mi(sual).com

Tungchhova kal mihring te hian thil nihphung kan man fuh lo fo thin a. Ni tura kan ngaih ni tlat si lo te, ni theia kan ngaih ni thei tlat si lo te a tam thin.

Mihringin kan zawn thin langsar ber chu ‘dam chhan’ a ni a. Hei hi mihringin kan thelh lian ber anih loh vek chuan hmuh theih si loh hmuh tuma kan zawn nasat ber a ni talin a rinawm.

Mihring hi eng atana siam nge kan nih le? Chhanna hrang hrang a tam ngawt ang a. Chhanna dik pe thei erawh kan vang hle ang. Mi tam ber hian mihring hi dam tura piang emaw kan nih kan ti a, hei hi a diklo tawp a; mihring hi thi tura piang kan ni zawk a ni.

Mi pakhat inawhhlum tumin thuziak a hnutchhiahah, “Dam chhan tur ka hmu zo tawh lo a ni,” tih a chuang niin an sawi a. Kan naupan laia thil thleng a ni tawh daih na’ngin khatih lai atang khan he thuziak hi mak ka tiin dik lo ka ti hle thin a. Hun tam a liam hnu hian dik lo ka ti zual tawlh tawlh a. Hetiang thil letling hi a awm tawh lohnan khawvel hriata thudik puan a tul a ni.

Kan thian pakhat lehkhathawn ziak chuan, “Ka dam chhan ka luah zawh si loh che chuan ka..” a ti pek a. Kan han inhauh tak tak kha. Keiin “Dam chhan i lo zawng a ni maw? Mihring hi dam tur ni lova thi tura siam a lawm kan nih” ka ti a; ani’n, “He khaw pumpui hi fang chhuakin pastor atanga zu zuar thlengin zawt la ‘dam chhan’ zawng vek an ni ang” a ti thung a. Mawl inti ve ve chu thinrim deuhthawin kan inhnial pek anih kha.

Anih leh dam tura siam leh piang chhuak ni ila engahnge kan thih ang? Chuti anih chuan thihna hi a awm miah tur a ni lo. Dam tur nilova thi tura siam leh piang kan nih avangin kan thi thin a. Mihring kan nih chhunga kan chanchin langsar ber thin chu kan ‘thih chhan’ zawk a ni a. Mi an thih reng rengin emaw, kan hmelhriat thin thih tawh thu miin min hrilh reng renga zawhna kan inzawh thin pawh an ‘thih chhan’ a ni tlat.

Chuvangin mihring hian he thudik hi hriain ‘dam chhan’ zawng lovin ‘thih chhan’ tlak kan zawng zawk tur a ni. ‘Dam chhan’ zawngtu chuan engtikah mah dam chhan a hmu zo dawn lo a. Thil awm thei lo ‘dam chhan’ a zawn avangin hmu thei lovin mangang leh lungngaiin a taksa in a rawih phah ang a, dam chhan hmuh zawh loh vangin a thi ang a. Engtikah leh eng hunah pawh, engvang pawhin thi se mi hlawhchham a ni dawn a. Thlarau khawvela a luhpui tur chu ‘hlawhchhamna’ niin hmel dur khupin mitthi khua a lut ang.

‘Thih chhan’ zawngtu erawh chuan thihchhan tlak ngeia a ngaih hmanga a mihring pui te rawng bawlin a zawn chu a hmu ang a. A tum leh duh dan ang chiah ni lo pawhin engtikah leh eng hunah pawh, engvang pawhin thi se a thih veleh ropuina lukhum khumtir a ni ang a, mi ropui leh entawntlak niin a thi ang a. Thlarau khawvela a luhpui tur pawh ‘hlawhtlinna’ a nih ngang loh pawhin duhthusama thil ti zo hman lo, mahni tih china lawmna nasa tak a ni ang a. Mitthi khuaah nui sangin an lo lawm lut ang.

Kan pasaltha ropui Chawngbawla khan sa leh ral laka Lal leh a mihring pui te thlamuan kha thih chhan tlakah ngaiin a bei vak a. Natna khuma a boral dawn pawh khan natna kha thihchhan tlakah a ngai ngang lo tih kan hre vek. Mahse thihchhan tlaka a ngaih a beih vak avang khan tun lai thleng mai ni lovin mihring awm chhungin ‘pasaltha’ ropui a ni reng ang.

