Post a tam vak lemlo bawk a ka vei zawng ka website/blog a ka thil ziah hi ka rawn tarlang ve mai mai ange.
Tunlai chu lammaul a grass phah a lar hle a. Engemaw zawnga ngaihtuah chuan a lawmawm in hmasawnna kawng khat a ni ve a. A tha ka ti khawp mai. Amaherawh chu zau zawka rilru a ngaihtuah chuan a tangkaina leh kan mamawh em em na tur hi tun dinhmun ah chuan ka hre ve hauhlo mai. Abik takin keini thingtlang lama awmte phei chuan kan tangkai pui lo lehzual. Aizawl khawpui chhunga awmte pawhin tangkai pui na engvakmah an neih bik ka ring lo.
Hetiang a Zoram ram rethei leh hnufual ah, mahni intodelh lo leh Central Sawrkar hrawk chawm ni reng chunga sum tam tak helai hmun zim te a luanral tir hi ka lo ui ve em em mai a. Heng te ai chuan kan kawngpui te hi min chei sak ta sela, fur lai a diak lutuk thin tal te tlema a lo zia awm theih deuh nan hma min rawn lak sak nan hmang se te ka lo ti mai mai thin.
Ania sin, thingtlang kilkhawr, damdawiin pawh awm ve lohna khua ah te hian asin hrehawm. A bik takin fur lai in. Damloh hritlan han tawh pawhin fur lai chuan a buaithlak em em thin. Ke a kal theihloh phei chuan zawn a lo ngai a, ruah a sur phei chuan a lo zawn theihloh a. Tichuan inenkawlna tur atana an sum lo khawl/neih ve tlem azawng chu motor hire nan hman a lo ngai ta a. Tichuan damdawiin lama an in enkawlna tur senso chu midang ta an han puk chawp leh a. Damdawiin hnai ber pan in an han chhuak ve ta thin a.
Chutah kan kawng te chu a chhiat em avangin damlo chu damdawiin thlenpui a nih meuh chuan a natna vang ni miahlo, motor in a sawi chauh em avangin a natna a lo zual a. Doctor te thiam tho mah sela khawl tha leh damdawi tha te a awm ve loh avangin hmunpui lamah refer an ni a. Mahse damlo chu a chauh em avangin motor chuan phur leh ta sela kawng lakah a thi mai angem tih zawhna a lo awm leh ta. Chu chu doctor pawhin a lo hlauhthawn ve tho a ni. Tichuan doctor leh nurse ten theihtawp an han chhuah a. A hah pawh an hah thin. Thingtlang doctor leh nurse te hi chu tun aia tam hian an hlawh pawh hi hmunpui lam ai hian pe tam sela ka duh thin ngawt mai.
Tichuan damlo chu a na zual zel a, a hniam telh telh a. Tlema a that deuh hun, motor a phurh ngam a nih hun an ngaihchan chhung chuan a natna chuan a lo hneh ve zel a. Tichuan a nunna chu chhan theih lohin chatuan ram a pan ta a.
Keini naupang te pawhin hetiang dinhmuna ding, kan khaw damdawiin a thi ta hi hriat ka nei ve ta nual mai. Kan kawngpui te tha nisela thlamuang taka hmunpui panpui nghal mai theihtur kha kawngpui sawrbawl lutuk leh sawhna lutuk a phurh a ngamawm loh avangin dam ngei tur pawh khan a nunna hlu tak a chan ta. Chu a nunna chu Lammual-a Grass phah ai hian a hlu a, an grass phahna sum hian a lei thei hauh lo.
Tin,damlo pakhat, emergency a zai nghal rum rum ngai chu power supply awmloh vangin duh angin an hmanhmawh thei lova, kan doctor khan a nunna chhan ngei a duh avangin Emergency light eng nen zai a tum ta a. Mahse a zai hma chiahin a boral hman. Power Supply hnianghnar ila chuan a nunna kha an chhan hman ngei ang.
