Dt.1.3.2010 khan Durtlang Hospital Intensive Care Unit ah ka nau, ka chhang chiah (mipa) a boral a. Amah hi khawtlang thila inhmang peih tak leh mi khawngaih thei tak a ni a. A damloh trantirh hian 135kgs a rit a ni a. A hriselnain a tuar ang tih hlau hian in check up fo tur hian a laina hnai apiang hian thurawn an pe thrin a. “ka thra e” a ti tlat zel a. Mahse 2009 kum laihawl vel atrang khan a hriselna a tlahniam a. 1st March 2010 chuan a Vital organ zawng zawng thra ta lo in min kalsan chu a lo ngai ta a.
Hospital atranga a ruang an lak chhuah dawn chuan Sister (ICU a duty) chuan ka u hnenah”Ka pu, I nau kan enkawlnaah hian Duty te`n kan tihawmtak tihloh kan nei em.?In mittlunlohna kan neih chuan hreh miahlovin sawi la, kan insiamthrat theihnan.”a ti a. Ka U chuan tlinlohna sawi tur a hriatloh thu sawinn Lawmthu a hrilh hnuah ka nau,kan lainat ngawih ngawih ruangdai chu Vaivuta kir turin kan phur chhuak ta a.
A thlan nghah tuk zaikhawmnaah chuan Bangkil a thru, Nu berhve te hi zah avanga khur zawih zawih hian a lo ding chhuak a,”Mi hmaah hian thu ka la sawi ngai lova,mahse vawiinah hian ka din ve a,Pu Sanga min tihdan hi ka sawiloh chuan ka damchhungin ka rilru a nuam dawn lova”a rawn ti reuh a. Amah hi kumhnih liam ta a lo pem lut a ni a. Hmeithaiin a fapa nen khawsa an ni. Meihawl rawh a eizawng a ni a. An hnathawk haw hi ka nau chuan a lo nghak khawm a, Motor chuanman awm lovin a lo phur haw thrin a lo ni a.
“Nikhat chu mipa naupang pahnih kum 10 rual awm vel hian Truaitrit rah hi an lo zuar a, Ramhnuai thei, tui vak pawh a ni si lova, Pu Sanga chu a ding a.`Mama inhralh thei nang e` a ti a. Naupang upa zawk te chuan,`Ka pu tuman an lei duhlo, a tui loh loh nen, an ti zel a`, a ti a. Pu Sanga chuan a zawt thui deuh a, an Nu a dam lova, tlai chaw chhum tur an nei lo va, an unau te chuan ramah kalin an thei hmuh chhun chu an lo va. Buhfai lei nan an ti a lo ni a.Buhfai a leisak a, an thei zawrh chu an chhiarna angin a lei bawk a,Sangha tin leh chhang a leisak bawk a.
Chumi tlai chuan lawm avangin ngawi rengin a motor hnungah chuan ka Mittui a tla zawih zawih a” tih thu hi hnuk ulh treuhin a rawn sawi a. Keini a unaute tan chuan khang aia min hnemna thu kha a awmlo hial awm e.
Tichuan mahni awmna lam pana hawn darh a lo hun a..Kan chhungkua chuan “Inthlahna hunserh hnuhnung kan hmang a. Ka u lo ding chuan,” ka nau ruang kan lak chhuah dawn a ICU a Duty Sister thusawi khan ka thinlung a hneh a, Kan zavaia kan nau kan sunnaah hian he thu hi hawn threuh ila, Ka unaute emaw,ka nupui pasalte,ka fa te, midangte chungah hian -KA TIH AWMTAK TIHLOH KA NEI EM, tih hi hre fo turin ka chah duh che u a ni..” a ti a. Tichuan “Khuahmunah Leng ila rual kimin, awmhar Lunglen hi bang tak ang maw, a nilo,Rualkimin Lunglen a bang chuang lo,Trah a bang chuang lo.” ti chungin mahni awmna lam panin kan invai liam ta a.
Similar Posts:
- Breaking News: Tui tla zawngtu tuiah a tlahlum ve leh
- Ka thiannu kha…!!
- R.V ah Kan zu an man
- Thluak chhaih!!!
- BEIDAWNG SUH
August 30th, 2010 at 7:36 am
A tha hle mai… !
