mi(sual).com

Mi tin mai hian hun hi mahni hmun theuhah kan chhiar beuh beuh hlawm a. Mi tam takin hlawk leh nuam ti taka kan chhiar laiin, thenkhat erawh chuan “Aw..khawvel ral tawh mai la, lungngaihna chirhdup ata hi ka zalen ve ang” an ti vawng vawng mai zuk nia! Chu’ng mite chuan van lam an ngai zual bik pawh a ni hran lo, an tan chuan he lei nun hi a thlakhlelhawm lo lulai em a ni!

Puitu an ngai a, chhantu an mamawh a; mahse nang lah khatah i thu mai mai si! An lungngaih tizual turin i la hmusit zui a; i ten a, i endawng a, chil i chhak lo chauh emawni lehnghal! “An sual man an hmu” i ti fo a, i ti dik chiah mai. Hmuhsitawm tak zawng an ni renga. Mahse, eng vanga lo heti ta mai hi nge an nih? Tun tum chauh chu han ngaihtuah vang vang teh.

Beidawnna ata ruihhlo-ah Chhungkaw pa ber chu rui lutuk tak mai hian a rawn hawng a, “Lalrohnun, eng vangin nge i ruih leh thin?” tih pahin a fapa chu a vaw te nghal tuarh tuarh a. A fapa chuan chuti ang chu a naupan lai ata tawh, lo tuar thang viau mah se, ngaia neih harsa a ti kher mai. Vuak sim theih chu ni se a ruihhlo tih rualpuite zingah a sim hma pawl chu a ni chiang khawp ang. Mahse ngawlveiin ngawlvei simtir a tumna chhungkua an ni tlat mai a, a ngaihna a awm ngang lo a ni.

A nu leh pate inhau leh invel thawm hriat tur a awm reng thin avangin Hnuna chuan a naupan lai atangin an in chhungkhur chu hrehawm a ti em em thin a. A nu leh pa inhau thawm a hriat apiang mai hian rilru hrehawm leh ipikin a lo awm thin a. A tawt up up a, ngaihthlak nuam a ti lo thin asin aw…! Chhungkaw

hausa an ni hran lo na-in, heti em ema rethei tur chu an ni hran lo. An lakluh ve chhun chhun chu a pa’n a in zo zel a, a nu lahin card den a ching a, a lo cha ve reng mai thin bawk vei nen, retheih chu an phu ve reng emaw tih tur zawng anni. A nu leh pate’n an lensan loh leh, hnathawkin an chhuahsan reng a. Enkawlna tha leh kaihhruaina mumal pawh dawng vak lem lovin zalen takin a rawn seilian ve naw naw a, in chhung ai chuan khawlaiah a tal tam a; mi chhungkua nui dar dar lai a hmuhte hian awh namen lohvin a awt thin.

Pathian tihtu chhungkuaa pa berin zahawm taka a nupui fanaute an enkawl dan a hriat leh a hmuhte hian, a pa atan a lo awt ru em em thin. An chhungkua chu engti zawng paw’n han mitthla se, inhauh, invuak, pa ber chatthla… tih vel loh chu engmah mitthla tur dang a awm lo. Lungngaihna, manganna, khawharna, beidawnna leh hrehawmna te chu a thian hnai tak an ni ta ber a. Chuti ang mihring nunna atana thian duhawm lo hlirin a chhungrila ro an rel hnu chuan, tum khat chu intihhlum mai duhnain a khat mup mup ta mai a. Mahse a huaisennain a tlin ngang loh avangin mual a liam ta lo mai chauh a ni.

