Neiliani : Liani hi nula hmeltha leh lènmawi tak a ni. A hmingpum – ‘Neiliani’ a ni a, ‘Liani’ tiin an ko mai thin. Pasal a neih hnuah ‘Neii’ tia koh tura engkim ruahman lawk vek a ni a, an khaw nula chhuan tawlawl a ni. A pian hma chiah kumah an Bawngpuiin Nó, a lena lian mangkheng a hrin avanga ‘Neiliani’ lo ni ta, a ni awm e.
Hmangaihna : An khaw tlangval fel leh lehkhathiam – sorkar hnathawk, zirtirtu leh tlangval chhuanawm ‘kei ka ni’ inti chin te’n beiseia an hèl mup mup a ni a; mahse, ani chuan hawihhawm takin a lo hnar zel a. Nikum, kumtir atang khan hmangaih (em em) a tâwng ve ta a. Chù tlangval a hmangaih zia chu mite sawi a tling a, val upate mak tih hlawh khawpa tlâng hriat a ni. A hmel hmu loin ni a vûi zo lo a, zan a hmachawn huam lo a, chû tlangval chuan zawlaidi a tat a niang, an ti hial a.
Lianchhiari lunglen pawh neptè a ni. Amah chu – Ropianga a ni. Pu Thangseia (fam) fapa, thlanmual thlanga awm, chhungkaw harsatna avanga Pawl 4 pawh zirchhuak lo, khilaitu a hmuh apianga lem ve thei zel a ni a; a hmel leh pumrua erawh tlangval tawkfang ve tak a ni. Farnu tawng thei zet a nei bawk a.
Liani a tap! : An fanu, chuti tak maia val satliah tàwnna a tuiral ta mai chu a nu leh pate ngaih a tha thei ta lo a. Kum tamtak an fanu lo beiseitu, an khaw VCP fapa – Keitawna nen, tunthla chhung ngeia inneih tir tumin hma an la ta a. Chù thu a hriat chuan, Liani chu a tap nasa hle a. “Ka nu, ka pa, eng thil nge intih tak? Hmangaihna a ni, hmangaihna! Hmangaihna hi thinlung atanga chhuak, nu leh pate’n thuthmuna in lo sawi rem mai theih a ni lo a sin. Ka hmangaih – Ropianga ka neih loh chuan e, in fanu hi lunglengin ka fâm thei hial ang. Hlimin ka dam hek lo ang. Hringmi zingah ani tluka thlakhleh ka nei mawlh lo, min then lul suh u. Neih rosum leh mihring felna te hian thinlung hlimna, chhungril lawmna min pe dawn si lo. In thu hi sut hram ta che u…” tiin, a ngen chiam a.
A nu leh pa thlirna : A nu leh pate chuan zaidam takin “Lianbawih, tunah hian i hmalam hun, i damchhunga i nawmsakna leh hlimna tur pawh thliar thiam lo khawpin, hmangaihna avanga tihàt-in i awm mek a ni. Hetiang mi hi khawvelah tam tak an awm a, an inchhir a, inchhir a sawt tawh si lo. Khua a tlai zo tawh thin si… Kan thu ngai la, pawm mai zawk rawh. He hmangaihna avanga damchhunga hun hreawm leh retheia i awm tur hi kan hmu chiang em a, chutiang tur chuan kan phal thei lo che a ni. Hmangaihna hi sawirem theih a ni lo, inneihna erawh sawia inrem theih a ni. Chù sawiremna atang chuan nang pawh i lo piang a, chhungkua nuam leh awhawm nei i ni.
Hun an pe : Tuna i hmangaihna hi hmachhuanin Ropianga khu nei ta la, retheihna leh lungngaihna ruamah i nun i hnuk lut dawn tihna tluk a ni. I pasal atana kan hual, kan VCP Fapa – Keitawna khi i nei a nih ngat chuan, fanau maltluan chawiin chhungkua in han din chho ang a. Karlo-ah hmangaihna a lo piang a, chhungkaw hlim leh awhawm indin ve ngei ang. Chutih hunah chuan, Ropianga ngaiin i kúr tawh ngai lo ang a, nangmah ngei pawh mi nute awh rawn – nu zahawm i la ni ngei dawn si a. Tharum hmanga nawr luih che kan tum hauh lo, duhthlanna dik erawh i neih ngei kan beisei. Ngun takin lo inngaih tuah ang che…” tiin, inngaihtuahna hun an pe ta a.
