‘A mi tan e sênlai mah chang sela,
Kei ka tan e, lenglai bungdawn ka tuai a tliak e’
Han Chhiar Ve Teh……
Mizote hian pipute chhan ata thihna sawi dan chi hrang hrang kan nei a. Sarthi, Awmlai, Zachham lak, Hlamzuih, Raicheh titein thliar hran a ni. Hlamzuih-a thihna hian vawiin thlengin Mizo khawtlang leh kohhran ala thunun reng a, hmanlai pipute ngaihdan zulzuiin kan la kalpui ta reng a, a bak thihna hming dang erawhchu kan Kristianna leh kan tunlainain a umbo ta a ang hle. Chuvangin hlamzuih kan sawngbawl dan hi ngaihtuahnawn(re-thinking) a tul ti zawngin ka sawi dawn a ni.
Hlamzuih tehfung:
Hmanlai chuan nau, a pian atanga kum thum a tlin hmaa thi hi hlamzuih an ti (Pi Puten Thihna leh a Piah Ram an Thlir Dan & Thu leh Hlaa a lan Dan by C. Vanlallawma in Pi Pu Zun Zam, phek -204) Chumi awmzia chu ni 1095 zeta upa tawh pawh hlamzuiha chhiar an ni thin tihna a ni. Tun meka YMA-in Hlamzuih a hrilhfiah dan chu ‘Mi, thla thum(ni 90) hnuai lam a thih chuan hlamzuiha thi a ni ang’ tih a ni.(cf. Central YMA Chhiatni Thatni Inkaihhruaina, phek-11) Hei hi Mizoram puma hlamzuih chungchanga kan tehfung inhman tawm a ni.
Hlamzuih awmzia:
Nau a pian hian Nu pum atanga nau rawn tuamtu a awm a, chu chu nau hlam tih a ni thin a. Chhûl (hlam) chu nau pian hnuah a zuih ral ve mai thin a. Nau, ala sên em avanga chhul ang leka zuih ral ta anga ngaih a nih avangin hlamzuih tih tawngkam hi lo chhuak ta niin a lang (Tawng Un Hrihfiahna
by James Dokhuma, phek-190)
Hlamzuih sawngbawl dan:
Hmalaiin mi a thih chuan a pualin Thlaichhiah dah thin a ni. Hlamzuiha thi an awm hian Thlaichhiah an dah ngailo. Nula leh tlangvalin an buaipui lova, Upa thenkhatin zû an pû a, khawhar chhungte an inpui thin. Chhungkhat laina leh upa thenkhatin In hnuaiah a thlan tur an cho a, bellam chhungah nausen ruang chu khungin, artui nen an phum tel thin( cf: Pi Pute Biak Hi by Rev. Zairema, phek -127) Hlamzuih an ngaihdan lan theihna chu tawngkam pakhat ‘Hlamzuih tah chu nêp tê’tih an lo neih dan atang hian a hriat theih. Hetia artui an phûm telna chhan hi kha nausen thi kha engmah la hre ruallo a nih avangin mitthi khaw kalkawng pawh hre lo turah an ngai a. Artui an dah kha mitthi khaw kalkawngah a lum ang a, chu chu nausen khan zui zelin Pawla kawt chhuah thleng a zui turah an ngai thin. Pawlan perh tumin a lo tin phûn phûn a. Chutah, nausen chuan ‘E! puitling hman ila eng ang mi nge ka nih dawn i hre hlei nem, min han perh vaih teh’ ti a chhang turah an ruat a. Pawla pawhin perh ngam ta lovah an ngai thin. Tichuan, nausen chu pialral lamah hahchawlin an ngai ta thin. Heta Pialral tih leh mitthi khua tih hi thil thuhmun a ni lova, Pialral chu engmah thawh ngaih tawhlohna hmun, faisa ringa awm dërna hmun ni a an ngaih a ni
.
