“Rami a awm em?” tih leh an in chhunga luh kan rual a, nula kan rim chu a ni ta der mai. Lal Isua dam chen zet lo tlangval ve tawh mah ila, chhingmit kawpza a dul thei bawk si lo: Nula hmel keu ve deuh chu ‘I rim ang hmiang” kan la ti zel dawn a nih hi maw!
Thingtlang nula rim hi a dangdai danglam ve riau a nia. Justin Bieber leh Lady Gaga te chanchin sawi a tul lo a, thawmhnaw changkang inbel leh englo rimtui inphuh a tul ve lo. “Ka pheikhawk hi USA atangin ka putea min hawn a nia” tih a tul ve lo.
Rami chuan vawk chaw chhum phahin a naute lehkhazir a lo vil a. Vawk chaw chhum so bat bat vilpui phahin an fehna te, sawhthing leh thlawhhma chanchin te kan sawi ho mai mai a, a va nuam tak em.
Rami kan rim laia ka rilru-a rawn lang chu hmelhriat ngai miah lo pawh zanah kan inrim thei zel hi a ni. Chumi piah lama ka ngaihtuahna chu keini Zofa valrualte hi Zawlbuka riak thin nge, nula ina riak thin zawk tih hi a ni. Tlem lai deuh khan misualdotcom-ah nula ina tlangval riak thin angin tuemaw-in a rawn ziak a.
“Hmanah chuan hlimten laichhuat an maw..
Siali hel vala chham ang zal e..
Tual vawk rawl so ri, bawhar khuang nen,
Chiar nghin nghian run kha a chul zo ta…….”
Nula vawk chaw chhum vil, rimtu tlangval mutna thin chhuatpui mam thin kha tunah chuan tlakhawlh hlauhawm khawpa awngrawp a ni tawh a…tih kha a post-tu hre tawh lo mah ila, a hla thu atang chuan Zofa valrualte hi Nula inah kan riak thin tih a chiang thawkhat e.
Ni e, ka theih tawpin ka chhui a, ka chhiar ve a, heihi ka hmuchhuak ta. Nula ina riak thin te, Zawlbuka riak thin te pawh Chhura thlah te kan ni vek tih hi! Zofate hi nula leh tlangval inrim danah kan va zalen em!
Hnathawk ho/inlawm ho phei chu tlangval hnathawh thawmhnaw chenin nula-in a phur vek a, a khat tawkin a lawm tlangval te chu tuibur a theh emaw, a vaibel a bensakin a tankaisak thin. Amaherawhchu, tlangval chuan nula thawh theih loh zawng zawng a thawhsak ve thung.
Lusei te leh Matupi te chuan tlangval riahkhawmna Zawlbuk an nei ve ve a, Matupi te chuan ‘Imhongh’ an ti. Nula ina riak thin Lai (Haka) leh Thantlang tlangval te chuan an mut dawnin an diar chu an riahna nula-in a dahthatsak a, zingah diar chu a sem leh a. Diar a pek sual chuan nula fel lo nih a hlawh!
Lo inngaizawng leh lo inngai an awm ve thin! Mahse a chetsualpui tawh chu a nei ngei ngei turah an ngai a, a neih duh loh chuan misual nun ning, lu zuar tlukah an ngai ve thung. Paite ho ngaihdan chuan nula aiin tlangval a hming chhe zawk a, “Zang huk”, “Zang thak” an inti thin! Pawi ho pawn nula an chetsualpui chuan an nei ngei ngei thin.
Zangiat (Lumbang) leh Tapawng (Pawi) ho phei chu nupui an neihin an puzawnte hnehah nula a lo ngai tawh a nih chuan an hrilh ngei ngei tur a ni. A hrih loh chuan thi turah an inngai a, a hrilh zel thin. Mahse, inthawinaah a tel thiang tawh lo a, fatu-a tel a thiang tawh hek lo.
Lusei te leh Zahau (Pawi) te ngaihdan chuan nula a hmingchhe hle a, mipa a him ve thung! Tlangval chuan a neih duh loh pawh nula ngai nih duh avangin a thlem a thlem a, a zui a zui bawk a. Nula chu lo tang zo ta lo se, “Mi hur”, “Lepchiah” nih a hlawh a. Nula ngai thei tlangval chu miin an fak a, a induh phah sawt a. Lal fanu ngai thei te, unau ngai kawp thei te, nula hnahkhat (virgin) ngai thei te phei chu! Thlanlungah an nula ngaihzat chapo takin an ziak! Nula tan an duh ve em em te chungah pawh fimkhur a lo ngai hle a ni.
