mi(sual).com

Mizo hlaphhuahtu hmingthang hmasa ber Pi Hmuaki chuan, [Thangtharin hla phhuah ve tur an nei lovang tih an hlauh vanga nung chunga phum a ni] a nung chung a an phum laiin, heti hian a phuah zui a :-Nautevate u, nauhaiate u, tha te te khan min han chhilh rawh u , a ti a.

A awmzia chu hetiang hi a ni :- A phumtute hi patling hlir an ni a; mahse an thiltum leh tih dan hi, thil tling lo, tih awm loh a nih avangin, naupang tih awm lek leh mi a, mitling lo tih awm lekah ruatsakin, nauvate u, nau a a te u, tha tak khan min han vur rawh u, a tihna a ni.

Tin, chai hla upa ber Thailungi hlaah pawh :- Thailungi, Thailungi, i tiangthir te lo nghak la, i hlantai te lo nghak la; tih a lo ni leh a. Hei pawh hi a la kal hla lo hle, mahse, a thu hi a thuk ru deuh ta a ni. Tiangthir a tih hi hmeichhe tuibur dawn a an khai hi a ni a, hlantai a tih hi em a ni a. Heng hunlai hian thir avang em em a, thir awm chhun chu tuibur hlawm khatah chuan a hlu ber a nih avangin, tuibur aiawh atan tiangthir hi a hmang mai a ni.

A awmzia chu Thailung , tuibur leh em ka rawn pe ang che lo ding leh rih lawk rawh a tihna mai a ni.

Tin, Mangkhaia (Mangkhaia ralveng an tihna chhan hi) hla-ah heti hian phuah a lo ni leh a:-

“Ka nun tuichhin lamzawl a phiat a,

Keiin Dara run ka phhiat a”

Hetah hian hla thu ‘run’ a lo tel ta zauh va, a kal hmang erawh a hla thu kal hle tho.

Tin, Lalvunga zaiah chuan heti hi a lo ni leh a :-

“Lalvunga’n ka lian a ti Farzawl a luah,

A luah sual e, changsial sawmthum an la e”

Hetah hian hla thu ‘changsial’ tih a lo awm a; tin, tawngkam a hman theih ‘sial’  tih hi hlathu atan a lo awm ta a. [ A hla hi a tlaungtlam ang reng a hrilhfiahna dah lo mai ang]

Khing hla palite khi Tiau-ral awm lai hla a ni.

Tin, Zopui zai, chai hla pangana-ah chuan heti hian an phuah a:-

Thlanrawn Thanchhuma lian e,

Zo khuaah um ang thu e;

Darkhangliana, aw e.

Hei hi chu a lo hla ta hle mai. Lian, um ang thu, Darkhangliana tihte hi tawngkam hman dan leh kalhmang a ni ta lo va, a lo kulmut ta hle a ni. A awmzia chu- Thlanrawn pawi lalpa Thanchhuma chu luipui angin a lo lian thla a, Zopui khua (Lallula khua)ah, chhuat laia um hun ang maiin tuma tihchet leh tih chhiat rual lohva inngaiin a awm ta a. Mahse, Zopui khua chuan an man a, kawl (dar a siam) lian pui an bun tir ta zawk a ni tihna a ni.

Tin, Lianchhiari hlaah chuan,

Hmawng ang i pem hnuah,

I run ram ang ka fang;

Senhri pual hmul ang thlau,

Lumlang an runah e.

Hei hi chu a hla-in  a thu pawh a kulmut ta hle mai. Kan pi leh pute ti-tiah chuan hmawng lian deuh mai pakhat hi, zan khat thil maiah a lo pem (insawn) daih mai a, a awmna hmun chu a khuar dum mai a, hmun dang hla deuhvah amah ngei kha a lo ding luah mai tiin thu makah an sawi thin a, hei hi Tiau ral awm lai niin an sawi. He ti-ti atang hian hmawng ang pem hi hetah hian hman a ni. Lianchhiari hian a hriat loh hlana Chawngfianga a pem daih avangin hmawng ang pem (hriat loh hlan a insawn daih) tih hi hla thuah a hmang a ni. Tin, senhri pawh hi pangpar ni lovin a chhawnthiang a sawina a ni zawk. Hmanlai chuan ral lu lam ni a tawn atan tlangval zawng zawngin chhawn siamsa pahnih khat chu an vawng vek a, an roh em em a ni.

