Zing dar sawm leh a chanve a ni a, Delhi khawpui laili leh sorkar hmunpui pakhat, Shastri Bhavan-a Press Information Bureau (PIB) Conference Hall-ah chuan Railway Minister Mamata Benerjee a lo lut a. A thutna tur dawh san pan mai lovin mipui awmna-ah a’n thu khaw muang a, mitin mai chu hlim leh nui sang chungin a chibai kual bawk a.
A thutna tur dawhsan a pan a, a bulah Railway Board chairman leh PIB Principal Director General Pi Neelam Kapur chiah an thu a. Thu sawi tura sawm a nih angin, India Railway hmasawnna leh an hma chhawp te chu a thlun phelh ang zar zarin a han sawi ta a le. Chu Conference Hall-a chanchinbumi kalkhawm 300 vel zet te chu kan ngawi thap mai. A officer ten a thusawi tur chu an ziah chhuah sak ve ngei a, a ziak pawh a kawl ve. Mahse chhiar chu sawi loh, a en pawh a en mang lo. Chuti chung chuan bahlah awm map lovin a department chan hnuaia hmasawnna leh hmachhawp te chu a sawi pap pap mai.A department chan chu a tuichilh mai a ni lo, a luhin a luh chilh tih a thusawi atangin a chiang a ni.
Thu a sawi rei lo. Duh duh zawhna hun an hawng a, chanchinbu mi kalkhawm tih takah zawhna zawt duh chu a phar hian an phar suau mai. Pi Neelam Kapur-i’n a koh hmasak apiang chuan zawhna an zawt a, Andaman & Nicobar Island atanga kan thenawm Tripura thlengin mahni vei zawng zawng an han zawt tak tak a le. ‘Chutiang thil te chu a kilkhawr e mai a hre dawn emaw ni le?’ kan tih te pawh kha a chhang thei vek mai. Mak tak a ni. Tuma’n an zawt buai zo lo, zawhna a zawh let chang khan a zawttute zawk kha a buai zawkah an tang mah mah emaw tih mai tur a ni.
Sap hlaphuahtu ropui William Wordsworth-a’n, thinlung luangliam (sponteneous overflow of powerfull feeling) a tih ang mai khan, a thinlunga a vei leh a hnathawhte chu a buakin a buak pui hawk hawk a. Mahni ‘concern’ loh deuhna hmuna minister khuallian an sawmin, hul huka thu an sawi nen chuan in persan tak a ni.
October ni 26 leh 27 khan India rama chanchinbu hnathawktute funkhawmna lian ber, ‘Economic Editors’ Conference (EEC) 2010′, New Delhi-ah kan zu chhim ve a. State hrang hranga regional newspaper a\angin mi 62 leh national paper leh TV a\angin mi 200 vel nen kan pung khawm a. Kan conference hi Union Finance Minister Pranab Mukherjee-a’n a hawng a. Anni bakah hian cabinet minister 5; Power minister, Sushil Kumar Shinde; Petroleum & Natural Gas minister, Murli Deora; Road Transport & Highways minister, Kamal Nath; Railway minister, Mamata Benerjee; Agriculture minister, Sharad Pawar te nen inkawmhona (interaction) kan nei a. Planning Commission Dy. Chairman Montek Singh Alluwahlia leh a thawhpui ten India economy hmasawnna tura hmachhawp leh hmalak dan ten an sawi a. Dr. Prajapati Triveri, Secretary in Cabinet Secretariat chuan ‘Performance Monitoring and Evaluation System’ chungchang powerpoint hmangin a sawifiah bawk a ni.
Performance Monitoring and Evaluation System: Hei hi sawi zau hlek ila, kuminah hian hei hi EEC-a thil thar an dah a ni a, a chhuan pawh an chhuang hle a, Pi Neelam Kapur pawhin a sawilang deuh fo. Hei hi sawrkar laipuiin sawrkar hmalakna a endika thawk \ha leh \ha lo a hriatna tur hmanrua ti ila a sual lovang. Sawrkar kum bulah department hrang hrangte chu a changtu minister-te hmalaknain an hnathawh dan turte duan lawk sa chu Cabinet Secretariat-ah hian thehlut turin tih an ni a, chumi an thehluh chu thla ruk hnuah an endik ang a, kum khat a liam hnuah an ennawn leh ang. Heta \ang hian manifesto mil leh duan lawk angin department-te an kel em? tih kha a hriat dawn a, hei hian sawrkar department hnathawh dan a enfiah thei dawn a ni. Hetiang hmalakna hi Dr. Prajapati Triveri, Secretary in Cabinet Secretariat chuan khawvel ram dangah pawh an lo hmang tawh a, an hlawkpui hle tih a sawi. Mizorama hman ve atan kan rawn awt haw hle a, thil harsa niin a lang lo, a format a awm a, chungte pawh chu kan rawn hawn nghe nghe.
