mi(sual).com

by Lalremtluanga Varte(Dina Pa Dt. 22.12.2010)

“Tin, heti hi a ni a, chumi khua atanga darkar chanve zet lirthei-a an chuan hnu chuan ngai teh, leilung pian tirh atanga a la chuan ngai miah lohna thlawktheithil awmna chu an va thleng a. Chumi hmunah chuan mi tam tak hi an lo zi mur mur a. Mahni pan lam tur hre sa vekin chulai hmun chu an lo pan khawm a lo ni a.”

Mihring dam hun chhung kan sawi a a chanve chu kum sawm li hi a ni tlangpui a. Chutiang ang zat miin an kum tawh chuan thil tam tak an thawkin thil thar tepawh an hmu chhuak tawh thin a.  An nih tur ang ang chu an ni tawh thin. Infiammi an nih phei chuan a uai thla lam an lo ni tawh a. Sports Association hruaitu ah emaw lo chuan an tlak vak tawh lo thin. Thahrui nei viau mahse an tuan in a daih tawh lo lam a lo ni bawk. Zirna leh eizawnna lam kawngah pawh an dinhmun tur ang chu an luah tawh tlangpui a. Thil thar thiam belh leh zawn belh lam aiin an hriat tawh sa ah an inbeng bel duh hle tawh bawk.

Chutiang ang chu ka lo ni tan ve ta reng mai a. Miin an chul bel hle tawh leh ngaia an neih tawh chu kan hla thar sak pui ve ngawt dawn chu a nih hi. Mumang lamah tak ngial pawh ka la chuan ngai loh ‘Thlawhtheihna’ an tih ah chuan chuang ve turin keipawh ka chhungte nen  kan in Tira-mei-kai ve a. A hre chiang inti te tawngkamah chuan a thlawh chhuah dawn leh tum dawn lai tak hian mawng a za duh tihte chu lo hre tawh mah ila a tak ngei a ka la tawn ve loh avangin engtin tak chuan awm ang I maw ka in ti rilru a.

Ar khual ngam tir ang maiin Airport tual zawl leh Terminal building chhungah chuan ka tuai kal ve zawt zawt a. Hriat hmel deuh si, hre si lo hian mi che tla chu ka melh ru relh relh mai a. Intih awihawm nan ka kamis mawi ber chungah ka Pull-Over hman thiam dum ngei mai ka ha bawk a. Awihawm tawk chauhin ka lo tlawntlai zuai bawk si nen, tumahin mi mawl melhin min melh bik miah lo.

Air ticket hmel hmang pawh la hre uk lo khan e-ticket an tih chu ka hum thlan ve dap a. A book dan tur pawh hre hawt lo khan Online a an lo lak tawh chu ka intihtheih phah hle leh nghal a. Keimah leh keimah chu ka in bum nalh hle a ni. Min hre chiang chu awm sela, ‘Kal mai teh’ min ti ngei ang. Tichuan duty thuah hnih kan pal tlang hnu chuan a thuah thumna kan va thleng a. An lo uluk phian mai a, kan bag zawng zawng chu min X-ray sak vek leh nghal a. Rontgen-a ten X-ray an hmuh chhuah dante min ngaihtuah chhuah tir a.

Mi aia an thil lo chik peih man a lo awm hle mai te ka ti rilru a.  Hlauh thawn ang ngei ngeiin kan bag pakhat chu an la ringhlel zui a. Thin a phu rang nghal ngawt a. Mahse eng dang ni lovin Mobile charger vang lek a lo ni a. Kan bag te lah chu keini aia uluk zawk hian min la tawn(packed) sak zui leh nghal. A thuah thumna pal tlang tawh thawveng chuan Airport Contingency Plan an lo tarte chu kan thlir ulauk lui vel a. Hriat thiam aiin hriat thiam loh a lo tam zawk mah a. Mipa inthiarna leh hmeichhe inthiarna te chu milem  an tar avangin ziak chhiar thiam lo tan pawh thliar hran a harsa lo. Mahse an milem tar chu a nalh lo hem avang zawkin ka en chian fe loh chuan ka’n hre thiam mai lo leh pek a nih kha ! Mawl theih haih haih ngei mai.

Tin, heti hi a ni leh a. E-ticket keng chung chuan Counter lam chu kan pan ve a. Jet Airways ah chuan kan chuang dawn lo tih chu ka chiang a, Mahse Indian Airlines ah nge Air India thlawhna-ah kan chuan dawn ka lo hre tlat lova. Kan haw na lama haw ve tur tih hriat chian sa te kalna lamah chuan ka ve kal ve na a, ka duap leh ta tlat a. Ka ngam ngai loh kan nu zawk chuan a Bengali pachal(ni ngei tur a ngaih) pa chu a va bia a. A sirah ka lo ding ve zaw a. Bengali pa chuan Computer chu an khal niap niap a.

Kan E-ticket chu Ticket pangngaiah min siam sak a. Indian Airlines a thlawk tur chu kan lo ni e.  Thaw a veng huai a, kan thlawk thei ngei dawn e ka ti rilru a. Kan bag an X-ray tawh chu an lo buk uluk leh hle bawk a. Kg 15 bak ken phal a ni   lova, mahse an phal chin huam chhungah chuan kan lo leng a. Inrinni tuka bazar thang tan chuan a rih zawng kha chu ka thla phang hauh lova. Iskut a pum len dan a zira Kg 1 awm tawk hre tak kha ka ni miau a.

