comments closed as per request of topic author
(Evening post 9th September, 2010-a chhuak a ni)
Pu Lalhmingthanga,
August 23, 2010-a i Open Letter to K. Laldinthara ah khan ka chungchang diklo taka i ziah avangin thu dik tarlan a ngai a, hreh tak chungin ka han chhang che a ni. Rilru a pawmdan leh ngaihdan awmsa (pre-judged idea) nei lova ka thu han sawi te hi ngun taka lo ngaihtuah tur leh “a dik chu dik, diklo chu diklo” ti ngam turin ka han sawm nghal bawk che a ni.
A hmasa berah chuan Pu Laldinthara open letter kha Pu Vanhela hnena thawn ani a, a thu ziah atang kha chuan Pu Vanhela mimal leh Chief Secretary a nihna nena inkaihhnawih deuh vek niin a lang si a, aman rawn chhang ta lo a, nangin i rawn chhang daih mai kha thil kalphung pangngai chu a ni lo phawt mai a. Chief Secretary a nihna thu a sawi fiah ngai a awm a nih pawhin aman a sawi fiah turah kei chuan ka ngai a, anih loh vek pawhin Information Department lam Public Relations Officer-in emaw an hrilhfiah tur niawm tak a a lan laia nang ilo penchhuak ta mai hi thil hriatthiam har tak chu a ni ve hrim hrim – nge, Pu Vanhela hian a aia thusawi turin ‘authorization’ a pe che ni ang tih thlengin a ngaihtuah theih a ni.
Pu Laldinthara a open letter-ah khan ka hming vawi khat a lang ve zauh a, chu pawh Pu Vanhela’n Mizoram a service chhunga state pawna kum hnih emaw chauh state pawna experience a neih chu Chief Secretary meuh ni tur atan chuan a duhkhawp lo deuh tih a sawi naah AGMUT IAS Mizo dang Pi L Tochhawng leh Pu Lalmalsawma te nen chuan kan service tawh zahve aia tam leh a zahve dawn te state dang leh central lama hun lo hmang tawh kan nih thu a sawi a; state lian zawk leh central lama experience lo ngah tawh na na na chu Zorama-a an lo kir pawhin an chawrnahawm lehzual ang tih a rin thu a sawi a ni. Keini kan tha min ti bik a, min fak pawh a ni lo.
Pu Laldinthara ngaihdan hi a dikah i pawm a ni ang tih theih turin khami chungchang kha eng mah i rawn sawifiah lo a, dawtin keimah min mal beih zui ta ringawt a ni ber. Mahse, Zoram mipuiin dawta min beihna ringawt an hriat a, thudik an hriat loh hi kei chuan ka ngaigam lo a, ka phal bawk lo a ni.
I Open Letter-ah khan Home Ministry Deputy Secretary pakhatin May 20, 2004-a Mizoram sorkar lehkha a rawn thawn thu i ziak a, Additional Secretary Grade-a kaisang tura ‘unfit’ (tlak lo) tih a awm thu sawiin, chumi awmzia chu State-ah Chief Secretary atan pawh tlak lo tihna a ni, i rawn ti a. Hei hi thudik chanve leh rinthu belhchhahna mai a ni tih ka sawilang duh a ni. Pu Vanhela Additional Secretary grade pek a nih hnu deuh khan meeting pawimawh a Delhi ka kalin keima chungchang ka zawt fiah a, Home Ministry ami te chuan ka ACR tlem a kimloh avangin Additional Secretary payscale min pek theih rih loh thu min lo hrilh a. Tichuan Aizawla ka kir veleh khatih laia Chief Secretary Pu H.V. Lalringa ka sawippui nghal a, ani chuan keima case ang deuh a Pu Vanhela hnena officer ten ACR ngaih pawimawh a tul thu a lo hrilh tawh thu leh amah Vanhela ngei pawh a ACR kimlo siam kim tura a lo buaipui thu te min hrilh a, keima ACR kimlo te pawh chu min tih fel sak in Ministry ah min thawn sak nghal a, chumi hnu rei vak lovah Additional Secretary grade pay pawh pek ka ni ve ta tho a ni. Hemi chungchang hi amah Pu Ringa pawh zawhchian theih a ni ang. Chuvangin Additional Secretary atan “unfit” (tlak lo) ti zawnga a chhe thei ang bera in sawi hi chu thil awmdan diktak haider luih tlat tumna a ang hle a ni. “Chumi awmzia chu State-ah Chief Secretary atan “unfit (tlak lo)” tihna ani” i han tih phei hi chu thu diklo hulhual, nangma duhthusam mai a ni tih i hriat ka ring. Chief Secretary appointment chungchang ngaihtuah a nih lai khan Additional Secretary grade atan “unfit” i ngaih pawimawh em em hi chinfel a ni tawh a, “thu thi” a ni tawh ani tih i hrethiamlo anih pawhin i thulakna te chuan an hrechiang viau ang.