Mihring tlinglo:
Pi puten mihring tling pha lova an ngaih chu Hlamzuih an ti mai a, an sawngbawl dan pawh kan tarlang ta a. He ngaihdan hi thim hnuaia Mizo society leh culture a kun lai a ni. Tunah chuan chanchintha eng hnuaiah kan awm, nimahsela thim hnuaia kan awm laia nausen thi kan sawngbawl dan zulzuia kan la sawngbawl reng mai hi ngaihtuahnawn(re-thinking) a hun ta em? Holam taka kan ringtupui chhiatna tawk kan kalpui a, kan ûk-sâklo hi Lal Isua zirtirna nen a inmil em? Thla thum la tlinglo nausen a thih hian Bible hman a remchanglo kan ti a ang deuh tlat a, kan lo hmang a nih pawhin Kohhran leh khawtlang huang pawn, mimalin kan hmang emaw a ni mai ang. Mizo kristian khawtlang leh kohhran hian mihring tlinglo(Hlamzuih) neih reng a thiang dawn em ni, ka ti deuh thin. Eden bawhchhiatna hnu lama mihring hrim hrim hian mihring nihna dik tak kan tling tawhlo zawk, tiin Rev. Challianngura chuan a ziak (cf:Chhandamna, Kum 2011 Synod Sunday school Puitling zirlaibu, phek-17) Mihring tlinglo ho hian kan mihringpui nausen(ni 90) hnuai lam hi mihring tlingloah kan chhuah chhawng mai a ang hle.
Naupang/nausen leh dikna:
Khawvel pum huapa naupang dikna leh chanvo puanchhuah, United Nations Convention on the Rights of the Child-in naupang a tih chin chu kum 18 chin leh a hnuai lam zawng te hi a ni. India ram dan Juvenile Justice (care & Protection of Children)(Amendment) Act,2006-in naupang a tih chu nausen piang hlim atanga kum 18 hmang mekte hi an ni. Tuna kan sawi mek hlamzuih kan huam tir chin hi anthropologists leh psychologists lam ngaihdanah chuan nausen tia koh an ni (cf:Naupang Dikna Chanvo by Ruatfela Nu, phek- 24&26) Dan lama a lan danah chuan ni 90 dam thlenglo naupang thliarhranna a awm lemlo niin a lang tlat. Rihdil leh Jordan lui:
Thim hnuaia Mizo hnam a kun laiin mi a thih chuan a thlarau chu Khanchhukah lawnin, kawmchar lamah chhuakin an ngai a, chuta tangin Rihdil pan ta thinah an ngai. Chanchintha eng hnuaia kan awm hnuah kan rihdil theology chu Jordan luiin a rawn luan hnan a; Hringlang tlang lam hawia mittui hru thin kha Kalvari tlang lam hawiin kan lám kual ta a; Lungloh tui in aiin Kalvari daifim vawi khat far kan thlahlel ta zawk. Pialrala hna thawk lova faisa ringa bawp-khaw-kherh piahlam hmu thiam lo khan Vanram kan hmu thiam ta zawk a. Chuti fakauva Pathian khawngaihna dawng Zofate hian engahnge Hlamzuih theology hi kan la vawn tlat le? Nausen, ni 90 la tlinglo mihring pangngai la phalo a kan ngai hi an dikna leh chanvo an sawi theih loh vang a ni mai em? Ni ta sela Mizo society ah hian human rights violation a thleng reng tihna a ni thei em le?
December 11th, 2010 at 2:28 am
Hetiang hi hriat a tha ania, Mizo nih chuan hriat zel tum tur.
Report this comment
December 11th, 2010 at 2:29 am
comment kha an block vel a, Pu HV a an nghak ani ang a..
Report this comment
December 11th, 2010 at 2:33 am
Ting3 tunah chauh le.
Report this comment
December 11th, 2010 at 2:37 am
Block lovang, ‘Read more’ khi ka click a, a dik nghal zaih ale ale
Report this comment
December 11th, 2010 at 2:41 am
# Pu HV na chinah chuan comment closed emawni a inti alawm., a rei tawh mai.
Report this comment
December 11th, 2010 at 2:50 am
Admin’ ho an weekend anga an click sual aniang a hairehai :lol:
Report this comment
December 11th, 2010 at 2:53 am
hAhAhA dik theih hmel viau mai mai.
Ka va han hriat hnem phah em.
Human right violation a ni thei dawn em ni, ruang dang ang thlap a vui a nih loh vang mai in.
Report this comment
December 11th, 2010 at 2:57 am
Culture and tradition hi human right chu ani ber lawm ni. Western culture/tradition atanga chhut chauh hi human right a ni theiin ka ringlo ve tawp.