Mahni inteh hi chuan inteh thinloh hi a har viau a, midangte hnen atanga min hmuh/thlir dan hi chhut fo a tul reng a ni.
Report this comment
August 30th, 2010 at 7:52 am
Ka liam hnuah pawh ‘mi retheite khawngaih thei tak a ni’ ti hian miten min hre reng se tih hi ka duhdan a ni ve thin a, theihtawp pawh ka chhuah ve a, mahse mi khawsa thei deuh nih a lo ngai hle niin ka hria.Bekang fun Rs 10 man Rs 20 a lei sak, i nau puak rum pum lei sak nan tia Rs 20/10 pek tih vel mai2 lo chu ka tlin ve si lo.
Report this comment
August 30th, 2010 at 7:52 am
A va ropui tak em midangte tan malsawmna ni te hi chu ka ngaisang lutuk ringawt.
‘Mi khawngaih thei tak chu an eng a thawl e khawngaih an la hlawh dawn si a(matt 5:7)’
Report this comment
August 30th, 2010 at 7:59 am
Keini damdawiin ve nen chuan adang deuh anih chu. Keichu ka nupui boral khan lungawi lohna tamtak tunthlengin ka la nei tun.. Mahse sawichhuah tawhloh hram ka tum tawh
Report this comment
August 30th, 2010 at 8:01 am
I nau chu ava’n khawngaihthlakawm ve aw!! Mite tana Malsawmna a lo nih fo tawhna chu a fakawmin a entawntlak hle mai, kan tana harsa vak silo pawh hi mite tan chuan hriatrengtlak hi a lo ni thei reng asin tih hi hriat fo a tha reng ani.
Report this comment
August 30th, 2010 at 8:04 am
Post tha hle mai a. Tukin chu rilru i rawn ti thar leh a, lawmawm hle mai.
Report this comment
August 30th, 2010 at 8:05 am
Sap hovin an rawn chiahpiah deuh a customer/patient care bakah public relations pawimawh zia an hria anih hmel e Durtlang Hospital ah chuan.
Civil Hospital ah ve thung chuan mithi chhung te lu sun trap te kha in bengchheng an tia an hrawk hrep thin ani lawm ni kha? Nursing care te hi a chhia ania, damlo kan kan ni te hian bed sore pan perh hlei hlui te hi ka hmu thin (nurse ho thatchhiat zia lanna chu damlo in bedsore an neih leh neih loh hi ania).
Report this comment
August 30th, 2010 at 8:25 am
Post tha tak a ni e.
Report this comment
August 30th, 2010 at 8:32 am
Ka lung a chhe tlat, :cry: ka pa minhriat chhuah tir.
Ka pa pawh kha thilzuar kan ina lo lut reng rengte hi, lo leisak zel hi atum a, kan nei ngang thin silo. Kan lei theih loh chhante hi tu tihpawh hriat mang hleih loh bulah hian a sawi leh vak thin a.
Report this comment
August 30th, 2010 at 8:34 am
He khawvela hnuhma ngaihnawm tak tak hnutchhiahtute zingah i nau chu a tel ve ta a nih chu. A chanchin a ngaihnawm hle mai.
“Tih awm tak tih loh ka nei em?” Zawhna ril tak a ni. Kei ka chhanna chu: Nei teuh mai. ‘Nei lo’ tia chhang thei turin tan lak a va ngai nasa em!
Report this comment
August 30th, 2010 at 8:38 am
@^-||RaLtE||-^, i blog ah thil zawh duh che ka nei a nia
Report this comment
August 30th, 2010 at 8:39 am
#11 @sisen: go on…
Report this comment
August 30th, 2010 at 8:48 am
A van ngaihnawm ve aw! I nau chu entawn tlak hle ani, i post tha e!
Report this comment
August 30th, 2010 at 8:51 am
Ka tih awm tak tih loh ka nei tam hle, insiam thatna tur hi a ka va ngah tak em.
Report this comment
August 30th, 2010 at 9:04 am
A bik takin Durtlang ICU khi chu a to bawk a,Nurse Duty Pali/panga vel hi chhun zan zawmin mu miah lo in an tluan thak a,an polite em em bawk a.Hmuh leh biak an nuam sarh reng mai a ni.Mi lian leh mite an thliar awm ka hre lo va.Thla thum trep kan awm chhung khan Mitthi chhungte an thlahliam danah an fakawm hle in ka hria.
