mi(sual).com

Mizo ruah hming chi hrang hrang te

1. Pâwl delh ruah: December thla tâwp lam leh January thla tîr lam emawah a sûr thîn. Pâwl delh ruah a sûr tuma khawpui a rîk dur dur chuan upain, ‘ruahtui tam kum tur a ni e,’ an ti thîn. Thâl ruah sûra khawpui ri dur dur chuan lung a tilêng duh hle.

2. Thuang ruah: January thla chawhnu lama sûr thîn hi a ni ber a. He ruah a sûr hi chuan kawihthuang pâr te pawh a lo chuai tawh thîn a, a pâr tlàna hrailêng châwm thîn sîrvate pawhin pâr dang an lâwr tawh thîn a ni.

3. Chap delh ruah: Thâl ruah bawk a ni a, lo vâta ram riakte pawh a nan hàwng cháwk thîn a ni. Thâl ruah a nih angin a vâwt duh hle a, hri pawh a kai chhuak duh hle a ni.

4. To ruah: March thla a lo nih tawh chuan to ruah hi khawthlang lam atangin a lo haw tawh thîn a, a lo thawh dâwn chuan khawthlang lam kâwl chu a hnîm ruih a, thlipui leh ruahpui a lo thawk chiam thîn a ni. In leh thlâm te a lên chhe ve fo thîn. A châng chuan rialte nen a lo thawh vak châng pawh a awm.

5. Ruahthimpui: He ruah hi May thla chawhma lama thawk a ni ber thîn a, zîng lam ruah a ni a, tûkthuan ei lai te leh feh kal lai te leh thlâm thlen tirh lai te hi a sûr duh hun a ni. A lo thawh dâwn chuan chak takin chhûm dum a lo let but but a, khawthlang lam kâwl bul chu hauhûk laibu ang maiin a thim duk rui a, rei lo tê-ah thlipui chu naméng lovin a lo thawk ta chiam thîn a ni.

Chutia hun rei tak a tleh hnua a reh dâwn lamah chuan ‘siruk la thli’ (thlipui hnuhnung) a lo ni tawh a. He ruah sûr hnuah hi chuan fûr a intan tak tak tawh a, ruah pawh chhim lam atangin a lo hâwng tan tawh a ni.

6. Nikîr ruah: June ni 20 vêlah Nikîr ruah chu a sûr deuh ber a, ni sarih chhûng te khua a chêng thîna ngaih a ni. June thla hi ni rei lai ber a ni a, ‘Lalmanga nu lâwm rawih ni’ tih a ni. Hemi hnu lam atang hi chuan ni pawhin chhim lam a pan hret hret tawh thîn. Nikîr ruah sûrah hian ruahtui nu bîk a awm thîn.

7. Ruah phingphisiau: July thla hi vawk hniak zawn thla tih a ni a, tuihawk pawh luang tham mang lovin ruah a phingphisiau reng thîn. Zo chhûmin a chîm chin tlâng sáng deuhvah te chuan Zo chhûm a châm hmuk reng thîn. Tun hma chuan hetih hun lai hian sapui (sakei) pawh dai velah a hnai duh hle thin a ni. Phai ramah chuan khua a ro em em chang pawh a awm bawk.

8. Ruah varpui: August thla a lo nih chuan ruahsur hi ralkhat hla tak atang pawhin a hmuh theih a, van sang atanga a lo tla pawh a lang sung sung thei thin a; hetih hun laia ruah sur chu ‘ruah varpui’ tih âwm rëng a ni.

9. Ruah mual liam & ruah bing: He ruah hi August leh September thla vel laia sur thin hi a ni ber. Khaw tha uar anga a lan lai pawhin ruah mual liam chu a lo thawk thut a, thawkmawh nu thil pho, seng hman mang lohva a nan huhsak chang te pawh a awm duh thin hle. Tin, ruah bing chu ram zim tê-ah tam takin a sur a, hmun hran hranah a sur kal duai duai thin a ni.

10. Mai hrui pawt chat: Fur ruahtui hnuhnunga ngaih a ni tawh a, September thla chawhnu lama mi a ni ber a, namen lovin a sur a, thlawhlai kawra mai zam te pawh a len fai duak duak thin. Fur ruah hnuhnung, ruah tam bik tihna mai a ni.

11. Ai ruah: Kum khat chhunga ruah hming neiah chuan a hnuhnung bera ngaih a ni. A hun pawh hmang dik pawla ngaih a ni a, October thla tawp lam emaw, November thla tir lam emawa sur thin a ni. Ai ruah sur tan ni chuan lui dungah chakai an vak chhuak duh hle. Hemi hnu atang chuan chakaite chu thlasik tuar turin lei chhungah an inkhung tawh a; thlasik chhung zawng chu chaw zawng pawhin an chhuak lo va, mahse, an thau em em tho!

12. Ruahpui vanawn: Ruah tam tak thawklehkhat sur thut hi a ni ber. Eng hun pawha tam tawka ruah sur vak hi Ruahpui vanawn a ni mai. Hei hi chu hunbi nei ruah a ni lem lo.

Thli chi hrang hrang te hre ve mai mai duh tan heti lamah.

He thu hi C. Lalbiaknema lehkhabu, ‘Zoram Mawitu’ tih atang lakchhuak a ni.

Similar Posts:

• Mizo thli chi hrang hrang te
• Lungrem chimin naupang 2 delh hlum
• Fur ruah!
• Ruah leh thli avanga chhiatna Serchhipah
• Ruah

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Wednesday, November 10th, 2010 at 7:02 pm and is filed under Information, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.