Petroleum leh Agriculture minister te hi upa lam a nih tawh avang leh an mihring mizia pawh muang deuh hlek an nih avangin an secretary ten an tawiawm nasa a. A dang te erawh khi chuan an department chan an hrechiang a, zawhna kil khawr ber thlengin an chhang a, an secretary te sawi sak an ngai lo.
Kan state-a kan minister fel tak tak te pawh hian \an han la lehzual sela, hmathlir leh tum nei chung hian an department kaihruai sela. An department chanah hian a department hnathawktute ai hian a ‘rau’ han chang thuk ve bawk sela chuan hma kan sawn leh zual ngei ang. Heng central minister chhuanawm tak takte hnathawh dan leh an thil hriat dan atang hian kan minister leh ram hruaitute hian zir thar tur an nei vein kan hria. Tunah pawh kan minister zingah, tuina leh inpekna, hmathlir nei chunga hnathawk tak tak chu an thliar hran theih mai hi!
EEC hi chanchinbu miten an ngai pawimawh hle thin a, chanchinbu neitu leh a lian deuh chin ‘economic lam ziaktu leh senior editor’ an kal thin. Chuvang chuan kum lamah pawh ‘kan pu’ rual deuh hlir an pungkhawm a, keini thiandun leh Jammu & Kashmir atanga mi 2 lo kal bakah China atanga nula leh tlangval lo kal tih loh te kha chu kum 50 chunglam vek an ni ang (TV reporter leh cameraman te tel lovin). |um tam tak kal tawh an ni hlawm a, an mikhual lo hlawm hle bawk. Chuvangin a nikhatnaah kan chuh chak ve ta lo deuh a, a ni hnihna-ah erawh chuan kan State-a tuialhthei laihchhuah tum chungchang leh tuna royalty ennawn mek chungchang kha Petroleum minister kan zawt ve a. Petroleum minister chuan kum 2012 a\angin company ten Mizorama tuialhthei laihchhuah hna tan theih an in beisei thu a sawi a. Indian Oil Corporation chairman-in Mizorama hnathawh nuam an tih thu leh mipuite tawiawmna an dawn that thu sawiin,hmun danga buaina leh harsatna (law & order problem) awm ang chu Mizoramah a awm ve lo thu a sawi chhuak kha a nuam ve viau mai. Minister hian tuialhthei-a royalty chungchang chu sorkar in a la chinfel loh thu a sawi thung.
Chanchinbu-a tuialhtheia royalty chungchang news-a kan rawn tarlan khan sawizui a hlawh ve viau a. Tunlai thalaite website lar ‘www.misual.com’-ah pawh an khel deuh laih laih a, chuvang chuan tlem han sawifiah deuh \hain kan hria. Tunah hian tuialhthei laihchhuahna state hian royalty-ah 12.5% an chang a, a bak chu central sorkar chan a ni. Hei hi a tlem lutuk nia ngaiin petroleum producing state te chuan state leh central chan hi 50-50 a ni tur a ni tiin an nawr a. Hemi chungchangah hian kan Lok Sabha MP Pu CL Ruala pawh hi a tang na ve hle a, kumina MZP Gen. Hqrs. Aizawla a thusawiah 50-50 chu a nawr tluk theih tur thu a sawilang tawh nghe nghe a ni. Hetianga nawrna a awm mek avang hian central chuan royalty chungchangah ngaihtuahna a seng mek a, thutlukna erawh a la siam fel lo thung. Hei hi nawr hlawhtlin a nih hlauh chuan kan state atanga tuialhthei laihchhuah a nih hunah pawh hlawkna tam tak kan tel phah ve thei dawn a ni.
Royalty chungchanga kan zawhna hi a ‘hit’ vang nge national media lam hian an lo ngaihven sa hrim hrim ni ang, royalty chungchangah chu an zawt ta sup sup mai a. Press conference zawh hnu thleng khan national TV te chuan minister leh a secretary te kha an bawr nasat phah hle.
