mi(sual).com

Champhai chu ka pianna khua leh ka seileina nih vangin nuam ka ti ve em em mai a, eng ngaihtuah tak tak la nei hek lo i, Aizawl kal kha kan chak thei khawp a, Khang hunlai kha chuan SUMO la awm hek lo, Night Bus kha zinna nuam ber kha a ni mai a. Tlai thim dawn hnaih lama Vengthlang chhuk a Night Bus chhuak mai tur motor lo in start hlut hlut  leh Passenger te inring rana Bus chhunga an han thu kar hmuh te khan anmahni kha ka awt ve ngawih ngawih zel mai kha a nia.

Tun hnuah hian ka ngaihtuah let thin a, Khatiang em em a Aizawl ka kal chak kha mak ka ti zawk hial thin, Chutah le Aizawl zinna chance kan han nei ve ta a, Mizoram Khawpui ber Pan chuan Night Bus ah kan tlan tan ta, Khawdai kan han thlena tawngtaina hun an han hman lai vel te chuan rilru ah hian maimichhin lam a lang thei tawh lo, Motor chuan nuam tih nen Bus kha ding zing ka ti em em mai a. Khawzawl kan han thlenga Chaw ei tura kan han chhuk te kha nuam dangdai ve deuh mai a nia.

Tichuan le, kan tlan char char mai a zanah chuan Passenger tam zawk tih theih chu an muhil reh thup mai a, Kei zin rawp tawh tak mai chu muthilh chu kaha se hi ni ringawt, ka chhungte bulah chuan khua lo lang a piang kha,”saw saw eng khua nge, Saw pawh , saw pawh” ka ti thla tlaivar thak deuh thaw mai kha nia, Chhungte tan khan a lo ninawm duh awm ma nge ka ti thin tun hnu hian. Seling kan rawn tlan pel a le, zing dar 4 a la ri lo, Aizawl khawpui chu lo de thut mai le, rilru a phawklek duh ngei mai, ka awm hle hle thei tawh lo ka za zek zek mai. Aizawl kan han lut a le, mahni thlenna tur chhungte in lampanin vartian ah chuan kan han kal hnak hnak a.

Chhungte in kan han lut te kha vanram tlafual ni ta emaw tih turin a danglam nuam duh teh asin. Tichuan zana tlan tlaivar na na na chu kan thlenna ( ka ni te ) chuan mutna te min han siam saka, mut pawh ka mu tha thei lo Bazaar hun mawlh kha ni ka nghahhlelh em em. Zing dar 9:30 vel a rawn ri ta, kan han in bual fai sek sawk a Bazaar ah chuan kal turin kan han chhuak ve ta rawih a. Taxi chhung ten an han pharh dinga, Taxi a kan han tlan kual vel te khan thingtlang mimawl tih takah tukverh tangin kan dak hu hu mai a.

A pui teh zawng a ni Aizawl kha ka tan chuan ( khan hunlai khan a nia ka tih ). Kekawr leitur in Bazaar chhungah chuan kan han lut a, kekawr  kawnghren chhawm sa ngei mai, Kekawr a Pistol keychain in khai sa ngei mai kha kan ngena min lei sak ta nge nge. GI JOE Cobra Tank leh He-man leh Skeletor kan ngen leh pang mai a, chhungten nei leh neilo chuan min han lei sak ve le chawt mai a. Kan mamawh leh kan duh kan leizo ta, ni hnih vel kan chama, Kan khua Champhai lam pan chuan kan haw leh ta a, Champhai kan han thlen meuh chuan ka in ti thei kher mai, ka thilthar neih te kha thiante laka show vel te kha nuam ka ti em em mai a, thian te leh hmelhriat deuh hmuh tawh hlek chuan,”Aizawl kan zina” kan ti deuh sek  mai.

A nuam dangdai ve ruai a nia.

Similar Posts:

• Handset camera nen Inrinniah ka bazaar a…
• Krismas leh kumthar vuakvet hlimthla…
• I Bike a bo ve tawh em?
• Mizoram kawng kam quarry
• Aizawl, Aw Aizawl!

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Tuesday, October 5th, 2010 at 11:15 am and is filed under Travel. You can follow any responses to this entry through the RSS 2.0 feed. You can leave a response, or trackback from your own site.