mi(sual).com

– Mamuana Y2Goal

“Sawiselna tel lova lawmthu sawi omchhun i ni e, thnks” (@Feb.1, 0814hrs) tia sports minister-in ka lawmpuina leh duhsakna thu min rawn text let khan ka ngaihtuahna a tithui hle a. Hetiang phul lem hi khawvel hmun hrang hrangah sik leh sa avang te, enkawl zui awlsam zawk vang leh chhan chi hrang hrang vanga phah a ni thin a.

Tunah pawh ngaihdan inang chiah lo vangin sawiselna pumpelh chu a har khawp ang a, titi pawh a titam hle a, chanchinbu lamah pawh chhiar tur a awm nawk a ni. Engpawhnise, tualchhunga Red Ribbon Tournament tawp lam chu he Lammual phul lem phah thara khelh tur a nih thu te, TV lama en a nawm zawk theihnan zan lama khelh tum a nih thute a awm takah hian boruak a siam nasa lehzual hle a ni.

Phullem hi khawvel hmun hrang hrangah, an game khelh tur azirin chi hrang hrang a awm thei a. Khawvela infiamna ropui ber, football khawvel thuneitu sang FIFA pawhin 2004 atang khan The Laws of the Game-ah khungin dan leh hrai mumal tak siamin a kalpui ta a. Sumdawnna khawvel huang zauhin company hrang hrang an rawn pung chho tual tual a, a that leh that loh chungchangah te sawi dan leh ngaihdan pawh a inang thei lo.

Heng phul lem chi hrang hrangte hi football thuneitu sang FIFA leh confederation dangte hian angkhata hrut rual mai lovin category hrang hrangah tehfung mumal tak neiin an thliar hrang a. Mahse, hei hi a khelmual ngawr ngawr lam a ni lo a, a chhehvel leh mamawh thil hrang hrang ken tel a awm nawk thin a ni.

Motor-bike aia sakawr thatna chu petrol a ngai ve lo, an tia, mahse bike angin sakawr chu a thih hnuah a rah nun veleh theih tawh loh, tih fiamthu ang deuhin natural grass leh artificial grass te hi khaikhin ni thin mah se a rem loh chang tam tak a awm thei a. Phul tak chu chhe mah se a to leh thei a, phul lem erawh chu siamthat a ngai thung tih chu sawi nawn a ngai lo. Concert leh thil dang hi infiamna stadium hrang hrang Camp Nou (Barcelona), Wembley (England) etc.ah te neih a ni thin a, hengahte hian a tlangpuiin phul chhiat lohnana phul chunga phah te an nei thin a.

A nih loh chuan natural grass te pawh hian tawrh chin a nei thin tih chu hmanni lawka hawn Wembley phul chungchangah te pawh kan hre thei ang a, duhthu a sam theih loh avangin vawi thum zet an chin thar tawh hnuah pawh eng a la ang thei tak tak lo a nih ber hi.

Tin, stadium hmun thenkhatah chuan an phul hman te hi a lem emaw a tak emaw pawh ni se hmun him zawka enkawl leh laksawn theihte pawh a ni ve thin bawk a. Moscow khawpui vawt taka phul a to that theih loh avangin Luzhniki stadium-ah kan phul lem ang fieldturf hi phah a ni a.

Chungah te chuan concert ropui tak tak pawh am nei thin a, mahse Professional footballer hovin phul lem hi an ngainat tehchiam loh avangin UEFA Champions League final 2008 an thlen dawn meuh kha chuan hmanhmawh takin phul tak an totir leh a. Penalty pet sual, Chelsea captain John Terry leh a thiante mai bakah, champion nihna changtu Man. Utd. player te pawh khan nuam an ti tehchiam lo a nih kha.

Tin, stadium reng reng hi thuneitu hrang an awm avangin a thlawna hman theih a ni ngawt ngai lo a, an sum huiluh hmangin ‘maintenance’ te pawh an kalpui thei tur anga ngaih a ni. Vai milian innei hautakzia kan hria a, a hmunhma atan Wankade stadium, Mumbai te chu a maktaduai telin an hmang riap thin a, cricket match lian thlenna leh room rent out-na zawng zawng nen phei chuan amah leh amah chu a inchawm zo ngei ang a. Tin, khawvel football club lian tak tak te pawn anmahni pualin stadium an nei fur a, mahsela inrelbawlna a hran miau avangin an free ngai lo.

Mizoram sorkar hnuaia Agri.dept.-in Tourist Lodge hman man chu sorkar deptt ve tho Tourism dept. hnena an chawi ang deuh hian, Man.Utd. hian Old Trafford stadium-a match an neih apiangin hman man sum tam tak an chawi thin a. Training nan phei chuan an hmang pha lo zawk a ni.