Miretheite leh tribal mipuite economy siam thatna atan Mizoramah New Land Use Policy kalpui a nih thu leh state dang-ah pawh enchhin theih dan kawng zawn a nih thu Planning Commission Deputy Chairman Montek Singh-a’n a sawi chhuak a. Power minister-in Tipaimukh Dam chu clearance tul ang ang te tihfel a nih hnu-ah khuah tum a nih thu a sawi bawk a, “harsatna a awm lovang,” tiin a sawi nghe nghe. A bak chu kan state hnaivai thil sawichhuah a awm lo va, national level-a economic upliftment chuan hmun tam zawk a chang a ni.
Rawtna: Kumtinin PIB buatsaih hian Economic Editors’ Conference hi buatsaih \hin a ni a. Hetah hian minister hrang hrangin an department chan chhunga hmalakna leh hmachhawp te puangchhuakin, chanchinbumiten zawhna zawtin rawtna an thlen bawk \hin. Hetiang bawk hian kan ramah pawh hian neih ve theih ni se la, minister ten an hnathawh \ha an puan zar theihna hun leh eng ‘issue’ emawa an insawifiahna hun remchang pawh a ni thei bawk. District hrang hranga chanchinbumi thlan chhuah te sawm ni bawk se la, ram leh mipui tan a bengvarthlakin a hlawk hle kan beisei.
Information & Public Relations department hian bul tum sela, chhun thingpui leh zanriah chu khulamah pawh minister hrang hrang ten an in tum sem mai a, kum khata vawi khat buatsaih mai tur a nih avangin thil hautak lutuk a ni lovang.
EEC 2010 kan kal theihna tura ruahmanna min siamsaktu leh, chanchinbumite hmasawnna tur ngaihtuahna kawnga a tha leh zung seng rengtu Press Information Bureau (PIB) Aizawl-a Deputy Director, Pu Mangjangam Touthang leh hruaitu nih tling MJA president Pu H. Zosangliana te chungah lawmthu kan sawi a. Delhi-a Mizo taka khual tha thlena min lo thlengtu kan MP (Rajya Sabha) Pu Lalhmingliana te chhungkaw chungah lawm thu kan sawi bawk e.
Similar Posts:
- Annual Economic Editors Conference kan chhim ve
- India Today State Survey – East Zone ah Mizoram Pakhatna
- Health Minister bang rawh se
- Assembly session zawhna ropui tak mai chu!
- CM hlawh thar tur – Rs.1,20,000
November 11th, 2010 at 3:10 pm
A bengvarthlak e.
Report this comment
November 11th, 2010 at 3:12 pm
E heu, va pui hmel tiah tiah ve,….chhiar phawt ila, muang marin thluak dai dek dawkin i han comment dawn ang hmiang.
Report this comment
November 11th, 2010 at 3:16 pm
Post tupa chuan mizo font a hmang nasa awm hle mai
Report this comment
November 11th, 2010 at 3:19 pm
A Ngaihnawmin a bengvarthlak khawp mai. I rawtna pawh a tha ka ti. Mahse, an tihlawhtling thei angemaw? :roll:
Report this comment
November 11th, 2010 at 3:22 pm
Maipawl kan pu var leh ta vu vu mai…. post tha tak ani e.
Kei ni ang thluak thawl deuh tan chuan han comment vak tur pawh ka hre lo e a. :lol:
Report this comment
November 11th, 2010 at 3:59 pm
Press Information Bureau (PIB) Aizawl-a Deputy Director, Pu Mangjangam Touthang hi mitha tak ani…
an office a tar tur lianchhiari lungleng tlang ka oil paint tum kha chuuuu…. 8O
ka la hman lo e mai…economics lampang hi chu nakinah ka comment ang
Report this comment
November 11th, 2010 at 4:32 pm
tlaiah zu in ho na in nei em?
Report this comment
November 11th, 2010 at 4:41 pm
Fonz, neilo mahila kan pu designation leh hming ziahna dar ho zawng khi ka hralh vek dawn :twisted: :mrgreen:
Report this comment
November 11th, 2010 at 4:48 pm
Ava ngaihnawm ve.. Vai kan tih te hian Ram hi an lo hmangaih zia chu heta tang pawh hian a lang chiang khawp mai… Post tha leh AWMZE nei tak a ni e.
