mi(sual).com

source :-Zalen

C.Lalengkima

India ramah zirna tih hmasawnna turin Continuous and Comprehensive Evaluation (CCE) hman a ni ta a. Mizo ten kan hriatthiam awlsam dan chuan ‘fail awm tawh lohna’ kan ti mai a. He kalphung thar hian Mizoram zirna khawvel pawh nasa takin a nghawng dawn a, he kalphung thar kan hmanna a thil hrang hrangte i’n thlir kual teh ang.

Kalphung chhunga inthlak danglam aiah a kalphung thlak :

Mizoram zirna inrelbawl dan kalphung (education regime) chungchang zir chian nan International relation theory–a Stephan Krasner-a regime theory hi han hawh lawk ta ila. Regime (inrelbawl dan kalphung/nih phung) hi thil tih dan phung/ngaih dan nghet, thil a nihna tur a nih theihna tura pawm theih chin tehna, dan leh dun zam bik leh thuthlukna (principles, norms, rules and decision making) tein a siam a ni a. Krashner chuan ‘regime thlak thleng tur chuan principles leh norms thlak a ngai a, rules leh decision making inthlak ringawt erawh hi chu regime chhunga inthlakna mai a ni e’ a ti a ni.

Mizoram education regime-ah hian exam-naa pass hi kan principle ber a ni, norms atan hian kum khata vawi thum exam emaw board exam emaw chiah hi zirlai tha leh thiam tehna awm chhun a ni. Rules kan neih ho hi curriculum leh a behbawm vel a nih laiin tuna kan kal chho pui dan mek hi decision making a nih theihna a awm bawk awm e.

Mizoram education regime chhungah a tih tur leh kan tih mek tawh (prescriptions for action and prevailing practices for implementing collective choice) thlak kan tum chiam tawh a, sikul sawi khawm (comprehensive school policy) te, curriculum thlak te, subject thar belh te kan ti chhuak a, mahse kan danglam tak tak thei lo. Kalphung chhunga inthlakna mai kan duh khawp ta lova, kalphung nghet leh tehna atana kan hman (principle and norms) te hi kan thlak dawn ta a. Eng tak min thlen ang maw?

Kalphung chhunga inthlak tawhna :

Inrelbawl dan chhunga kan inthlak danglamna chungchang hi thui tak sawi tur a awm a. Mahse, chung zinga pakhat curriculum thlak chungchang hi i’n thlur zui lawk teh ang. Tun hmaa kan zirlaibute kha enlet hian a nuihzatthlak viau mai. Kan nu leh pa te ho kha chuan “Kel beng an chep, Engatinge an cheh, Bete a pet a ni awm e” tih te kha an zir a ni awm a. Keini ve duang pawhin kan hun laiin nursery rhymes an tih ang chi “Ba! Ba! Black sheep” te kha pawl li (4) ah leh “Old Mac Donald had a farm” tih te kha pawl rukah khan kan zir lauh lauh thin.

Mahse khang kan rualpui tam takte kha sap sikula heng kan zir ang nursery vela lo zir liam mai mai tam tak khan an tluk chuang lem lo. Tin, tun hma lam deuh khan khawi laia vairam sikul zirtirtu zirlaibu siam kha min rin tir mai thin a. A ziaktu lah khan Mizoram tan liau liaua ziak pawh a ni lem lova, mithiambik tena en leh zir chian pawh awm lem lo khan mimal ziah kha min rin tir mai thin ni awm tak a ni. Tun hnu lam hian thil hrang hrang an thlak a, CBSE syllabus an ti vei rawl nen.

Curriculum thlak hi a pawimawh lo ka ti hauh lo, mahse, zirna siamthatna atana curriculum leh mark pek dan thlak vak ngawt hi chuan kawng ro a su ber lo em ni aw ka ti. A chhunga inthlak danglamna ringawt kha chuan sikul naupang nun leh zir dan pawh min thlak zo lo emaw ni ? Aia a tha zawk tur a rin kalphung zawk thlak an tum ta reng a nih hi maw.

Kalphung thar hma lama Mizoram zirna khawvel :

Tun hma lam deuh kha chuan zirtirtu leh zirlaite pawh khan exam-naa pass kha kan tum bul ber mai ni hian a hriat a. Exam-naa pass tum khan thih thain, a thim a var thlu lovin kan bei chiam thin. Matric-te ngat phei chu ralpui phiara phiar a ngai a nih kha. A thiamna leh hriatna tak tak pawh pha lem lo khan kan bye-heart ve tawp mai thin kha a ni. Tun hnua ka ngaituah let hian Oxygen siam dan te, Methane siam dan, middle sikul vela Mizo tawnga kan zir hrep tawh kha pawl sang lamah khan a saptawngin kan hel nuai chiam mai ni hian ka hria.

A awmzia pawh kan hriat loh “Take a test tube” tih mai mai te kha zan khaw tairek thleng thlengin kan chhiar nawn tluk tluk vel mai mai a lo ni awm a, ennawn leh loh phei chuan a tuk lawkah chuan kan theihnghilh leh zui nen. Geometry a solve tur thenkhat phei kha chu kan bye-heart tawp thin kha a ni a. History lam nise ‘Akbar was’ leh ‘Akbar is’ pawh hre hrang lo khan matric kha kan innawr liam ve mai mai thin a ni ber. Hriatna leh thiamna tak tak pawh pha lo khan kan ar khaw thim dai mai mai a ni.