Sawi tur a tam mai. Keini thingtlang lam mi tan chuan Lammual-a Grass phah aia mamawh hmasa kan la ngah lutuk. Tin, kan MLA/Minister te thlakhat hlawh theuh hi cut sela, buhfai neilo harsa lutuk, vai pawisa puk sak a rul leh thei silo, an rulh theihloh avanga vai hnena an fanu duhlai pe ta ngawt te hi buhfai rawn lei sak sela a va lawmawm dawn em…. Kan khua ah an awm tak tak ania aw. Tlema khawsa thei deuh tan pawh a leina tur pawisa awm mahsela a lei tur buhfai ber a awmlo tlat thin.
Heng zawng zawng ka han sawi tak nachhan chu kan Sawrkar ding reng reng hian mipui nawlpuiin enge kan mamawh hmasa tih hi chhut thiam sela. An hlawh tihsan leh an hamthatna ringawt ngaihtuah lo hian, Zoram mipui te hi min ngaihtuah ve sela ka duh vang a ni.
Similar Posts:
- Lammual-a zan a inkhelh hi
- Doctor, Nurse leh a chhehvel
- Ka lo vei ve thin
- Help help!
- Enge I ngaih ve dan??
February 23rd, 2011 at 9:32 am
first keuh ang,,dik ve pah reng
Report this comment
February 23rd, 2011 at 9:35 am
I thlirna lam atang cuan a dik ka tihpui khop mai che. Mahse lammual grass deuh ngor2 i ron vei a, thingtlang damdawiin te leh facilities dang omlo te hi chu, a changtu department threuh te hian an hna tur dik takin thok se, sum eiruk leh inthlahdahna te omlo se, lammual grass phah chung pon a zia tho lo mo le? He he
Report this comment
February 23rd, 2011 at 10:14 am
I rawn sawi khi a thra hle a, mahse lammual grass phahna sum hlawm hi Central Sawrkar pek a ni a. Sports atana sum dahhran an zuk sik hek ve a ni mai. I rawn ngaihpawimawh Kawng tha hi PWD lamin hman hman atangin Grass phahna tur sum aia tam feeee kum tin Central Sawrkar atangin an la chhuak reng. P& E Deptt ah pawh hetiang em em a tlawm a current hman man a tlawmna chhan pawh Central Sawrkar pawisa tho, Mini Hydel Project productive lem lo engzat ne kan neih… Health ah nise, National Rural Health Mission a awm,Malaria, TB, Aids..a Central hian pawisa a rawn pe hnem ltk.. Rural Development Department atana sum awm te hi i ngaihtuah chiang ngai em….
i rawn sawi harsatna te khi kan la tawh reng nachhan chu kawng te, eng te, damdawiin atana Central Sawrkarin an pek kha a nihlohna turah a kal tam deuh tihna a ni mai….Sports ho chuan a nihna turah Grass phah nan an hmang a..a lang nghal uar mai anih hi…hawh u i fak zawk ang u…
Report this comment
February 23rd, 2011 at 10:15 am
Lammualah MI ila. Inkhelna tur emaw tia. Chapchar kut pawh kan hmang dawn alawm le. Uluk takin bawkkhup chungin phaitual hnim chunga MI va chakawm ve o!
Report this comment
February 23rd, 2011 at 10:16 am
Development a awm dawn chuan a sawhkhawk a awm a ngai thin, nikum lam khan kan awmna lam ah chuan sawrkar in in 150 vel a nawrthlu hmiah, kawngpui zauh nan. Compensation cheng khat pawh a pe lo. A chhan chu sawrkar ram vek a ni tlat a, an lainatawm viau mai. Mahse tun ah chuan kawngpui zau tha lutuk a awm ta.Hei hi ka ngaihtuahna ah a lo awm daiha i thil ziah nen hian in kungkaih deuh tho in ka hria e.