Tichuan ‘a chuan theih tawh e’ an tih nghakin kan thu a. Chhak leh thlang kal tur, a then haw lam a then kal tur kan ni nuk mai a. Kan in ang lo hlawm hle mai a. Rome khawpuia Catholic zirna hmunpuiah kum thum lai lo zuk zir tawhte, thlawhna la chuang ngai reng reng lote, zirlai haw lamte, vai sumdawngte kan ni nawk mai a. Thingpui man tlawm zawk a an zawrhna hria leh hre lo te pawh kan ni a. A tlawmna hre ve lo tan chuan No khat Rs. 60/- a in a ngai hawl a.

A to mah mah a ni. Chutianga kana wm lai chuan mipui zi nuk nuk karah pawh chiang tak hian thu an rawn puang awl lova. A ri lo zawng, a ziak chhiar theih zawng tepawhin chanchin an tar reng bawk a. Tlai khawhnuah kei ta pek chuan kan chuanna tur chu an ‘delay’ tihte chu kan hre ve a. Darkar a liam hnu chuan an ziak tar ah chuan keini lam kawnga haw turte tan chuan ‘Security Checking’ tih tur a nih thu an rawn tar a. Min check uluk tawh teh reng nen a hma aia uluk chuan chuan min la check a. Jacket ha chhah deuh chu phelh tirin plastic kho ah an dah sak a. A X-ray nawn leh ngat nia mawle. Tuisik mahni in tur ngat pawh Duty te hmuh lai ngeia in deuh pap a ngai a. Tur a tel lo tih kha mahni ngei min fiah tir ni maw ? Chung zawng zawng kan pal tlang vek hnu-ah chauh chuan thlawhna-a chuan an phal nia !

Tichuan a tawpah chuan thlawhna ah chuan ka lut ve ta ngei mai le. Kan thutna turah kan thu far mai a. Air-hostess hnar ngul sang veh vawh tak hi an duty a. Kei ai chuan boruak (boruak tak tak) an ngam hmel hle leh nghal. Kan thlawk dawn ta tak tak a niang chu Seat belt hren dan leh phelh dan thleng chuan zaizir hian min han hrilh vel a. Tawngtheilo be thang deuh tan lo chuan hriatthiam mai a la harsa fo mai a. Mahse zaizira an rawn tih hma khan ka lo inthlung fel diam tawh zawk a.

Runway atanga kan thlawh chhuah dawn chuan Pilot chuan a bei vung viau leh nghal a. High School kan kal laia Wilbur Wright leh Orville Wright te unau in Aeroplane siam tura an beih dan kan zirte ka hre chhuak a. An thawh rim rah chu a hnu kum tam takah hian ka chhawr ve ta chauh a. ‘A thlawh kan dawn lai tak hian a hlauhawm’ an tih te pawh chu eng teh chiam a lo ni lem lova. Rei lote ah chuan kan thlawk kang ta vuah vuah mai a. ‘Chungtiangah mu ang a thlawkin’ an tih chu a takin ka chang ve ta ! Chhum chungah te chuan kan thlawk ta ang vuah vuah a. Hnuai lam atanga thlira sang tak kha ka chhuk thlir a. He kan chenna lei hi ka’n chhuk thlir ta a nih chu.

Muvanlai thlir hian a lo lang chiang em em mai a. Vawk kawng tum tepawh a lang vek an lo tih kha ka pawm ta hle mai. Kan thlawk thui tial tial a, leilet phai zawl leh sangha dilte a lang chiang hle a. Ruam leh pawng zawng zawng pawh hmuh phak chin chu a chiang hle. Tlangram chin chunga thlawh hnu phei chuan Upa Kapzauva te thlam ni awm tak, sawi deuh leih lawih te, Upa Tluangkhuma feh haw ni awm takte hi hmu-in ka in hria a. Thlawhna hi a lo va tha em aw !  te ka ti rilru a.

A thatna lam chuan ka rilru a la hle a. Ka rilru a a lan dan chu a dang daih. Feh kawng zawn nante, kawng zawn nan hrim hrimte, ram patta siam nante leh bawng bo zawn nan tih vel te ka rilru ah chuan a lang daih mai. Tin, chubakah chuan fanu/fapa sual deuh, thu awih mang lo, thatchhe chaw heh zet si ho hi chhum chung atang hian an harh chhuah theih nan Pathian hian han thlak chin se te ka ti rilru a. A thlak chhin hmasak pawlah ka tel ang tih erawh ka hlau hle lawi a.

Tu emaw hi chu han thlak chin se chu an zawng chhang awm der si lova. Sual sim phah nana an hman hlauh kha chuan a tha dawn em mai a. Piangthar se su lo mahse insawi harhna tha tak zawng a ni ngei ang. Hremhmun rapthlak zia insawi khum ai mahin a thatte ka ring a. Hmuh ngai miah loh in sawi thaih ai chuan hmuh phak reng a mi in sawi thaih kha a effective mai thei a sin. Chutiang chuan kan chuang zel a, tute emaw thil chhiar sualin ‘Lengpui Lengport’ an tih ah chuan kan tum ve ta mai a. A hlat ve  teh lul nen kan thleng hma hle leh nghal a. Kan chhuah hun tikhawtlai lo se, ka la feh hman tur hi a ni a.

Similar Posts:

• Tuklo no chawm.
• Chemte thlawk thei kan nei
• Terrorist Plot Foiled
• Mizo leh Music (Production)
• Pathian hian mi zawng zawng nun dan tur hi a hre lawk vek ang em?

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, March 5th, 2011 at 6:00 am and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.