Report this comment
December 11th, 2010 at 3:29 am
Hmana tanga tun thlenga ka la vei em em, belchian dawl taka i rawn ziah vangin post tupa chung ah lawmthu ka sawi e. Revd chuauthuama khan a rawn ziak tawha vanglaini ah hman deuh khan, khami chhanna angreng khan Pu Lalzuia colney khan ‘invui nan kan hun tha zawng zawng kan hman a ngai ang’ ti ang zawng khan a rawn chhanga. Ka rilrem zawng chu a ni lemlo. Kohhran hruaitu te lam hian aw an chhuah har ka ti. Zawlaidi vel buaipuk vak lo hian nunna leh thihna Pathian pawisawi theihna thil hi han ngaihtuah thar deuh se ka va ti em.!!
Report this comment
December 11th, 2010 at 3:37 am
* (Pi Puten Thihna leh a Piah Ram an Thlir Dan & Thu leh Hlaa a lan Dan by C. Vanlallawma in Pi Pu Zun Zam, phek -204)…..tih hi ka bo.
enge a saawi tum ka man fuh thei der lo.
Chuan “Hmanlai chuan nau kum 3 tlin hma a thi hi Hlamzuih an ti” tih lai hi a ziaktu khian a hresual a nih duh hmel ka ti.
Report this comment
December 11th, 2010 at 6:10 am
Kei Kristian pachal hian HLAMZUIH hi ngai ka ti ve tawh lo. Hlamzuih sawngbawl kimchang pawhin kan inbawisawm tawh zeng hek lo, nial nuala khawsak hi ka hnein ka ten.
Bellam chhunga hlamzuih ruang thunin, artui pawh kan phum tel tawh chuang em ni? Tihbo duhtu ka ni reng thin, MHIP vuaicha lutuk pawh hi ka ten. PC Zoramsangliana hian a nupui he lamah hian kheuh harh sela a tha ang. Hawla pawhin a nupui chu Anti-Tobacco lamah a phurpui a nih ngei ka ring.
Tisa lamah chuan nourishment a tha ta deuh bawk a, hlamzuih kan tlem phah ta. Saw lamah hlamzuih a la tam deuh an ti.
On the other hand, Gospel Camping lamah hi chuan Camp chhuah atanga thla thum a tlin hmaa intipiangtharte HLAMZUIH leh ta hi erawh chu kan ngah a nih hi, thlarau lama kan pian dan fuh tawh mawlh hek lo le!
Report this comment
December 11th, 2010 at 6:10 am
Zachham lak hi ka hrethiam lo tlat?
Hman ni khan naute thla 1 mi a thi a, a nu thawrhzia kha! A awm ve tho e. Thla 9 a lo pai a, thla 1 chhung duat takin a lo enkawl alawm.
Report this comment
December 11th, 2010 at 6:49 am
!!!Full support!!!
chawnghilh, #11:
:lol: :lol:
Report this comment
December 11th, 2010 at 6:52 am
Practice tawh loh pawh hi kan culture hlui leh tradition hlui te hi hriat reng atha ania. Kan hnam chanchin thlah zel te hrilh tur kan neilo dah ang e etc etc.
Report this comment
December 11th, 2010 at 6:56 am
Nizan khan uluk takin ka chhiar a. Comment ve hram ka tum a, a theih loh. A pawi lo vd, hei, tunah a theih tawh tho alawm.
Report this comment
December 11th, 2010 at 7:04 am
Nizan khan ka comment chàk teh réng nen..tunah a bo duak. Fanu thla 2 mi ka nei a, a nu leh pa mi chhia mah ni ila amah chu Lal Fanu a ni. Tawng-thu-chhe-lo an tih hi ngaihtuah pawh ka ngaihtuah ngam lo!
Report this comment
December 11th, 2010 at 8:30 am
Hlamzuih tih lampang hi ka rilruah a lut ngai reng reng lo a, tunlai ah te chuan thlanah an phum ve mai em ni? engtin nge an sawngbawl reng reng ka hre hauh lo.
He post atang pawh hian ka hre chuang lo. Pastor emaw Upa in emaw tawngtaina nen a thlah liam loin tihna deuh em ni?
