mi(sual).com

Ringtute hi a khat tawk a intihchakthar hi kan mamawh fo thin, rawng bawltu ropui tak tak te pawh hian intuaithar hi chu an mamawh ve reng tho thin. Famkim lo mihring, hun alo liam a thil theihnghilh leh mai thin mihring kan nih hi kan hriat nawn fo a tul thin ani. Alexander Ropui-a pawh khan a hote zing a pakhat hnen ah chuan “He khawvel ah hian ka awm reng dawn lo ani tih hi min hrilh nawn fo rawh, chutilochuan awmdan tawk ka thiam lo ang e” a lo ti tawh reng ani. He theihnghilh theihna hi Pathian in min siam dan alo ni hrim hrim mai a, thihna leh lungngaihna nasa tak kan tawh chang te hian “Hun in a la hnem mai ang chu” kan ti thin, chumi awmzia chu kan la theihnghilh chhawm ve mai dawn ani tihna ani.

Israel fate nun ah pawh khan chiang takin alo lang thin, Pathian in thil ropui tak a tihsak chuan an pathian ah chuan an kir thin, mahse hun alo vei a, an lo theihnghilh leh mai thin. Chutiang hun ah chuan Zawlnei leh Pathian mihman tak tak ten harhtharna, inpektharna leh simna te an rawn tlangaupui leh thin ani.Tunlai pawh hian ringtute zing ah hmanlai Israel fate ang mai khan Pathian hmangaihna leh chhandamna kan chan, kan hlimpui em em te chu hun alo vei a, kan lo theihnghilh leh mai thin ani.Hetiang hun ah hian inreltawn a intehtawn mai lovin (Chu chuan mi a siamtha ngai si lova) infuihna thu leh insiamthatna tur a infuihtawn sauh sauh zawk tur kan ni. Tuna tlinglo kan tih em em te hi hmanni lawk a kut thing meuhva chibai kan buk lawp lawp, kan lawmpui em em te tho kha anni si .

Eng pawh ni se, Israel fate zin kawng kha han bih lawk ila, khatia Mosia hova Tuipui sen kam a taksa chetna chi hrang hrang a khuang leh ri thei zawng zawng an tlir hnu khan Pathian in an mahni fiah nan thlaler ah a hruai kual dawn chauh ani tih kan hriat kha le. Tuikha hmun ah chuan an phunnawi nasa ta mai ani. Eitur an nei lova, Pathian in nitin eikhawp manna a rawn pe a, chhar khawl theih ni hek lo, nikhat atan zel chauh an chang thei anih kha, hlim pawh an hlim reng tawh bik lo, mahse ramtiam pan chuan an la kal ta zel ani. Keini ho pawh hi Hlimna Tuipui sen kama kan awm reng Pathian in a phal bik lova, ramtiam pan chuan min hruai a tum zawk ani. Hlim chuang lova a rawngbawl leh a laka rinawm te hi kan thei ang em tiin Pathian ngei chuan min  hruai kual fo thin.

Hlim  reng chuan nupa nun pawh hi alo awm reng theih bik lova, pawimawh ta zawk chu a nuam ah emaw, a hreawm ah emaw pawh ni se “Tiam tlat e” tih kha an zawm em tih zawk alo ni daih si. Hlim tak loh avang a innei leh ta lo emaw intih fo mai chu puitling zia ani thei ngai lovang. Hmangaihna thu inhrilh nawn fo kan ngai thin ang hian, Pathian hmangaihna kan lo hriat tawh hnu pawh hi inhrilh nawn fo kan ngai thin ani. Chu  chu hnung lama in sawisel mai lova intihchak tawnna hmanraw tha em em mai alo ni.

Davida chu lal atana hriak thih anih leh lal a nih tak tak in kar chu  kum rei tak leh kawng chhukchho tak ani. Lal anih tak tak hma a a nun beidawnthlak zia hi I ngaihtuah tawh thin em? Israel lal atana Pathian in hriak a thih tawh bera hnu chu Lal nghal mai awm, mahse a teuh lo. A nunna chhanhim nan a kum tam fe thlalerah an tlanchhe leh rih chu a beidawng ru ve fo thin ang le. Thi lek lek in a hote zaruk rual nen duhthlan tur dang nei tawh hek lo, Israel te hmelma hlun Philistia ho Lal Pakhat, Gath khaw lal Akisa chu an zuk bel rawih mai a, Lal Akisa chuan Ziglak khua chu alo pe a, an han awm ve ta naw naw phawt a.

