Kamkeuna:
Khawtlang kan tih chuan, ‘keimah’ telin ‘midang zawng zawng’ a huamtel thei ang chu. Nun kan sawi dawn chuan, mihring damchhunga a hun hman chhungzawng kha a ni bawk. Siamthat tih awmzia chu, a tha lo lai paih a, a thazawka thlak te, a lo mawih lai, thawmthat a, a thar thlak emaw, a mawih lai thlak emaw kha a ni bawk. Tunlai Mizo khawtlang nun kan sawi dawn chuan, tuna kan Mizo khawtlang nun, Kum 2011 atang hian kan sawichho dawn a ni.
A hmasa berin engvanginnge tunlai Mizo khawtlang nun hi siamthat a ngaih? tih hi ilo bihchiang hmasa dawn teh ang: Tunlai Mizo khawtlang nun hi hmandeuh kalta, 1990 vel lai ai chuan a chhe fe tawh a. Kan hnamzia nasa taka kalsanin, hnamdang tihdan nasa takin kan la a. Mahni hnam intodelh tum hauh lovin, hnamdangte zarah kan nung hram hram a. Dan leh hrai pawisa lovin tute pawh tunah chuan Arte thih thei mai dinhmunah kan ding ta a. Thiltha nia kan hrait pawh tumahin kan tihtha ngam tawh lova, kan sira midang lo awm ve te mitmei kan ven avangin kan hnam chu tunah hian a nuamsam lova, siamthat ngaiin, chhelai khawi emaw laiah chuan a awm chiang a ni.
Khawilai nge chhia? Ele, kan nunphung hrim hrim te, kan ngaihtuah leh sukthlek te, kan hnamzia leh kalphung te, kan Pathian biakdan te, ei leh in kan zawnna kawngah te, kan nitin hnathawhna ah te, Sawrkar hna kan thawhna ah te leh, kan then leh rual, chhungkhat laina hnaite nena kan inzawmna kawngte hi tunah hian siamthat a ngai tak meuh a ni.
Engtinnge kan siamthat ang?
a. Nunphung: English chuan ‘Moral’ a tih theih awm e. Mihring hrim hrim chuan nunphung kan nei vek a. Kan nunphung chu a that chuan, kan bula mite tan malsawmna kan ni thin. Kan nunphung a khaw loh emaw, a lo khawbaw deuh chuan, mahni mai pawhin tuar bik lovin, kan bula mi te thlengin an tuar thei thin. Chung kan nunphung tha lo, heng- zuk leh hmuam tihte, ruihhlo khawih te leh, midangte tai rana khawsak ang chi te hi a siamthat ngai a ni. Chung siamtha tur chuan, zuk leh hmuam tih loh (bansan) a, ruihtheih thil khawih tawh loh (bansan) a, midangte tana malsawmna nih tlat tumte hi thil pawimawh ber ber te a ni.
b. Ngaihtuah leh sukthlek: English chuan ‘Idealism’ a tih theih ang chu. Mihringte hi kan ngaihtuahna hian min han hruai nasa khawp mai a. Hlawuhawm aw nia kan ngaihtuahna- a kan ngaihtuah tlat chuan, kan hlau mai thin ang hian kan ngaihtuah a zir hian mihring taksa hi a awmin, a awm lo thei fo! Kan sukthlek leh hawiher te pawh hian nasa takin mihringte hi min kaihruai a. A nuam ringawt kan um chuan hreawm a lo thlenin, kan duh loh zawng tak pawh nise, kan ti thei mai fo! Kan ngaihtuahna a that a, thil a eng zawnga kan thlir thiam a, midangte tana tangkai tum tlatna ngaihtuahna rilru thiangjlim kan neih tlat chuan, khawtlang nun hi siamthat theih a ni. CHuti ni lova, a herh zawng hlira khawsak chuan, kan khawtlang hian thatlam pan ai chuan mawih leh tawih lam a pan tial tuial dawn a ni.
c. Hnamzia leh kalphung: Tunlaiah khawvel a changkang tawh a, thiltha leh hman nuam zawkte mai bakah, mawi zawk leh tlo zawk, chhawr nahawm zawkte a lo chhuak ta zawih zawih a. Kan hnamzia pawh chu thilthleng chuan nasa taka rawn chhem nghingin, kan Pathian biakdante chu a tha lamah tunhma chuan a rawn hruaichho va. Nasa taka hmasawnin tun dinhmun hi kan lo thleng ta a ni. Amaherawhchu, kan hnam hi kan zia a nghet lo emaw ni tehreng, thil thar apiang kan lawm a, kan hma- a lochhuak apiang kan ban a, kan tana thatur leh tha lo tur pawh kan ngaihtuah chian hma- in kan bawh rawk rawk thin. CHu chuan nasa takin sum leh paia midangte thikna nasa takin min neih tir a. Kan Pathian biakdan chenin chu chuan nghawrnghingin, eng Kohhran pawh tih theih turah Kohhran mi te kan thlarau a ro em em a ni! A chiang a ni lawm ni? Inkhawm pawh kan thahnem hleithei lova. Pathian fakna hla pawh kan sa hlei thei tawh lo. A hmingin, Hnehna chu Lalpa ta a ni’ tiin au rual dual dual thin mah ila, kan nunah a langchhuak chuang si lova!!
