He khawvêl ram zau taka chêng mihringte nunah hian beidawnna piah lama beidawnna vâwrtâwp a la awm a nih ngai chuan chu mi neitute zînga chhiar theih ka ni ngei ang. Ka nei mai ni lovin nitin kan inkawp a, ka hringnunah hian hrui lovin a uai bet tlat zâwk a ni. Midangte tâna hlimna thlentu ni si khân keimahah beidawnna a thlen tlat a, chu chu a lo chawr no va, a lo thanglian zêl a, rah a chhuah ta hial a; chu mai ni lovin a puakkeh ta hial a!
He thil hi ka tâna lo awm niin ka hria a; hlimna hi ka tân chuan hmêlma a ni a, khawngaihna leh lainatnate chu ka rilru leh taksa hian a dawng pha lo va, a beisei pha hek lo. A ngaihtuah ringawt pawh ka inthiam lo thei hial thîn a ni.
Mi zawng zawngin min ensan a, min tlânsan ta! Midang hlim nui ri hi ka tân ânchhia a ni a, lâwmna thu kengtu chu ânchhe min lawhtu mai a ni a, a hla te chu ka tâna phuah a ni ve lo. Lungngaihnain min chênchilh reng a, hrehawmnate chuan min hual vêlin retheihna leh mangannate chuan min khawngaih ta zâwk a!
Ka tân chuan chhûn hi zân ang maia thim a ni a, zân pawh hi chhûn ang maia nunrâwng a ni. Midangte tâna mawi taka chhuak thîn ‘ni’ hi sahuai ang maiin ka do tlat a, a tla tur hi lungngai takin ka thlîr liam hrâm thîn.
Vânneihna an tih hi ka chungah a tla ve thei lo va, chutih laiin vânduaina erawh chu a hlâwm hlâwmin a rawn thleng a; ka beiseina êng de vê vê chu a rawn hliah ta vek a. Vânduaina hruia phuar behin ka awm a, lungngaihna hlîngin min chhun a, ka buai zo ta!
Ka zin kawngah hian thihna hian min hnaih reng a, zân mang tha lo tak ang maiin hlauhthâwnna leh râltitnate chuan min hual vêl reng a. Chu chuan min tichi-aiin inthununna thumal ka theihnghilh lek lek thîn. Nun hlimna hi ka tân chuan mumang ram mai a ni a, nun hahchawlhna hi thihnaah chauh awmin ka hria a, ka chhia leh tha hriatna hian chu lam chu pan turin min tur ut ut reng thîn.
Khawvêl mihring tam takte zîngah khawhar takin ka chêng a, ka mal ngawih ngawih a, khawvêl hi ka tâna siam a ni mawlh lo. Beiseina chhetè nen khawvêl thar ka thlîr nitin a, ka nghâk a, ka zawng vêl ruai thîn. Min pui turin mi dik ka zawng a, ka hmuh chhunte chuan min hlimsanin min lâwmsan a, ka tân an luangliam mawlh lo.
Kan lei inher hian hlawhchhamna bâk a rawn herchhuahpui ngai lo va, mite tâna hlimna leh lâwmna thlen thîntu khân thihna chauh min thlen dâwn a nih hi ka ti rilru hial thîn. Hmangaihna an tih hi tlêm tal chu he thinlung thlalêr ramro lutuk leih hnawng turin dawn ka châk hliah hliah thîn a ni.
Mitena hlim taka suangtuahna nena duhthu an sâm thin angin kei chuan ka sâm ve thiam lo va, mahni inkhawngaihnaa bul tanin thihnaah bawk ka tâwp leh thîn. Thinlung luangliamte hian an lâwmna tlêm tal chu ka tân an chhuah ve phal lo niin ka hre tlat a, chu chuan beidawnna atâ beidawn lehzualnaah min hruai leh thîn.
Ka thinlung hi chhûm angin a zîng a, ka beiseina chu rial angin a dai a, ka ngaihtuahna chu meialhin a kângral ta! Hêng thilte hian ka lei taksa awngrawp tak hi an tichuai zo ta a, hmangaihna te, lainatna te, khawngaihna te, hlimna leh lâwmna te, lungawina te, beiseina leh hlawhtlinnaten an tlawhpawh ve ngai loh taksa chu beidawnna ruam paltlangin lungngaihna chirhdûpah a tla lût a, a tâng hlen ta! Tap chungin ka lo piang a, tapin ka seilian a, tapin ka nung a, tap chungin ka hringnun hi an vui liam dâwn ta!