Report this comment
November 11th, 2010 at 4:50 pm
badboy chu va ngaihawm ve
Report this comment
November 11th, 2010 at 4:53 pm
R.Lalropui, nang deuh a lawm le ngaih awm, i va reh vung2 ve, khawilam ah nge in hur bo a :twisted: :twisted:
Report this comment
November 11th, 2010 at 5:00 pm
I la ngai reng ani maw? :lol:
Report this comment
November 11th, 2010 at 5:03 pm
#12: nangpawh ila ngai reng a nih kha khawilamah maw in hur bo a :twisted: :twisted:
Report this comment
November 11th, 2010 at 5:06 pm
@12 & 13___In va han in hrechiang hmel ve a…. :lol:
Report this comment
November 11th, 2010 at 5:08 pm
Performance Monitoring and Evaluation System i tih khi kan tlakchham pawi tak a ni awm e. State sawrkar in beng han chhi se a va tha ve mawle. Pawisa tamtak kan hmanna kan evaluate leh dan hi department level deuh chauh ni maiin ka hria a, a tawk lo a ni e.
Report this comment
November 11th, 2010 at 5:16 pm
@Zoa Tlau, bengvarthlak hle mai, Petroleum royalty chungchang i rawn sawi fiah hi alawm awm hle mai, hmanni a news kha a kim chan loh deuh vangin ngaihpawlh tawk kha kan lo awm nuk a.
Petroleum laihchhuah chunngchang ah hian kan fim khur angai hle in ka hria, Kan thenawm state Assam leh Tripura ah pawh tam tham tak an lai chhuak tih kan hria a; mahse an state hian eng tiang tak in nge hma an sawn pui a, mipui nawlpui hian an chhawr tih te hi zir chianna awm thei se atha hle.
Report this comment
November 11th, 2010 at 6:39 pm
State hausakna hi central hausakna a ni a, state policy implement-na kawngah kan sum bawm chu central nimahse kan intodelhna kawngah state hian a chanvo a hauh nat ve deuh a ngai a ni.
Kan ram chhung ami tuialhthei chu a neitu state kan nih ang 12.5 ngawt chu a bei tham deuh a ni. Survival kan bei anih chuan kan survive-na turah nawr ngai chu huaisen taka kan nawra mahni tanghma pawh kan ngaih ve a tul ngei ang.
Kan ramah hian hna thawh tum tak tak politician hi engzat nge awm ang aw? Sum neih vang leh hausakna leh power duh vanga politics a zuang lut hi an va tam awm e aw! An thiamna ram tana chhawrnahawm tur ni lo, politics a senior, sum leh pai nei deuh leh intihlar thiamna avanga MLA a tling ve ta mai hi engzat tak awm ang maw? Kan ram hian politics thiam kan mamawh lova, ram siam duhtu leh a ngaihna hre chunga a taka thawk thiam leh thawk peih a mamawh a ni. Hetiang mi hi ka hmu tlem khawp mai.
Report this comment
November 11th, 2010 at 7:39 pm
Entawn tur kan va ngah tak ve aw! Kan state ah pawh hian kan la kalpui ve turah lo beisei phawt teh ang. Good post.
Report this comment
November 11th, 2010 at 7:40 pm
@ muantea, Adik tho mai thahnem kan ngai tur ani. chutuh raula chuan, Royalty chungchang ah hi chuan,kan state in anawr thiam vanga chang tam tur kan ni chuang miah lova DGH hnuaiah mumal taka dan NELP guidelines a awm vek vangin central in a siam tha anih ngawt loh chuan kan duh zah lo bithiah ngawt kha thil theih anih hmel loh.
Kan thenawm Nagaland pawn 12.5% hi tlem an tih avangin Company ho an lut thei thin lova mahse tunah tak hi chuan an in chhir tih thawm ka hria, ka chiang chiahlo.
Ka rilru a lian tak erawh chu, kan thenawm Meghalaya ah te pawh ram leilung hausakna atam em em a, mahse a ram mipuite an kan vak na pawh kna hre lo chu anih hi; keini ram ah pawh hian OIL hi lo tam ta teh reng pawh nise kan ram hruaitute sawi ang a sekibuhchhuak ang chauh hi chu ani dawn ami chu aw ka ti deuh zir chian ngai in ka hre khawp mai.
Report this comment
November 11th, 2010 at 7:59 pm
Vlchinzah, i dik, mahse guidelines pawh hi siamchawp a ni a, constitution pawh amendment siam a nih thin ang hian amendment siam thei tura inthuruala kan nawr a ngai a ni.
Kawlphetha siam nana tuikhuah siam hian ram a tihchhiat nasat zia te hi kan ngaihtuah ngai em? Tuikhuah te chi, engmah ni tham lo, eirukna tham nisi kan siam kan siamte hi bansanin kan intodelhna tur ngei pahnih khat chauh siamin kan ram kan humhalh a ngai ka ti. Mihring kan pung zela ram erawh a pung ve thei si lo.