Report this comment
February 23rd, 2011 at 10:22 am
Post chhiar hma in ‘Ka vei zawng’ la ni hman chiah lo, thil pakhat. Post a pics kan en mai dawn a, ‘Unregistered domain, register at imageshack.us’ tih a lo in tar kulh kulh tak mai. Imageshack chu a free ta lo a ni maw? In register a ngai dawn a nih hi le….
Report this comment
February 23rd, 2011 at 11:15 am
In khaw tereuhtea damdawi in tih changtlun vak rikngawt hian Zoram tan rah a chhuah tamlo khawp ang. Chu ai chuan lammuala grass phah hi Zoram mipui, thingtlang kilkhawr ber ber leh in khua thlengin kan chhawr tlang thei zawk ang.
Tin, lammuala grass phah aia tul chu a tam na meuh mai. Amaherawhchu, a thlirtu azirin tul nia kan hriat aia pawimawh hi a awm thei khawp mai. Chuvangin, thil tullo tak a ni lemlo bawka lammuala grass phah hi chu i sel tawh lovang u. Kan mamawh zia kan hriat hlawm ka ring, nang telin. Chuvangin lungawi zir mai hi a finthlak hle.
MLA-te thla khat hlawh cut sak te i rawt titiha, rawtna siam ngam turin Zoram tan hian thahnem kan ngai tawk em? tih pawh hi chhut chian a tul hle.
Report this comment
February 23rd, 2011 at 11:17 am
Ka vei ve zawng. Eset NOD32 Antivirus 4 update download na site hria in awm chuan min hrilh teh u. ka zawng kual ve nasa tawh. ka hmuzo tlat lo
Report this comment
February 23rd, 2011 at 11:24 am
Report this comment
February 23rd, 2011 at 11:27 am
@8 automatic update ah dah la,a in update mai dawn lawm,kei pawn chutiang hlir chuan ka ti a
Report this comment
February 23rd, 2011 at 11:38 am
Hetiang hi a lo nih dawn hi kan pute’n, ‘Hmasawnna a zuan in a zuang ang’ an lo tih fo chu!!! A zuan fuhna lai a awm tan a hlawk, a zuan khum te tan erawh hmuh phakrual a nilo… khawvel hi… Hahahaaa (Smiley a awm tlat lo..)
Report this comment
February 23rd, 2011 at 11:43 am
All round development hi kan thlir thiam a ngai khawp mai..Department tam tak a awm a, chung te chuan an mahni theuh ah development an kal pui thin. Central Ministry lam in an mahni chan theuh ah fund te an rawn allocate/ sanction a, chu chuan hna an thawk thin.
Artificial Grass phah pawh hi sport lam thlir chuan achievement ropui tak ani ve bawk. Helai a kan ngaih pawimawh zawk anih loh avanga development dang atan a lo divert ngawt theih pawh ani lo.
Kawng tlem te ngaih pawimawh a, a dang hlamchhiah hi policy tha a tih theih loh ang..priority pek tur bik erawh policy maker te hian an duang chawk(Chawmhlawm kan la nih avangin, Central Policy duan ang angin kan kal a tih theih ang ). Zau tak a thlir a ngai ani e.
Report this comment
February 23rd, 2011 at 11:50 am
@8 proxy i hmang anih loh chuan @10 sawi ang hian tih theih mai loh maw? Proxy i hmang anih erawh chuan settings atang khan a proxy address leh port te i set hmasak a ngaih hmel
Report this comment
February 23rd, 2011 at 11:54 am
Vai pawisa pum pek leh theih silo lai tak khi……
Rilru ava ti na ve…
Grass phah a tul ti leh ti vaklo an in zat vel ang chuvang chuan kan thu ve lo em mai sawi ve peihlo.
Isua pawn mi zawng2 a ti lawm biklo chuvangchuan
Ram hruiatu ten pawn mi zawng2 an ti lawm theilo.
Lungawi tum ang u har hle mahse….
