mi(sual).com

Govt’ Aizawl College Magazine 2008-2009 ‘Dole Rich’-a Best Article ka lo lâkpui vena. 50%-in ka kaitawi!

Nuih ka tum, ka ṭhen ve suk a, mahse thinlung erawh a ngui si. Khawhar inah ka kal a, tuarpui âwm taka mittui tihtlâk ve ngial ka tum pawhin nuih a za leh tlat ṭhin. Tlai ni tla tûr thlîr chunga zâninah zet chuan ‘Bawihte, ka hmangaih che’ ka ti ve tawh ngei ngei ang ka tih pawhin a saseh tak takah chuan kha hi a chih tlat a, kan se bo hawi leh mai mai ṭhin.

Tlai lam chanchin tharah chuan ‘chutah/khatah bomb a puak; thlawhna hijack a ni; lawng suamhmang ten lawng lian an hruai kawi; terrorist-ten Hotel an luhchilh, ruang chhar, pawngsual, tui tla hlum, in kàng…’ tih hlir mai kan ngaithla a. Chanchin thar pawh chu thihna, lungngaihna, ṭahna, nupa ṭâng ṭhenna, fahrah ti tamtu leh ramtui lei lova min siamtu hlîr a ni ta! Heti ang reng chuan chanchin thar pawh hi kum 18 hnuai lam tâna ngaihthlâk phal loh mai chi te pawh a la ni ta ve ang.

Khawvêl mum pul mai hian mihring nunna eng zât tak lem pil tawh ang maw? Kum 70 chu kan dam hun chhûng tûr a ni, chakna avangin kum 80 pawh a ni thei e. Chu mi chhûng chuan vawi tam tak Hremhmun leh Vanram kan chên hman a ni. Mi, a nun a hlim miau chuan a awmna hmun chu atân Vanram a ni a. Kan nunin hlimni hmêl a hmuh loh chuan khawi hmunah pawh awm ila, kan tân hremhmun a chang tho tho ṭhin.

Midangte tâna kan nun hian kan tha leh zung a hek pawh a ni thei e, mahse hlimna kan hlawh chhuah chu he khawvêla a vâwr tâwp a ni. Hmasialna leh duhamna chuan Seol kotlâng min hruai thleng ṭhin. Khawvêl sum tam tak pawhin a lei theih loh mi tin hian kan nei a, chu chu ‘Seih’ hi a ni. Chu thil chuan inhauna pawh a hnehin hmangaihnaah a chantîr ṭhin.

Khawvêlah hian mihausa an awm a, rethei berh chip chep an awm bawk. Mi fing an awm a, mi â an awm bawk. An kârah chuan kak zau tak a awm ṭhin. Mi hausa chu a vanneih vâng em ni? Mi rethei chu a vanduai vâng em ni? Vanneihna kan tih pawh hi hlawhchhuah a la ngai ta fo mai. Retheia lo piang tûrin Pathianin a siam bîk em ni? Hausa tûr rênga khawvêla lo piang an ni em? An thawh rah zêl an seng a ni zâwk.

Nau neihna Ward-ah chuan hlimna au thawm a thangkhâwk rum rum a. Ward ṭhenkhatah erawh thihnain thla a zâr ve mêk bawk. In khata awm ho pawh a ṭhen an nui a, a ṭhen an ṭap a; mitthi dâr a ri a, inneih dâr a ri leh a. Hei ngei hi a lo nih hi khawvêl chu… Kan hlim viau dâwn emaw kan tih laiin lungngaihna chuan min rawn chîm a. Hmalam hunah harsatna awm thei zawng zawng kan suangtuah a, chân loh khânah rawn chhuakin, lâwmin kan nui leh vur vur ṭhin. Indona a lo awm a, hnehna chan ngei tumin an bei a, nunna tam tak hloh a nih hnu-in remna palai tirh a ni leh tho ṭhin.

Roreltu leh hotu nih kan duh a, pawisak nei lovin mi tih dik loh lai kan sêl ṭhin. Dinhmun sânga kan din ve meuh chuan mihring famkim lohzia kan zir chhuak ṭhin. Khawvêl pum pui hi neih vek kan duh a, mahse kan thiamna leh finnain daih hek lo le, kan jentail serhtan loh lên vêl ta mai mai a nih hi. Farisai-te anga fing tân chuan kawng pêngṭhuam, mipui tamna laia ṭawngṭai te kha chu tihâwm tak a ni ve rêng rêng. Tu pawh mai hian lansarh leh lâr hi kan châk vek si a. Mi ropui nih kan duh a, mi duhâm nih erawh kan duh si lo. Mahse kan duhâm avanga mi ropui nih châk kan ni si.

Natna khirh tak tak a lo chhuak a, damdawi an hmuchhuak ve zêl a, mahse khawvêl thiamna hian natna khirh tak takte hi eng tikah mah a hmakhalh thei ngai dâwn lo. He khawvêl hian lirpui rapthlâk tak tak te, tui lian te, thli tleh leh chhiatna rapthlâk tak tak te a lo vir pui ve vek a. Chutih lai chuan hlimna khawpui te, lâwmna ruai te, nuihna thlaraute pawh a lo pianpui ve vek tho.

In kharkhipna dungeon-ah birthday hlim taka an hman theih laiin in nuam takah birthday lawm thei lova buaina nasa tak a chhuak ve fo. Khawi hmun hi nge hlimna tih leh khawi hmun hi nge lungngaihna tih chu sawi theih a ni lo va, he khawvêl hian a rawn her chhuahpui ang ang chu kan lo pawm thiam a ngai ṭhin. Kan nuih dar dar laiin ṭahna te a lo thleng leh thut ṭhin. Kan hre lâwk lo va, kan duh dân a ni bawk hek lo.

Hmangaihna te hi mi zawng zawng hian kan zawng a, kan hmu vek em tih erawh mimal chunga tla a ni. Hmêlṭha apiang hian hmangaihna an ngah bîk lo va, hmêlchhia apiangin an nei thlêm chuang bîk hek lo. Khawvêlah hian hmangaihna thlipui a tleh vêl ṭhin a, a chhêm phâk erawh mi tlêmte an ni.

Hah thikûlin kan thawk a, bianga thlantui luang zawih zawihin kan nawmna tûr kan thawk chhuak ṭhin. Mahse hlimna leh lâwmna, he khawvêlin min pêk theih chu midang te tâna kan luanchhuah hian kan nunah a lo luang lût zâwk ṭhin.

He khawvêl hi a ropui a, a râpthlâk a, a mak a, a hmuhnawm a, a ngeiawm ve hliah hliah bawk. Ṭapin kan lo lût a, kan chhuah dâwn hunah chuan keini chu thlamuang leh hlim takin chhuak ila, midang hi kan chungah rawn ṭap ve rawh se. Aw, hei hi maw KHAWVÊL chu…?

Similar Posts:

• Duhthusâm
• Mi beidawng
• Fate hmangaih natzia hi!
• Ka ṭap ṭhin
• Ka thu leh hla ṭhenkhat

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Wednesday, March 28th, 2012 at 2:30 pm and is filed under Lifestyle, Opinion, Whatever. You can follow any responses to this entry through the RSS 2.0 feed. You can leave a response, or trackback from your own site.