mi(sual).com

Nupa hlim thei tak kan ni a. Thenawm khawvengte paw’n kan inhmangaihzia leh kan inkawmngaihzia an sawi fo thin. Tleirawl inngaizawng tha leh ang mai hian kan awm a ni ber. Kan nu hi khawpuia cheng, chhungkaw hung leh khawsa thei tak an ni a. Kei erawh thingtlang tlangval mai ka ni. College kan kal ho thin a, Final year kan zir kumin kan inchhar a, a kum leh-ah kan innei nghal a.

Bank-ah hna a hmu ve hlauh mai a, chhungkua dinin fapa duhawm tak Pathianin min pe a.  Kei erawh hna nghet em em nei lovin vawk leh ar vulh nuam ka tih em avangin ka vulh ve reng a. Sum leh paiah mi neih khum lo mah ila chhuanchhamin kan awm lova, rual  kan awt  bik hek lo. Kohhranah kan phak tawk te te-in kan inhmang ve a. Kan chhungkua kan hlima, thinrim chang awm mah se kan tawngtaia mittui tla zawih zawihin ngaihdam kan indil-tawn thin. Kan thinrim hi ni-in tlakpui mah se mutpui erawh kan tum lo. Hei hi kan nupa inkara kan thupui ve a ni.

Kan Birthday-ah present inpek kan hmaih ngai lova, kan innneih anniversary a lo thlenin inneihna thutiam kan tiam nawn leh thin. ‘Kei chauh min nei lova, ka chhungte zawng pawh i nei tel’ tiin kan inhrilh tawn fo thin. Kan fapa a-nakin hun tur thlengin ruahmanna fel tak kan duang ve a.

Hun leh nite an her liam zel a. Hlim takin kan nupa pawhin damchhung nite kan chhiar dun a. Mahse, hringnun hi tluang takin a kal purh reng bik lova. A bumboh chang a tam ve khawp mai. Sawi tawh angin kei chu thingtlang tlangval ka ni a, khawpui neinung tak fanu ka nupui a ni. Chhungkaw dinhmun a inthlauh em avangin harsatna neuh neuh kan nei leh thin a. A nu hi che milian chi tak a lo ni bawk nen, min sitna-chin awm hian ka hre  tlat thin a. Dik tak chuan kan nu nuta te pawh hian min chu-e-kha-e vak loh chang ka tawng fo mai. Chu chu kan nupa inkara kan harsatna bul intan chhohna a ni.

Chhungrilah kan nupa inkar boruak chu a chhe telh telh a. Tun hma kan hlim thin ang kha kan pha ta hauh lo mai. Mahni hmasial ranin kan awm ta emaw ni chu aw ka ti rum rum thin. Zana kan pahniha kan mut dunna khum chu inhauh-na mittuiin a bual khat ta a. Zing thawhin nui hmel kan inhmuh thei tawh lova. Kan nupa nun chu chhum chhahpuiin a zin hnan mup  a ni ta ber mai.

Zankhat chu chhuah hial duhna rilru pu khawpin a thinrima, kei lahin tlawmah ka lo la.  A nu te a phone a, eng nge a sawi ka hre lo. Rei lote-ah an Car in a nu te’n an rawn hruai ta mai a. Khami tuma a nu an-hla chhiatzia kha sawi chhuah ngam chi pawh a ni lo.

A nak zanah ka Pate-a te tirin koh haw kan tum a. Mahse, an ni chuan sum chhuah hial an duh zawk leh kan fapa pawh laka a enkawlna sumah an buai loh thu chaltlai takin an lo sawi a. Ni em em bik lo ve tiin a bungrua rawn la turin a tukah chuan ka hrilh ta a. Kum tluang a tan inthen hlen turin thu kan dah ta a ni.