Sorkar hna thawkte service chungchang hi thu khirhkhan leh harsa tak a ni a; Pu Vanhela Pachuau ngei pawhin Mizoram DP & AR Secretary/Commissioner a nih lai khan ‘service subject’ hi thu khirhkhan tak tak a nihzia hrechiangin, PWD leh Power Officer te hna thawh engineering subject aiin a ‘technical’ zawk, a ti thin a; heihi a dikna chen a awm a, Service thu hi a zirmi leh a khawih thanglo chuan hriat thiam mai theih pawh a ni lo reng a ni. Chinchang hre phak ni la chuan i hming chhalin vantlang hmaah tuna i sawi ang hi i sawi duhin a rinawm loh a ni.
Mizoram Sorkar Chief Secretary ka nih chhung khan appointment order nei lo leh in charge mai mai niin min sawi a; Mizo mipuite min ngai mawlin, Ministry of Home Affairs leh IAS officer-te hi min ngai ho hle niin a lang. I sawi angin Chief Secretary appointment hi Home Ministry tihtur a ni. Chutih rualin Mizoram chu State puitling a nih avangin Chief Minister rawn lo chuan Centre in thutlukna an siam mai lo ang tih hi tlang hriat a ni. Mahse, nang chuan Ministry of Home Affairs hi State pakhat Chief Secretary meuh kum thum leh a chanve lai in charge-a dah tur khawpin a inthlahdah a, Chief Secretary nih duh leh tling IAS officer dangte pawhin engmah ti lovin an thlir liam mai mai tih ngaihdan Mizo mipuite neih tir i tum a ni ber a, hetiang em ema mawl tura Mizo mipui min ngai hi a pawi ka ti hle.
Ministry of Home Affairs hi an inthlahdah lo tih a lanna chu 20th September 2005 khan Government of India, Ministry of Home Affairs chuan, Order No.14016/33/2002-UTS.I. chhuahin”, Shri Hauzel Haukhum, IAS (AGMU: 74), presently posted with the Government of Mizoram, is hereby appointed as Chief Secretary, Government of Mizoram” tih ani. He order ah hian “…appointed as in-charge Chief Secretary, Government of Mizoram” tih a tel lo. I open letter ah kha chuan Chief secretary in-charge tih thu kha a lang tam viau a nih kha. Pu K. Laldinthara open letter i thawnna ah khan, dt. 28th January 2004-a P.K. Jalali, Joint Secretary (MHA) in Mizoram Chief Secretary atana qualified mi pathum hming- Ms.Neeru Nanda, Pu Vanhel Pachuau leh Pu Chhering Targay, Pu L.C.Thanga, Secretary to Chief Minister a rawn hriattir thu te i tarlang a. He lehkha hlui, kum 2004 a thawn tawh, a thu ken pawh mi tlemte chauhin an hriat, a rawn thawntu Home Ministry pawhin an bawhzui loh leh Mizoram Sorkar file pakhat chhunga dah that mai mai pawh hriain i thurchhuak thei a, September 2005, kan State Chief Secretary appointment order, Home Ministry tihchhuah ngei i hrelo leh i hmulo thei tlat a, thudik ngaisangtu i nih a rinawm lo hle a ni. A nih loh leh 20th September 2005 order kha Chief Secretary office atang leh Mizoram DP & AR file atangin paihbo a lo ni em ni?