OT deuh roh: Hman ni lawk khan kan thawhpui,nula 23 aboral thut mai a. Min barakhaih nasa hlawmkhawp! A thi tih ka hriat chuan an in lamah kan thawk phei ang chu tih naklaiin engmah reng reng tih theih kan nei lo. Officeah kan thu tlawk tlawk ringawt..mittui nen..chuzawng chu. A tukah chanchinbu ah a vuina hmun biakin, a hun an chhuah a. In lampang pawh open loin private a awm an duh zawk thu a chhungten an ziak. Chuzawng chu! Nihnih hnuah phum a ni a, buakinah pangpar kan keng a, thlanah kan kal bawk..A enga maw zawng chuana felthlip thlep viau..
Report this comment
December 11th, 2010 at 8:41 am
Mi(sual) a kar khat dawn tel theilo a awm chu lung ava leng duh em.
Hlamzuih definition hi kan tuihnih hlek teh ang.
Hmanlai chuan nu in nau a neih in, nau hlam (a chhul) hi tui ûm ah dah in tha takin an chhin a, khawdai ah an dah thin, hetia a hlam a tawihral zui zata thi (tawih ral) ve tamai hi hlamzui(h) an ti ta ni in an sawi. A tir chuan a tawpa “h” hi sawitel ani ngailova, khua alo reia a lamdan an inthlak e anti. A dik ber erawh ka ti hauhlo thung.
Kan sawngbawl dana ka ngaidan tlem: Pumchung a awmlai mah Kohhran, pawl leh dan kan neih ten hetikhawpa an thlavang kan hauh tawhna khawvelah hian, timaia a piangtawh te kan ui thisawn phum leh ngawt mai thin hi chu, ngaihtuah nawn ngai deuh ni in a lang.
Aziak tupa thu belfakawm tak min hlui avangin ka lawm hlemai.
Report this comment
December 11th, 2010 at 8:44 am
@8 Hv : “Culture and tradition hi human right chu ani ber lawm ni. Western culture/tradition atanga chhut chauh hi human right a ni theiin ka ringlo ve tawp”.
Pu HV, Human rights chu western culture/tradition hi a ni ber mai, western culture/tradition nena in millo chuan human rights an violate a ni ber i tihna nge, i sawi letling?
Hlamzuih hi kum 3 ni lovin thla 3 a ni, Pu.C.Vanlallawma hian a hriatsual ai chuan a ziak sual/typing mistake a nih ka ring zawk, edit lemlo a nih hmel.
Report this comment
December 11th, 2010 at 9:48 am
shylo #19
kan sawi ve niah nuah khi chu, western world lam hian an mahni ngaihdan lo hi chu human right violate ang hian an/kan sawi a ni ber lawm ni ka ti a nih hmel 
Kan sawi chhan pawh, tam tak chu pawm theih ni mahse, tamtak tho chu mahni culture and tradition tih dan a nih loh vanga, “A diklo, human right violate na a ni,” an han ti ngawt zel hi a dik thei ber chiahin ka hrelo a ni.
Western culture hi copy tam viau mah ila, khawvel culture ang hrima neih kher hi a tulna ka hrelo. European ho thuhnuaia awmna chi khatah kan awm tihnaah ka ngai. A diklo hulhual erawh ka ti chuang hauhlo thung.
Report this comment
December 11th, 2010 at 10:43 am
Bengvarna zel ni e….thil kan hriat belh teuh2 zel a….lawmawm thin eeeee…..rawn ti zel teh u..
Hlamzuih hi a tuartu tan chuan a nep chuang hauh lo…chuvang chuan mihring anga an rawn pianchhuah tawh chuan mihring pangai dan anga sawngbawl hi a tha ka ti kei chu….
Report this comment
December 11th, 2010 at 12:51 pm
Tha ve……a tir ah khan comment theih loh khan a awm reng tak kha mole
.
Kan hnam ah hian ‘NAUPANG A’ tih awm tlat mai hi social stigma pakhat chu ni ve awm in ka lo hre ve a a dik em tih phei chu ka hre lo……
Tin, piantirh atanga kum 18 hi chu tih chi ni in ka hre toh lo, chronological age leh mental age hi a inthlau thei riau a nia……kum 18 hnuailam rilru puitling tak2 te, kum 50 chuang naupang chhia tak2 hi a awm ve theih tlat in ka hria. a hre chiang zawk ten han soifiah se ka va ti ve??????
