mi(sual).com

Chhiar tur: Philippians 4:11     by Rev. Vanlalzuata

Kei zawng engkimah lungawi zel ka ching tawh si a (Phil. 4:11).

Vawi khat chu lal pakhat hian a huan a fang vel a, a thlai phunte chu en velin a in bula amah tihlim tura phun sawn tur a zawng kual a. A thlai phunte chu anmahni tawkah an hlut teh lul hlawm nen, nimahsela lungawina reng reng nei lo an lo ni deuh vek mai a. Oak chuan, Pine thing anga sang leh mawi ka nih ve loh avangin ka lung a awi thei lo a ni,” a lo ti a.

Pine thing pawh chuan, “Grep anga rah thlum tak ka chhuah ve loh avangin ka lung a awi thei lo a ni,” a lo ti bawk a. Grep pawh chuan, “mahni pawha ding zo lo, mi dangte rinchhana awm reng mai hi ka lung a awi thei ngang lo a ni,” a lo ti a. Geranium pawh chuan, “ Lilac anga rimtui ka chhuah ve hma chuan ka lung a awi thei lo vang,” a lo ti a. Lal chuan, “Aw, ka duh taka ka phunte vek in ni si a, tumah min tihlim tur in awm dawn lo em ni aw?” tiin a in bula phun sawn tur chu a hmu zo dawn lo emaw a ti a.

Chutih lai chuan Cherry chuan, “Kei hi ka hniam si a, ka thi hma bawk si a, lungawi lohna sawi dawn ila, thlai dang zawng zawngte aiin ka nei tam zawkin ka ring. Nimahsela ka nihna ang ang hian ka lung a awi hliah hliah a, lalin a huana phun ve tlaka min ruat hi ka lungawina ber chu a ni,” a lo ti a. Chu ngei chu Lal chuan a pawt a, amah tihlim turin a in bulah chuan a phun sawn ta a.

He thu atang hian zir chhuah tur kan va nei tam em!! Khawvel tihrehawmtu ber chu lungawi theih lohna hi a ni a, lungawi theih lohna hi min siamtu Pathian laka helna a ni bawk.Tunlai khawvelah hian lungawi theih lohna hian mahni inawh hlum duhna te, inchiu hlum thak duhna te a rawn hring chhuak a. Mahni nupuia lungawi lohna avangin hmeithai leh fahrah kan tam phah a, mahni pasala lungawi lohna avangin uire-na a pung bawk a.

Mahni thil neiha lungawi lohna avangin hlemhletna a pung tial tial a. Hlemhletna avangin kan hausa tial tial a, chutih laiin kan duhamna a zual tial tial bawk a, duhamna chuan mi hlim thei tak kha mi lungngaiah min chantir bawk a. Fak hla phuahtuin –

Lungawi lohna khawvel hi zawng,
Belh chianin lungngaih a tizual;
Rualawhna leh duhamna hian,
Chin lem a nei lo ve

a lo tih hi a dik a ni. He lungawi theih lohna hi engtianga lo piang nge, engtianga hneh tur nge, tih hi kan hriat fuh loh chuan naktuk lo chhuak zel tur hi a huphurhawm tak zet a ni.

Lungawi theih lohna hi Eden huan atanga bawhchhiatna zungzam a ni a, khata tang khan mihringte thinlungah lungawi theih lohna kan nei a ni. Kan thinlungah hian pindan ruak pakhat, khawvel thilin a luah khah theih hauh loh a awm tlat mai a, chu chu lungawi lohna pindan a ni a, ‘a aia lian duh pindan’ tiin kan vuah thei bawk ang. Chu pindan chu a neih saah lungawi tum lovin,a la neih lohvah lungawina a zawng a, a la neih loh chu han nei mah se, a la neih loh thil dang bawkah a lungawi tumna chu a insawn zel si a, a va buaithlak tak em!!

