mi(sual).com

[A tawi thei ang ber a han khai khawm kan tum chin a nge, a sei kan ti thei hlawm si a. MUP Tlangau Feb. 1998 issue-ah chhuah a ni tawh a!]

1890 May thlaa British Bawrhsap hmasa ber Capt. Brown-in Aizawl a, Sawrkar a rawn din tirh hian office pakhat intawmin Bawrhsap leh Manding Sap chuan pindan chauh hrangah Babu (clerk) pakhat v eve nen an thu phawt a ni. An Babu-te chu Bawrhsap Office-ah Kristi Chandra Deb (Bengali) leh commandant office-ah Sibcharan Thapa (Gurkha) te an ni.

Kum 1892-93 chhovah chuan Mizo thenkhat office orderly, Chaprahsi Dovasi (tunlai Grade IV ang) hnathawk an awm ve tan a. An zinga mi la hriat theihte chu Zaithuma, Chhungdula, Lua, Thangphhunga leh M.Suaka te an ni.

Sawrkar a lo phuisui chho zel a, Rahsi (Circle Interpreter) hnate a lo pung ve zel a. Kum 1894 tawp lamah chuan an zinga vai tawng thiam hmasa leh lehkha thiam hmasa, M.Suaka Chawngthu chu C.I te hotu ber atan Lushai Clerk an lo kai tir ta a, Suaka’n Babu a kai an ti thin. Kum 13 zet clerk a nih hnuin 1907-ah Police Sub-Inspector (Dahrawk)-ah an kaisan tir a. 1914-ah pension-in Durtlang Lal a nit a ani.

Pu M.Suaka dawtah hian Pu Paliana Hauhnar chuan kum 1931 thleng Lusei Clerk hna hi a chelh zui a ni. An ni pahnih hi hmanlai sorkar hnathawk chhuanvawrte an ni.

Pu Ral Do Leta Khiangte, Mizo matric pass hmasaber (1910) kha Babu an pe nghal tih a ni a; mahse a dam rei ta lova, matric a pahnihna Pu Thanga Hauhnar leh Pu Lalhnuna , nakina mizo B.A pass hmasa ber (1924) leh midangte pawh babu  lamah hian an lut chungin Pu Sainghinga Pautu, Upper mai kha Mizo zinga Head Clerk hmasaber a ni thei tlat a ni

Pu Sainghinga hi mi fel chungchuang leh inzir mi tak a ni a. Kum 1915-ah Lunglei SDO Office apprentice clerk-in a lut a. Indopui(1917-18) France ram kalnaahte intuai hriam zelin 1926 khan Lunglei SDO office head clerkah a kai chhova. Aizawlah insuan pheiin 1932 Bawrhsap Head Clerk Mizo hmasaber a lo nit a a ni. 1942-ah Political Assistant (Sapte)-ah a kaisang leh a, 1964-a a pension thlengin he hna hi a chelh zui a ni.

Pu sainghinga dawt a mizo lusei clerk leh chu Pu Lianhnuna B.A kha a ni (1942-43).

Kum 1920 khan Pu Thangluaia Chawngthu Assam Civil Service Grade-II  a zawm a, 13^th Oct. 1920 khan Silchar D.C Office-ah Sub-Deputy Collector hna a zawm tan a ni. Amah hi [N.B:-Aizawla sumdawng hmasa hovin petition Assam Governor hnen a an thehluh khan, Pu Thangluaia draft sak hi anih Bawrhsap khan a ringa, Garo Hill-ah a transfer phah a ni]. Vanduai thlak takin kum 1926 Nov. khan fa 2 chauh nei hmanin kum 31 pawh a la pumhlum hmain a boral ta mai a ( T.B natna in). Pu Thangluaia hian Calcutta University atangin kum 1914-ah matric leh 1918-ah I.A first-ah a pass a ni. Kum 1920-ah B.A mizo zinga exam hmasa ber niin a pass ta lo va, ACS-hi a zawm ta zawk a ni.

Kum 1924 khan Mizo tlangval pahnih Hrawva Khiangte leh Lalhnuna Pachuau te’n B.A an rawn pass ta a, a pass hmasa ber an ni. ACS an beih thu kan hre mai lo. Kum 1926 khan tlangval 2 dang R.Buchhawna Khiangte leh Lalkailuia Sailo te’n B.A an rawn pass ve leh a. Kum 1926 hian Pu R.Buchhawna hian ACS a dil ve nghal a, mahse a hlawhtling lo va. 1927 kum hian Lalkailuia nen hian ACS an dil dun leh a, Syhlet-ahte pawh an interview dun a, mahse an tling lo leh a. Hemi kum hian Assam Secretariatah Pu Buchhawna hian clerk hna a thawk ta a. A kum leh 1928 chuan ASC-II chu tlingin 2^nd May 1929 khan Shillong D.C Office-ah a zawm ve ta ni. Kum 1960-a a pension thleng a thawk a ni.

Pu Buchhawna hnuah hian ACS-ah mizote kan lut chhangkhat hle a, Pu Lalbiakthanga Pautu kha 1947 khan reilote a zawm tih loh chu Pu Lalnithanga Pachuau in 1955 kuma ACS Grade-I a tlin kha a chhunzawmtu chu a ni mai. Pu Dengchhuana’n kum 1967-ah ACS Grade-I a tling leh a, An pahnih chiah hi ACS-Grade 1 direct a tling awmchhun an ni ta a ni.

ACS Grade-II ah hian Pu Biakthansanga Pautu leh Pu C.L.Rema te chu kum 1956-ah an lut ve leh a. Anni dawtah chaun Pu V.Thangzama (1962), Pu Lalthanmawia (1963) leh Laldailova Khiangte (1963) te hi an hmasa leh a.

Kum 1954 atang khan community project hnuaiah APSC kal tlang lova PEO/APO-ah te tam tham tak lut an awm a, a hnuah APSC chuan an service a regularize leh thin a ni. Chutianga 1960 hma lama lutte chu  Pu te – Hauthuama Hauhnar, R.L.Thanzawna, J.K.Khenglawt, Zosanga Khiangte, J.Pazawna te an ni awm e.

Mizo zinga UPSC kaltlanga direct IAS hmasa ber chu Pu Zamchawnga (1955) kha a ni. Pu C.L.Rema kha kum 1958 khan Special Recruitment-ah a zuk tling vet a a, 1954 atanga PEO a lo thawh tawh leh 1956-a ACS-II ah regularise a lo nih tawh avangin IAS(1956) Seniority an lo pe a ni.

Direct recruit ni lo va, defence leh service dang atanga IAS hmas ber kan neih te chu Major Lalhmingliana Tochhawng (1951) leh Pu Lalbiakthanga Pautu (1954) te an ni. State puitling C.S ve ve-in an pension a ni.

Vawiin ni thlengin Mizo fate IAS-ah kan tha hnem ve tawh hle chungin Central Sawrkara Secretary puitling kai pha chu Pu Rohmingthanga Pachuau chiah kan la nei rih a ni.

……………………………………………………………………………………………..

Similar Posts:

• Hriselna lama Mizo zinga mi hmasa thenkhat te
• Mizo Vaitawng Thiam Hmasa
• Zofa zinga mi hmasa thenkhat
• An lenlaini te
• Mizoram Agriculture

Recent Posts:

• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!

This entry was posted on Wednesday, October 13th, 2010 at 1:21 pm and is filed under Information, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.