Zalenna sual laia kan hnam pasaltha te khan kan ram leh hnam tana beih kha thihchhan tlaka an ngaih avangin thang thar zelin kan fak tulh tulh a; mahni pumpui puar nana pasaltha te thisen dawt duh ‘kawktu’ te erawh thang thar zelin kan hmusit tulh tulh a. Kan pasaltha te chu thi tawh mahse an thlah te leh an thisen zawmpui te thlah te chuan an chhuang em em a; ‘kawktu’ te thlah leh an thisen zawmpui thlah te erawh chuan an thlahtu te chu anchhia lawhin an zahpui ngawih ngawih tawh a, an la zahpui zual zel dawn a ni.

Khawvelin tunge a ngaihsan? Hruaitu ropui leh engemaw tana nun thap ngam chin vek a sin… Mahatma Gandhi… Mother Teresa … Napoleon Bonaparte … Adolf Hitler… Mosia … Isua … Sawisen an ni lo. Chung mi te chu anmahni pumpui puarna ni lovin thihchhan tlaka an ngaih angin an nung thin a sin.

‘Kamikaze’ hi engvangin nge khawvelin a ngaihsan? ‘Crusader’ te kha engvangin nge kan ngaihsan? ‘Martar’ leh ‘Jihad’ hi engvanga ropui nge?

Mi ropui nih duh lo tunge awm thei ang? Nang khan mi ropui nih duh siin dam chhan i zawng duk duk ang maw? He khawvela i awm chhunga i duh tihhlawhtlin tumin i phar buai ang maw? I taksa nawmna tur ngaihtuahin in leh lo leh ram zau pui pui i lungkham maw? I tisa chakna hrikthlakna tur melhin i buai nileng ang maw? Chung zawng zawng nei thei Lal Solomon-a khan enge a sawi kha? I taksa damna tur zawngin he khawvelah hian i van ruai ang maw? Bible in engtin nge mihring dam chen a sawi?

I taksa kha kumhlun tur ni lovin ni rei lo te atana pangpar lo par ang lek a ni a, eng ang pawhin nungin inenkawl la i thi tho tho dawn. I pumpelh hauh loh tur awmchhun chu thihna hi a ni. Dam tum engang mah la i thi dawn tho tho tih hria ang che.

Engchen nge kan dam ang le? Kum 20, 30 … 100 emaw a aia tam pawh a ni thei. Tuman kan sawi lawk thei lo. Amaherawh chu hei hi a chiang – kan dam chhung hun hi chatuan atanga teh chuan a rei lo lulai em a ni, tih hi. Kum engzat pawh dam i la kan dam chhung hun aiin kan thih hnu hun a rei dawn a. He leia reilo te kan dam chhung tur chauh kan thlir chuan hun lo kal leh tur ata theihnghilh kan ni dawn a. Hun lo kal tur atana dam reng turin ‘thih chhan’ kan zawn a ngai a ni.

Kum tam liam ta ami tun thlenga kan thinlunga la dam leh thangthar zel te thinlunga dam reng tur mihring te khan enge an tih? An dam chung rei lo te lungkham lova hun lo la awm tur an thlir a, thih chhan tlak thil ropui an tih avanga la dam asin an nih.

Hawh u, vawiin atang hian, kan zavaiin he dam chhung tawi tea kan nun dan tur leh kan nawmsakna tur thlir lovin, kan thlah te leh kan ram leh hnam damna tur te, kan Pathian ropui zual zel theih dan tur te thlirin, dam chhan zawn bansanin thih chhan tlak, hun lo la kal zel tura kan dam reng theihna tur tih tur i zawng tawh teh ang u.

Similar Posts:

• Enge Kan Dam Chhan
• Thih Hnu Awmdan Mawi
• Zoluti
• Thihna
• Thihna

Recent Posts:

• REINCARNATION LEH DEJA-VU
• Mizoram State Day – Pu Laldenga duhthusam ber thlen famkimna ni a ni ang em?
• Atchilh atthlak
• REISISS!
• Hlawhtlinna kawng

This entry was posted on Tuesday, November 16th, 2010 at 5:10 am and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.