Dik tak chuan ka hmangaih em em a, hetia chhungte vang mai a inthen hi hriatthiam har ka ti. Ka ngai ngawih ngawih a. Kan in chu a ruak ka ti em em a, hrehawm ka ti a ni. Chutia kan inthen ta mai chu thenawm khawveng te lakah ka zaka, khawtlangah ka tawmim a, kohhranah phei chuan ka lang ngam lo hial a ni. Mi zawng zawng hian min nuih zatin ka hria a, hrehawm ka ti tak zet a, hmangaihtu nei lo hialin ka inchan fo thin. Khawnge kan Pastor leh kohhran Upate kha, khawnge thalai hruaitu te kha?, ka chanchin an hria a ni lawm ni?. Tumah an rawn lan loh le? tiin ka vui fo thin a. Mahse, keipawh chuan pan ka tum bik si lo.

Chuti renga awm ai chuan tiin, ka pawisa neih ve chhun chu ka la chhuak a. Zu dawr ka pan ta a. Ka ina, ka in ka in a, a lo nuam phian mai.  Ka nuna harsatna pawh chu min chhawk huaiin ka hria a. Khawvel eng hi harhfimin ka hmu ngam lova. Tumah ka kawm peih lova, zu chu ka thian kawm a ni ber ta. Zanah zu ka in loh chuan ka mu thei lova, zing ni chhuak chu harhfima lo dawn sawn ai chuan tiin zing atangin ka in tan a. Khaw eng hi ka haw em em a, zan ni reng mai se ka ti a.

Chutianga zing atanga nilenga zu ka in takah chuan ka taksa pawh a lo chhe tan a. Ka biang a puam a, mawng a thepa, hnar a rawn tawk tan a, ka kut hi a khur ta hluk hluk mai a ni. Chutianga ka hmel a danglam tak em a vang chuan ka thian te leh hmelhriat te pawh tumah ka hmu ngam lova. Hel dan kawng ngawt ka zawng thin. Khawvelah hian mal ngawih ngawihin ka inhria a, inah ka tawmim tlata, Zu dawr leh kan in chauh chu ka khawvel hmanna a ni ta.

Zu mai duhtawk lovin damdawi thlengin ka ti chho ta a. Ruihhlo hmuh theih ang chi zawng zawng chu ka ti kim veka, no 4 thlengin ka khawih ta a. Nunphung pangngaia ka khawchhuah leh hi ka ring tawh lova, tumahin an ring tawh bawk hek lo. Ka chhungte’n ka chanchin an lo hria a, ka nu-in tap zawih zawihin min tawngtaia mahse, keichuan barah ka khawn lo. An mangang chuan Ruih hlo ngai te enkawlna hmunah min dah a, Mizoram mai ni lo, Manipur leh Mumbai thleng pawhin min dah a. Mahse, rei a daih si lo!. Diktak chuan keipawh ka manganga, hremhmun leh vanram hi ka theihnghilh vek tawh a, ka hma lam hun thlirin ngaihtuahna chhete pawh ka hmang thei tawh lo.

Tlai khat chu khaw awmdan a mumal lo hle mai a. A chang leh a rawn dur khup a, a chang leh khawdur karah ni eng mawi tak a rawn lang leh zauh thin a. Zu dawr lam panin keimah chauhvin ka phei a. Kal kawngah chuan ka ngaihtuah neuh neuhva, “Engtik nge nunphung panngaia ka khawsak leh thei ang, heti renga khawsak chu hrehawm ka va’n ti tak em?” ka ti vawng vawng a.

Ka kal kawngah chuan naupang sikul bang ka tawk phei nual a. Ka thleng tep tihin ruahpui van-awn a rawn sur ta hawk mai. Tuihawk luan kawr te chu reilote chhungin a rawn liam ta puat puat mai a.Chutah naupang tap ri ka hria a, ka bengchhe ri maiah ka ngai a. Ka han ngaithla vang vang a, naupang mangang tap thawm a ni chiah mai.

Ka tlan chhova kawng chhak kawrah chuan sikul naupang pakhat hi Sabereka-khuangkaihin a lo la chu niin, kawng sirah a vawrh chhuak a. A thianpa chu mangang takin a lo tap a. A thi nge a dam tih pawh hriat tawh loh. Thei leh thei lovin ka pawm a. Ka kawr ka phelh a, a taksa chu ka hru thuak thuak a. A mar ka deka, a la awm.