Ruihhlo chu a ban phakah a awm reng bawk a, a chak ve hrim hrim vang lam pawh ni lovin, a chhungril nun hrehawm leh beidawng chhawk zangkhaitu a nih beiseiin a’n ti ve chhin a; rei lo te chhung chu a hrehawmna pawh a theihnghilh ve mai a. Mahse a rui hlen thei si lo! Harhfim hman lek lova khawsak mai chu a duh ta fo a, ruihhlo chu a khawih ta fo a, thla tam a vei hmain a ngawl a vei ta reng
mai. Pawisa nei ta lo chu, ruih ve reng a duh bawk si a, mi thil a ruk mai a ngai ta. Mi thil ruk ai chuan inhlawh zawk mai a duh changte pawh a awm a. Mahse ngawlvei chu tuma’n an chhawr duh si lo. A chakna chuan a rawn thing ve sek reng thin bawk si a, tlawm leh zah pawh dawn lovin rukruk leh ruihhlo chu a khawih a lo ngai ta a ni.

Ngawlvei mai mai Hnuna nu leh pate chuan ‘keimahni vang a ni’ an ti lo. An fapa chu misual chhe lailet derah an chhiar a, a tih ngaihna lah an hre chuang der lo. “I tlat tlat khan lo tla vel mai mai teh” an ti let zawk zawmah a! Khawtlang hruaitute leh Police te’n ruihhlo ngawlveite chu an man a, an vau a, an vua a, jail-ah an dah a, an tihtur pawh a ni reng a. Thenkhat phei chu an vaw hlum hial a, mahse an simtir thei si lo. Hnuna pawh chu chuti ang chuan an man ve foa, an vuaa, an vaua mahse a rilru erawh an khawih danglam thei tlat si lo. Kohhran hruaitute chuan hma laiin Gospel camping-ah te Hnuna chu nawr lut lui fo thin mahsela an ti hlei thei bik chuang der lo.

Eng emaw chang chuan an ti fuh ve viau dawn niin a langa, amaherawhchu anhmuh dan a danglam tak tak thei lo ber hian Hnuna chu a ti hnual leh thin. Kohhranah te a in hmang chho ve dawn chauh a ‘enthlak phawt tur’ an han ti leh lawi a! An ring zo ve tak tak lo tih a hriat hian a ti thei ngang thin lo a ni ber mai. Biak in kawt tual velah hmel hlim sangin kut thing meuhin lawmpuina thu an hrilh vei luam thin tak nain, mi a nileng ta lo chuan an lawmpui tak tak leh tak tak loh chu a hrethiam vek tho. Ruihhlo nghei ta chu nun pangngai a rawn zawh chho ve beuh beuh zel a, ngaih melhte pawh rawn nei ve tanin, thenawm khawveng te inah pawh an lawi lut ve ngam tan ta.

Nimahsela, nu leh pate chuan an vei em em, an tawngtaisak chamchi Hnuna chu an inah an fanute kawma alen luh ve chiah chuan, a haw hnuah, “Mami, kha pa kha in leng atan ka duh hauh lo a nia,” an ti leh daih thung si! A lang a mawiah chuan lawmpuiin vei hle mah se, an tawngtai chhanna Hnuna chuan an in chhungkhur a thlen meuh chuan an mizia tak tak an thup seng ta thin lo a ni. Chutia ruihhlo bawih atanga chhuak tura a in buatsaih lai chuan, Lamtualah te pawh a kut vung leng lungte chu zahpui zo lovin Pathian a fak ve a, kawng dik zawh tura puih chhunzawm zel a ngai a, Pathian a duhnate chu tihpunsak deuh deuh a ngaih tehlul nen, a tawngtaisaktute bawk chuan “Engtikah tak da leh ang maw” an ti leh sup sup lawi si!.

An rilru tak chuan “Ngawlvei mai mai” an ti ni ber hian a hria. High way is my home Hnuna tan chuan an in chu hremhmun ang mai a ni. Chaw ei nan leh riah nan a hmang ve zeuh zeuh hi a ni ber a. Khawlai chu a ngaina takzet a, kalna tur ber hre chuang si lovin a tei a tei a, a thlen tawp tawpnaah riahrun a rem ve mai thin. Vawi tam tak a inngaihtuah a, intipa viau e ti lo chuan, tu hriat si loh hian a tap hawm hawm fo a, a nihna leh dinhmun te, a hun tawn te a thlir chuan a lungawi thei thlawt lo.

