mi(sual).com

( A sei deuh mai thei a,chhiarchhuak hram turin ka ngen che u)

Ran leh Rannung hi ka ngaina em em a.Ka Vulh ngat phei hi chu,ka phak ve ang tawk a duat leh hmangaih takin ka enkawl thin a.1999 kum khan Ui pa(Burney) note tha deuh mai,chum biang buang hi ka la a. Hnute hnelai la ka nih vang khan,feeding bottle in Bawnghnute nen a ka chawm seilen a ni a.A diet pawh ka theih ang zawng zawng a ulukin,thei(Fruit) pawh eitir thei khawpin ka enkawl a.Mihring ang chiahin ka bia a.

Hrik pawh nei hmanlo khawp in ka bual faiin,a ha thlengin ka nawhfai sak thin a.Rual pawh pawl theilo khawpin ka enkawl a.A nghawng hi a hmul chhur a,Sakhi rawng,a dumin a pawlh deuh ang hi a ni a.A lo puitlin a,Star tu a neih a lo hun chuan ka buai zual a.A rinawmin ,vawikhat ka hrilh hi a theihnghilh ve ngai lova.Nikhat chu-Pangpar(Seasonal) hi uluk taka ka phun laiin, ka bulah a awm ve a.”Bawihpui,he pangpar hi veng tlat ang che aw.” ka ti a.A veng ta nasa lutuk a.Keimah ni lo chu ka pangpar phun bula kal reng reng kha a ngur chhur chhur a,Ar phei chu mangan thlak khawpin a um a.A venghim hneh lutuk kha ka buai phah fo thin a.

A thlah duh in Uinu nei hian thlahtir min rawn dil ta fo mai a.A mah a lianin,hlauhawm tham a ni si a.Ka mangangin ka fimkhur thin a.Ui nu rawn hruai kha an veng leh contact No. ka lo dil zel a.Tukkhat chu zunram thiar tur a ka chhuah kha a tlan ta vak mai a.Motorin ka um zui a,Ka hmu ta mai lo a.Mi kan zawt a,Ui Nu hur an rawn hruai hnuhnun berte veng kha a ni si..”Nichin lawk kha chuan a lokal kha.” tih bak chhanna ka hmu ta lova.Ka ngaih a thalo hle mai a.Ring taka au in kawngpui thlanglamte ka haswi vel a.

Ka beidawn dawn tawh chuan,kawng thlang Thang pik kar chu a rawn ri suat suat a.Burney chu meikhup zul hian a ke dinglam khai hian a lo chhuak a.Chik deuh nghur nghur hian min rawn pan a,”Bawipui,ka thu i awihlo a,engtinnge i awm a.?” tiin ka lo pawm a,..Aw.. a van hrehawm tak em, ka hlauh ang ngeiin,a khel dinglam chu a liahna a huh hlup tih ka hre ta mai a.Kan en nak chuan Silaia kahna hnuhma ka hmu ta mai a,a thi erawh chu a lo liak fai vek a.Min liak a,min bawh huam huam a,chhan ngai leh zualko hmelpu ngawih ngawih a min en chu hrehawm ka tiin,ka thinlung a Na a.In lam a haw lovin Vety Hospital ka panpui nghal a.

He Hospital a thawkte hian vaccine ka ngaih pawimawhsak zia leh,Ui Lian danglam tak a nih vangin min care pui takzet a.Office hawn tirh a thleng kan ni a,an lo buaipui vat a.”Kan thu i awihloh chuan I Pi in Sa a lei dawn lo che,” an ti a,an hriat than em avangin a hmui pawh phuar lovin a hliam chu an enkawlsak thei a.An tihfaisak a,an jection a,an tuam a.ka hawnpui ta a.A hliamna lam ke chu a rap ngam lo a.A len em avangin ka pawm zo tawh si lova,ka khawih ve kher loh chuan a thin a rimtlat zel si a.Natna leh hrehawmleh riltam tinreng hria,ka duh leh ka duat ngawih ngawih kha engvangin nge a Nu Hur awmna veng a a leng kha an lokah mai le.