Report this comment
February 23rd, 2011 at 12:26 pm
@10 gprs ringawt chu automatic update tur chuan a hman tlak loh lutuk a. chuvang nia offline update ka duh na chu. Tin. I hre tho lo maw
Report this comment
February 23rd, 2011 at 12:31 pm
Sangpuiipa, kei pawh, ka pa hi ‘Sangpuii Pa’ tia koh a ni. I vei ropuiin, i vei ril bik hle mai. Ram leh hnam hmangaihna tak2 thinlung pu mi i ni tih a lang e.
Report this comment
February 23rd, 2011 at 2:26 pm
I vei chu ka hriatthiampui khawp mai che. Mahse ka hriatthiam loh chu in khua a mi a pawisa ba pe thei lo khawp a berh niin a ba aiah a fanu vai hnena a pe chu in enliam mai thei a maw? Sorkar tih tura dahin in tha en mai em ni? Mak ka va tiin hriatthiam har ka va ti em!! Tupa chengkek lo tur te pawh ka hrechhuak e
Report this comment
February 23rd, 2011 at 2:41 pm
17
. Mizo diktak tan chuan neih ang chhun chhun pawh thawhkhawm liam liama in tanpui mai awm! Hmangaihna a dai zo ta! 
.
Allahabad-a temple pakhat chanchinte kha min hriatchhuah tir ka ti. An temple condition kha a chhe lutuk a, a balin a tawp bawk sia, a buildingte kha a rawih chhe zo va. Mahse tuman an ngaihven lo. A templea puithiam takngial pawn a ngaihven lo, chanchinbumi ten an kawm na ah chuan sawrkar a mawhpuh daih. Sawrkarin hma an la duh lo a ti. A tifai tur pawh an rawn dah lo a ti. A hmunhma balte kha chu mahni pawn tihfai ve mai awm tak kha a nia.
Report this comment
February 23rd, 2011 at 2:58 pm
Inti Thingtlang hohi in rilru hi alo chhia anih hi ka ti ta!!! Ram vei nan khawpui insawi chhe vak vak a, mahni khua retheihzia leh ngaihsak hlawhlo niin in inhre em em bawka, in retheihna zawng zawng in rawn hai langa…politics ah in han zuanglut chiaha khawpuiah in pemsan leh daiha. Inkhaw lam reng reng in hre chang tawhlo, thiam takin chu mite hnung chu rawn zui in tum ni ta ber hian ka hria. Kan politician in rel zuah zuah ho hi thingtlang lam atanga lo chuang chhuak, nang ni ang bawka mahni khua leh ram retheihna au chhuahpui nana khawpui sawichhiat avanga tling ta te vek tho anni. Mahni khua hmangaih awm tak hian in duhna ah chuan Aizawl in pemsan hrehlo thum chu nihhi. In sawisel pawhhi in khaw chhuak te tho kha anni…
Report this comment
February 23rd, 2011 at 4:21 pm
Hmasawnna kawng hrang hrang hi mahniin kan chhawr ve dawn loh vanga sawisel emaw, thil tul lo anga ngaih tlat emaw chu a dik bik dawn em ni? Nangman i chhawr tangkai lo a nih pawhin chhawr tangkai tur tam tak an awm ang chu. Thingtlanga damdawiin tha neih pawh a pawimawh khawp mai. Mahse khawpuia chengte tan chuan a tangkaina a tam vak bik lo thei.
Hma kan sawnna te hi a lawmawmzia ngaihtuah zawk ila a tha lo’ng maw?
Report this comment
February 23rd, 2011 at 5:48 pm
Kawng tinrengah hma kan la sawn thei lo deuh a nih pawhin hma kan sawnna awm chhun te hi chu sawisel loin lawm zawk tur a ni. Ngaihpawimawh lam a inang lo deuh thin mai a ni e.
