mi(sual).com

Khawvelah hian hmangaih hi ka nei ve ngai anih chuan Hmingthani kha ka hmangaih chu ngéi ang. Ni tam tak a liam tawh a, thla tam tak a ral tawh a, kum eng’emaw zat a vèi tawh na chungin; ka thinlúng chu tûn thléng hian a kal liam ve thei si lo. Hmeichhe eng’emaw zat, Hmingthani nen kan inthen hnua ka ngaihzâwn takte kha tun hnu hian ka lo hmangaih tak taklo va, ka duh ringawt alo ni reng zawk si tih hi ka hre thar hnuhnawh leh a ni.

A réi tawh a, engkim a chuai zo tawh. Mahse, hmangaihtu thinlúng chuan engti anga réi leh chuai tawh hnu pawh a fang nawn lo thei thin si lo. Ka hmangaih a, ani paw’n min hmangaih; mahse, kan inhmangaih chu tleirawl thinrimna dâwntàwi tak avangin anih tur a ni phâk ta si lo. A ni, khatih lai khan kan la naupang dun êm a, kan intawn tirh vel lai khan kum 16 mi niin Class-XI ka zir a, ani kha kum 15 mi niin Class-X a zir thung a. Ka mitthláah thâmral lovin kan inhmuh hmasak bêr nî kha a la châm reng thin.

Kan chanchin hi tam tak ziah tur awm mah se, ka ziak ngam thin lo. Mittui nen ka ziak ang a, a chhiartute’n eng’ahmah an ngai leh si lovang tih hi ka hlau a ni. Kan inhmangaihna chanchin kha tute emaw inngaihzawnna ang mai mai a ni tlat lo. Engtiknîah emaw chuan ka la ziak ve ngéi ang a. Aw… Chutih hunah chuan fám chang tawh hnu kan sùlhnû zawng kha kaihthawh a ngai ngéi dawn si a, ka va huphurh tak êm!

“A tir chuan ka hmu naupang chhia hle a, naupang chhaih ang deuhvin kan inchhiatkhum vel thin. Ka ngaihtuah chhuak reng thin a. Kan School kal kan inhmuh ták fo avang chuan kan innêl ta zel a; a tawpah phéi chuan kan inngaizawng ta a ni… Kan va inngaizawng chiang tak êm âw! Kan inngaihzawnna kha hmangaihna an sawi fo hi anih lohna bik tur rêng ka hre lo. Min duh a, ka duh a; min ngâi êm êm bawk a. Tupawh kha amah aia duh leh ngaih ka nei thei lo.

Amahah khán engkim awmlo mah se, ka duh thilte erawh awmlo a awm miahlo thung si. Khatih lai khan ka ‘luck’ ve asin aw… Hmeichhe tleirawl min ‘try'(beisei) tu kha an awm ve nual thin a. Mahse, chûngho chu min beiseinaah beisei theih ka nih loh thu ka hrilh tlang tawp thin. Amaha ka thil ngaihtuah pakhat chu, ‘Hmanah khân khaw’nge i lo awm le? Naupang tê kan nih lai atang khan lo inhre tawh ila.’ tih hi a ni.

“Matric(Class-X) an exam dawn hnai ta. An School-ah ‘Study Camp’ an nei a. Chhûngte inkán nî(Visiting day)-ah a unaupa anga ka zuk kãn thin zet kha chu… A unaupa tak tak ka lo ni.” tiin kan chanchin chu ziak turin bul han tan dawn ila; kimchang taka ziah ka duh avangin a chiang tâwk lovang tih ka hlau bawk si. ‘Engti anga ziah tan tur nge ni ang aw?’ tiin ka thluak chu ka chháwr nasa ve thin khawp mai.

Bial KTP Conference, an khuaah a awm hlauh mai a, chumi tum chuan an inah ka thleng a. Tlai zanriah eikham, pãwna kan thutdun laiin abulah chuan kan chanchin ziah ka duh thu ka sawi ta phawng mai a.

“A pawi hleinem, ziak la”

“Engti anga ziah tan dan tur nge ka hre lo alawm. Chubâkah, nangmah ràwn tel lo chuan ziah sual palh ka nei ang tih ka hlau bawk si a, ka la rawn biak fo che angaih ka ring”

“Chu te chu i thu vék alawm!”

Chuti ang vel kan sawidun hnu chuan tumláwkna pawh nei miah lovin a bengbulah zawite hian, “Ihmaw, Hmingthan, nupui fanáu châwm thei dinhmuna ka din ve hunah chuan, ka hmangaih hmasak bér leh ka hmangaih awmchhun kha fate nu atan ka duh a; khawngaihin i lo inngaihtuah dawn nia,” ka’n ti phawng mai a. Min chhãng miahlo va, a ngawi reng ringawt a. Keipawh chuan sawi tur dang ka hriat tawh loh êm avangin dawrah kuhva lei turin ka kal ta a.