Kan hnamzia hi a ngheh loh avangin sum leh paiah nasa taka bum nuamin kan lo awm ta a. Phakar taka sum lakluh lah hreh lo tawk lo awmin, Chiahpuam ten min han man vel bawk a. Hengte hi kan khawtlang nun tichhetu hmanraw pawimawh ber ber a ni asin! Kan hnamzia, kan incheina te chuan hnamdang tihdan a lo ang telh telh a. Mipa thenkhat chuan tenawm takin an Sam an han cheibawl vel a. Sap MKH ang chiahin Chain nen, engengemaw nena inkhai bibawr thlehthluahin khawlaih an tei zuai zuaih a. Mahni thawhchhuah pawh ni lo Handset man to over nen khawlaiah Nula Bike ri ring mangkhenin an han leu pui vel a! Henghi a ni, kan khawtlang nun siamthat ngaihna lai chu ni!
Kan hnam chu mahni indahsang lova, midangte dahsan ching thin kan ni a. Tlawmngai hnam kan ni bawk. Mahse, tunah chutiang chu kan hnam zia a la ni em? Kei chuan, ‘Teuh lo mai, a teuh lo mai!’ ka ti tawp mai! Nursery naupang atanga High School naupangte te pawhin pitar putar City Bus- ah thutna ken nachang an hre tawh lova. Kan bula awm ve hnamdangte pawhin khami avang khan inthlahrunna an nei ta lo a nih hi!
Khawlaiah midangte ngaihsak hauh lovin kan pen hmawk hmawk a, mi kan su leng lawp a, ngaihdam dil zuina chang hre lovin, kan kalliam nal a. Midangte chilper hlau hauh lovin MOtor kan leu pui a, inthlahrunna kan nei tlem ta hle mai. Kan Mizo zia pawh ni tawh em em pawn heng hi ka hre tawh lo ve!
Khing a chunga hnamzia leh kalphung ka han sawi takah khian a piahlam pawh ka sawikai tel teuh mai thei a. Mahse, a huamthei nia ka hriat avangin duhthawh takin ka han zep tel hlawm a ni. Kan Mizo hnamze mawi ta, hmana hnamdangten min awh theih em em Tlawmngaihna kan tihte kha i chhawmnung thar leh ila, School ah te, mahni inchhung lumah te, Pathian Biakna hmunah te thlengin inzirtir thar leh ang u khai! Tichuan, kan Mizo tunlai khawtlang nun hi tunhma ang bawka lo mawi thar lehin, kan Mizoram Khawvel hi hnamdangte pawhin an ngaihlu thar leh ngei ang.
d. Pathian kan biakdan: Pathian nung bia Mizo te hian kan Pathian hi eng ang chiahin nge kan ngaih a, kan hriat? Kan thiante ang maiin em ni aw? Hnamdangte mahnin an Pathian, nunna pawh nei lo, thlaraute phei chu khawilamah! te an zah a, an biak urhsun dan zia te hi kan ngaihtuah ve ngai em? Khawtlang nun siamthat nan chuan Pathian kan biakdan hi kan inenchian a va tul tak em! Biakin ah mawitaka incheiin kan kal a. Mahse, tawngtai laiin kan meng kur a. Pathian thu miin a sawi laiin Mobile Phone kan khawih a. A nih loh leh bula thu kan thiante nen kan ti ti a. Pathian hi kan chungah a va lawm awm lo chiang tak em!
Thenkhatte phei chuan ei leh hmuam lam tihnan an hmang a. Zai lahin an zai tha mumal peih lova. Biakin chhung an lut thei tawng tawng a ni ber e! Hei hian nasa takin kan thlarau lamah nghawng a nei tih kan khawtlang nun hman mek atang hian a lang thei reng a ni lawm ni? Kan khawtlang nun kan siamthat theih nan chuan, kan Pathian hi a awm ngei a, a nung a, kan tana thi a tho leh, min tlantu a nihzia hria a, ama lam hawia, ama hnena kan tlukluh a, Biakin chhungah amah tih deka kan awm a tul a ni.