A hmalama ka han tarlan tak ang khian, Additional Secretary grade hmu tura ‘unfit’ nia min sawina leh Chief Secretary tura appointment pek ka nih hian inzawmna engmah a nei lova, a ruat theitu chu Home Ministry a ni a, chu thuneitu chuan i he lovin appointment order a chhuah mai ani. Chief Secretary atana ka ‘qualify’ zia a lanchianna chu Mizoram chauh pawh nilo, Home Ministry order angin Goa ah pawh Chief Secretary hna ka thawk leh bawk. India ram pumpuia IAS officer 3000- chuang zingah hian Chief Secretary hna thawk tura ruat hi a za tam an ni lova, State pahnih (2) a Chief Secretary thawk chiah phei chu sawi tur an tam lo viau ang. Chuvangin Additional Secretary atan pawh tlak lo, Sorkar hmasa duhsakna avanga Chief Secretary ni thei ang leka min chhuah hi chu chawp leh chilha finfiah theih thu diklo hulhual a ni.
Dik tak chuan he Additional Secretary grade chungchang hi Pu Lalringa’n Chief Secretary hna a chhuahsan dawn laia Chief Secretary thar appointment dawn lai vel atanga sawi lan tawh kha a ni a, kan thukhel hi a lo chian zawk nan tlem ka han thai lang ang e. Khatih lai khan Chief Secretary a ruat theih IAS pathum an awm a, pakhat chu kei ka ni a; experience te, seniority te leh a Cadre neitu (AGMUT) ka nih avang te in claim nei tha berah ka indah ve ani. Khatih lai khan Pu P.L. Thanga, keima Senior pui, Manipur Cadre pawh a rawn lang ve a, beiseina sangtak a nei ve ni pawhin alang. Nitin chanchin Aizawl Post, 4th July 2005 chhuak ah chuan “Pu P.L. Thanga chuan nikum khan Chief Minister Zoramthanga chuan Chief Secretary hna chu vawi hnih vawi thum vel chu min tiam a, phone pawhin kan inbe reng thin ani tiin The Aizawl Post a hrilh” tih a lo lang a nih kha. Khatih laia hotute khan Pu P.L. Thanga kha C.S turin an thlang ta chuanglo chu a ni a. Pu Vanhela Pachuau pawhin Chief Secretary-a dah phu niin a inngai a, a sawina tam zawkah chuan, Haukhuma aiin Additional Secretary grade pay kha ka hmu hmasa zawk a, chuvangin ka senior zawk a, Chief Secretary ah hian min dah tur a ni, a ti thin. Pu Vanhela ‘claim’ hi Sorkar hotu ten pawm tlak ah an ngai lo ni ngei tur a ni. Pu Vanhela ‘claim’ hi dik chu ni se Chief Secretary-a ruat ka nih hnuah chuan IAS-te kalphung pangngai angin ka hnuaia a awm phak lohna tur hmunah an dah ngeiin a rinawm. Tin, ani pawhin mahni aia junior-te hnuaia awm chu a duh lo ang a, zualko theihna hmun hrang hrangah zualko nachang hre ve awm a ni.
A thu hrimah IAS dan ah chuan, Seniority chu IAS tlin kum (year of allotment) ani tih ani tawp mai a, thildang “Additional Secretary grade ka lut hmasa” tih ang vel hi chu Dan bu ah hmuh tur a awm lo hrim hrim a; hei hi Pu Vanhela pawhin a hrechiang ve tho chuan ka ring! Chuvangin Pu Vanhela 1976 a IAS lut hian engtik lai mahin kei 1974-a IAS lut hi min tlankhalh thei lo a, Civil List-a kan hming hi dah anih chhung chuan ka hming hi ziah hmasak ani kumkhua tawh dawn ani. Esaua ang khan kei hian ka upat zawkna lo hralh duh mah ila a theih chuang loh! “1976 batch IAS officer hi 1974 batch officer aiin a senior zawk” tih ang te hi Centre leh State dang IAS officer te leh thil chinchang hria te chuan mak an ti reng a ni. I open letter ah khan “Pu Vanhela hi Chief Secretary atan a qualified chauh ni lovin, Secretary grade, Government of India ah 10th September 2008 khan Home Ministry in promotion order a lo tichhuak tawh a ni” tiin Pu Vanhela chungnun zawkna tarlan tumna ni awm tak a lo lang a. Ministry of Home Affairs Order No.14016/16/2007-UTS.I dt.5th January 2009 i en chuan, Government of India in 1st December 2007 atanga Secretary grade phalsak a promote ka nih thu i hmu ang. Chumi awmzia chu Central Sorkar full Secretary grade pay hi Pu Vanhela aiin thla riat leh ni sawm (8 months 10 days) in ka hmu hmasa a ni.