Theih se zawng, a suahsualna zozai chu sim hmak a duh ber a. Zan a mutnaahte hian, “Naktuk atangin ka ti leh tawh ngai lo vang,” tiin thinlung takin thutlukna siam ve thin mah se, a tuk khua a lo var a, a tih than em em damdawi zungzam chuan chuti maiin thlah a tum bik hauh si lo. Chu ruihhlo chuan ti vat vat turin a lo nawr chiam chiam a, a tawpa tawpah chuan a thutlukna siam pawh zah zo lovin a ti leh thin. Ruih reng mai chu a duh tawh lo takzet a, a ruihna bawlhlote chu a’n paih thul. Mahse, rei a daih thei tak tak lo. A paih chu amah bawkin a zawng leh du du a, inthiam lo zet hian a rui leh nge nge thin.

A nun dan hi a duhdan a ni bik lo. A langah chuan Pathian duh awm reng reng hmel a pu lo na in, mi hriat lohvah chuan Pathian chu a au fo lawi si. Zan khat chu, “Pathian, min hre thei em? Ka lam lo hawi hram la, khawngaih takin min chhan rawh,” tiin tap chungin a au lawm lawm a. Pathian lah chuan hun a la ti lo nge, a ngawi hmak mai bawk si. A remruat dan hi hriatthiam a va har thin em!

“A tur a na e, zungzam a fan zo,
Rawlthar dawn tuai te, a dawi a mek che,
Nangma tan a pawi lua, i dawn chiang lo a ni.
Aw Mizo tlangval famkhua i lawi dawn e,
Sim rawh bansan la, ruihhlo i hmelma a ni,
Aw tang fan fan.”

Uar tak maiin Hnuna chuan a’n sa vei al al thin taknain, a tur na chuan a zungzam a fan zo tak meuh meuh thung si. A tan a tha lo tih leh famkhua hma taka lawitir theitu a ni tih chu a hre chiang viau a, ruihhlo hi a hmelma a ni tih chu tu hrilh nawn leh pawh a ngai tawh hran lo. Tang ve fan fan thin mah se, a tang zo ngang thin lo a ni. Mihring pangngai ve ta na na na chu ngaihzawngte pawh a nei ve a, rawlthar a nih lai atang tawha a ngaihzawng a ni.

An inngaizawng rei viau tawh na in, a hmeichhe chhungte chuan an duh thei thak lo – duh chi lah a ni hek lo. A hmeichhia pawh chuan simtir tumin a thiam dan leh theih ang tawk tawk chuan tan a la ve nasa hle mai. Kum tam a tawngtaipui tawh a. Mahse Hnuna chu a danglam thei hek lo. Ruihhlo sim thei lo chu, hmangaih leh lainat em em chungin a then mai a lo tul ta a. Awlsam a ti bik lo kher mai. A hmangaih berin thenna thu a hrilh ni chuan Hnuna chu a tliak hnawp a ni ber e.

A bialnu chu a dem vek thei lo va, a rilru natna pawh hneh hram a tum thin. Mahse a rilru na chu a reh thei lo va, a buaipui awm tawh tehreng nen, a hma aia nasain ruihhlo chu a tih phah zui a; a hmangaih leh a neihchhun nia a hriat, a bialnu a’n chan zui a, nun beidawng ngawih ngawiha a’n awm ta chu, lainatawm tak a ni. A nun ning tih ngaihna hre lo tawpkhawk chu addict center-ah a awm ta hial reng a, chutah chuan alawm, mawi em em mai hian bangah thu a lo inziak a. A chhiar a chhiar nawn a, inhmeh a inti hle mai. Chu thu chu –