Hun engemawti hnu ah chuan Philistia Lal hote chu inthurual in Israel ta chu han beih an tum a, Davida pawh chu ami Israel te do tur chuan a thawk chhuak ve a, mahse Philistia hote chuan ring zo lovin an kirtir leh a, Davida ten an khua Ziglak an zuk thlen leh nak chuan, Pathian hremna nge ni Amalek hoten an khua an lo run chu ni in, an lo hal ral vek tawh mai a, an nupui fanau te zawng zawng chu sal ah an lo man fai vek bawk si. In leh lo leh nupui fanau te chan pawh a thawpik thlak ania, a hote lah chuan Davida thiamlohvah puhin lunga denhlum an lo tum bawk nen. Israel te Lal tura Pathian hriak thih chu thlalerah lal hman lovin a hoten misual nung tlaklo ang maiin lung in an deng hlum mai ang maw? A teuhlo mai.

Hetah hian Bible a MAHSE ropui em em, Israel te history zawng zawng sawi danglam vek khawp MAHSE chu alo lang ta ni.
“Mahse Davida chu LALPA a Pathian ah chuan a intichak a “(I Sam 30:6)

Eng tin nge  a intih chak a? A tawngtai ngei ang, mahse tawngtai mai bak ah engemaw tih dang a nei ani. A Pathian, Israel te Lal atana hriak thihtu chu a ngaihtuah let hman ani. A nun a Pathian thuthlung chu Israel te lal ani tur ani tih ani bur mai ani, mi ram thlaler a lo tualthi hman ani lo. A Pathian chu a rinawm ta lo em ni? Rinawm  teh meuh mai le, naupang te anih lai a sakeibaknei leh savawm laka lo chhanchhuaktu, michak Goliatha laka hnehna lo petu chu a rinawm ani, a thutiam ah chuan a ding nghet dawn chiang a, tun ah pawh a rintlak ani tih chu a ngaihtuah chhuak hman ani zawk. Chutah chuan ani Davida intihchaklehna thuruk chu a awm. Chutah chuan Sam 23-na “Lalpa chu min vengtu ani a, ka tlachham lovang,ani chuan hlobet hringdup hmunah te mi hruai thina, ani, chawlhna tuikam ah te mi hruai thin, ka nunna hi mi siamthat thin a……..thihna hlimkawr ruam zawh mah ila, thil thalo reng reng ka hlau lovang, nang ka hnen ah i awm si a, i talhtum leh i tiang in mi thlamuan thin ani……….” tiin sam hla ropui em em mai chu alo phuah chhuak ta zawk ani.

Nang pawh, Pathian chhandamna chang tawh, roluah tu tur, Pathian hriak thih chu eng in nge ti chau thin che, enginnge ti beidawng che le? I inhriatna dan in maw? Ka phur tawh lo i ti em ni? Phur lova Lalpa rawng bawl dan chu Lalpan a zirtir dawn che tih i hre lovem ni? Rawngbawlna ah chanvo pawh ka nei tawh si lo i ti em ni? Rawngbawl lovin, chanvo engmah chelh lovin rinna ah i ding nghet thei em tih Lalpan a enchhin mek che tih i hre lovem ni? Mi ram ah ringlo tute kar ah i thamral mek em ni? Thlemna kar ah, ro em em a nunna thuruk chu zirchhuak tur in in sangmar ta che le. I thlarau nun a chau in a tuihal em ni? Nun tuihal leh chauva i awm khan rinna ah i la dingnghet tlat em tih Lalpan a fiah mek che a sin, chutah chuan Lalpa a harhtharna  beisei nachang i hria nge hrelo tih a thlir reng che asin. Tuarchhel taka beiseina awm a awm tawh loh pawh a Lalpa a beiseina neih tlat chu rinna tak tak, Lal Davida zia, Pathian in a hruai tumna che chu a ni zawk asin.

Le, Pathian hmangaihna i lo chan tawh chu ngaihtuah kir leh rawh, Pathian thutiam chu ngaituah kir leh la, I thutiam te chu ngaihtuah kir leh rawh. Pathian chu a rinawm ta lo em ni? Ngaihdamna a tlachham ta em ni? A theihnghilh theih i ring em ni? Ngaihtuah kir leh rawh le.

Tuna i awm ang, i tawn ang kha ringtu tamtak in an lo tawng tawh- a then te chu an tluhlum ngei e, MAHSE a thente chu an inngaihtuah chhuak a, an intichak zawk thin asin.

Lalpan a thu malsawm rawh se, Amen.

Similar Posts:

• Kala hmangaih reng che asin
• Hnamdang Nupui-Pasala Neih Hi {Sunday Pual}
• Lalpa Pathianin a mite a ngaihtuah thin.(Sunday Pual)
• Israel Ram Buai
• Mi ram thil Pathian thu a neihna chuan Zoram thil pawimawh a chim pil

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Sunday, May 29th, 2011 at 9:30 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.