.A nu hur awmna In pawh a la thleng hman si lova.An Nature ah chuan,a nu, a pan kha hmuin, Uipa dang nen lo in kawp se,a thik lutuk khan, a theihnaq zawng zawng a chhuh tumin a sual ngei ang.A nu awmna a thlen hma loh chuan,mihring leh Ui dang reng reng kha a rilru ah an awm dawnlo tih ka hrechiang si a.Ka thinlung Nat zia tak kha aw..Ran ka vulh hian,ka phak leh ka hmuh ve phak ang angin, an chanchin ka zirin ka chhiar ve thin si a.Kum 8 a lo nih hnuin, tuk khat chu-retaining wall,7″ vela sangah hian a zuang thla a.Ka enzui vat a,a len em avangin ka hlamchhiah ngam lo a.Ka zu au chu,a lo ding tual tual a.Lungngaiahna a khat mitmeng hian mi rawn melh a.”Bawihpui,i insawh na deuh a mi,lokal teh” ka ti a.

Muang chang hian a lokal a.Ka bul a lo thlen chuan a zung a,Ui pa zun ang posi pawh a la peih lo a.A zun chu a thi ta vek mai a.Vety Hospitalah ka tlanpui nghal a.A insawh dan ka sawi a.X-Ray a ngai a.Ran an X-ray na ah chuan a langkinm ve thei lova.Mihring X-ray naah kan va X-ray tir a.A Kidney a lo sawh chhe vek mai a.Zai mahse, damna chance a nei lo tih ka hre ta a.Aw..Ka va han lainat tak em..A Na kha mitmeng lo chuan min hrilh thei si lo.

Pet animal a nih vang khan ka tan mihring angin a hlu in ka ngaina tih kha an hrelo nge..a condition kha ip miahlo hian an sawi nghal bawrh bawrh zel mai si a.Nithum Vety hospital ah chuan ka awmpui a.Drip an khai a,an jection a,a bula ka awmloh hlek chuan a hnaihtu apiang a ngur chhur chhur a,treatment an pe thei si lo a.Hriau a an shot dawn te khaqn a vawn chuan,ngawi rengin a dawh tluan thak a……..A ni 3 ni chuan kan phur haw ta a,Gypsy hnungah hian amaha a mut in a lu a dah chhuah ngai khawp a lian a ni a.

Ka lainat lutuk chu Gypsy hnungah chuan mawng lehlam nghat a thuin ka awmpui a.Kan tlanlai chuan..thei leh theilo hian a lo hawi a..Lainatawm ngawih ngawih hian mi rawn en kuau a,ka malchungah a lu a rawn nghat a, a zung tuarh tuarh a,a zawi ta hnawk mai a.”Bawipui,Burney..” ka ti vak a.A lu a rawn chet leh a.Vai ruai hian mi rawn en leh a.Kum khua atan a mit chu min chhinsan turin a maimichhina ta a.Ka insum zo lo a.Ka tapri ta hawk a.Ka kuah a.

Ka va ngaiin..ka va lainat tak em..Engmah ka tihsak thei si lo.Ka Ui,Burney kha a thlaphang ve thei a,puih a duh ve thei a,Chhantu a ngai ve ngawih ngawih thei a ni tih hi chiang takin ka hria ani.A kuang tur thingphel lei turin mi ka request a,Mahse..Mizo mentality ah chuan..’Ui Kuang mai mai tur’ tih kha an rilru a ni tih hai rual loh hian,reilo te ah an lokir a.Thingzai zuar an hmuh zawhloh thu min rawn hrilh a.Tichuan..zantina a mut nana ka phahsak thin rizai leh puan varin ka tuam tir a..an tawn phui tur leh an zawnchhuak tur chu ka enzui ngam ta lo a ni.

Kum 2006 khan Vahai Note,a nu leh a pa hi min rawn zawrh a.Rs.450 in ka lei a.Cage ah kan dah a,mahse an lianin an tha roh si a.Kan In a falin thing a tam a,Inchhungah ka chhuah vat a,an sawt thoh thoh a,thlawh an zir a,ka kut hlirin chaw ka pe lui tlat a.’Hai-te’ tiin ka ko a.ka be bawrh bawrh a.Ka bulah an awm a.Ka rawngbawl laite hian an hmui lianpui hian ka kut an lo khel a,min lo tibuai thin a.Thingfanghmate,chaw(Rice) te,Atta kan te, Kawlthei te,Mai te ka pe thin a.