“A u, ka mut a chhuak.” ti-a Rami nau au-ri chuan min tiharh a, sana ka en a, zan dar 9 a lo ri ta der mai. Kan haw ve ta nghal a.
Similar Posts:
- A hmui mawlh kha
- A lo nuam ber mai e
- Lungphunna Ruai kil in…
- Krismas Ruaitheh (Pic album)
- A ngai em em che a sin
November 27th, 2010 at 7:08 pm
nula in ah tlangval an riah thin thu khi ka lo hre ve ngai miahlo. Rami han tih chuan a rei tawh hmel e.
ngaihnawm reuh.
Report this comment
November 27th, 2010 at 7:09 pm
tha khawp mai a
Report this comment
November 27th, 2010 at 7:11 pm
ka la chhiar lo. Nia, ka chhiar don reng..
Report this comment
November 27th, 2010 at 7:13 pm
Kei pawh nula ina tlangval riak hi ka la hre ngai lo. Mizo ze pangngai chu a ni lo ang.
Report this comment
November 27th, 2010 at 7:14 pm
A nula nu leh pate hriat lohva riak erawh chu…thu dang! :twisted:
Report this comment
November 27th, 2010 at 7:26 pm
Thingtlang nula rim hi a dangdai danglam ve riau a nia. Justin Bieber leh Lady Gaga te chanchin sawi a tul lo a, thawmhnaw changkang inbel leh englo rimtui inphuh a tul ve lo. “Ka pheikhawk hi USA atangin ka putea min hawn a nia” tih a tul ve lo.
i rim dan thin a mak em mai a
Report this comment
November 27th, 2010 at 7:26 pm
i thawnthu maw kan chhiar dawn ka tia, a bengvarthlak zek.. ”pah” tih tur ah phah vawi 2 ngot i hmang.
”siali hel vala chham ang zal e”..nula rim pahin relax deuhin chhuatah an mu vel niang chuu! :mrgreen: riak lem chuanglo in..hihi
Report this comment
November 27th, 2010 at 7:26 pm
Ngaihnawm hle mai. A mizo raih mai. He Article ka chhiar lai hian kan U Biaka thil min hrilh ka hre chhuak zawk mai. A tia lawm. Kan tlangval lai te kha chuan tun ang hian thutthleng awm hek lo. Mitthi an han awm a, Phulraw chhuat nawhtlian halh mai hnuaiah khan chhuatah Nula nen kan han thuhova, nula kha kan kapkalak ngei a. Tunlai angin eng awm tha hek lo, Tapchhaka Mau alh kha a ni mai a. Bialnute hnungah, Buthupuan ngei kan han bat a. Buthupuan hnuaiah zai pahin hmaa Nula hnute kan han khawih them them mai chu…. Kan bialnute chu an zai sual ul ul mai alawm a ti.. :lol:
Report this comment
November 27th, 2010 at 7:31 pm
Nula inah tlangval an riak mai mai lo ang,tunlaiah pawh an riak mai mai lo a nia…an zalna laichhuat te hi chu nula rim tlangval ho bawh zal na(thuthleng nei ve vak hek lo)a niang e.
Nula rim hi chu a nuam ve hrim hrim.
Report this comment
November 27th, 2010 at 7:38 pm
Ron ti ngaihnawm fu mai ! Mahse mizo history/culture ka hriat ve-ah chuan engemaw damloh/chhiat tawkte an nih ngot loh chuan tlangval nula inah an riak mai2 lo thung !Rim erawh chu tu nula pawh an rim thiang a,ar khuan dan pawh..’lenglen ar’, leng hawn ar’ tihte anih hi a!
khan a ti ta in ka hria !…. :mrgreen: 
8O
Amaherawh, sawidanah chuan tlangval kha khawdanga mi ni sela..la innei rih lo mahse inneihngei an tum tawh a, nu leh pa hriatpui meuha lo in ngaizawng tawh annih chuan chhuatah ‘zawlpuan’ an phah a, an mu dun thin a …tichuan an innei zui ngei2 thin ! Zawlpuan phah zeta nei duh leh si lo an awm chuan, sepui an chawitir thin..Pu James Dokhuma
Report this comment
November 27th, 2010 at 7:45 pm
ZerO chu i ziak ngaihnawm hle mai, hriat sa ngaihtuah chhuah ngai meuhloh nen i rawn phawrh a rilru i ti thar e.