Mahse, engtin nge ka tih tak zel ang? Khawi lam nge pan pui tur? Rilru baihvai takin ka awm a, a thianpa lah a tap reng bawk nen ka buai em em mai a. Vanneiha siam in 407 truck a rawn tlana, ka phar ding a. Driver hnenah chuan ka thil tawn chu ka hrilh a.  Ani pawh hman hmawh viau mah se tlawm a ngai a, Damdawiin lam kan pan ta a.

Naupang thianpa chu a hming te, a nu leh pa leh an in awmna te kan zawt a. Tichuan, damdawiin atangin ka va phone ta a. Reilote chhungin an rawn thleng a. A nu chu rawn tap lutin a fapa lo haw har an tih thu leh an ngaih a that loh thu a rawn sawi a. Kan chunga a lawmzia te, “Kan fapa thi tur in chhanchhuak a ni”  tiin mittui tla zawih zawihin a sawi a.

A tukah chuan naupang kan chhanchhuah chanchin chu khawtlangah a khat nghal a. Rampum chanchinbuah a chhuak chuai chuai a. Ka hming leh driver hming pawh chuan ram pum a deng chhuak a. Thenawm khawveng ten ralkhata min lo nuih rukna leh ka chanchin a chhe zawnga sawi fo thin chu a thang tha zawngin min lo sawi ta a. Tun hmaa min cheksawlh thintu te pawh khan chawimawina lukhum min khumtir ta a ni ber mai. Chu chuan ka nun pum chu a rawn let ta thawk mai a ni.

A ni,misual bera inngaiin ka hringnun rahbi pelhin, mite hmusit leh endawng ni mah ila, mi dangte tanpui turin chakna ka la nei a, thil tha ti tlak ka la ni tiin ka rilru ka siam thar a. Ka hringnuna harsatna leh buaina ka tawh zawng zawng hi harhfimin huai takin ka tawn tlang ngam tur a ni. Chumi ti tur chuan thahrui ka la ngah tawk. Thil tha ka la ti thei a lawm. Ka sualna zawng zawng te hi thatna in ka rul let vek ang a, midangte tana malsawmna ni turin ka inbuatsaih ang tiin ka intiam a.

Ruihhlo ka tih thin zawng zawngte ka bansan vek a, Pathian zarah ka hriselna a tha chho ve zel a. Hna remchang a piang thawh hreh ka nei lova, sum lamah tlaran viau mah ila, chhuanchhamin ka awm bik lo. Ka nun a hlima, kohhranah inthlahrung tak siin ka phak tawk rawngbawlna chanvo min pek te chu ka hlen chho ve zel a.  Vanneihthlak takin kan veng English medium school-ah zirtirtu hna ka hmu ve hlauh a. Chutah chuan ka thawhpui nula fel tak, Chhani (Lalchhandami) nen kan intawng a.

Nula fel tak, inngaitlawm tak a ni a. Ka nuna ka harsatna ka tawhte chu  a hrethiamin  min enkawl thiam em em mai a. Inneiin, nupa kawp chawi rem tak kan ni chho ve zel a. Kan inneih atanga kum nga-naah kan hna bansanin Boarding school te kan din chho ve naw naw a. Thingtlang lama sikul naupang lehkhathiam tak tak chhungkaw harsatna avanga zir-chhunzawm thei lo te chu zawngchhuakin kan phak tawkin kan nupa chuan kan enkawl chho a. Pathianin nasa takin malsawmnain min vura, midangte tana malsawmna ni ve turin kan inpe a, hlim takin kan nupa chuan damchhung nite kan hmang ta a ni.

.

Similar Posts:

• Nupa inthen hi
• Hmangaihnain a hnawl sipai huaisen
• Ka thiannu kha…!!
• Ka nunna I ni
• Nupa

Recent Posts:

• June 2016, Mizo(ram) Diary
• The reason we have bad roads in the North East
• INNGHAHNA TLING THURIL CHU
• Essay on Amen
• A MAKIN AVA ROPUI EM…!!

This entry was posted on Saturday, October 23rd, 2010 at 5:30 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.