“Highway is my home,
Newspaper is my blanket,
Cubit is my pillow .“

Duh thu leng a sam a A rilru tawt lutuk chu a thawlpui phah mial beiseiin daiah a kal thin a, fianrial hun a hmang ve thin. Mahse a tawngtaina chhanna chu a hmu thiam lo nge, chhanna reng reng a dawn ngai si loh avangin tawngtai pawh a kham zozai ta. A tawngtai tha duh meuh tawh lo. A bul vel chu a’n thlir a, rose par mawi tak chu a lo awm thliah thliah a, chutah District Jail-a a awm laia an thu tar thin chu a hre chhuak zawk mai – “Nun hrehawmin beidawng suh, rose pawh hling zingah a par thin asin” tih kha. A han hawi zau leh deuh a, thli thaw her her chuan a thlang lawk hnim leh hnahte chu a chhem thle lep lep a, chu ngawt pawh chu a awt rilru hle a.

“Anni zawng, inlungrual takin an awnho dual dual si a,” a ti rilru neuh neuh a. Chawngzawng leh Tlaiberh te chu a chhak lawka chawnpui leh saron par mawi takah te chuan an rawn fu ve zauh a, an thlawk bo leh thin a; a hrehawmna leh beidawnna zawng zawngte chu chu’ng savate ang chuan thlawk bo vek thei se a ti khawp mai. Mahse a teuh lo – hrehawmna, mangannna, lungngaihna, beidawnna leh nun ninna te chuan ka ta tak emaw tiin an vuan tlat tawh si. Van boruak zau tak chu a’n thlir leh vang vang a, chhumte chu an tleh del del a, a awt leh ta em em a. Chhum anga sang taka awm a, khawvel lungngaihna leh hrehawmna zawng zawng chunga len chu a chak a. Mahse… Hnuna chuan duh thu chu han sam ve neuh neuh thin mah se, boruaka in sak mai chu, a chhungah a chentheih si loh.

Dam man a awm lo tahna tur hlir a ni  Addict center atanga a chhuah hnu chuan nun pangngai neih tumin in lamah a haw ve ta a. A chhungte lakah chuan rinna a nghah ve tawh tehlul nen, hma an lo la
sawn reng reng lo mai. Eng emaw hlekah an ringhlel reng mai a, a pa zu rui lah chuan kamchhe tleuhna’n tak a hmang fo lehnghal! Mahse an entleu tawh laklawhna rilru chu tawrh hrehawm ti viau mah se, Hnuna chuan a ruihhlo tih thin chu sim hlen hmak a tum tho tho a.

Harsatna erawh a tawk dawn chauh. Mi pangngai tumah thian a nei si lo. An retheih nak alaiin drugs addict a la ni zui bawk si! Thian pangngai pawh a beisei ngam lo va, a thian neihchhunte chu amah ang bawk an nih avangin a hnaih duh tawh si lo. Mi chak lo tak a nih avangin a ti leh palh hlauh ang tih mawlh chu a hlauh ber a ni a. Chuti khawp chuan tan a khawh ve a, mahse a thian hluite chuan an rawn zar reng a, lo hnar ve fo mah se, anni chuan fiamthu ang lekah an ngai a ni ber. A lungngaihna leh beidawnna zawng zawngte chu mi pangngai hnenah hrilh tur nei hek lo le, a ruihhlo tih pui, a rin zual deuhte hnenah chuan sawi ve mial mial thin a.

Mahse, anni lah chuan, “Ho lutuk! Keini paw’n chuti angte chu kan tawng ve vek tho, engah mah ngai duh suh,” te an lo ti mai mai a. A thiante chuan engah mah chu’ng harsatnate chu ngai lo mah se, a tan chuan phurrit a tling tak meuh meuh si. A nun harsatna chu tumah hrilh a tum leh ngai ta lo. A nun khawharna, hrehawmna, manganna leh belh tur duh thinlung chu amahin a up char char a, a pai reng a, a tawpah a rilru tawt lutuk chu a puak keh ta! Kal ngaihna a hre tawh lo, pan tur lah a hre hek lo. A hun tawn leh harsatnate chu mite chuan nep an tihsak a, “Sim duh lo chu, thih chilh law law la a ni mai. I nep lutuk! Mahni tana tha lo pawh thlah thei hlei lo.