Mi duham tak mai pakhat pawhin, “Aw, pawisa chhiar sen loh han nei ila aw, hmanchawp tlem nen,” tiin a duh thu a sam a ni, an ti. Chhiar sen loh neih tawh hnu pawha hmanchawp tlem la duh belh hramna hi thinlung pindan ruak atanga lo piang chhuak a ni. Duhkima kan ni a, Neihkima nih hun kan thlir a, kan thih ni thleng pawhin kan ni dawn si lo va. “Khawvel pum pawh nei mah ila, lunga awi chuang lawng e,” tiin kan thi vek dawn a ni.

Khawvelah hian mi hausa tawntaw millionaire te, multi-millionaire te, billionaire te an tam tawh hle a; nimahsela neih belh zel duh tawh lo khawpa lungawina kim nei kan la hre ngai reng reng lo. Millionaire pakhat John D.Rockfeller-a chuan, “Ka sum leh paite hi mite enah tam hle mah se, ka rilru retheihzia chu kar khata dollar thum la lut ang vel hian ka la rethei tho va, ni khat chauh pawh lungawina min pe thei an awm chuan ka sum zatve hi ka pe phal a ni,” tiin a inpuang a.

Millionaire pakhat John Jacob Astor-a pawhin, “Lei chunga awmte zingah hian mi khawngaihthlak ber ka ni e,” (I am the most miserable man on earth) tiin a inpuang tawp bawk a. Millionaire pakhat W.H Venderbilt chuan, dollar maktaduai tam tak ka neih hi ka phurh zawh loh khawp a ni a, lungawina reng ka nei si lo,” tiin a inpuang bawk a. Multi-millionaire pakhat Andrew Carnegie-a pawhin, “Millionaire-te chu kan nui khât pharh mai a ni,” (Millionaires seldom smile) a ti bawk a.

Mihringte mamawh ber chu lungawina a ni a. Kum 2001-ah khan Andaman thliarkar kan zuk fan ve tumin an Leut. Governor quarters-ah chaw kan fak a. Khu thliarkarah khuan hmana an ram luah hmasatu hnam mawl lutuk tak mai an la awm a. Chungte chu thliarkar hranah an awm a, ramsa ang maiin an mihringpuite an hlau va, tumahin an tlawh pawh lo va. An L.G hnenah chuan, “Heng mite hi tlawh pawha tihchangkan dan in zawng em?” kan ti a. Ani chuan, “Mihringte nuna thil hlu ber chu zalenna a ni a, mahni duh thu ngeia lungawi taka an awm hi an hlimna ber a ni ang, changkanna an mamawh lo a ni,” a ti daih mai a. A chhanna hi pass mark chu a ni hrim hrimin ka hre ta. Keini Mizote ngei pawh hi tunlai aiin hmana kan mawl zual lai khan kan nun a hlimin a lungawi mah zawk niin a lang.

Lal Solomona pawh kha khawvel thilah lungawina zawngin nawmsip bawlna tinrengah a inhmang zo va. Chhiahhlawh tam tak a nei a, mipa zaipawl leh hmeichhe zaipawl a nei a, a hmeite nen phei chuan nupui sangkhat a nei a, pawisa lah chu lungte hmana hman tur a nei bawk a, a thinlung chu eng lawmna mahah a sum hek lo. Ngaw nuam a siam a, a chhungah chuan dil mawi tak a siam a, nipui in leh thlasik in a nei a, saingho khumah a mit itzawng apiang a duh duhin a mutpui thei bawk a.

Israel lalte zingah a fing ber a, a finzia hriat duhin ram hla tak tak atangin amah hmu turin an lo kal thin a ni. Khawvel thilah hian lungawina leh hlimna a awm a nih chuan Solomona ta tur ni âwm tak a ni a. Amaherawhchu hlimna leh lungawina reng reng a hmuh lohzia chu ama inpuanna tawngkam atangin a lang fiah hle mai. “Mit chu a thil hmuhah a tlai lo va, beng pawh a thil hriatah a tlai hek lo…Finna a nasat poh leh buaina a tam a, hriatna a pun poh leh manganna a pung,” tiin a sawi tawp mai a.