Report this comment
November 11th, 2010 at 8:18 pm
#20, Adik chiah alawm,Lui lian te kan ram min chawmtu chu sawi loh kan hralh chhuah theih ngei tur te hi khuap ila tha tur, Lui te kan sawi hnawnna ni lo se, amahpawh in chawm zo tawk tawk tur hi kan khuap a buaithlak tak ani.
Mipui kan harh a kan sawrkar hi kan kar thiam angai tak zet in ka hria.
Report this comment
November 11th, 2010 at 11:12 pm
I rawtna khi a tha khawp mai. Khitiang rawtna khi tipuitling ngam sorkar neih a va chakawm ve..
Report this comment
November 12th, 2010 at 5:14 am
Mizo te hi taima rinawm thawpui nuam Pathian tih mite hian minti sela ka ti ve fo thin. thawnpui nuam tia National levela EEC-a Zofate min han puang ta mai hi a va lawmawm em
Report this comment
November 12th, 2010 at 8:43 am
Zoa:Vaiho chu bahlah awm miah lo in an dak thei em..an thiam em em vang pawh a ni hran lo.An zak thei lo hrim hrim. An zahtheih loh leh tawng theih a zarah Miss World te poh a kum zawn ten an tlin vel kha hman deuh khan.An zak thei lo em vai ho chu.
i rawtna khi a tha khop mai.mahse mizopa chu vaipa anga tawng zawt zawt tur chuan beisei chi a ni hauh lo ang..kum 45 a pelh tawh phei chuan.mizo pa in a hriat loh vang ni lo in, kan tawng muang em avangin.
Report this comment
November 12th, 2010 at 9:13 am
Post bengvarthlak tak a ni e.
Pi Mamata Benerjee thusawi vel leh zawhna a chhan dan vel i sawi khi a tak tak a nih chuan a va ngaihsanawm leh zual em! Ka chhiar laiin kan ram Minister-te ka rilru-ah an lang uar uar mai…
Report this comment
November 12th, 2010 at 9:17 am
@burgerstud2005, mzvision, vlchinzah etc. in ti lawmawm khawp mai in lo chhiar peih a, a sei sei nen, he post hi H. Laldinmawia, The Zozam Times nena kan ziak a ni a, kan pahniha kal kan ni.
Vai-ho trawng theih chungchangah chuan sawi ve hrim hrim hi an tum a, a buaithlak angreng. Awmze nei vak lote pawh an rakpui chiam a, minister-in an zawt let a, an dang leh der roh si.
Pakhat phei chuan railways chungchangah ‘incident’ engzat nge thleng tiin a zawt chiam a, eng ‘incident’ tiin an zawt let keuh a, a dar der bawk.
An duh an sawi chiam chiam a, thriante an ngaichang lo. Hei hi vai inchuh leh huamhap zia a ni ber mai.
Tlai lamah Oberoi lamah dinner an siam a, hei hi chu off the record
Mizoram mipuiin min thlawp an ti a, mahse awareness kan neih a ngai. Oil hi kan ram leilunga awm a ni a, a leilung neitute hlawkna tel lo chuan laih loh a him, corporate leh sawrkar hi tunlai khawvel awptu an nih tawh hi. Indigenous rights-ah pawh chanvo kan neih kha…
Tlak ve leh duah teh ang…
Report this comment
November 12th, 2010 at 9:47 am
Ni e…. An dak par par theih vanga hre hle tur emaw thiam hle tura ngaih ngawt chu a fuh chiah lovang. Mizorama computer thiam riaua anhriat te chu type rang thei deuh ho anni maia [eng master degree poh neila, i type ran loh chuan an ngaisang vak lo ang che
] Hetiang nen hian a in ang reng.
An deptt. chan an tui em vang emaw an luhchilh tak meuh avanga dak par par anni kher lo thei. Khatia bahlah awm map lova rik par par kha society + religion + politics atan a pawimoh miau a. Anlo hre tak tak anih chuan a lawmawm hle thung ang. Eng point nge a sawi kha a pawimawh ve riau.
Mamata ngat phei hi chu a dak thei sa ve hrim hrim. Railway budget a siksawi dan te kha a ngeiawm. An state tan over khawp in a che ve ziah. He nu hian railway hi a tui pui takzet ka ring thei lo. Politics khelh nan leh CPI ho kher nan railway deptt. a hman nasat zia te hi!! Hman kum engtik nge sorkar lai an thlawp a, railway an chan tir bawka. Budget a duh tawka a chalai hnu ah sorkar a thlawpna a hnukdawk leh daih. Ngeiawm tak a ni.
Report this comment