May 2011, Mizo(ram) Diary

June 6th, 2011 8:30 am by chhana

1st. Sunday: Lengpui Airport-ah Jet Airways chuan thlawhtheihna a service tir ṭan a, ni tin vawi hnih a rawn tum ṭhin ang. Jet Airways flight hian Kolkata atangin chawhma dar 10:15-ah Lengpui Airport a pan ang a, Lengpui atangin chhun dar 12:15-ah Guwahati a pan leh ang. Chawhnu dar 1:45 ah Guwhati atangin Lengpui a pan leh ang a, Lengpui atangin tlai dar 4:50 ah Kolkata a pan leh ṭhin dawn a ni. Jet Airways thlawhtheihna hian mi 66 a phur thei a ni.

2nd. Monday: Aizawl Zoological Park-a awm mek Vahrit chuan Asia khawmualpui-ah record siamin Zoological Park-a awm chunga mahni tui awpkeu hmasa ber ni turin tui pathum a awp keu. Tun hmain Asia khawmualpui-ah Zoological Park-a awm chunga mahni tui awp keu sava an la awm ngai lo a ni.

3rd. Tuesday: May 5th. – 7th. chhunga Dhaka, Bang¬ladesh-a Indo-Bangladesh Trade Fair 2011 chhim tur Industries Minister, S Hiato chuan Aizawl a chhuahsan. He Fair hi Indian Chamber of Commerce (ICC) leh Indian High Commission, Dhaka-te buatsaih a ni. S Hiato hian Trade Fair leh Summit-ah hian thu a sawi dawn a; Dhaka-ah hian Mizoram sorkar hnuaia Bamboo Development Agency leh Bangladesh Chamber of Commerce ten inremna thuthlung an lo ziah tawh a bawhzui nghal ang. Minister hi Industries Secretary, RL Rinawma, Industries Jt. Director R Lalrodingi, National Bamboo Mission-a Mission Director, Lalthangliana Murray leh official dangte’n an ṭawiawm a ni.

4th. Wednesday: Lengpui Airport-ah North East Shuttle thlawhna (Cessna Caravan) flight No. 2025, mi 9 phur thei chi Imphal atanga a rawn ṭum tur chu runway a tlan pelh deuh avangin Mamit/Phaileng panna kawngpui bula Chiahpui lui fintu kawrah a tla thla a. Vanneihthlak takin thi an awm lova; mahse, pilot, Saurajit Yadav (22) tiamin mi pathumin hliam an tuar.

5th. Thursday: R.Malsawmtluanga s/o Ramthangi, Sihphir leh Lalhunchhungi d/o Darchhuanthanga Kawnpuite chu Sihphir Venglai Kohhran Biak Inah Rev.John Raldosanga kutah an innei.

6th. Friday: Mizo mipuiin ‘Mimi Renthlei’ tia kan hriat, Mizo nula zaithiam lar, Vanlalrempuii chuan Biak Inpui, Mission Veng Kohhranah Mark Lalthanliana Varte, BDO Reiek chu ‘Ka thlang tawh che Ainawn, kumtluangin’ a ti ta.

7th. Saturday: Chief Minister Pu Lal Thanhawla chuan Serchhip-a Shalom Spastic School (Aspire School for Spastic Persons of Serchhip District) chu tlawh a tlawh a. Maruti Van, Television lian leh School-in a enkawl mek mi 32 te thingpui inna tur cheng 2,500/- a pe. He Spastic School hi mi tlawmngaite leh mi ṭhahnemngaite thawhlawm atanga inenkawl an ni.

8th. Sunday: Treasury Bazar-ah Lalnunpuii (36) d/o R Sangṭhuama (L), Republic Mual Vengthlang ruang chhar a ni. Lalnunpuii hi saruak deuhthawa hmuh a ni a, kawr a hak bak kekawrtê pawh ha lovin a kekawrin a kap bawr vel khuh a ni a, a ruang awmna bulah hian thlan lung atana hman granite keh hmuh a ni a, hei hian a lu-ah chhut a nih rin a ni. A mit ko hnuai, a biang ruh bulah inchi khat vel a kak a, a nghawngah rehna hnuhmá a awm bawk. Police-te chuan ruang hi an hlâwm a, postmortem nghal a ni. Lalnunpuii thih hun hi zing dar 4 vel a nih rin a ni. Ruang awmna bul vela mite chuan thawm engmah an hre lo a, thah a nih hnuah ruang hi dah a ni nge, hemi hmunah hian thah? a ni tih hriat a ni lo.

9th. Monday: RTC Lalduhawmi lehkhabu ziah thar ‘Thlarau Thianghlim leh kei’ tih chu Synod Moderator Rev. C. Lalsangliana’n a tlangzarh. Lehkhabu hi tlangzarhnaah hian Rs. 80/-a hralh a ni a, dawrah Rs. 100/-in hralh a ni thung ang.

10th. Tuesday: State Bank of India (SBI), Mission Veng Branch-a counter pakhat aṭangin mi pakhatin Rs. 1,000/- note 108 (Rs. 1,08,000/-) a rû a, a tlanbopui nghal. He misual hian tim na nei lova thil a tih avangin misual a ni tih amah hmutu tam zawk hian an hrelo a ni.