Report this comment
August 30th, 2010 at 9:10 am
“…thu chauhin i hmangaih suh ang u khai, lei chauhin i hmangaih hek suh ang u. Thiltih leh tih takzetin ni zawk rawh se” Thiltiha hmangaihna lantir hi a Pathian thu a, a ropuiin mite thinlungah hna a thawk thin. I nau thiltih dan hian mi a hneh khawp mai. He khawvelah hian hetiang ang mite an lo awm leh phoh thin hi mi chanhaite malsawmna a ni. Ropui ka ti, Lal Isua zia a ni si a.
Report this comment
August 30th, 2010 at 9:12 am
He zawhna hi a ril hle mai. Hetiang ang nurse mizo in kan nei hi a va vanneihthlak em. He zawhna hi a theih chen chen chu ka nunah sengluh kan tum teh ang.
Report this comment
August 30th, 2010 at 9:27 am
@ 4 Cyberthug : Ka lainat hle mai che.”Dar lehlam sahthlang ang” tluk a na i tawrh mek laia Natna tizualtu dang i pai chu..”Khuarei hian min la hnem ve MAHNA” tih a ni chauh si..Hnem ngei ngei dawn, tih a ni si lo.Pathianin awmpui che se la ka duh takzet a ni.
Report this comment
August 30th, 2010 at 9:58 am
“Heng mi te ber chunga in tih chu ka chunga ti inni” sawitu chuan a lo welcome dawn ani.
Report this comment
August 30th, 2010 at 10:14 am
Naute,i thil rawn post chu chhiar ava han nuam em em ve le.Hnuk te I ti ulh dawn a lawm le,i nau ang mize pu hi kan mamawh tak zet ani,ava han uihawm em.
Tin,Durtlang damdawiin,chu an va han ti tha tak ve mawle,rilru damna hi a hlu reng ani.
He post hian mi hneh hle mai!
Report this comment
August 30th, 2010 at 10:32 am
ka nau kan lainat ngawih ngawih ruangdai chu vaivuta kir leh turin kan phurchhuak ta. A thu a va nalh ve le
Report this comment
August 30th, 2010 at 10:54 am
In comment te avangin lawmthu ka sawi e
Report this comment
August 30th, 2010 at 12:06 pm
E khai he post zet chu zirtur, zirtir, hriat tur leh ngaihgtuah zui tur a van tam em! A tha hle tia han coment chi nge ni ang a hlu hle mai tia coment zawk tur le…
Report this comment
August 30th, 2010 at 1:05 pm
Kei zawng hetiang kawngah hian ka va nep ngai em…Ka chhiar a, ka ngaihtuah chian poh leh zir tur ka ngah tawlh tawlh mai. naute, i nau chu ka va ui em…midang tana malsawmna ni zel turin a dam lai nunte la chhiar thei se ka va ti ngai em. Mahse nunna chungah hian thu kan thei silo, chu mai bakah mi fel leh thate hi a dam rei lo mi an ni chawk leh nghal.
Report this comment
August 30th, 2010 at 5:56 pm
Khai he post hi chu Hnam Bo zia ani miah lo mai ka ti, ka lo chhiar hmaih mai mai lehnghal. Hetiang ang tawrhna phena lawmna ang hi mi hriat miah loha a thamral hi a hlauhawm. mi entawn tlak chuan entawntlak enkawltu a hmu, a enkawl te’n lawmthu an la sawi zui.
Zirtur ka va ngah em kei misual hian he post atang hian
Report this comment
August 30th, 2010 at 6:17 pm
“Ka pu, I nau kan enkawlnaah hian Duty te`n kan tihawmtak tihloh kan nei em.?In mittlunlohna kan neih chuan hreh miahlovin sawi la, kan insiamthrat theihnan”
a va han mawi em!
Report this comment
August 30th, 2010 at 6:21 pm
Thanks again for your sweet comments.It makes me feel better.
Report this comment
August 30th, 2010 at 6:22 pm
@kkguite: Kei paw’n kha lai tê kha mawi ka ti khawp asin.
