Aizawl-a Republic tih hming pu veng pathum – Republic Veng, Upper Republic leh Republic Vengthlang-te chuan thlanmual an inhman tawm mek chu inphumna tur hmun atlem tawh avangin hmun thar dap buai lo leh thlanmual an neih mek hi rauh san lova hman nawn leh dan – ‘Recycling System’ an duang a. He ruahmanna hi kum hmasa lam atang khan an buaipui tawh a. Thlanmual survey-te neiin record-a alan danin he thlanmual-ah hian mitthi 1,104 phum tawh a ni a.
Thlan awm zawng zawng erawh chu 993 a ni thung. Heng zingah hian inphum thuahna (chhungte etc.) thlan 92 a awm a, thlan thenkhatah chuan ruang pathum laite phum thuah a lo ni tawh bawk. Hmun then khatah chuan thlan lung awm lo te, thlan lung bung leh ziak chhiar that theihloh te an nih avangin thlan engemaw zat chu chhinchhiah (record) hleihtheih loh an awm bawk.
Heng veng pathum-te hian Thlanmual Joint Committee dinin nikum lamah khan veng mipuite ngaihdan an lo la tawh a. Kumin November 5, 2010 (zirtawp) zan khan veng pathumah a hrang theuhvin public meeting an nei leh a, tuna an thlanmual hman mekah thlan thar hmun tur atlem tawh avangin hmun dang ngaihtuah lova hman nawn tura ruahmanna an siam chu an pawm tlang a, hmalak tan an tum a ni.
Thlanmual hman nawn dan tur ruahmanna an neih chu hetiang hi a ni :-
1) Thlanmual ram chin chiang taka chhinchhiah/hung a ni ang.
2) Thlanmual dung (thla) step sir tuak feet 20/25 emaw ve ve thleng hian ‘Thlan thar’ (Ruhro dahna) hmun atan ruahman a ni ang.
3) Inphum nan thlan hlui (a upat dan indawtin emaw) laihnawn a ni ang a, ruhro lak chhuahte chu ‘Thlan thar’-ah dah a ni ang.
4) Thlan thara ruhro dahte hi thlan thar huam chhunga ruhro awmsa te nen 2 x 1.5 feet zela zauin feet chanve zel kar awl neiin awmze nei taka rem an ni ang.
5) Step sir tuak thlan thara thlan awm sa leh dah thar zawng zawngte chu chhinchhiahna/thlan lung size inang vek pek siam an ni ang a, hei hi khawtlang (YMA-in) a buaipui ang.
6) Ruhro phawrh leh dah that (phum) hi thlanlaitu, tlangval tlawmngaite’n an buaipui ang.
7) Thlanmual ram, a bik takin, thlan thar hmunah hian thing chi hrang hrang awmze neia phun a ni ang a, park nuam tak a ni thei ang.
He an ruahmanna ang chuan kum 46 vel thlanmual an lo hman tawh, mitthi sang chuan inphum tawhna step sir tuak ve ve-ah hian thlan 12 vel a phei zawnga rem a nih a, a sei zawng 250 ft-ah thlan 125 vel rem a nih chuan kum 60 – 100 chuang thlanmual hi la hman theih an in beisei a ni. Hei hi an ruahman chhinna, a tak ram chan tir tuma an pawm tlan tak chu a ni.
Ruahmannaah chuan thlante hi a ruala laih vak tur a ni lo va, thlan upat dan indawtin, a mal te te-a hman dawnah zela laih tur a ni a, thlanlungte hi vantlang thawhlawm atangin inang tlang veka siam tur a ni ang. Tin, thlan laitu tlangvalte’n ruhro lai chhuakin kuang (box)-ah uluk taka dahin thlan tharah an phum thin dawn a ni.
Thlan khawih turte hi kum bithliah fel taka siamin, a upat dan indawt a lak chhuah tur a ni dawn a, a tul a nih chuan chuan thlan phawrh turte chhungte chu thlan phawrh lai hian kal ve lo tura ngen/hriattir ni mai se la an ti a ni.
Aizawl-a kan hmun tha lai tam tak hi thlanmualin a khat emaw tih mai tur a ni a, tunah hian veng tam tak chuan khaw pawn lamhnaiah thlanmual hmunte leiin an sawngbawl tan mek a. Hetih laia Recycling System duanga Republic Veng ten hma an la hi Mizoram-ah a hmasa ber a ni thei a ngem? He ruahmanna hi hlawhtling taka hman theih a rinawm em ? Lo ni ta se la Aizawl khawpui chep taka veng hrang hrangte hian thlan hlui hman nawn lehna tur ruahmanna hi siam ve ta mai hlawm ila, kan ti fuh viau lawng maw ? … tih thu hi ka Mi(5ual) thiante sawiho atan ka han phawrh ve a ni e.
Similar Posts:
- Thlan laih Privatise ang
- Ui rinawm Capitan.
- Kan inphum zel dawn em ni ang – Engtin nge thlanmual?
- Thlanmual
- Republic in kang?
November 9th, 2010 at 5:01 pm
thil thar…phek thar
Report this comment