Central sorkar chuan Additional Secretary grade chauh ni lo full Secretary grade tura fit min tiin min kaisan tir a, Chief Secretary atabn pawh fit-ah min ngaiin State pahnihah min ruat tih chiang takin ka tarlang tawh a; Mizoram Secretariat ah ‘source’ duhthusam i nei niin a lang bawk a, Mizorama ka service kaihhnawih thudik tak hriat i duh chuan i nei thei ang tih pawh a chiangah ka ngai. Mizorama i hmuh theih lohte leh hmuh theihte pawh i duh chuan Home Ministry atangin i la chhuak thei bawk. Mahse, i duh lo a nih chuan Mizo mipuiten hnial rual loh thudik an hriatna tur leh ka zahawmna hum nan Court-a kan inhmuh a la ngai ngei ang.
“Appointment order nei lovin kum thum leh a chanve Chief Secretary in-charge in a awm a, chuvang chuan Pu Haukhum Hauzel kha mi tam takin Chief Secretary lem an tih fo thin nachhan kha ani” tiin open letter-ah khan i sawi bawk a; hei hi ka hriat dan nen chuan a inang lo deuh. 2008 election zawh tirh lai vel khan political leader tlem a zawng chuan hetiang deuh hian public ah thu an sawi niawm ani. Khang political leader te kha election campaign leh thildang buaipui tur tam tak nei an ni a, khatiang karah khan Chief Secretary appointment order en a, Chief Secretary lem tih theih ani nge ni lo tih buaipui kha an enghelh ber leh an ‘priority’ anih a rinawm lo a, hriat pawh an hriat a rinawm hek lo. Chief Secretary appointment order neilo tia dawt thu politician te va rawlruk a, Sorkar administration leh mimal sawichhiatna zawnpui tute hmalakna atanga lo irhchhuak ani tih hi a chiang hle. Chung mite chuan an duh ang leh an hisap ang ngeiin election zawh veleh mimal hamthatna an tel ta reng anih hi! Min puhna chungchang ah erawh chuan Home Ministry order ka sawi tawh atang khan he min puhna hi dawt a ni tih a chiang tawh a; thil pawi tak chu mipui aiawh leh ram hruaitu tak takte dawt hrilh mai ngam an awm thin hi a ni. Hetiang mite hian ram hruaitute nihna leh zahawmna an tihniam fo a, corruption pawh an tihluar ngei ngei a ni.
Pu Laldinthara open letter chhang nia insawi sia Pu Laldinthara’n a open letter-a a sawi i chhan leh sawifiah awmchhun chu Pu Vanhela leave lak chungchang kha a ni awm e. Chief Minister leh Sorkar hotu lian ten Mizoram Senior Officer liante Vanapa Hall a an koh khawm tum a, Pu Vanhela’n hotute thu zawm lote chu nui sang chunga hrem an ni ang tih a sawi chungchangah Pu Laldinthara khan amah (Pu Vanhela) ngei pawh hotute thu zawm lo leh Home Ministry in Pondicherry a Chief Secretary tura sawna a kal duh lo a nih thu sawiin, hetiang thu a sawi hian inthlahrunna a nei ve ang em, midang chunga hremna chelek thei a ni bik em, Bible-a Isua’n, uire denhlum tur a sawi chung chang a “sualna neilo in deng hmasa rawhse” a tihte a rilrua a lo lan thu a sawi a nih kha.