Thurawn pe r’u : Tunah hian, Liani hian a hmalam hun lo awm zel tur atan thurawn a mamawh takzet a ni. Engtin nge thu i rawn ve dawn le? A dinhmunah han inchan la, tu zawk nge i thlan ang a, eng kawng nge i zawh ang le?
Liani,
“Khawvela i hmangaih ber, i rilru leh suangtuahna zawng zawng neitu, mite mak tih khawp leh mualpho pawh huam takmeuha i átchilh – Ropianga chu nei ngei rawh! Hmangaih leh duh berte neih tluka hlu a awm lo. Chutin, i nun pawh a hlim ngei ang. Aw… i va hlim dawn tehlul em! I hlimna leh lawmna chu mihring tawnga sawi fiah rual a ni tawp lo ang le!…”
tiin, thurawn pek che ka tum zet a –
Mahse, Liani…
Mahse…
Similar Posts:
- Hmangaihna
- Tu hmangaihna nge thuk ber ang?
- Mahse…
- What is Love? What does it mean to me?
- Hmangaihna!
a tha khawp mai
February 1st, 2011 at 10:53 pm
Phek thar hawng law law ang
Report this comment
February 1st, 2011 at 10:54 pm
Hetiang hun hi damchhung nghawng tur thutlukna siam HUNLOHLAI ber ani. Neih hrihloh ve ve a him ber ang. Hmangngaihna changchawi in Ropianga chu neih ta se,an inthen leh hma khawp ang,a chhan chu:
1.Hmangaihna chhanletloh hi huatna ah a chang thin.
2.Tunlai hmeichhia ten an duhber chu SECURITY ani, chu chu Ropianga hian pek chhuah tur a neiloh hmel.
3.Hmangaihna sosang hi a daih rei tak tak ngai lo,gland hnathawh, kiam leh mai tur ani.
VCP fapa pawh chu nei ta se, se…se…se…ta sa ti reng reng in Liani chu a inngaihtuah chet chet thin ang a, a pasal dawhtheihna in a tuar lo hun a awm ang a, an hlim chuang lovang, inthen tho an hmabak. Hetiang ah hi chuan Liani tan awmna hmun sawn a tha ber ang.Tin, rilru lakpen nan vantlang hna(social services) lam ah inhmang tam rawh se…
Report this comment
February 1st, 2011 at 10:57 pm
@ 52 ..! & 2 khi
Report this comment
February 1st, 2011 at 10:57 pm
Neiliani chu aw , i hmangaih ber hian a hmangaih ve che em,kan hmangaih aia min hmangaih tu mipa hi an hlu ania,i nu leh pa te thu zawm la i tih fuh ka va ring em, i bialpa lah hi a ngaihsam hmel ropui si,nu leh pa thu zawm ti fuh lo hi an vangviau ania, fuihna thuziak hi lo chhiar phawt mai teh
Report this comment
February 1st, 2011 at 11:15 pm
In thurawn tha tak2 te avang hian Neiliani a lawm tawh ngawt ang. A hma lam hun atana thuthlukna dik leh tha zawk pawh a thlang thiam ngei ang. Han tizel teh u’n…
Report this comment
February 1st, 2011 at 11:46 pm
Mate ainawn chu i la dam thiam thlap thlap hle mai. Thil reng reng hi kan han vei tak tak hian chuan khaw dang hawi lek lo leh nu deuh but a vei hi a awl a, kan duhdan leh ngaihdan ni lo ngaihdan dang mi in an rawn pho chhuah hian, chu ngaihdan dang chu ngun tak a ngaihtuah ai a lo lungawi loh nghal em em leh ngaihdan dang nei tu te a mimal a kher kher ai chuan, fel fai tak leh dam thlap a kan chhan let theih zawk hian kan tihtur/ thiltumah kan chiang hle tihna a ni zawk thin.