A awmzia chu :- Hriat loh hlanin, zan khat thilah hmawng pem an sawi ang maiin, i lo pem daih mai a; i in, i pem san chu ramvak fanin ka fang a, I chhawn duhlai tak mai, vapualin a thla emaw, a chang emaw, a duhlai a thlauh thin ang hian, i chhuatlaiah i lo kalsan ngat mai a, lung a ti leng hle mai, a tihna a ni.

Tin, Laltheri (Lalchawngpuii) Sailo nula, a tlangval Chalthanga, Luangpawna an that sak khan-

Bawmzo ral mah dar anga chhai ngam lo,

Belzukungah ka di Chhawnthang;

Chawng sai ang sat e.

Tiin a phuah a. A hla kalhmang en hian a hla hle mai, a thu hman dan pawh kulmut tak a ni. A awmzia sawi hmain a thu khirhkhan zualte hrilhfiah ila –

Bawmzo ral – Hriamhrei nei lo, ral deh nuam ber, hlauhawm lo.

Dar ang chhai – Hlim leh phur taka bei.

Belzukungah – Zu khawn lai.

Chawng –Thangchhuah nan a thiltih rahka hmasa ber.

Sai ang sat – Theihpatawp chhuaha sat emaw chek emaw.

A hla awmzia chu :- Ral hlauhawm lo ber pawh bei ve ngam si lovin, ka tlangvalpa thlamuang tak a, a zu khawn lai chu, a hmingthan ve theih nan theihtawp chhuahin a sat e tihna a ni.

Tin Saikuti chuan heti hian a phuah a :-

“Mat tui luang chhuak tiauvah damte’n a chawl,

Ni chhun ka lawm Thangte anka biah nem a chawl e.” tiin.

A awmzia chu :- Mat lui chu, lui dam vak a ni lo na a, a aia lian zawk a fin dawn tep chuan a dam dup mai a, luang lo angin a chawl ta ni awm takin a lang thei a. Chutiang chuan ka lawm pa, biak nuam tak mai chu a tawng duh ta bur lo mai a! a tihna a ni. [anka biah nem hman tanna a ni em?]

Tin, Darpawngin, a Thlekzual hlaah chuan :-

Khuafur hawktui thiangah in luantir,

Liandang bahsam Zawlaidi kan chulh sak;

Darpui zunleng kiang rawh maw.

A awmzia chu :- Thanglianpuia hian ngaih let nana sahriak, Darpawngi’n a thih ruk, kha zawlaidi kha a duh lo va, a su fai leh ta vek mai a. Chu chu Darpawngin a hriat chuan “Ka sahriak thih hi chu su fai vekin, tuihawkah luantir vek mahse la, Thanglianpui ka ngaihna hi reh tho tho rawh se, a tihna a ni.

Tin, a lusun hlaah chuan :-

Sialkhaw bawhar, Emaw, pau thei lo,

Thangril laiah ka hrai bungdawntuai;

Fam dairial maw a chan le.

‘tiin a phuah leh a. Thumal hrilhfiahna :-

Sialkhaw bawhar – Siallukawt khaw ar

Emaw  – Hmeichhiain an thian bikte an kohna, Thiani tihna.

Pau – Tawng (Hetah hian khuang tihna a ni)

Thangril – Zan, zanlai.

A awmzia chu – Siallukawt khaw ar hi, thiani, a va khuang har em! Khua a va har em! Ka fa thihna lah zanlai a ni hial tawh a, tunah chuan rial angin a dai tawh a, khua var har ka va ti teh lul em! A tihna a ni.

Tin, a thihrim hlaah chuan –

Khiangvawn rai kan rah e (2),

Ka lengkelin sumtual zawlah;

A chun a hai lo ve. ‘a ti leh a.