“Ka pu, I nau kan enkawlnaah hian Duty te`n kan tihawmtak tihloh kan nei em.?In mittlunlohna kan neih chuan hreh miahlovin sawi la, kan insiamthrat theihnan”
Report this comment
August 30th, 2010 at 6:42 pm
naute, a hmasain a THUPUI khi– “Ka tih awmtak tihloh ka nei em.” (.) ai-ah (?) dah la ka ti. Tin, he inchhiattawh ‘Thu tawitè’ hian ngaihtuah ava ti thui tehlul em! Mahse, keimah-ah chuan- “Ka tih awmtak tih loh ka nei em?” tih thu aimah-in, “Ka tih loh tawp tur tih ka nei em?” tih thu hian tunlai chu min hneh zawk mah. Ka tih loh tur ka lo tih avanga keimah mai nilo, ka thlah kal zel te’n an tawrh phah theih hialna tur ‘Thil sual’ ka lo tih thinte kha— Hmmm… Dawn a ti sei lua e! :cry:
Report this comment
August 30th, 2010 at 6:50 pm
@ 29 Sir Kawlhawk : I sawi dik thei ee..Mahse he post ah hi chuan a sawitute sawidan dik chiah a ka rawn post ve ngei a ngai sia..”Ka tihloh tawp tur tih ka nei em” tiin han post leh teh.Kawl ni miah lova “HAWK” pawh khan min khawih teh asin..”Min kick tawp” ti ila a dik zawk ang ka ring..
Report this comment
August 30th, 2010 at 7:48 pm
naute, ‘Sir’ min ti maw? Min va ti zak ve le! Ka ngaihdan mai mai ka rawn sawi anih khi. Keini ang dúang, íak tam satliah thu/hla hian mi a dèk thin anih ngai chuan, he, i nau boral thu hian mi thinlung a hawlh zâwk ngei ang. Ni e, Post thar kan la ngaihtuah ang chu! :lol:
Report this comment
August 30th, 2010 at 8:47 pm
a va han ril em…pu vanneihtluanga ziah lengzem sept,2008 ni ta in ka hria ‘ damchhan’ tih kha lo chhiar ve teh u, ka hrechhuak zawk mai….
1.I nau chuan a damchhan tihlawhtlingin a hun a hmang ral e. hope you will learn that ”time is not a healer,but the revealer of how God does the healing”.
2. Durtlang nurse- an fakawm thlawt e..damchhan ah an chiang e.a tluk a awm lo. In enfiah tur ka va ngah tak em, ka tih tur ka lo tih loh, ka tih/sawi loh tur ka tih tak te…a rawn lang uar mai, a zahthlak e…thank you for such a spirit enriching post!!
Report this comment
August 30th, 2010 at 9:35 pm
Kan tih tur tih loh kan ngah hle ang. Chutih rualin kan tih loh tur tih pawh kan ngah hle bawk ang.
Thupui fun tak i rawn ziak a, chhiar a nuam hle mai, mi a khawih dan a dang zar mai. Mi puitling chin awmkhawm kan ni a, kan nitin hnaah inen fiahna darthlalang thatak a nih ngei ka beisei.
Tin, tlaikhawhnuah, in chhungkaw lusunnaah a thu in ka rawn ral a che.
Ka lawm e.
…khrum
Report this comment
August 30th, 2010 at 10:23 pm
Kan tawngkam chhuak ho te emaw kan tihte hi midang tan a ho lo tih min hriatchhuah tir hle mai…
High Five
Report this comment
August 30th, 2010 at 11:40 pm
“ka tih awm tak tihloh ka nei em” han tih chuan ngaihtuahna a va ti kal thui duh ve..
Report this comment
September 6th, 2010 at 7:16 pm
A va ril! Tih sual leh tih loh sual te chenin a awm thei a … inbih chian nan a tha reuh zek mai!
Report this comment
May 13th, 2012 at 11:04 pm
Tunah ka chhiar ve chiah……….
Report this comment
May 13th, 2012 at 11:47 pm
He Post hi Silent Reader Regu tak ka nih thin lai khan ka chhiar tawh a tha ka ti khawp mai.(2011 April thla vel atang chauh khan ka comment tan a).
Report this comment