mi(sual).com

— Zirsângkima, May 29, 2010 (5.10 – 10.25pm)

Mím Kût thla laihàwl a ni a, ruah pawh a la súr duh buan buan viau mai a. A cháng chuan zíng lamah khua a thiang vuk a, chhùn lamah a sûr leh chiam thin a; a cháng leh zíng atangin a bei ngat ngat a, tlai lamah khua a rawn êng leh uar ang thin lawi a. Inchei sual awl hun lai ber a ni ngei ang.

Vàngpui tlai khaw nêm duai hnuaiah
Inrinni a ni a, ‘Ka chawlh ve ni alawm,’ tiin ka chhùn mut a. Ka mu tui ngang a niang, ka harha sana ka’n en chuan tlai dár li a lo pèl dêr tawh mai a. Khua chu a thiang vuk mai a. Kan pindan tukverh chu ka hawng a, favàng tlai khaw êng no mawi leh duhawm tak mai chuan min tiharh sawng sawng a, tlai ni ném duai maiin kan kawmthlanga khiang thing a chhun tlêt siaute chuan ka lung hi an ti-awi hliah hliah mai a ni.

Kawmthlang tualzâwla naupangho infiam chu an ri chèl chûl mai a. Chutih lai chuan ka rilruah ka fapa a rawn lang zawk a. A piancham September 19 pawh kár leh a lo ni ta reng mai. Engtinnge kan lawmsak ang tihte ka ngaihtuah neuh neuh a. Chutih rual chuan kum ruk mi lekin zawhna chhàn harsa pui pui min zawh thinte chu ka rilruah an rawn lang zut zut bawk a; tin, ka chhàn thin dànte nen.

(more…)

Mi hmasa te’n mual an liam a, mi thar an lo chhuak zel a. Par chuai chu kuhmum-in a thlak a, hnah vuai pawh chawrno-in a thlak thin a. Khuareiah Chulram chu hring hmun a lo ni a, tuikhur ro pawh a lo khat-liam leh thin a.

Khawvel leh a chhunga thilte hi nitina danglamin, mitkhap kar lekah a inlet but but a. Thil siam tinrengte pawhin an ze hlui leh tha lo laite hnawlin, ze thar/nihna thar nen mawi takin par an rawn chhuang leh thin a. Chutih laiin kei erawh, keimaha thil tha lo awmte hnawl thei lêk loin kum hei chen hi ka awm ta! Khawlohnaa dinin ka awm a, khawlo taka khawvel chhuahsan erawh ka duh hlauh si lo. Thlarau khawvel ka thlirin, thlamuanna reng ka nei lo a!

Nun thar nei turin thinlung thar ka mamawh a ni. Ìtna, Chàkna, Hûrna, Ìtsikna leh khawvel thil bawlhhlawh tak tak te’n a chiahpiah ve loh- Thinlung thar! Mahse, Ani chuan– “He leiah hian thil tha lo reng reng ngaihtuah ngai lo, sualin a tihbuai loh leh thlemnain a ngam loh thinlung thar ka pe tawp lo ang che u. Chutia’ng chu Van-a in chan tur a ni si a. Tin, in damchhungin Hurna te, Ìtna te, Chàkna te hian a chhuahsan hek lo ang che u.

(more…)