I ziak pakhat, “Pawi ho pawn nula an chetsualpui chuan an nei ngei ngei thin.” tih hi a fair ka ti khawp mai. An neih loh vek pawn chawi an nei teuh thin, neilo erawh chhiar tham lek an awmin ka ring. Lusei ho zingah chuan hetiang lamah, Sawn man pek bak hi a awmlo a nih hmel.
Leng khua, Sailak (Sailulak), Darlawn tlangdung vela nula vawkchaw chhum kan rim ve thin lai kha hehehhe. Thingpui kha tapah hem sat reng alo ni bawk nen, kan thli chhen mai mawle
Report this comment
November 27th, 2010 at 7:51 pm
#11..khaih… pawisa mumal awm hma khan sawn man chu tangka sawmli ani e…ka lawm e…hairehai
8O
Report this comment
November 27th, 2010 at 7:52 pm
loneeagle26016 #12 a nilo kan ti hleinem hairehai :mrgreen:
Report this comment
November 27th, 2010 at 7:53 pm
Ngaihnawm hle mai…
“MAtupi” i tih hi Chin state a mi kha ni em aw..??
a nih loh chuan ka hre miah lo.
Report this comment
November 27th, 2010 at 7:56 pm
@13…ilo edit hman nge ka chhiar sual zawk aw….lol…a tam tham em avang hian ‘ba’ hi chu an awm thin an ti… :mrgreen:
Report this comment
November 27th, 2010 at 8:05 pm
ka edit lo ale ale
kilung, Matupi chu Mizoramah chuan Matu kan ti. Matupi chu Lai (Pawi) ho koh dan Matupui tihna a nih hmel. Lai (Pawi) tawngin ‘pui/tui’ ang te hi Pi/ti’ tih a ni.
Report this comment
November 27th, 2010 at 8:05 pm
A ngaihnawm dan a dangdai hle mai. Thuziak tha tak a ni e.
Nula han rim a, pa ber in emaw, ‘choka lamah lo va inkawm teh u’ a tih ri tluk a mawi hi avang khawp a sin… :lol:
Tunlai chuan tlangval in nula rim lo in, nula in tlangval an rim tawh zawk tlat a ka hriat… :roll:
Report this comment
November 27th, 2010 at 8:07 pm
@16____chhingmit kawpza alo dul deuh anih dawn chu..hairehai :mrgreen:
Report this comment
November 27th, 2010 at 8:11 pm
Thingtlang nula rim hi a dangdai danglam ve riau a nia. Justin Bieber leh Lady Gaga te chanchin sawi a tul lo a, thawmhnaw changkang inbel leh englo rimtui inphuh a tul ve lo. “Ka pheikhawk hi USA atangin ka putea min hawn a nia” tih a tul ve lo.
Thingtlang nula rim chuan Aizawl chanchin sawi a ngai ve thung a lawm… Justin Bieber-Lady Gaga aiah Idol/Icon tih vel, LPS pro-fight chanchin te…. Incheina pawh Millenium Centre/Solomon’s Cave atanga lei, an nin Bangkok or Thailand vela an lak a nih thu te pawh sawi a ngai ve zeuh2 ang chu… :roll: :mrgreen: :lol:
Report this comment
November 27th, 2010 at 8:18 pm
loneeagle26016 #18 Serchhip Chhimvengah kawm thin a nei chiangin ka ring hahahha.
Chhimveng tawngkamthenkhat:
Chhingmi kawpza rul = mut chhuak
Kawr ha hmin tek tek = kawr sen ha
Kawr a hel tek tek = kawr hring ha
Chhipchhuan hel (raw) = Excise (lukhum hring)
Per rum (vroom) = bike khalh etc etc
Report this comment
November 27th, 2010 at 8:21 pm
Pu Hv, kan khua ah poh khian matu tlem chu an awm ve a, an lo kal na kan zawh hian matupui/maturam/matupi te an ti sia, chu chu Burma chin state awm ania an ti ve bok sia… Kan buai deuh lom le….:D
Report this comment
November 27th, 2010 at 8:26 pm
@20____ nei tho a, mahse ‘chhingmit kawpza’ tihlai tak hi chu LPS ho profight comment ron tihchhuah alom male..hairehai
Report this comment
November 27th, 2010 at 8:27 pm
kilung, Halkha khaw mi te Halkha kan ti ang mai hi a ni awm e. Matupi/Matupui chu Sountern Chin hills a county pakhat Matu county a an khawpui hming a ni; Chin hills ah hian county 9 a awm. An khaw hming chawin Matupi ho/Matu ho tih an ni mai thin.
