkai percent a tla hniam leh daih a. Mahse kan ram a AIDS veiho za-a tam zawk ngawt mai hi inpawlna atanga kai alo ni si hi a rapthlak a. Hei hian a tarlan chu nupa inkar piah lamah Sex kan hmang nasa hle tihna a ni.

Kan khawtlang nundan, kan Free Society kan kalpui dan leh kan Kristian nun kan hmandan hrim hrim pawh hi bihchian chu a ngai ta a ni. Pawn lam hmel hriat loh nen a sex hman sim vat a ngai. KS leh hmeichhia hrim hrim tamna ramah nula ngaih a uanthlak tawh hek lo. Kan sim vat theilo anih si chuan, kawtthler a signboard lar ber thuziak ‘Condom hmang rawh’ tih thupek zawm a ngai. Chuti chung pawhin, I Pathian khan thianghlim turin a phut tlat che tih kan hrilh nawn leh ang che ‘Kristian kal fimkhur rawh’.

Kan pi-pute hun lai kha chuan tlangvalin nula ngaih ngei an tum a, nula ngai lova an thih chuan mitthi khaw kawtchhuahah Pawlan sairawkherhin alo perh pawp dawn ani an ti. Tuna Kristian kan lo nih hnu hi chuan kha rindan kha paihbo fihlim a tul. Paula paw’n sairawkherh hum tawh lovin, Krista chanchintha hrilin a vakvel thin tih Bible-ah kan hmu. Mizo mipaten nula ngaih intihtheihnan kan hmang thin pawh hi sim vang vang a ngai; ‘kawng raltiah kan kal’ a, kan rawp ral palh ang e. Inngaih chungchang a thil fel hlel awmreng pakhat chu: putarho han kawm ila, nula ngailo awm ta reng reng lo; pitar han kawm thung ila, nula thianghlim lo ni thin lekin. A eng laiah nge AIDS awm hma pawh khan thudik chu a awm?

Natna reng reng, natna khirh emaw khirh lo emaw, kan Mizo tihdan a inthawi kan bansan hnu hi chuan, mithiam leh Sap tihdan a enkawl hi kan tum ber ani ta a. AIDS pawh hi Sap/Vai natna kan ram a lo lut anih avangin, sap ho tihdan a enkawl leh do kan tum ta a. Sap tihdanin, AIDS vei reng reng chu an hming leh an thil vei chu kan zeppui ta tlat mai a ni. Zeppui tlat hi a veitu tan chuan a zahthlakna a pumpelh a, a lawmawm viau maithei.

Mahse AIDS dona kawngah chuan a tha ber lo tih hi ka ngaihdan a ni. Hmanah kan thenawm Nurse-nu, Civil-a thawk sawi ka la hriat chu. Kan thenawm nu pawh chuan zeppui an nih chuan a darh chak hi alo ring ve nasa mai a. “Civil damdawi In a AIDS hrik pai an hmuh nula pakhat hmeltha tak hmanni chu ka zu hmu a. Tlangval pakhat hi khulai kawngpuiah khuan a lo ‘bem’ a, an pahnih chuan Taxi-ah an kalbo ta a. Kha tlangval kha chu a ngaihtuahawm ngawt mai” a ti.

‘Hnam fing zawk Sap tihdan ani e’ tiin AIDS veite kan zeppui ve ringawt a, Sap angin kan nundan leh thil ngaihtuahdan ala puitling ve leh si lova. ‘Natna tihdam theihloh AIDS ka vei ani’ tih inhriat hnu-a mahni inkiltawih leh inpuanzar tum ta lovin, a tam thei ang ber kaitirve leh thihpuive kan tum ta emaw ni tih tlaka khawsa te kan awm tak hi! Kan awmzui dan hi chu, natna zeppui tlak kan ni lo ngawt thin mai. Kan ram a ‘result’ kan hmuh tak chu AIDS vei an tam tawh khawp mai a, an pung chak khawp mai bawk. Hetiang zel a pung chak leh khuahkhirh loh anih chuan, Africa ram thenkhat anga hnam pumpui ralna kan hlat vak lovang.

Tun a kan AIDS do dan hi ngaihtuah chian leh ngai ka ti. A sawi te pawh sawiho leh ta ila. Tun dinhmunah chuan kan raldo hi kan hneh tlat lo tih hi i pawm ngam ang u khai. Sap tihdan a kan inzeppui naah hian hlawhtlin ni hmel kan hmu lovang tih pawh a hlauhawm e.A reng reng thuah Mizote hian hmel hmuh loh ral kan do ngai em ni le? Ram fingte chuan an hmel hmuh ngai loh doin an hman hlel a, CIA leh KGB indona te hi chuan kum tamtak a awh tawh a. Khatiang hmelhriat loh do kha Zopain kan thiam ve tak tak lo.

Khua leh Vengah vanduaina tawk an lo awm a, mitin leh intinin kan hre thin angin; AIDS chu hmuhchhuah alo nih veleh kan pholang law law anih loh pawhin, I zep hranpa tawh lo mai ang u. A veitu kan deusawhna tur ni loin, a veiloten fimkhur dan kan thiam theih nan ni zawk rawh se. A veitute erawh kan khawngaih leh kan lainat kha kan tihtur, kan ‘duty’ a ni. Tanpuina pawh tun aia mimal leh sorkar ang pawha kan uar a tha. Heihi YMA kan nih avang te, Mizo tlawmngaihna vawngtu kan nih avang tein a ni phawt a.

Krista zuitu kan ni a, Krista hmangaihnain Aids veite a huam zawh em em avang tein, kan hmangaih ve ngei tur ani ber zawk. AIDS veitute chunga hmangaihna kan lantir laiin, an natna hlauhawm tak pai hi a taidarh erawh i phal hauh lovang u “lentupui kai vel leh romei chhumin a bawm kan Zoram mawi leh duhawm hi AIDS lakah pawh kan chhanhim theiin ka ring tlat a ni.

(Ka room dustbin-a ka thil chhar ka rawn post ve pawp, chhuah chhawn phal ani lo :P :D)

Similar Posts:

• Thosi leh AIDS
• AIDS tak hi chu aw….
• Mizoram leh HIV/AIDS
• Mizoram AIDS dinhmun
• HIV Hrik Pai te Thinhrikna Hi

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Saturday, August 28th, 2010 at 4:45 pm and is filed under Health, Information. You can follow any responses to this entry through the RSS 2.0 feed. You can leave a response, or trackback from your own site.