Inkhawm mai chu sawi loh, kan nitin nun kawngah kan theih anga tam tawngtai uar thar ila. Chu chuan nasa takin khawtlang nun hi kan siamthat theihnan hma min lakpui thei dawn a lo ni reng mai!
e. Ei leh In kan zawn kawngah: Tunlai kan Mizo khawtlang nun hman mekah chuan kan duham luat avangin ran hrisel lo kha kan ui avangin kan talh a, a sa kan zuar chhuak leh a. A nih loh leh a sa uih lai te kha paih mai lovin a tha karah kan zep ral a, kan zuar leh a. Ranthi tawh sate pawh thenkhat chuan a nung sa cheibawla cheibawlin kan ser leh thin.
Thenkhat chuan nimin Antam kha vawiina sih chauh Antam- ah kan chhal a. Awm ang lo takin thlai thenkhat chu a man kan chhiar bawk a. Thenkhat phei chuan, kan ei leh in zawnna kawnga hlawk kan duh avangin pawlhbelh emaw, thlak belh emaw kan nei ziah thn. Kha khan sasa takin midangte tan harsatna a thlen a. Zuchhe in avang tein, zu tha ina thi lo tur kha an lo thi ta thin. Chuvang chuan kan nitin ei leh in kan zawnna kawngah mitinte hi kan nunhlui kalsa a, midangte tana thiltha ti tura kan ke kan pen a ngai a ni. Tichuan, kan khawtlangah duhawmna a lo bo tial tial ang.
f. Nitin kan Sawrkar hnathawhna leh kan mimal hnathawhna kawngah: Mi thahnem tak chuan Sawrkar hnuaia thawk in tih avangin an hna an thawk tha peih lova. A hunah Office kai peih lovin, an hun taka an tihtur ti duh lovin, hlawh chiah beiseiin hna an thawk thin. Kan mimal hnathawhna kawngah pawh mahni tanghma hai ranin, a taima zawkte hlawh eisak phet tumin kan hmanhlel thin.
Thenkhat chuan Sawrkar hna a thawh chhan chu mipuite tana tangkai leh rinawm taka an mamawhte lo phuhruksak tih lam ngaihtuah lovin, mahni Office- ah Mobile phone an khawih emaw, Computer Games an khel emaw a. Biak an har em em mai khawp bawk a. Khang mite avang khan kan khawtlang hi a nunphung a chhe zawnga inher zelin, a nget nasa tial tial thin.
Kan hnathawhna chu khawi hmun pawh lo ni ta se, midangte tana tanglai nih tum ni ta vek ila chuan, insawisel leh inrel hi a bo vanga, mitin hi nuamsa takin khawtlang timawi chung zelin, khawtlang nun siamtha pahin kan khawsa ho tur. Bengali phakar an sawi ang maia phakar rana kan khawsak a, hna kan thawh chuan kan thawhna ah kan tui tak tak lovang a, han hnathawhte pawhin hma sawn thei lovang.
g. Laichinte: Hei hian, ‘then leh rual’ te leh, ‘chhungkhat lainate’ huam se a tha mai awm e. Mahni chauh kan indah pawimawh bikna hmunah chuan midangten nuam an ti ngai lo. CHutiang hmunah chuan nunhphung a khaihlak awlsam a, khawtlang nun thlengin a nghawr chhe thin. Kan laichinte nena inngeih taka kan awm chuan, kan lamhnai ni lem lo te pawhin min ngaisang ang a, min awt ang a, min thlirin kan tihdante tuihve chak in an phu et et ngei ang. Kan laichinte nena kan inkungkaihna hi a taht phawt chuan, kan khawtlang hi rei lote chhungin a mawi thei a ni.
Sawitur ka ngah hle mai. Khawtlang nun hi siamthat duh chuan a siamtha theitu mitinte hian tangrualin kan siamtha thei tih khing atangte khian a lang chiang thei awm e. Tun tum atan chuan tawk phawt se a tha awm e. Chhiartuten hlawkna pakhat tal in chan ka beisei e. Ka lawm e.
11:42 AM 2/26/2011
February 26th, 2011 at 4:03 pm
Rinawm taka mahni hna thawh te hi kan inzirtir tawk lo a ang. Office kal hun leh kal chhunga rinawm taka thawh, sorkar dan zawm that te hi Pathian thu nen an inzawm tlat tih kan hre lo nge ni. Private sector a thawhkte pawhin an duty an hre hle tur ani. Synod office a thawk angin sorkar hna hi thawk vek sela kan ram chu a va changkang tawh dawn em
Report this comment
February 26th, 2011 at 4:12 pm
Tha khawp mai
Report this comment
February 26th, 2011 at 4:21 pm
Mahni hna, midang hna, sawrkar hna kan rawngbawlna (hnathawhna) reng2 ah hian rinawm ila, khawtlang kan siam tha a ni maiin ka hria. Bawlhhlawh a bawm taka paih atangin kan inzir angai.