Report this comment
November 27th, 2010 at 8:28 pm
kei chu engmah ka sawi vak ngai leu….Pa hi min ti em em mai ni.. :mrgreen: :lol: :mrgreen:
Report this comment
November 27th, 2010 at 8:37 pm
Pu Hv, a nih chu a…
Van hre thui reng2 ve a, google niang a.. :lol:
Zohnahthlak ah chhiar theih ve tho lo maw..
Report this comment
November 27th, 2010 at 8:46 pm
Nula chu ‘date’ tur ani a, rim tur ani lo
Report this comment
November 27th, 2010 at 8:57 pm
Kei pawh ka hriat danah Nula Inah tlangval an pawngpaw riah ngawt ngailo, tlangval nikhua lo deuh chhuata lo tlu zal muhil te pawh nulain an menpui hram hram thin, an kai harh ngam ngailo. Riak ni chiah lo, “Mikhual nula zen” risk sang tak an sawi erawh ka hre ve thin, hei erawh zan mut hnu a khawtual tlangval chet lakna a ni.
Arunachala hnam pakhat pawh tlangvalin nula a chetsual pui chuan neih ngei2 tur ani, neih duhloh chuan sial engemwzat chawi a ngai an tih ve tak kha maw le.
Report this comment
November 27th, 2010 at 9:02 pm
Chhingmit kawpza rul tih hi chu LPS pro fight hma pawhin ka hre daih tawh :insawithei:
Hman lai Mizo tlangvalte nula inah an riah ngai ka va hre lo em. Nula rima an len erawh chuan nula la kaihna bulah emaw banah lu do kangin an tlu zal thin. ‘Siali hel vala chham ang zal e..’ tih hian an riak thin tih a kawk kher lo. Nula rim chhuatthlanga tlu zal a sawina a ni zawk ang. Thutthleng ilo an neih pachhiat deuh thin avangin a then chhuatah an thu sawp a, a then an tlu zal thin.
Report this comment
November 27th, 2010 at 9:12 pm
Muantea hi ka lo thlawp lawk teh ang. Mizo History te hi kan phulpui ve leh hlut thin a. Hmanlai mizo tlangvalte kha nula inah an riak ngai lo tih chu sawi tulah pawh ka lo dah ngai lova, mahse, tarlan chian deuh a ngai a nih hi – an riak ngai lo :). Tunlaiah hian, khawpui lama awm hi an riak zeuh zeuh tawh zawk
Hla pakhat atanga a landan ngawta kan mizo nunphung judge leh conclusion siam chu a fel lovang. He hla pawh hi han bihchiang ila..hmanlai khan, nula rim, a ngampa deuh chu khumai ah te pawh an tluzal thin a, tin chhuata lo tluzal tawk pawh an awm thin ni ngeiin a lang bawk a. An riak tihna a ni lem lo.
Report this comment
November 27th, 2010 at 9:14 pm
kilung, min zawt zel rawh
muante #28 chhingmit kawpza…. late 80’s vel kha a lar vanglai a nih hmel hairehai
Report this comment
November 27th, 2010 at 9:20 pm
Ngaihnawm khawp mai.
coolsoul09,#29 Dik khawp mai. Kei paw’n hriat ka nei.. :lol:
Report this comment
November 27th, 2010 at 9:23 pm
ka nula rim chuan zualbonez hi ka thianpa ania ka ti zel…tlang a awl duh khawp mai
:mrgreen:
Report this comment
November 27th, 2010 at 9:33 pm
Lunglen i pawt tho ang tih a va han hlauhawm ve le lalZero.
Sipai chhuti nula rimpui chu thuk bulah te hian nawalh an nawt alh phur phur zel.
Lacknow atangin ngunte an rawn hawn tawh chuan chan a bo duh khawp mai hahah. :roll: :roll: :roll: :roll:
Report this comment
November 27th, 2010 at 9:35 pm
Zero chu ziak ngaihnawm hle mai. Nula ngai lo pawlan a sai an ti. Heta pawla hi tunge ni ang aw? Pialral gate vengtu a nih duh hmel. Hmanah chuan nula ngaih chu pialrala luh na, tunah chuan luh lohna. A in opposite hle mai.
