Tunlai chu helam hian ka rilru a luah hneh deuh nge ni, ka ngaihtuahna lamah hian a khawlpui vuantu a ni reng fo mai.
Hringnun hmang tura khawvel tukverh a kan dah chhuah ve ni khan mittui karah tap chungin kan lo piang chhuak ve a. Hlimna leh lawmna tam tak karah lungngaihna leh manganna ten min chim buai bawk thin. Hringnun hi hman thiam a har a, ke chheh a rem hleithei thin lo a, hmun rualrem rap lo laklawh tan phei chuan tanchhan tur rahbi thar siam a harsa hle tawh thin.
Thatlai hun kan chen a, kan chenna lama hringnun hmabak zawng zawng pawh chenral ta sawi tur lah kan awm teuh si a. Ka nun hi keima thu a ka duhna lam hawi a khalh tur leh khalh kal thei ni mah ila, ka duhna hmun leh hunte chuan minlo hnarlo mahse, ka tan erawh tahna leh mittui far tura min tur luitu an lo ni fo thin.
Kan thatlai leh Vanglai nun nuam taka hmang tur erawh chuan duhna lian tak thinlungah kan kawl theuh a. Mahse, kan chak zawng leh nuam tih zawng ngawt hian hringnun hi hmang ta ila, i tan leh ka tan hian hmabak thim leh eng reng rengin a chhun tlang zawhloh hun khirh takin min lo hmuak thei si! Tahna leh inchhirna, lungngaihna leh nun hrehawmna chu.
Hringnun kan hman ve nana Siamtu’n i tan leh ka tana hun min pek hi kum a ral a, hun a inher zel ang hian a ral ve zel a, Khawvelah hian kan chamrei zawh poh leh engmah titheilo leh mahni pawh in saseng theilo a, duh leh mamawh chauh sawi thei a kan awm hun hi alo la thleng ngei ang.
Aw.. chu hun chuan min nangching ang a, kan tan khawvel hi a lo thim ang a, tar vun chuar leh tih theih neilo kan lo nih hun chuan vanglai nun ngaiin hringnun kawng hi a bul atanga tan that a, zawh that leh ava chakawm dawn em?
Theih nise, nunhlui liamhnu chu ko kir lehin, hun bel tan tha leh turin kir zai rel leh thei ta ila, ka tan chu hun chu hun hlu leh tha ava ni dawn em! Mahse, Nuih a za har tual tual ang a, mite hlimna chu kan tan hnawksak mai ala ni ang. Rimawi te pawh chu kan tan bengchheng leh ninawm mai an la ni ngei ang a. Chutih hunah chuan, theih nise, bul tan tha leh dawn ta la, i vanglai hun tuna i hman dan khan i hmang ral leh duh ang em le?
Similar Posts:
- Hringnun(Chapter-I)
- I ngaihtuah ngai em?
- Hringnun hi a va mawi em!
- Naktuk hi ka tan awm ta lo se
- Chi thlah
March 23rd, 2011 at 8:24 pm
Hetiang thil hi ka ngaihtuah peih lo.
Report this comment
March 23rd, 2011 at 8:35 pm
kei pawh
Report this comment
March 23rd, 2011 at 8:39 pm
A ni tak a sin, bul tan that leh duh hi kan tam in a rinawm. Mahse, tui baw hnu a ruh leh theih tawh si loh.
Report this comment
March 23rd, 2011 at 8:43 pm
pimpom i post hi ka duh thei lutuk
hun kaltawh ngaihtuah chuan mahniin sawt hlei loa insawh insawh a awm mang e mahse beiseina nun lairil kan neih hi maw
Report this comment
March 23rd, 2011 at 8:49 pm
Theih a nih a bul tan leh duhtu zawng chu thangthar bul la tan tir te te zirtirtu/kawhhmuhtu ni thei zel bawk ila chuan ava tha dawn em!
Report this comment
March 24th, 2011 at 12:10 am
Ngaihtuah a tithui hle mai. Tar huna kan awm dan tur i rawn suangtuah khian min hneh lutuk. Kan tun hun te hi nakin atan a ni si a. Chuvangin tun hun hi a lo va hlu em!
Report this comment
March 24th, 2011 at 12:02 pm
Good Post.
Report this comment
March 24th, 2011 at 2:55 pm
I ziak tha hle mai. I thuziak atang chuan kum 30 i tlinna a rei ve deuh hlek tawh a ni ang. Hetiang ziak tur chuan hringnun thlir thiam a ngai tawh tlat. Amaherawhchu hetiang ziaka ngaihtuah thinte hi piang nawn leh tak tak ta ila, kan ziah leh ngaihtuah thin ang hian kan awm thiam leh chuangin ka ring lo. Tawna hriat chi chauh a ni awm e.
Report this comment
March 24th, 2011 at 9:12 pm
Post tha tak a ni e. One day at a time tih ah hian in nghat phawt mai ang!!
Report this comment