Artificial grass hi professional footballer ten an ngainat lohna chhan hi sawi tur tam tak a awm a, chung zingah chuan player inhliamna a thleng tam zawk niin mithiam, a zirmite pawn an sawi thin kan tih kha. David Beckham pawn London-a ama academy-ah artificial phahin naupangho petpui thin mah se LA Galaxy a zawm tirh lam khan MLS match thenkhat chu chhuanlam fahrahte te siamin a khel lova, training pawh a ‘regu’ vak lo niin an sawi thin a. Kum 30 ral kai tawh mah sela hmalam hun a la thlir a, World Cup 2010 khelhte pawh a tum hle a, chuvang chuan a la indimdawi hle tih kan hria a. Thil dang chu thuhran ni se, hemi kawngah ringawt pawh hian kan thalaite tan a entawntlak khawp mai.

LAMMUAL LAM HAWI ILA… Red Ribbon tournament hi nikum lamah a boruak a sang hle a, kuminah phei hi chuan Lammual-ah phul lem an phah thar ta bawk a, an inthlitfim fe hnuah Lammual lama insuan luh te, TV a entlak khawpa zan lama khelh a nih tur thute puanzar a nih takah hian a boruak pawh nasa takin a sang lehzual a. Football ngaisangmite tana thil ropui a lo thlen takah hian kan football thuneitu sang MFA lam hi ka beisei aiin an pen chak lo a, football kalphung leh chinchang hre tak ni turah ka lo ngai deuh pawh a ni mahna!?

MFA hnuaiah hian Sub-committee hrang hrang awmin, technical committee te hi an hmang tangkai em tih chu ka hre law….FIFA, UEFA etc. te’n an dah ropui em em Study Group tih velte pawh hi MFA chuan a hmingin an nei niin an sawi a, eng nge an tih phei chu ka hre law. Ka lo beisei dan chuan heng study group-ah te hian chinchang hria, player hranghlui te, coach te an awm ang a, anniho hian player, referee etc. rawntlakte phungbawmah siamin an kokhawm ang a.

Chungho te chuan khawvel hmun hrang hranga artificial grass te, an phah dan leh hman tangkai dan chipchiar taka zirin, saphovin an rawn phah (install) laite pawh thahnemngai takin an lo enpui ang a. Chumi hnuah ‘eng ball nge tha ang?’ tiin a lirh dan leh sawh (bounce) dante, ball-boot hling (stud) hmantlak turte an zir chiang vek ang a. Khelmual ramri, a vang zawng hi a zau deuh bawk a, game te pawh a sir zawnga sawi kual a remchang mai thei tihte pawh zirchian a tha hle a.

Manager te’n an player te nihna leh theihna an hriat chian a, hetiang khelmuala tactic, formation, strategy etc. hman chi tur chungchangte sawikhawm sela. A hmang hmasa ber tur, Red Ribbon tournament-a team te hnenah ziakin emaw, video-in emaw, TV show velah emaw tihchhuah nachang hria ni sela awww….Tunah erawh ‘arkhaw thim dai’ vek tur a ni a, game pawh a nghawngna viau mai thei?? Khawvela player/team tha tak takte pawn an match khelhna tur hi uluk takin ni hnih-khat an han belchiang a, chuti chung pawh chuan khelmual danglamin nghawng a neih thute pawh an sawi chamchi, tih chu football chinchang hria te tan thuthar a ni lo.

Engpawhnise Mizote hian football khelh hi pianpui thiam leh zeina kan nei a, chuvang chuan hnam dangte ai thlawt chuan insiamrem lam hi chu kan awlsam zawk thin a. ‘Ar khaw thim dai’ theuh theuh, mipui pawhin vaivut leh chirhdiaka inkhelh ngawt ai chuan hmuhnawm turin kan beisei sang hle a, player te’n phul lem an zuamsual a nih pawhin thil mak a ni lo a, an demawm loh bawk. Zirmite leh chinchang hria te’n phul tak aiin phul lemah hian inhliam a awlsam zawk niin an sawi thin a, dawt muhlum a ni lo.

A bik takin thahrui tihnat te hi a harsa tehchiam lova, sliding tackle te angah te hian intihnat a awl zual a (Zofate hian infiamna ni lovin phul chunga han teikual velte pawh hian tluk hi kan uar khawp mai a, uar lutuk a chi loh). Tlukna lama intih pem pawh hi a na zau zawk tihte hi manager te’n sawi uar se, training velah pawh stretching lam uar a pawi lo a, warm-up pawh ngaih pawimawh lehzual a tha khawp mai.