Thuhriltu bu hi han chhiar ila, a thunawn ang maia phek tin deuh thawa a sawi chu, “Thil zawng zawng hi engmah lo mai a lo ni e,” tih hi a ni a, vawi 23 ngawt a sawi a ni. A tawpah chuan lungawina leh hlimna chu Pathianah chauh a awm a ni tih a hre chhuak ta a, “Ka nun engmah lovah hian engkim ka lo hmu ta,” tiin lungawina kim a chhar ta a (Thuh. 7:15). A nun tlangkawmna chu, “Pathian tih la, a thupekte vawng rawh, hei hi mihring zawng zawng tih tur chu a ni mai,” tih hi a ni (Thuh. 12:13).

Aw Lalpa khawvelah tuikhur,
Chawi turin ka tlan a;
Mahse a tui ka in thei lo,
Thihna tur a lo ni.

Adama leh Evi pawh kha Pathian thua an awm lai khan saruakin awm mah sela tlakchham an nei ngai reng reng lo. Pathian dan an bawhchhiat hnuah erawh chuan an nun chu tlakchhamnain a hual vel a, theipui hnahin Evi pawnfen an chilh khawm a, an saruak khuh mawi tumin an hmanhlel ta a. He saruak nih inhriatna hi an thlahte hian kan rochung ta zel a. Chu chu silhfen te, sum te, bungruatein hnawh khah kan tum a, kan buai hle a; nimahsela kan saruakna chu chhung ril nunah a nih avangin pâwn lama kan inhai vurna hian a tireh thei si lo.

Hausakna te, thuneihna te, lalna te, finna leh thiamnate hi a hun laiin hlu hle mah sela, kan thih dawn meuh chuan, “Engmah lo mai a lo ni e,” tih hi kan hla a ni leh mai thin. Khawvel hnehtu an tih khawpa ropui Alexander-a ngei pawh khan a hun tawp lamah chuan, “Hneh zel tur ka nei tawh lo,” tiin a tap a ni an ti. Adama thlah, kraws-in a sawizawi loh khawvel nun hi chuan a thih ni thlengin lungawina a hmu zo lo a ni e.

Khawvel pum pawh nei mah ila,
Lung a awi chuang lawng e;
Hunten an liampui leh ang a,
Ar ang vaihna khua a sei thlawn.

A nih leh khawiah nge lungawina leh hlimna chu a awm? Engtin nge kan neih theih ang? He zawhna hi kan thih hma ngeia kan chhan dik a pawimawh a, a chhanna ngaihthah apiangte chu khawvelah chauh pawh ni lovin, lei leh vana mi vanduai ber an tling ngei ang. Lungawina kim chu Lal Isua hnenah a awm reng, chu chu a duh apiangte tana neih theih a ni bawk. Chu lungawina chu Tirhkoh Paula’n a nuna a neih dan a sawi hi ngaithla ila. “Ka tlakchham thu sawi zawng ka ni lo ve; kei zawng eng ang pawhin awm mah ila, lungawi zel ka ching tawh si a.

Tlâwm taka awm dan ka thiam a, hausaa awm dan pawh ka thiam bawk a, thil tinrengah leh thil zawng zawngah tlai leh riltama awm dan, hausa leh tlachhama awm dan thuruk chu ka hre chhuak tawh. Mi tichaktuah chuan engkim ka ti thei a ni,” tiin testimony a sawi a (Phil. 4:11-13).

Mihringte mamawh ber chu hausak a ni lo va, thiamna a ni lo va, dam rei pawh a ni hek lo va, in leh lo tha tak neih a ni hek lo. Engkima lungawi zel theihna hi a ni zawk. Chu chu Paula hian a nei a, Lal Isua ke bul atanga a chhar chhuah a ni. Pathian thu hi a hahthlak tawk lekin a awih ve lo va, a takin a nunpui a, a tawngkam aiin a nunah Pathian thu a lang fiah zawk a ni. A rethei a nih pawhin retheia awm dan a thiam a, a hausak pawhin hausaa awm dan a thiam a, miin an sawi chhiat laiin mite sawi chhiat laia awm dan a thiam a, an fak pawhin an fak laia awm dan a thiam bawk a.