Conference zawh kan haw hnu atang chuan ka rilruah kan inhmangaihna chanchin ziah chu alang tlat reng a. Dawrah ka lût a, an lehkhapuan zawrh tha chi leh Pen tha tawk tak ka lei ta a. Ka dawhkan chungah chu lehkhabu chu ka dah a, ka pen lei thar chu phawrhin ziah ka’n tum a. Ka mitthláah kan sùlhnú te chu a rawn lang uar uar a, a khawi atang ber chuan nge bul ka tan ang aw? Engmah ziak lo chuan ka khup a, pen chu ka chhin a. Lehkhapuan leh pen chu ka thlîr ta ringawt a. Chuti ang hlir chuan kan chanchin ziah ka tum apiangin ziah tanna lai ber tur hre lovin ka awm ziah a.

Kan nunhluite kha ka dawnkir neuh neuh thin a. Khami kum, February ni 14-a Valentine’s Card min pek te kha ka thingrem mawngah ka la dahtha diam tih te ka ngaihtuah tel thin a. Mahse, ka phawrh chhuak ngam ngai lo. Keipawhin Valentine’s Card kha chu ka pe ve ngei mai a. Khangte kha a lo la dahtha ve a nge’m le aw?

Ni a liam zel a, thla enge’maw zat a vei hnuin nikhat chu ka dawhkanah hian Inneih sawmna a lo let bal a. Tu tak chu ni ang maw tih pahin ka han lek kang a, ka’n chhiar meuh chuan, “A ni thei lo, a dik thei lo,” ka ti rilru mawlh mawlh a. Ka khum tlangah chuan ka thu a, kum sarih kum riat vel liam taa Hmingthani nen kan hringnun chu dawnkirin ka in dawmkun tlawk tlawk a. Inneih sawmna chu ka en leh zauh zauh thin a, Hmingthani pasal nei tur chu ka hrethiam thei lo a ni ber mai.

Hmanni lawk, an khuaa KTP Conference an nghah tuma abul a ka thil sawite chu ka ngaihtuah chhuak a, tuma hriatpui lohvin ka zak ru chem chem bawk a. Ka tho a, chhuara File pakhat chu ka la thla a; Hmingthani’n ka tan liau liauva a ziah, “Love is perfect only when we shared” tih leh a lehkha min thawn thenkhatte chu ka chhiar nawn leh a. Ka lunghlui a leng vawng vawng a, mal ngawih ngawih hian ka inhria a. Mithianghlim lawr hi lo thleng thut se, ram nuam takah Hmingthani nen chauhva dahhran bik ni ila ka inti kher mai. Ka ngaihtuahna chuan rahbi awm tawhlo chu a zawh avangin ka tawlhthla leh zel si a ni.

An inneih ni alo thleng dawn tak ngial ta. A tuk mai chu an inneih ni a ni ta si: “Come not tomorrow, that i may never see her leave” tiin amah uina thu chu Sap tawnga ziah ka’n tum a, ka Sap tawng thiamna lah a tlem si. Thlahna tawngkam tlachham chung chungin heti hian ti ta zawk ila ka han ti leh a: “O Sun, rise not tomorrow, for i can’t bear to see her take another man’s hand.”

Hei pawh hi a Sap tawng leh ka ngaihtuahna nen a inmilin a dik theilo tih pahin, “Let the sun not usher in the day that she will wear another man’s ring,” tiin a tuka turnipui chhuaklo tura ka duh thu chu auchhuahpui tum sateh mah ila, Zo tawng paw’n, Sap tawng paw’n ka hlawhchham chiang lutuk a. Beidawng takin ka khum tlangah chuan ka’n thu leh hnawk a. Chutah, ka tho thut a, in atang chuan chhuakin ka thianpa Tluangate inah ka kal ta ringawt a.

Tluanga bulah chuan engkhaw sawi set set lovin, “Saw tah sawn hmeichhe pakhat a awm a. Amah chu ka hmangaih hmasak ber leh ka hmangaih awmchhun a ni. Mahse, ka tan a vul dawn lo. Naktuk hian khiangawiin a liam dawn,” ka ti tawl a.

Muangchangin Tluanga chuan min han en a, “Eng’emaw a tan ila ti thei asin,” tihpahin, “Hawh, i chhuak dun phawt teh ang,” a ti a.