Hun a kal leh hlek a, sap tawng ber kha emaw zirna kan ti a. Sap sikul kal hri a’n leng ta a, kum tin sap sikul a pung thur thur ta mai. Mi thiam leh mi thain daih vek hek lo le, zirtirtu turin a mawng nawi nen lam kan han inrut khawm a, kan pawisa neih mawng nawi zawng zawng nen inrut khawmin, a zirtu lam pawhin an tlin leh tlin loh ngaituah lo lekin a hminga sap sikul ve dek dekah chuan kan han innawr liam a. A zirtirtu in zir hek suh a, zirtu lam lah nikhua hek suh, naupang luhlul leh nungchang mawi hre lo tak tak an chhuak phung mai a. Khawvel changkanna leh sual tawh zia nen kan sawi zawm ta vel mai mai a ni ber in a lang.

Kalphung tha aiin kan mil tawk kalphung a pawimawh :
Heti zawng hian in thlir leh daih teh ang aw. Thawmhnaw hi a mawi tia sawi tur chuan a hatu hak tawk leh a hatu rawng inmil a pawimawh ang bawk hian kalphung tha pawh hi a hmangtu mipui azirin a tha in a tha lo mai dawn a ni tih kan hre tur a ni. Entirna mawlte han tarlang lawk ila; khawvela fashion nalh leh lar ber ber, Versace, Louis Vuitton leh Dior thawmhnaw original thenkhat hi sap (vun ngo) ho mil tura thui leh an rawng mil tura siam a ni a.

Keini Mizote hian heng thawmhnaw chang kang ber berte hi an mahni angin kan mawi pui ve kher lovang. Heng ai hian Bangkok chhuak thawmhnaw, brand lem lo pawh hi kan tan chuan a nalh zawk ang bawk hian kal phung tha leh khawvela lar hi keini tan hian a tha ber kher lo thei tih kan hriat a pawimawh hle awm e.

Tuna CCE pawh hi a lan dan chuan a tha khawp mai. Mahse, ‘he kalphung hi a nih ang diak diak hian kan zo ve ang em, Kan mil tura siam a ni ve em’ tih hi kan chhut ngun a pawimawh awm e. Coat Suit nalh tak, pa lian lam deuh tan mawi tak hi pa te lam deuh ina an hak hian a coat suit rawng ngai leh a pianzia pawh ngai reng kha a mawi thei ta hauh lo ang hian CCE pawh hian hma min sawn tir rual hian kawng thenkhatah kan tan chhiatna a ni thei. Zirlai engmah thiam lo leh chhawr tlak mang si lo hi kan chhuah ruih mai ang em?

Tuna kan kalphung hman mek nen hian khaikhin a, kan phak tawk leh kan mil tawk tura siamrem ngai a awm a nih chuan kan siamrem hi a tul tak zet a ni. Mizoram hian mi Coat hak ang hi hak kan tum ve a nih si chuan kan hak tawka kan thui tet a tul a nih pawhin kan thui tet ngam pawh a tul awm e. Kan zirna kawngah hian a tam lam mai ni lovin, a that lam zawngte hian hma min sawn tir mawlh se.

A tawp kharna :
He tih dan thar hian amah kalphung chauh hi a thlak ang tih pawh hi hlauhawm hlel lo. A kalphung kan thlakna hian sikul naupang te zir dan leh zirlai nun a thlak thleng phak si loh chuan a principles leh norms thlak ringawt hi chu a ropui bik chuang lo. He kalphungah hian bye heart satliah kalphung ringawt min la kal puia, sap sikul hri kan vei hi a bo si loh chuan fail kan tlem ang a, mahse Mizoram hian zirna sang zawk leh technical lamah hian hma kan sawn chuang lo mai awm mang e.

Chuti ni ta se kalphung hi thlak nilo hian kalphung chhungah hian kan inthlak mai a ni ang em le? Chuvangin he CCE hian kan zirna kalphung hian min thlak tak tak mawlh rawh se. CCE hian exam laia rilru hah loh ngawt te, zirlai fail loh ngawt te hi rawn thlen suh se. Tun hma lamin exam-naa fail thin, mahse, mihring nun kawnga fail ve ngai lo tam tak tak kan nei tawh. Exam-naa titha ber an ni ngai lo, mahse tunah mi puitling leh hlawhtling tam tak kan nei a ni. CCE hian exam-naa fail lovin min siam mai ni lo hian mihring nunphunga kan fail lohna turin min siam puitling se la.

Theih ni phei se chuan, CCE hian kan Mizo khawtlang nunphung (societal regime) a kan ngaihdan leh kan ngaihlut zawngte (Mizo khawtlang nun a principles leh norms) :- changkang, ropui, awh-awm ni a kan hriat te nen lam hian a tha lamin min thlak thei phei se chu a va tih zia dawn em. Amaherawhchu, chu mi tur chuan a ram pum ang a kan tanrual erawh a ngai ngei ang le.

Similar Posts:

• Mizoram School Examination Policy
• HSLC Exam tih tawp ?
• Khawi sikulah nge i tu leh fate an kal?
• EXAM
• Sikul tha tehna kan mamawh

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Wednesday, May 4th, 2011 at 7:30 pm and is filed under Education. You can follow any responses to this entry through the RSS 2.0 feed. You can leave a response, or trackback from your own site.