mi(sual).com

(Misualah ka post lohna a rei ta hle mai. Hei le, lehkhathawn  nikum 23rd dec a ka ziah hi lo chhiar ve teh u).

Ka nu duhtak,

Tunah Bethlehemah kan la awm hrih a…Mari leh kan fapa Isua nen. Isua pawh thla leh hian kum 1 a tling ve dawn tawh e.Nikumah khan thil tam tak hrilh theih loh che ka nei a. Hrilh che pawh ni ila, a hunlai kha chuan i hrethiam dawn silo. Min ngaidam dawn nia.

Ka nu, Mari nen kan induh thin zia chu i hriat kha. Kan inhual hnu rei vak lo a Elizabeti ina thla thum lai a va cham hnu khan thil hi a buai zo vek a. Miten Mari a rai tih an sawi luai luai kha…ka nu, khalai khan ka rilru a va na thin tak em! Ama hnen ngei atanga hriat ka duh avangin amah ka zawt a. Mangan hmel taka “Josef, mi sawi hi a dik alawm. Insawi fiah tum mah ila i hrethiam chuang lovang; mahse Josef, nang chauh hi mipa ka hmangaih chu i ni” ti a min chhanna kha ka rilruah a thi thei lo.

Tumah ka be peih lova, nang ngei pawh ka biak ngai loh che kha. Rilru na tak chunga Mari then tura ka rilru ka siam hnu khan ka mumangah Vântirhkoh a lo inlar a, ”Josef, Davida fapa, i nupui hual Mari hi neih tim suh, a naupai hi Thlarau Thianghlim laka mi a ni asin” a rawn ti a. Chutah chuan ka hrethiam ta chauh a.

Nupuia nei tura an in a ka va kal khan Mari mit kha alo sen rum a, a tap nasa hle tih a hriat a. Mi zawng zawng sawisel leh a chhungte hauh a tawk nasa a ni tih ka hriatthiam pui a…ka va han lainat tak em!! Nupui a ka neih tur thu ka hrilh zawh a min kuah kha a nget asin ka nu, khatiang rengin Mari a chak tih ka lo hre ngai lo.

Amah leh a chungte hnena Vantirhkoh thusawi ka sawi chhawn hnu khan a chhungten an awih ve ta a. Anni pawh an mittui a sur zung zung mai a, Mari hnenah ngaihdam an dil nghal mawlh mawlh lai te kha hmu ve la ka nu, nangpawh lawm avangin i biangah mittui a luang ve tho ang.

Inneihna tur a ruahmanna kan siam lai te khan ka nu, i hrethiam ve chiah lo chungin, keima duhdan anih avânga min phurpui zia te kha ka ngaihtuah hian nang ang nu ka nei che hi vannei ka inti a ni.

Tunah chuan kan inneih chhan dik tak chu i hriatthiam tawh ka ring a. Keini tehlul Pathian fapa khawvel sual tlantu tur Pathianin min enkawl tir leh, A lei nu leh pa dinhmuna min din tir avangin Lalpa chu fakin awm rawh se.

Chanchin ka la rawn hrilh leh dawn che nia, dam takin le.

I fapa
Josefa
Bethlehem

Similar Posts:

• Lehkhathawn
• Ka Pa hnena Lehkhathawn
• Kan Stadium puitling tur bul tanna chu
• Amen ti thei – Mari (Isua nu)
• Ka nupui hnena lehkhathawn (Valentine’s Day pual in)

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, December 22nd, 2010 at 7:31 am and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.