Thihrim – Thih tih lo khawpa thinrim.

Khiangvawn – Khiangte chhungkua.

Rai kan rah – Kan rethei e.

Lengkel – kel

Sumtual zawlah – kawt zawlah

Darpawngi thihrim zai hi a chinchhuaka sawi kher loh chuan ngaihzawn a harsa bik a. Chuvangin tawitein sawi ila – Thentlanga an awm lai hian lal upa min nen kelnote an inchuh a, tu ta zawk nge an hriat theih loh avangin , an kelpui chu mahni kawtah an thlun tir ve ve a. Muallai atangin kel note chu an chhuah ta a. Kel note chuan Darpawngi in lam a pan a, a kelpui thlun hnute chu a hne ta a. Mahse an tlat ho chuan lal upa min kelpui chu  zui chang a nei ve a. Chuvang chuan lal upa min kel note chu an pe ta zawk a, ani chuan a talh ta mai a! Lal upa min kelpui chu a no ngaia be lovin, Darpawngi kelpui chu mangang em em-in a vak ruai a, chhun-zanin a  be chiam mai a ni.

He hla chang thu awmzia chu – Khiangte chhungkua hi kan retheih vang chauh a ni e, roreltute thu rem tum dan ang chiahin ka kel note pawhin a pui chu a hria a. Ka kawta ka kelpui thlun hnute a va hnek chat pawhin, ka chang zo chuang lo va, ava retheih thlak em, a tihna a ni.

Tin, Darlenglehi zaiah chuan :-

Chung Lianakpa i zawlaidi min hlan la,

Darchumchi feng sakruang buan ang;

Ka la pawm ve ngai lo ve, tiin mitdel tlangval Lalkhawdina chuan a lo phuah a.

Lianakpa – Choak

Darchumchi – Nula kawng chilh dara siam inbat chhawng.

Sakruang – taksa

Buan ang – tlangval infiama an inpawm thin hi, inbuan.

A awmzia chu :- Nang choakpa zawlaidi tha tak nei (Sawngkhara chanchin-ah), i zawlaidi chu min pe ve teh khai; hetiang nula neinung chumchi feng meuh hi, inbuan pawm pawhin ka la pawm fiam ve ngai lo va. He nula hian min ngaihzawn ve nan zawlaidi chu min pe hram teh a tihna a ni.

Tin, Awithangpa chuan Thangkungi a phuahna-ah :-

Parah chang i, ramloh lentu par mawiah,

Thangngo tum kawng bellei mualah to ila;

Min thliak dah lawm maw e, nau lawmah.

A awmzia chu – Thangkungi nen hian kan inlawmin kan inhmu fo thei si lo va. Chuvangin a fehna kawng bellei mualah hian, pangpar mawi taka chan a lo par ka va chak em, a nau lawm atan min thliakin min hawn duh mial law maw, a tihna a ni.

Mizo tawng thu kalhmang entir a ni tawh a, hetah hian hla chang thenkhat la chhuakin, hla kal hmang entir a ni leh a. Kan pi pute hian A, AW, B, neih hma rau rauvah chuan khawvel pumpuiah hla phuah thiam ber an nih loh pawhin pahnihna chu an nih bik, buatsaihtu hian a ring lo a ni. Kan hnam a fing deuh deuh va, hla phuah leh a kal hmang leh a thluk pawh, kan aw remin kan thiam ta lo zawk niin a lang thei hial mai. Mi siamsa zula phuah ve thei hramte pawh hi kan ang ta hial lo maw?

Similar Posts:

• ZU nge ZAWLAIDI
• Zawlaidi
• Krismas nang nen
• Zawlaidi factory moving to R.V.
• Zawlaidi-a ka ngaihdan leh a hriate ngaihdan

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, October 11th, 2010 at 10:24 am and is filed under Mizo Society & Culture, Music and lyrics. You can follow any responses to this entry through the RSS 2.0 feed. You can leave a response, or trackback from your own site.