Veilam zawk a mi khi a inla cute pawh ni lovin,en reng reng khian a Nu zan mai a,an lo len deuh tawh hnu pic, a ni a.Tikhian kan In bul vel,May Flower kungah te,thing awm apiangah fu in an leng kual a.”Hai-te, lo haw tawh ru” tiin han au i la,aw an hriat than in auh chuan kawngkhar leh tukverh in hawng apiangah an lo thlawk lut duai duai mai a.Tlai khat chu kan inpiah transformer(electric) chu a tek chhuai chhuai a,Power a thim a,kan va en a,a va han hreawm kher em..Ka Vahai Nu zawk chu transformer chuan a lo man a,a ke pahnih hi hmuh tur a awmlo,a lo thi reng mai a.A Pa zawk chu a bul a thing lerah a hram vak vak a.A lo haw duh ta hauhlo mai a.A tuk zing khua a lo var chuan,tukverh zawng zawng ka hawng a,ka au a.khawhar hmel ngawih ngawih hian a lo thlawklut leh ta duai duai a.Thla a liam vel ang tihah chuan,Zing dar 7 velah,Silai ri dawt ka hria a.Kan naute chu silai rikna lam ngaihven tur chuan an kal a.Ka thiannu Pi Hmai Driver in a lo kap a,a kah thlak hnu chuan a lo zawng hmu zo lo,tih thu min hrilh ta mai a.

Ka nghing lawih hian ka inhria a.Ka rilru na lutuk chu awmngaihna pawh ka hre lo a ni ber e.Mangang tak a ka awmlai chuan,Pi Hmai leh a driver chu an lokal a.Khatih laia ka chak ber chu,Mipa nih a,Ka Sava kap hlumtu chu hnek leh tawp hi ka duh a.Mahse tha takin ka lo dawngsawng a.Pi Hmai chuan”Ngaihdam dil chu i thu ni se,Sava reng reng kap tawhlo turin intiam rawh le.” a ti a.Ngaihdam min dil a,Sava kap tawhlo tur chuan a intiam ta a.A hmel ka en khan a kah leh ka ring tawhlo a ni.

Ka thiannu rawn tihdan chuan min tizang huaiin ka hria a ni.Mahse, ka Haitea chu a awm tawh dawn lova,a thiannu thih hnu in khawhar takin a maha a awm ringawt pawh ka lainat tehreng nen.Nithum vel hnuah chuan,naupang pakhat hian,’Ka pi,khuta khu i Sava ka hmu’ a rawn ti a.Ka zuk en vat a,pawr fap mai a thingzar a a fu chu ka zuk hmu a,ka au a,ka hnaih deuh chuan a thlawk sawn ta zel a,a riltam lo haw tum chuan,a mah thah tumtu ruangam ang ka nih miau avangin min hlau ta si a,mahse,ka awri a hre tho si..ka au a,ka aw ngaithla in a hawi vulh vulh a.

A fukna thingzar hnauiah chuan nilengin chaw ngheiin ka au a,ka awmpui a,tlai khawthim hma deuh chuan ka hawsan ta a.A tuk khawvar veleh chuan tukverh lae kawngkhar zawng zawng ka hawng a,eitur ka daqh lang a,Haitea chu a lo thlawk lut ta a,ti deuh hian a rawn ei a,a hmui tihdan chu,chaw ei a an a harst hle tih ka mitsirin ka hmu ta a.Tlailamah chuan,min nel leh ta a,ka darah te ka malchungah te a rawn fu a,ka khawih mai duhlo a,reitak ka bula thlamuang a a awm hnu chuan ka pawm ta a.

Kan enchiang chu a hmui hnuai,a hrawk hnaih takah hian silai mu a lo tang kuk mai a,hmul pawhna in ka cheh chuahsak a,a rak thawt mai a,ka thin a va han rim thin tak em.Tichuan lungmaunga a mawm leh hnu chuan,veng hla tak a awm,College Vice Principalin min rawn phone a.”I sava kha kan in bulah a rawn fu vung mai” a rawn ti a.Rangtakin Driver nen kan va tlan a.A lo thglawk bo hman a,ka au haw zo ta lova.