Report this comment
December 11th, 2010 at 2:07 pm
Nu pakhat ka hriatchian em em mai hian a nau pawmlai,Hlamzuih, pumpelh nan a ni 8 chauh mamawh tawh a sun a, a zan a zan chuan an phum sak ta mai a.Thla thum thelh chhun zan zawm tak meuh a alo kuah ve tawh leh a fa neih chhun chuti mai a an han phum ta mai chu a tuar hle mai.Awle, tun a hlamzuih kan kalpui dan hi chu a fel zan tawh lo hle a ni tih chu a chiang mai a.A Human right leh right lo zawng a thluk tehchiam pawh ngai lo vin tih danglam chu a tul ta a ni.Nu pumchhung a tang a thisa a piang em hi chu kan mithi sawngbawl dan pangai a han sawngbawl em chu a zialo deuh ang a,kar hnih khat an tlin tawh hi chuan hlamzuih sawngbawl a sawngbawl tawh loh maite hi a tha tawh lo maw?
Report this comment
December 11th, 2010 at 2:54 pm
@ Pu HV : Thupui nen inpersan deuh mahse human right chungchang han sawi lan a nih tak deuhah chuan kan kal peng ta deuh ani(OT lutuk lawng chu maw) @20 a i sawi dan khi keima mimal ngaihdan ani ve a, tun thleng hian ka la in zawt a, khawvel pawh hi a ka la zawt ani,”Eng hi nge human right chu, eng atang hian nge kan teh…etc” tih te hi. I sawi ang hian European culture/Tradition hi human right tehfung ah khawvelin a hmang ni ta berin a lang.
I sawi takah chuan ka lo thlir dan nen a in ang em a, kan duham ta deuh a ni e. Hemi chungchang pawh hi khel fe tham a awmin ka hre ve mai mai.
Report this comment
December 11th, 2010 at 3:35 pm
Khaw hrang hrangin hlamzuih an puan chin a dang mai thei. Khaw thenkhatah thla thum an tih laiin khaw thenkhatah chuan thla kua/ kum la tling lo te pawh a niang. Tin, mitthi chhung te inthlahrun avang te pawhin kum 3 lo hlamzuih tir ta te pawh an awm chu ka ring tho mai!
Hmanlai khan mitthi an awm reng rengin ‘Awmni kham’ angai a. Tlangvalin thlan an lai a, nulain thing leh buhfai khawn, tuichawi ilo vel an buai pui a. Pa-hovin zu bel nen mitthi in-ah an inkawm khawm a, tumah ram lam a feh bo an awm ngai lo. Chuvangin ram lam a tul buai lai tak phei chuan inthlahrun thlak duh khawp ang. A sawi nep nan pawh ‘Hlamzuih tah chu nep te’ an lo ti reng a.
Kristian kan lo nih hnu leh eizawnna a dan deuh tak hnu hian ‘hlamzuih’ hi Veng/Khua thenkhatah chuan thihna pangngai a chei sawi tur a awm ta nawk mai. A tuartu tan chuan Puitling thihna nen a dang chuang awm lo ve. Thla 9 chhung hrehawm taka pai/enkawl an nihna vang pawh hian a bikin nu tan chuan a nat dan a ngai reng tho awm e.
Report this comment
December 11th, 2010 at 5:00 pm
Nizan khan comment kha an block vel a, tunah an hawng leh ta si a, a va ho mai mai e aw.
Ka comment lo tawp mai teh ang.
…khrum
Report this comment
December 11th, 2010 at 5:01 pm
Kei Pathian thu hre vak lo.Rinna erawh nghet tak nei hian :wink:
” hlamzuih kan sawngbawl dan kimchang tawh lo tak hi
bellam chhungah hlamzuih ruang thun ila, artui nen.
chuan, Pastor in vui se.” ka ti.
Report this comment
December 11th, 2010 at 5:26 pm
Nula senior pakhat inla baby ltk tak mai poh, OD in a thi hlauh a, thihchhanah hlamzuih an ti keuh..
Report this comment