I open letter-ah khan Pu Vanhela leave dilna kha keiman phalsak lo angin i rawn sawi a, khami chungchang ah khan keima level-a thutawp ni loin Sorkar hotu luber te nena inrawna kalpui a ni. Pu Vanhela hi Mizoram atanga sawnchhuah a nih tawh avangin a chunga thutawp siam theitu chu controlling authority a ni a, chu chu AGMUT Cadre IAS-ah chuan Ministry of Home Affairs a ni a; chuvangin Mizoram sorkar chuan controlling authority atanga instruction lak chu thil nih dan tur nia hriain a rawn ta a ni. Ministry of Home Affairs chuan Pondicherry-a in-report phawt a, chumi hnua leave dil turin a ti a, chu chu zawm loh theih a ni lo. Tin, Pu Vanhela hi leave pek tur a ni, tiin Ministry of Home Affairs hian thu rawn nei ni ta se State Sorkar tan lo pek lohna tur chhan a awm lo. Pu Vanhela hi a leave dil hi pek a nih leh nih loh hre zet a, chawl rual a ni a, leave hi a mamawh a nih chuan Pondicherry-a in-report phawta dil leh hi a tana thil harsa tak a nih a rinawm loh bawk. Hmanhmawh takin Pu Vanhela release order hi tih chhuah niin i sawi a, a dik tak chuan Pu Vanhela transfer order kha September 30, 2008-ah Ministry of Home Affairs-in a tichhuak a; Mizoram sorkar chuan ni 30 chhung hun pein November 3, 2008 atangin a release chauh a ni. Hetih lai hian January 5, 2009 a Pu Vanhela Mizoram C.S tura order a chhuah tawh laia, January 20, 2009 thlenga hna ka la chelh kha mak iti a, chumi awmzia chu order chhuah tawh hnu ni 15 chhung ka la chhunzawm kha ilo helh tihna ani a. January ni 5 khan Chief Minister thar nen Delhi ah meeting pawimawh a tel turin ka kal a, a hnu ni 4/5 velah Aizawl ka kir a, chuvang chuan office thil pawimawh chinfel nan ni 10 bak ka hmang lo. Chubakah charge inpekna hun hi amah Pu Vanhela nen pawh a sawi dun hnua ruahman a ni. Dik tak chuan post pawimawh chelh te inthlakthleng naah chuan hetiang hun hman hi chu dan pangngai a ni a, lo helh vak emaw rinhlelhna mit nena lo melh ringawt hi chuan a sawiseltu rilru puthmang a hailang chiang hle zawk lo maw?
Heng atang te hian dawta min puhna te hian ka hming nasa takin a hliau ani tiih chu i hrethiam mai ang a. India rama Dan rorelna sangber Supreme Court chuan hmingthatna hi “fundamental right to life” ah hian a bet tlat a, diklo taka mihming tichhe tu chu dan anga na taka hrem theih ani, alo ti tawh a. Chumi awmzia chu hmingthatna hi nunna ang tluk thoa hlu anih avangin Sorkar leh Dan chuan a humhalh a ngai a tihna ani. Tlaklo chunga Chief Secretary –a dah nia min puhna te, Home Ministry in Chief Secretary hna thawk tura appointment order pek ni lo a min puhna te, Chief Secretary lem tia min kohna leh dawt thu danga ka hming tihchhiat i tum avangin ka hming thatna leh ka dikna humhalh nan Court ah ka zualko ve angai a, he ka thu rawn thlen hi “Legal Notice” a lo ngai turin ka han hriattir che ani. He thu chanchinbua chhuah a nih atanga ni 10 chhung ngeia Ngaihdam Dilna i siam duh leh duhloh chhanna ka hmuh loh chuan a tul ang leh dan angin hma ka la zawm ang. He hmalakna avanga Jail bang zut tur leh lei chawi tura Roreltu in Judgement a siam a nih pawhin mi rawn dem lo ang che. Ngaihdam Dilna i siam duh a nih chuan min rawn hriattir la, ka lungawi na tawka ngaihdam dil dan tur ka rawn hriattir dawn che nia.
Sd/-(HAUKHUM HAUZEL)
Bungalow No. 8-A,
Flag Staff Road, Civil Lines: Delhi – 110054
Similar Posts:
- In lo hriat ve duh tak in – Ngaihdam dilna
- Chief Secretary-ah Vanhela Pachuau
- Vanhela Pachuau – appointed for Pondy CS
- Mizoram DGP atan Pu Lalrokhuma Pachuau IPS
- AGMUT Cadre IAS te bihchianna