Hmanlai khan an in kiss ve ngai angem le??? :mrgreen:
Report this comment
November 27th, 2010 at 9:47 pm
@HV, Chhingmit kawpza rul leh a dang tam tak tawngkam te kha R.Kapmawia(volley ball player) leh Lawmthanga(lawmvala) te chher a ni ber. Veng dang pa hoin tawngkam mak sak deuh an chher ve pawh hian Chhim Veng tawng an ti zel bawk a
Report this comment
November 27th, 2010 at 10:43 pm
Zero chu, ziak ngaihnawm khawp mai! ka thil hriat ngai loh ka hriat belh phah teuh mai! A lawmawm thlak e!
Report this comment
November 27th, 2010 at 10:59 pm
ngaihnawm ve
Report this comment
November 27th, 2010 at 11:29 pm
@HV, pawih i ni lo hi vannei i in ti awm..lolz
Di nei lo Pawla’n a sai an ti fam mah ila mi sai bil lo’ng nge. Kei hi mi sai a ngem le???
buaithlak mipa tan ngaih a ngai hmeichhe tan in ngaih tir loh a ngai pipute pawh hi an ngaihdan hi buaithlak eeeeeee
Report this comment
November 27th, 2010 at 11:35 pm
Thingtlang nula dawhthleng a lungthu tlawhchhan a han fawh phar huang huang mai hi chu ngaih hi a la tha riau a sin! khawpui nula bei nghal thlap thiam ai chuan! :lol:
Report this comment
November 27th, 2010 at 11:40 pm
In nula vawkchaw chhum hi a rit si a, in haw dawn hian suan thlak sak nachang te chu han hria ula a lawm dawn nen……Lusei zingah chuan nula ina riah chu thil tih saloh-ah kan ngai a. Zohnahthlak dangte chu riak thin an awm tih min hrilh hi a bengvar thlak bawk.
Report this comment
November 27th, 2010 at 11:52 pm
Hmanah kan thenawm nula bialpa an ina riah ruk tum rukru emaw ka tia, au ri chuul in ka um sak vak tawh. An zak lutuk…mahse keimah ka zak nasa zawk :lol:
Report this comment
November 28th, 2010 at 12:18 am
@Pi bmw: Van che luck em em!
OT tawp nan, Naktuk ah Port Louis (Mauritius) panin ka chhuak dawn.. mi(sual) MI pui tur in awm em? :intithei:
Report this comment
November 28th, 2010 at 2:19 am
ZeROs ziak ngaihnawm thiam ngei mai a!!
Report this comment
November 28th, 2010 at 3:37 am
#17 dik hmel khawp mai.. :wink: keipawh nula ka rimloh na chin pawh ka hre tawh lo e.. :kur3:
Report this comment
November 28th, 2010 at 8:10 am
i thil rawn ziah mai mai chu lung i ti leng hle mai
Report this comment
November 28th, 2010 at 8:39 am
Tunlai chu internet ka hmang thei lo zeuh zeuh a, a va ninawm thin em!
Report this comment
November 28th, 2010 at 8:41 am
tha thei eeee
Report this comment
November 28th, 2010 at 10:38 am
@Saitawk#39, in nuin a chhiar palh ang e aw!! Tawmgkam thiam bak baka phat leh ruai kha a ngai ang e!! :lol:
Report this comment
November 28th, 2010 at 5:38 pm
“Hmanah chuan hlimten laichhuat an maw..
Siali hel vala chham ang zal e..
Tual vawk rawl so ri, bawhar khuang nen,
Chiar nghin nghian run kha a chul zo ta…….”
He i hla rawn lak chhuah hi Zirsangzela (fam) hla phuah ‘Luah Loh Run'(?) tih a mi kha ni in ka hria. Keta ‘chhamang zal’ a tih hi ‘riak’a tihna a nih ka ring lo. ka hma a mite sawi ang khian hman lai chuan thutna an neih tam lem loh avangin chhuat laiah an thu ho maia, a tlangnel fal deuhte chu an mu zal mai thin a niang. Tin, awllen laia nula chhun puantah an rim pawhin an bulah an tluzal ve mai thin ni turah ka lo ngai ve ngawt a.
Hman laiin nula ina tlangvalk an riah thu an sawi ka hre ngai lo, tun lai hian an riak ta zeuh zeuh zawk awm e, misual zingah pawh hian nula ina riak thin an awm chiang :lol:
Report this comment