(He thu ka ziah kum, 2008 vêl kha chuan ka nun kha a va beidawng thin tak êm! Ramhlun North YMA chanchinbu ‘MARYMA’-ah tihchhuah a ni tawh.)
September 22nd, 2010 at 9:18 am
suicide helpline a awm lom ni?
Report this comment
September 22nd, 2010 at 9:32 am
He khawvelah hi chuan beidawn duh bik loh tur. A êng zâwnga thil hi thlîr zel mai tur.. Khawvel a nih hi khawvel.
Report this comment
September 22nd, 2010 at 9:35 am
Lo beidawng tawh reng reng suh
i tan khuavel a parvul a lawm
Report this comment
September 22nd, 2010 at 9:35 am
Kan neih aia kan neih loh kan focus chhung chuan kan lungawi thei lo. Mi dinhmun hnuai zawka awmte han en char char la, “Mi vannei ka va ni tak em!” ti ang che.
Report this comment
September 22nd, 2010 at 9:58 am
Mr. TSA: Ka lung te pawh i tichhe lek lek mai. Shakespeare-a sawi he thu hi a dik ka tih chang a tam ve thin, “When sorrows come, they come not single spies.
But in battalions!” tih hi.
@4: I comment hi a tha ka ti hle mai.
Report this comment
September 22nd, 2010 at 10:15 am
Mi nun beidawng te hi an khawngaih thlak thlawt!!!Kan nun hi a chhe viau emaw tih hian kan aia nun chhia leh khirhkhan zawk tuar te hi han thlir ila, kan vanneih zia hi kan hre chhuak chawk thin a nia,
Report this comment
September 22nd, 2010 at 10:19 am
Tha hle mai..tunlai ka rilru nen in ang khawp mai a….
Report this comment
September 22nd, 2010 at 10:38 am
Beidawnna hi setana thlemna hlauhawm ber a ni.
Sony@ i comment thu hi a va’n tha tak em!!
Report this comment
September 22nd, 2010 at 10:43 am
‘Kristian Vanram Kawngzawh’ bu kan hriat chhuah zawk chu a. ‘Milian Beidawnga’ nih loh hram a tha e… :lol:
Report this comment
September 22nd, 2010 at 10:55 am
Hlimna hi kan nitin nun thil ho te te ah hian hmuh tur a awm reng a, mahse kan hmu thiam lo fo thin.
Tuia tla hlum te hi tui a an tlak vanga thi an ni lova, tuia an pil reng vanga thi an ni.
Vanduaina hi a mal malin a rawn thleng lova, a huhova rawn thlen tup tup a hrat thin, vanduai bika inhriat maite a awl ta thin a. I vanduai lungngaih lai chuan tuar rawh, tap hawm hawm rawh. Mahse i khum laizawl thlentir lo la, i thinlung bupui ah hmun khuar tir phal hauh suh ang che. I hringnun hi a thim zawng ni lovin a eng zawngin thlir tlat tum la. Lungngaih lutuk vangin eng thil tha lo mah a insiam that phah lo tih hi i vawng tlat dawn nia.
Report this comment
September 22nd, 2010 at 11:14 am
I ziah hun laia i nun chu a hrehawm ngawt ang. Mahse, tunah chuan i paltlang ta ni ah ka ngai, ka lawmpui a che.
Chutihlai chuan, khatih laia i thil hmuh dan leh thlir dan khan, tuna i nun hman mekah nghawng tlem neiin, thinlet chang che a neih ka ring a. Lal Isua chakna leh thil a eng zawnga thlir tum hram zelnain i hneh thei zel ang tih erawh theihnghilh suh.
Pathianin A hruai zel ang che.
Report this comment
September 22nd, 2010 at 11:23 am
Mr. TSA hi thu leh hla lamah hian i tui viau ni tur a ni, nitin mai hian i post pahnih/thum vel hi hmuh tur a awm ziah mai a. Thumbs up!