An Nature,a nu hur hun a ni tih ka hria a,’Umm,a nu hur rim a hria a,a kalbo a ngai ta anih kha” tiin kumkhua a hmu leh tawhlo turin chumi ni tlai chuan khawhar takin ka haw ta a.
Chutihlai vel chuan Zawhte var nalh deuh mai hi miin min pe a.A Nu a ni a.”Naute” tiin ka ko thin a.Note a nei pung a,7 lai mai ka vulh a lo ngai leh ta mai a.An zun leh Ekna buaipuiin ka hmanhlel chu a ni leh ta a.Cement Plate ang tiat velah hian Balu ka dah a,an zung a,an E a,Ka paih fai zel a.Zingah Bhujia te,Biscuit te ka pe a,10:00am ah chaw ka pe a.tlaiah ka pe leh a.Aan thauin an fing a,han au ila an lo tlan haw dawr dawr a.

Nuihzat thlak deuh chu,Sarang ri an hriat hian,Biscuit vel pe turah min ngai tlat zel mai thin a.2008 October ni 9 chuan ka Fapa neih chhun a boral thut mai a.Chumi chhung chuan thenawmten min lo enkawl sak a.In lam a ka hawng leh chu,ka zawhte te chu an reh diak mai a.A dum hlanghlak pakhat a awm ve a,Dumtea ka ti a,chute chauh chu a lo haw ta tlat mai le.Ka zawt thin a,Nimin piah chuan an la awm vek,tihvel kha min chhanna ani ta mai si a.A hnu deuhah a then chu an ruang ka hmu leh a,Tura hrai ngei an ni ah ka ngai a.

Ka Thinlung natzia chu aw..Mizote hi Kristian hnam za a za kan inti si a,heti em em a Nunna nei,lungngaih,khawhar,riltam leh natna engkim hre ve,rannung leh nungcha,Ran chung ah kan nunrawn em em mai le..Pathian hi a zahawm ka ti tak meuh a.Ka zawhte 7 zinga la damchhun Dumtea chu tunah ka bulah a la awm a.

A fing in a pangchang a,a duh ka pek hma chu min zui a,ka zin ka haw te hi min ngai lutuk hi aw chhang vek khawpin ka bulah a hram thin a.Kawmthlang Nu,mawl ve tak mai lo leng hian rawn hauh a ching thin a,ka ngaihdan a ni lo fo thin a,ka insum hram hram a,mahse vawikhat chu,”Sangpui,ka zawhte hi i fa i hmangaih tluk khan ka hmangaih asin”ka ti ta tawp mai a.A hnu chuan mi bulah fiamthu angin a lo la sawi zui a.2010 November thla tawp khan ka motor accident chungchangah nilengin ka chhuak a.Zan a In ka thleng chu Dumtea ka au a,a lo haw ta lova,a tuk nilengin a reh daih mai a.

Thenawmte ka zawh lahin an hmuhloh thu an sawi zel si a.Ka bei hi a dawng ngawih ngawih mai a,chhunah chuan huan a Ar Inah ka zu kal a,Ka zai deuh al al a,huan mawng pik atang chuan Ngiau chungin ka Dumtea chu a rawn baih chhuak a,a mit lehlam a meng ngam lo bawk a.Hliam a lo tuar a nih chu.Inah kan haw dun a,a dam leh hma chu pawn a chhuak ngam ta lova,chuta tang chuan keimah lo chu ka Inchhung ngeiah pawh hian Mihring a hlau ta tlat mai a.

Mak hi ka ti a.Kan sual zia leh kan mawl zia hi kan inhre der si lova.Sual kailo niawm fahran a mi diklohna kan sawi ngam te hi zahthlak hle in ka hria.Ka ran vulhte avang liau liau hian tul tawpah lo chua In ka chhuahsan ngailo a ni.

‘HAWH U,ZORAM MIPUI TE HI NUNGCHA LAKAH HMANGAIHNA LEH LAINATNA I LAN TIR VE TAWH ANG U.A SIAMTU PATHIAN VANG TAL PAWH IN’

(ka Ui pic. ka hmu zo tlat lo mai a,pawi ka ti ngei mai)

Similar Posts:

• SMS chhas hi?
• Nang i ngawih tlat si chuan…!!
• Engtin nge ka hnem ang?
• I ngaihtuah ngai em?
• Zu zuar veng min ti maw, vannei ka inti asin

Recent Posts:

• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!

This entry was posted on Saturday, January 22nd, 2011 at 6:30 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.