Engpawhnise, football khel hi felfai taka a hmuhnawm zual zel theih dan tur ngaihtuah hi FA ngaih pawimawh ber tur zinga mi a ni a. Chumi atan chuan khelmual mai bakah BALL pawimawhzia hi football khawvel chuan sawi chamchi mah sela kan hotuten ngaih pawimawh nachang an hriat ve miau si loh chuan, an hrethiam lo a ni ang, tournament dawnah “official match ball hman tur enge?” tih chu kum zabi tharah pawh kan la inzawt reng mai a nih hi. Hetiang kawngah hian kan basketball leh tennis association te an fakawm a, ball an hman pawlh nuk ve lo.

Tin, artificial-ah hian ball-boot hian kawngro a su hle a, vairam grass-a tha ang kha a tha ber lo tih hriat a tha. Hetiang phul lemah hian a hling (stud) tlem chi leh mum chi hman a tha, tiin tute’n emaw an sawi thin a. Nimahsela hetiang phul lemah erawh hi chuan a hling tam leh phek chi hi a tha tih hi khawvela chinchang hria te ngaihdan tlangpui a ni a, rubber leh lei nawi phah enkawl that dan pawhin kawngro a su khawp ang.

CHINCHANG HRIAT A NGAI…Tun sorkarah hian sports lama hmalakna hi hmuh mai theiha a len deuh ber avangin sports minister hian fak a hlawh a, a phu khawp mai. Nimahsela ama tan chuan thil zawng zawng ngaihtuah vek chu a harsa mai thei a, phul lem zau zawng leh khelmual zau zawngte hian dan a zawh kim phak chiah loh avang te hian a thawhpui hnaivaiten an thlawp tha tawk lo emaw ni le? tih mai a awl khawp. Khelmual ramri chin chungchangah, FIFA duh danin, natural grass-ah chuan touchline/goalline atanga metre 1 vel hi phulin a la phah tur a ni a. Artificial grass-ah erawh hi chuan touchline/goal line atanga metres 3 thleng hi phul lem hian a la khuh tur tih a ni thung.

“Tunah chuan international football match pawh kan host thei tawh..” lo tih ve ngawt chi a ni lo. International football thleng thei tura thil tul, airport changtlung, 5-star hotel etc. tih velte pawh nei mah ila, kan stadium-ah dressing room changtlung, media centre etc. tih vel kan neih miau si loh chuan I-league match pawh kan la host thei lo tih hi kan hriat a ngai. Tuna phullem chunga touchline (mual dung rin) hi 103 yds. nia ka hriat hi a dik a nih chuan, FIFA duhdan 90m – 120m (100yds – 130yds.) chu a pha a, nimahsela international match khelhna tura FIFA duhdan 90m – 120m (100yds – 130yds.) chu a pha lo deuh a.

Khawvela pawl ropui leh lian ber zinga mi FIFA-in khawvel hmun hrang hranga football kaihhnawih chungchangah dan leh inkaihhruaina mumal tak a neih hi Lammual phul lem phah velah hi chuan ngaih pawimawh a hlawh lem lo emaw ni awww..kum 150 dawn lai football inelna (competitive football) neih a nih hnuah pawh keini chuan “Kan Khaw-Dan” kan la hmang cheu emaw tih mai tur a ni.

Lammualah hian phul lem hian touchline atanga metre 1 chauh a khuh a, goalline lam erawh tlemin a hla hret a. Chumi pawnah chuan cement concrete chu a awm leh a, chutah thir leh cement hmanga pal-pin a ni leh a. Phul lemin a daih loh avangin cement chhuat ah hian lei emaw vaivut emaw chhung sela, pal-pin naa thir hriamte hi senghawi loh chuan a hlauhawm thei, tih hi kan sawi ve mai mai duh a.

Tin, zana hman tur light hi an enchhinna ah khan duhthu a sam lova, chu bakah a dinna hi 10 metres chauh anih chuan ball kang inchuh chungchangah player te mit a tivaiin a enkhalh awlsam bik ang, tih chu ngaihven a tul hlein ka hria.

Similar Posts:

• Mizote leh Football
• Hmeichhe referee – Poll
• Rawngbawltuten football khel an thlir nasa lutuk ta em ni?
• Premier League Football update (ve mai mai)
• BMA Football Tournament

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, March 5th, 2011 at 8:00 pm and is filed under Sports & Games. You can follow any responses to this entry through the RSS 2.0 feed. You can leave a response, or trackback from your own site.