Report this comment
February 23rd, 2011 at 6:53 pm
i post ulak taka chhiar hian, i awmna khua ah chuan damdawiin a awm ngei a,doctor leh nurse te poh an awm ngei tih a chiang viau,Internet connection thlengin,Mizoram a damdawiin Doctor leh Nurse Awmna ngei mai chu khaw changkang thawkhat tak anih ka lo ring ve mai a,chutiang khua ah ngei Mizo ei tur an neih loh avanga an fate VAI hnen a an hralh na khua chu han tar lang law law teh..MIZO awmna khua ah hetiang hi a awm tak2 poh ka ring lo ve
Report this comment
February 23rd, 2011 at 7:47 pm
He post hi a lak tlak teh vakloh. Department dang chan leh minister dang chan kha Sports minister ah a rawn burbun ngawt amawni, a harsatna rawn sawi khi sports minister chan ani hlawmlo reng reng.
Lammuala grass phah chungchang hi chu, hman atanga thalai leh football tui ho demand (football khel ve ngailo pawh, a en tal tuipui an tam em avang leh alo in mun rei tawh avanga an voice pawh strong em em) ani. Politician te thiamloh a awmlo a, an hmalakna a chhuanawm phian zawk ani. Mipui majority tena an demand ti hlawhtling tura an hmalakna hi a chhuanawm em em zawk ani.
Buhfai tihvel ah pawh Kan MLA thenkhat thahnem ngai deuh chuan an mahni sum tepawh sengin thingtlang rethei an tanpui ni tepawhin ka hria, food and civil supply minister (Rohluna) hetiang ani chung pawh hian.
Entirnan mai mai, tuna kan sports minister hian food and civil supply emaw health emaw, chang ta sela, tuna Rohluna teho ai hian a thawk tha leh ngei anga, mahse congress sawrkar sports lama a chakloh zia leh thalai te demand a ngaihtuah tak tak loh kawngah kan sawisel leh luai luai in a rinawm.
Sawisel ngai chu sawisel ngam ila, fak tlak pawh party thil vel avanga fak duhlo mai lovin, keimahni pawh hi insiamtha ila hma kan sawn zawk ang. Engemaw hleka a sawrkar zawnga kan generalise zel chuan Politician fak tur tumah an awm lovang. Tin, politician tepawhin mipui an play danah hma an sawn lovang.
Report this comment
February 23rd, 2011 at 8:10 pm
@funny,
i vang nge ka vang zok haha
Report this comment
February 23rd, 2011 at 8:32 pm
Entirna i rawn hman hi chu eng pawh lo nise, he ngaihdan chiah hi ka tawm pui e, kan ram hian hmasawnna nge a ngaih pawimawh mipui(voters) tih lawmna? NLUP an promise avangin thingtlang mi tam zawk hneh an ni a, 6th pay avangin sawrkar hnathawk hneh leh an ni a.kan inthlang a, Hnehnan chu Pu hawla ta a ni. MNF kihhnawk then chhungin thalai tih lawmnan grass an phah leh a. Mipui an lawma, an hlawh an san keuh.
Report this comment
February 23rd, 2011 at 9:11 pm
aijal1 #24: haha, kan tam na mual a in anglo tepawh ani thei ang chu. Misual ah hi chuan i comment hi ka hmu khat khawpmai, nick danga i comment te anih ngawt loh chuan.
misual pawnah vethung chuan mi zawng zawng tih theih, ka chhungte takngial pawhin reh min ti ve leh thung.
misualah hian ka tam lutuka, ka tlawh tirh lama incognito ka keep up tum ve ran ran pawh minlo hre tu an awm ve leh nawlh nawlh zel, a khat tawka comment hi a tawk chauh alo ni. Kei erawh chu ka khawvel leh thian kawmna ber ani lawi sia, ka tlawh ve reng chu anih si hi.
Report this comment
February 23rd, 2011 at 11:10 pm
Nia, min thlang tling ula…vek mai ang titu teh pawh hian an ngaihpawimawh hi a zim ta riau a ni tih a hriat ve na a ni mai
Report this comment