Report this comment
February 26th, 2011 at 4:42 pm
Thuziak tha tak a va han ni chiangkuang tak em. Uluk tawkin ka’n chhiar ang e.
Report this comment
February 26th, 2011 at 5:06 pm
Kan thenawm ram vel atanga rawn pem lut, Mizoram hmangaihna nei miah lo, an hlawkna tur a nih chuan midang chhiat vek pawi ti lo, an awmna venga chhiatni thatnia kal ngai lo, hnatlanga tel bawk lo, tlawmngaihna hre lo der, mahni tana taima em em si ho hi veng tinah an kuh tul. Hengho hi khawtlanga an mawhphurhna hrilh hriat a tul khawp mai.
Hengho hi office kal tlaiho aiin ka vei zawk.
Report this comment
February 26th, 2011 at 5:47 pm
Ziak tha khawp mai..
Ka rilru ah chuan pawimawh chihnih a awm a..
1. Dan zah..hei hi a pawimawh ber chu ani.
2. Ngaihsan zawng thlak..hei hi a pawimawh leh zual a.
Dan hi mihring awmkhawm min phuar khawmtu, a te ber atanga a lian berte in humhimna, dik lo leh tha lote lak a min vengtu ani. Tumah dan chunga leng an awm loh a, tumah danin a thlen phak loh a te an awm loh theih nan kan zah tur ani. Hei hi a nih loh chuan in siam that dan a awm lo..
Ka sawi fo thin, pawithui em em ni leh kan rilru sutthlek ti chhe vek ni a ka hriat chu kan sakhaw lak dan hi ani. Mi zawmthaw leh verther, a ruk a engmah pawisak nei lo te lanmawina ‘hmaikhawr’ anih chhung chu eng kan ang lo ang! Mahni hna, mahni eizawnna in min phut ang a hna kan thawh mai bak piah lam a thahnem ngaihna nei a hnathawkte kan ngaihsan hunah kan tha ve ang.
Report this comment
February 26th, 2011 at 6:45 pm
Khawtlang nun siam tha tur chuan a hmasa berah mahni theuha bul tan a ngai a ni tih pawm hmiah a ngai.
@vivia #7, an la intimikhual em ni? nge khawtlangin an welcome lo nia an inhriat vang? Anni pawh an thiam lovang, nangni pawh in thiam bik lo thei. Mahni theuhah khan bul han tan teh u…mikhual pawhin, in neitu pawhin
Report this comment
February 26th, 2011 at 7:40 pm
Inzahderna, inhriatthiamtawnna te leh inngaihsaktawnnate a awm tawh chuan mihring nun hi chu a hlim mai thin a ni.
Ziak tha khawp mai.
Report this comment
February 26th, 2011 at 8:16 pm
Mahni hna theuha rinawm hi a pawimawh ber mai. YMA President kum tamtak ni tawh pawh nise a eizawnna hnathawh a tihthatloh phah chuan ka ngainep khawp. Presbyterian emaw Kohhran dang emaw pawh nise, Kohhran Upa a Sorkar hnathawk thlan an remtilo anih ngawtloh chuan Sorkar chawlhah Committee te hi ko hram se. Padma Shri te hmu hial khawpin khawtlang rawngbawlnaah inhmang tha mah ila ka eizawnna hnaah thawhpuite kep deuh reng ngai ka nih si chuan darbenthek ri mai mai ang ka lo ni ang.
Report this comment
February 26th, 2011 at 8:55 pm
#7 megapixel, an tlangnel leh lutuk hi alawm kan buaina.
Mahni hna ngaihpawimawhna lutukah khawtlang kan hlamchhiah si chuan, a tuartu chu keimahni tho. Mahnia khawsa thei kan awm loh avangin khawtlang thatna leh nawmna hi mitin mawhphurhna a ni e.
Report this comment
February 26th, 2011 at 11:11 pm
Thlir dan chi hniha chi khat zawk, a thim zawng ngawr ngawr in i rawn thlir niin a lang. A dik vek tho va, a êng zawnga thlir tan pawh dawt tel miah lovin i ziah zat ziah tur a awm thovin ka ring.
I ziak tha ka ti. Hmanhmawh deuhva type erawh a ang.
Report this comment
February 27th, 2011 at 6:13 am
Ka type mawlh mawlh mai mawle.. hehe. A kal laklawh hi chuan ziahvak hi a awl ve khawp mai. Ka in ah Net ka pawt lova, mi In ah ka hmang mai thin a. Khawl a remlai hemi post nan ka duh bawk nen, a buarchuar mai thei. Chhiartute, in ngaihthiamna ka ngen e.
Report this comment
February 28th, 2011 at 3:57 pm
“Dar ben” nei mah ila, “thek” kan neih chuan si loh chuan … engtihna mah a ni chuang LEUUUUUUUUUUUUUUUUU
Report this comment