Report this comment
September 22nd, 2010 at 12:49 pm
Ka lawm e. Khi thu ka ziah lai vel khan depression ka nei thin a, ka nun a beidawng thei khawp mai. Mahse, Pathian-in min kalsan lo va, puitu nei lo emaw kan intih laiin Pathian chakna ringin a talchhuah theih a ni.
Kan zinga heti ang mi kan lo awm ve a nih chuan beidawng mai lovin Pathian rinchhanin a chhuah theih a ni tih hriat nan, he thuziak hi hmang thei hlauh ila ka ti hle mai.
Report this comment
September 22nd, 2010 at 2:16 pm
TSA chu, kawlhawk i khum deuh tlat, aaj kaal me!
Report this comment
September 22nd, 2010 at 3:11 pm
@TSA i ziak tha hle mai.. Tunlai ka nun nen inmil tak a ni.. Keipwh a chang cuan mak ka in ti thin. Ka thil tih hrim hrim ah hian tluang lo riau a inhriatna k nei thin.
Report this comment
September 22nd, 2010 at 6:08 pm
He thu chuan he prayer hi mi ti hre chhuak: “Lord, I have more bills than money, but Thank you for my home, car, food, family and friends, the life i’m living is full of trials and tribulations, but Thank you for not putting more on me than I can bear”.
Kan nunah hian hlimlohna tur hlir chuauh kan focus chuan a harsa thin, mahse Malsawmna kan dawn tam tak hi chhut ila, zinga dam taka kan han tho ringawt pawh hi a va ropui em!
Report this comment
September 22nd, 2010 at 6:30 pm
Mr TS, nia beidawnna hi chu a va hrehawm tak em tiraw. Mahse beidawnna tawp kan tawrh lai pawh hian Pathian lam hi hnaih tlat ila ani chuan min hnem thei asin. Kei pawh tunlai chu beidawnna hlirin ka nun ka hmang ve thin tho alawm. Mi te aia chan chhe zawk leh vanduai zawk a inngaih chang te pawh ka nei thin, midangte hlawhtlinna kara hlawhchham bik awmchhun ni hial tein ka inngai thin asin.
Mahse Pathian hian beidawnna tawp kan tawh lai pawhin kan tlukchhiat mai hi a lo phal lo a ni ang tun thlengin a kutin min la chelh ding hram hram asin.
“Falling down is not defeat, defeat is when you refused to get up”
A hnuaia thu hi lo chhiar ve chhin teh, he khawvelah hian kan vanduai bik lo asin -
God, Forgive Me When I Whine
by: Author Unknown
Today, upon a bus,
I saw a girl with golden hair.
I envied her, she seemed so gay,
And I wished I was as fair.
When suddenly she rose to leave,
I saw her hobble down the aisle.
She had one leg and used a crutch.
But as she passed, she gave a smile.
Oh, God, forgive me when I whine.
I have 2 legs, the world is mine.
I stopped to buy some candy.
The lad who sold it had such charm.
I talked with him, he seemed so glad.
If I were late, it’d do no harm.
And as I left, he said to me,
“I thank you, you’ve been so kind.
It’s nice to talk with folks like you.
You see,” he said, “I’m blind.”
Oh, God, forgive me when I whine.
I have 2 eyes, the world is mine.
Later while walking down the street,
I saw a child with eyes of blue.
He stood and watched the others play.
He seemed not to know what to do.
I stopped a moment and then I said,
“Why don’t you join the others dear?”
He looked ahead without a word.
And then I knew he couldn’t hear.
Oh, God, forgive me when I whine.
I have 2 ears, the world is mine.
With feet to take me where I’d go.
With eyes to see the sunset’s glow.
With ears to hear what I’d know.
Oh, God, forgive me when I whine
I’ve been blessed indeed, the world is mine.
Report this comment
September 22nd, 2010 at 6:40 pm
i va khongaih thlak ve chutiang te a i lo awm…….lo.awm toh reng suh. i duh2 danin tal la a tha ni mai, ka lo support reng ang che hahahaha……..
Report this comment
September 23rd, 2010 at 12:00 am
Ka chhiar, ka hnuk a ti ulh tlat. Hrehawmna kan chunga thlen chang chuan tuar a har thin, mahni in khawngaihna nen. Mahse maw.. kan tuar ai na hi mi pawn an lo tuar ve tawh thin a, will power kan neih hi pawimawh takzet e.
Ka lawmpui che.
Report this comment