Khawi lam nge kan pan dawn pawh ka hre lo. Tluanga chu ka zui hnak hnak a, chutah, “Engzat nge pawisa i ah chhuah?” min ti a. A zat ka han hrilh chuan, “A tihzia nasat chu,” a ti a. Thui fe kan kal hnu ah dawrah kan lut a. Tluanga chuan, “Inneihnaa hlan tur chi engte nge in neih?” tiin a nghaktu nula chu a han zawt a. Min kawhhmuh hnu ah ka pawisa ah chhuah mil tawk bungraw pakhat chu kan lei a. Mawi hnai taka min tuam fel sak hnu chuan dawr chu kan chhuahsan ta a.

Ka thil lei chu ka han ngaihtuah a, a thlawna mi ka pek tur ka lei tawh zingah chuan a man a la to ber tih hria a. Theih se, chu aia man to leh tha chu lei theih ka duh khawp mai. Amaherawhchu, sum leh paiah hian mite’n min thiklo khawp mai si a.

Tluanga chuan, “Naktuk inneihnaah chuan kal i tum em?” a ti a.

“Kal dawn lo”

“Ka hrethiam lutuk che”

Chutihlai tak chuan Taxi a lo tlan a, Tluanga chuan a tiding a. Hmingthanite inlam panin kan tlan ta char char a. Hetih lai vel hian ka rilru chu a nu deuh but a, ngaihtuahna fim ka pu meuh lo. Hmingthanite in zawn kan thlen chuan Taxi chu a ding a, Tluanga chuan chhuak chuang lovin Hmingthani nau chu a’n ko tuar ringawt a. Hmingthani nu zawk alo chhuak a, min han hmuh chuan a tuka inneihnaa kal ngei ngei turin min sawm a. Chutah, Hmingthani chu a ko chhuak a. Hmingthani’n min hmuh veleh, “Naktuk i lokal loh chuan ka thinrim viau ang,” a ti nghal a.

Kei chuan, “Min hriatthiam mai ka ngai a ni. Naktukah exam tur ka nei si a,” tiin dawt chiang lutuk tak chu ka sawi a, chutah, a tana kan thil lei chu pek pahin, “Hei hi nangmah ka thlah ve na che a ni e,” ka ti chuai raih a.

“A va pawi ve, lokal ngei ngei turin ka beisei che a sin,” ti chungin ka thilpek chu a la a. “Ka lawm lutuk, ka lawm takzet a ni. Mahse, naktuk i lokal theilo tur chu… A pawi ka tikhawp mai,” tiin min chibai a, min chibaina kut chu thlah mai harsa ka van ti tak em!

Tluanga nen chuan rei vaklo an inbiak hnu ah kan let leh ta a.

Hmingthani pasal neih thu chu ka lehkha zirpui thenkhat te’n an lo hria a. Classroom-ah cheng khat leh cheng hnih nawi ka dawng teuh mai a. Ka zak ru angreng viau a. Damlai lusun chu a hrehawm duh kher mai!

A pasal neih atang chuan kan pahniha kan sulhnu hlui chhuikir reng rengin hun ka hmang a ni ber mai. Amaherawhchu, kan inhmangaihna chanchin ziah ka tum erawh chu ka tum zui ta lo va. Lehkhapuan leh pen pawh chu thinlung lama min ti hrehawmtu mai anih tak avangin Tluanga kutah ka hlan ta daih a.

Kum thum a liam hnu, Tluanga nupui neih ni ah Hmingthani chu a fapa kum 2 mi vel nen an lokal ve a, a pasal neih hnua ka hmuh leh na hmasa ber a ni. A nulat laia a nalhna chu ala chuai lo va, a duhawmna chu a la ngai reng a, ka mit chuan amah chu a en lo phal thin lo. Chu naupang duhawm tak chu amah nena kan fapa ni se ka va’n ti tak em aw!

[Appendix: Ka thian tha ber(best-friend) chanchin hian ka thinlung akhawih khawp mai. Tih ngaihna tehchiam ka hriatthiampui bawk si lo. Hmangaih hmasak ber te hi chu kan hriatrengna atang hian paihbo an harsa a; min lo hmangaih tawhtu an nih tawh avang te, kan tangnema an lo bei tawh avangte khan lawm zawk tum ta ila. Chu pawh chu thil harsa tak a ni tho tho si.]

Similar Posts:

• Valrianga rian khua a sei thlawn
• First Love Never Dies
• Ka thiannu kha…!!
• I Duhlai Hlu Ber Kha…!
• Tui Mal Farkhat

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, March 30th, 2011 at 11:00 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.