A nat pawhin nat laia awm dan a thiam a, tihduhdah a tawh lai pawhin tihduhdah laia awm dan a thiam a, a thih dawn pawhin thih dawna awm dan a thiam bawk a. A tlakchham pawhin a tlakchham thu a sawi ngai lo va, a hausa a nih pawhin a hausak thu a tuipui ber hek lo va, Lal Isua a tuipui ber a ni.

Keini erawh chuan hausak dan kan thiam lo va, kan chapo deuh tlat a, retheih dan pawh kan thiam lo va, mi thil kan awt a, ruk kan duh hial zel a. Miin min rel laiin kan thin a rim a, min fak laiin kan chapo bawk a. Kan nat laiin kan vui a, kan dam laiin kan duham a zual leh bawk si a. Kan hlawhtlinin Pathian hnenah lawmthu kan sawi ngai lo va, kan hlawhchhamin Pathian lakah kan vui leh si a. Lungawina hi thilah kan zawng a, nimahsela thing hmuna rawtuai khawrh tuma chhuak angin kan hlawhchham chiang hle thin a nih hi. Khawvel thila lungawi tumna hi zawng, tui awm hlei lo dai kai tum ang a ni a, rah awm lo lawh tuma hah taka thing kunga lawn ang mai a lo ni e.

He khawvelah hian vanduaina kan tih te, vanneihna kan tihte hi Pathianin thilah a dah lo va, a tlahlang chhar nawlh tur a awm hek lo va, a dawngtu thinlung lamah a dah zawk a ni. Miin cheng maktaduai sawm nei ta sela, a fate nen sual kawng zawh phah nan hmang ta sela, rui sup sup mai sela, Pathian hming reng reng lam ngai lo sela, “In va nannei kher em,” kan ti thei dawn em ni? An hausakna chu an tan vanduaina rapthlak ber a tling âwm e. Engvangin maw? Thilah malsawmna chu an chang ngei mai a, nimahsela an dawnna thinlung a dik loh avang a ni.

Kawng lehlam han thlir leh ila. Miin natna leh retheihna nasa tak tawk sela, nimahsela an tuarna chuan Pathian hmel hmuh fiahtir sela, lungawi takin tuar sela, “In va vanduai kher em ve aw,” ti ta ngawt ila, anni chuan, “E, hetiang tuarna hi kan tawk lo vang tih kan hlauh mah nak alaiin,” an lo ti daih dawn sin. Engvang maw? An chunga lo thleng chu a dawnna thinlunhg a dik vang a ni. Chuvangin a dawnna thinlung hi Pathian thua kan herh dik phawt chuan vanduaina pawh malsawmnaah a inlet thei a, a dawnna thinlung hi Pathian thu atanga herh dik a nih loh chuan khawvelin vanneihna a tih hi vanduaina rapthlak ber a tling thei a ni.

Taylor Smith-a chuan a ke ruh a titliak palh a, natna khumah rei tak a mu a. Bible chhiar ngai lo khan Bible a chhiar phah ta ngat ngat a. Chuta tang chuan na chung pawha lungawina a chhar chhuak ta a, ke ruh tliaka awm dan a thiam ta a. A tawngtaina hlaah chuan, “Lalpa, ka ke ruh tliak avanga hetiang lungawina hi min pek chuan, ka khup hi tliak leh law law se ka va ti em,” a ti ta hial mai a ni an ti. Chu chu alawm kan mamawh chu. Rethei chung pawha hausakna, na chung pawha damna, tuar chung pawha lungawina, thi chung pawha nunna hi Lal Isua ke bulah zir chhuah theih a ni.

Ka lungawi zel ang, heta ka awm chhungin’
Ka chenna tlawmah rethei mah ila;
Hetah awmna nghet ka tan a awm si lo,
Khitah awmna nghet ka tan a siam zawk.

Similar Posts:

• Mihausa chu!
• Lungawina neilo Tuikuk te
• Ìtna leh Awhna
• Lungawilohna khawvel nge lungawina khawvel ?
• Bible Thu Chang Inkalh Anga Lang

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, May 29th, 2011 at 1:30 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.