I sual vang a ni! Tum tum mahla, ‘tiang hi chuan an sim hlen thei tak tak tawh lo,” tih velte chu mi dangte thlamuanna thuchah a ni tlat lehnghal. Aw… amah paw’n a buai tawk tawh viau asin mawle! A hma paw’n lo tum fo tawh mah se, a ngam ngai miah lo thin kha a nia, a hun tawnin zir ta ngang hek lo le, a tawpah chuan a ngam ta – hruihrual chu a la a, a thlang lawka kawlthei kungah chuan a hrui chu tap zawih zawih chung chuan a suih mawlh mawlh a, a hmawr  lehlam invalh chu hreh tak chungin a nghawngah a thun khur zawih zawih a.

Dam a duh tawh lo a ni lo, harsatna buai zing pik mup nena dam reng chu a duh tawh lo a ni. Amah hnem thei leh thlamuan zo reng reng a hmuh loh avangin, chu’ng laka tifihlim thei tur bera a hriat, thihna chu a thlang ta a ni. A tan chuan dam man a awm lo, tahna tur hlir a ni. Tal chawr chawr leh inleng at at chungin Hnunah chuan khawvel hi a chhuahsan ta…

Tlangkawmna
Tunah chuan mi hmuhsit leh endawng a tuar tawh lo va, sim a duh em em thin, a tih hleihtheih der si loh, ruihhlo chu a sim ta. Ruihhlo zunzam chuan a rawn thing let thei tawh ngai lo vang – chu mawlh chu a lungkham a ni si a. Riahna tur mumal nei lova kawmkar hmun remchang deuh a zawn duk duk a ngai tawh lo vang a, a nu leh pa inhau, invin leh invel thawm pawh a hre tawh ngai lo vang. An in chhungkhur rethei lutuk leh a pa zu rui chatthla hmel hmuh reng ngaite chu hla te khaw lamah a thlawh bosan ta!

A thih hnu chuan a thil neih beitham tak tak chu an han singsa ve a, engmah thil  hlu a nei lo. Thil hlu nei tur paw’n a khawsa lo hrim hrim a ni. A lehkha hluite chu paih turin a nu chuan bawlhhlawh bawm lam chu a panpui hnak hnak a, an carpet chu a hlui deuh vang nge ni, a thlerah tak mai chuan a in chhuih palh hlauh mai, lehkha chu chhuatah a tla darh nuaih a.

Hnuna nu chuan a chhar khawm zung zung a, chu’ng lehkha tla zingah chuan a fapa kutziak ngei mai a hmu fuh ta. A’n chhiar chu a insum hman lo, a tap nghal zawih zawih a – “Mama, Mama” tih bak sawi tur a hre chuang der lo. Mi dangte pawh an rawn tlan khawm ve hluai a, Hnuna nu lehkha phek ken lai, hlai vak lo, hlui hmel zet tawh chu an han laksak a, chu lehkhaah chuan ‘ti hian a lo inziak a –

Ka tan van pui lo chim!
Ka tan van pui lo chim!
Ka tan van pui lo chim!

Chu thu ringawt mai chu lehkha phek khat tlat chuan a lo inziak dul mai! Chu lehkhaphek chuan Hnuna awm loh hnuin thu erawh a sawi ring ta hle a. Hnuna nun ipik lutuk kutchhuak chuan an chhungkua pawh a puahkehtir ta! A nu leh pate chu Hnuna nungchang tha lovah an inmawhpuh a, an thiam lohzia an inhre chhuak ve ta…

Similar Posts:

• Ruihhlo
• Ruihhlo bawih atanga i lo chhuahin
• Ruihhlo do… Heti zawng hian…
• Rilru a hah ve mai a ni e…
• Awmpui Nula

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Wednesday, January 26th, 2011 at 4:54 pm and is filed under Luangliam, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.