Davida team te hian tanpui an mamawh zia i mit ngeiin i hmu a, theih tawp a tan i lakpui avangin i fakawm thlawt e. Chutih rual chuan kawng engkimah ngaihdan dang te hi a dik ve thei tho thin tih hriat a in en fiah nan leh kawng dik tak a min khalh ngil tuah hman thiam a va tha em! Ngaihdan chi hrang hrang karah, ngun tak a in bih chian hnuah kan thil tum chu tha kan ti ngang a nih erawh chuan a hlawh tlin nan theih tawp a beih chiam mai tur
Report this comment
February 2nd, 2011 at 1:01 am
Neiliani chu thutlukna fumfe in siamsak thei tawh em?
Report this comment
February 2nd, 2011 at 4:57 am
Zoho sawi ang khian pem daih teh, anih loh chuan zi bo rih teh.
Report this comment
February 2nd, 2011 at 5:25 am
Mahni hmangaih berte neih tluk a hlu a awm dawn em ni..Liani?
Hmalam hun tur chu tuman kan hre hlei nem! Tun hi a hlu a, I hmangaih hi nei la, i hlim lohna chhan tur a awm hleinem. Hausakna hian nun nawmna pe mahse hlimna a keng chuang lo e..I hmangaih Ropianga hi nei mawlh rawh..In VC fapa thaw uih deuh neih ai chuan a tha zawk ang!!hehe
Report this comment
February 2nd, 2011 at 7:24 am
lrp@59 I sawi dik maithei mahse min hmangaihtute neih hi a naum zawk lawng maw? Kan hmangiahte hian kan thinlung an ti na fo si ang tih a hlauhawm alawm le.min hmangaihtute chaun min hrethaim zel dawn asin
Report this comment
February 2nd, 2011 at 10:50 am
Comment 36 a eelcee thurawn hi tha ka ti ka thlawp mai teh ang.
He post hi lohtheihloha ngaihtuahna min sentir vang vang thei ani a, a ropui leh hle mai. Kawlhawk, lehkhabu hi i ziak tawh em? Hetiang talent nei chunga lehkhabu i ziaklo emaw ziak i tumlo emaw anih chuan talent petu che Pathian pawi i sawi ang tih ka hlauhpui che.
Report this comment
February 2nd, 2011 at 1:21 pm
Tunlaiah chuan Duh takte nena Bahra laih ai chuan, duh leh tho turte nena Bahadur, cha lao.. tih an duh tawh zawk
Report this comment
February 2nd, 2011 at 3:32 pm
awmawmpuia @61, I tizahthlak e a… lawmawm bawk si. Lehkhabu te zawng, keini han sualchhuah zia a ni dawn em ni le… Phur thut a awm tak leh kan la suâl ve ang chu.
Report this comment
February 2nd, 2011 at 4:14 pm
Ih maw Liani,pasal neih chu tu te pawh nei dawn ila risk vek….VCP fapa chuan a hmangaih che em?Midang pawn an hel ve tho che avanga nei duh mai che a ni lo maw??Show off atan ringawt chuan in phal miah suh.Mahse Ropianga hi i hmangaih tak tak em? I hmangaih tak taka nun nawm loh,retheih,rilru hah zawng zawng huam khawp a i nei ngam anih chuan midang tumah i mamawh ngailo ang chuan #52 point 3na khi a dik…hmangaihna sosang kha nghak dai phawt la,a sosang phul lutuk a reh hnu pawh i la retheih pui huam tho anih chuan Ropianga chu nei hmiah rawh…Ka va han hriat hmel zet zet tak emmm!!!!
Report this comment
February 2nd, 2011 at 9:15 pm
@63 Kawlhawk, sual ngei teh, ka lei ngei ngei ang.
Report this comment
February 4th, 2011 at 12:39 am
‘A hmangaih ve che em?’ tih zawhna hi a pawimawh ka ti. A hmangaih che anih chuan tunah tlangval ho tak ni mah se nangmah vang liau liauin a la insiam tha em em ang, hrehawm takin nun a hmantir hauh lo ang che.. te ka tia.
Report this comment