11th. Wednesday: Maubawk branch YMA chuan, Central YMA thurel bawhzuiin an venga hnam dang, mistiri leh helper, thir chhe zawng leh lu mêtte chu Local Council hall-ah ko khawmin, ILP leh mistiri leh helper hlawh an bithliah dan an hrilhfiah a; khawtlang duh loh zawnga awm lo turin an hrilh bawk.

12th. Thursday: International Nurses Day a ni a, he ni hi Mizo¬ramah pawh Trained Nurses Association of India, Mizoram Branch chuan Synod Conference Centre-a Pi Zaii Hall-ah an hmang a, Health Minister Lalrinliana Sailo-in a hmanpui. Kumina khawvel huapa an thupui chu – ‘Closing the gap: Increasing access and equity’ tih a ni.

13th. Friday: Aizawl District Anti Tobacco Squad (ATS) chuan Mizoram Police Headquarters (PHQ), Khatla fangin, meizûk phal lohna hmuna meizial zu an awm leh awm loh an endik a, police uniform ha chunga meizial zu pakhat manin, pawisa an chawitir.

14th. Saturday: Chanchinbua taxi permit nei anga inzuar, H Lalkunga (41) s/o H Thangchuanga, Tuikual North chu Vaivakawn Police-te’n an man. H.Lalkunga hian taxi permit pakhat Rs. 45,000/- a chhiar a, lei tumtute’n thil fel lo nia hriain, police an hrilh a, police-te chuan an man ta a ni. H Lalkunga hian tun hma pawhin taxi permit lem siamin a lo zuar tawh a, Aizawl Police Station pawhin an lo man tawh a ni.

15th. Sunday: India ram pumah petrol man tihsan a ni a, Mizoramah pawh zawm ve nghal a ni. Aizawlah chuan petrol pangngai litre khat man chu Rs. 56.24/- aṭangin Rs. 61.16/- in a sang a, Extra Premium chu litre khat Rs. 58.74/- aṭangin Rs. 63.66/- ah a pung. Champhai leh Hnahthialah Rs. 4.91/- in a sang a, a bak zawngah Rs. 4.92/- in a sang a ni. Tun ṭum hi India ramah thla kua chhunga petrol man a pun vawi riatna a ni a, ṭum khata petrol man a sânna sang ber a ni bawk.

16th. Monday: Lunglei District High Power Committee (HCP) Vice Chairman, Joseph Lalhimpuia vengtu, PSO leh a motor khalhtute chuan Aizawl DEF-a police driver Lalbiaknunga’n kawng kian duh lova; thui tak a hnunga a kaltir avangin an insum zo lovin kut an thlaka; a hnar a thi a, a hmui a kak bawk bakah mihring himna atana hlauhawm a, motor khalhah puhin Thenzawl Police Station-ah complain an thehlut.

17th. Tuesday: Suarhliap khelmuala helicopter ṭum tur chung virin a chhêm nasat avangin mei si perin field bula Lalbiaktluanga in a kâng kai a, a kan nasat hmain thelhmih a ni. In kâng hi a chung di a ni a, Mamit DC, Zothankhuma chuan in chung tur rângva pek a nih tur thu a sawi.

18th. Wednesday: International Museum Day a ni a, he ni pual hian Mizoram State Museum pawhin hun an hmang a; Mizoram State Museum chu a duh apiang tan man chawi lo a tlawh theiha hawn a ni. Mizoram State Museum-ah hian Mizo hnam rohlu chi hrang hrang 3,702 dah khawm a ni a, chung zinga 723-te chu gallery hrang hranga ṭhenin showcase-ah pho chhuah an ni. German lunghlu chhertu Johannes Gutenberg-a’n kum 1440-a a hmuhchhuah Platen (Treadle) Printing Machine pawh a awm bawk.

19th. Thursday: Central YMA leh Information & Public Relations department ṭangkawp chuan I&PR Auditorium-ah branch YMA chanchinbu enkawltute tan workshop an buatsaih a, I&PR Minister Zodintluanga’n a hmanpui.

20th. Friday: Sorkarin a thara Ethics Committee a din chuan Chief Minister Office Cabinet Roomah Chief Minister Pu Lal Thanhawla hovin meeting hmasa ber an nei a; ti ti hona hun tha ṭakin an hmang. He hunah hian member pahnihin rokhawlhna an neih avangin an tel kim thei lo a ni. June ni 1st. 2011 chawhnu dar 2:00 ah Chairman leh Secretary turte thlan an rel bawk.

21st. Saturday: Sports Minister Zodintluanga leh Mizoram Football Association hruaitute chuan Mualpuia Rajiv Gandhi Sports Stadium sak mek an tlawh. Sports Minister chuan, “Thawhhona ṭha tak a awm chuan hnathawh a phurawm ṭhin,” a ti. Rajiv Gandhi Stadium siam hna hi 12th. Finance Commission aṭanga pawisa hmuh cheng vbc. 25/- hmangin Lloyd Insulations Pvt. Ltd. te’n an thawk mek a, mi 20,000 ṭhut theihna tura sak tum a ni.

22nd. Sunday: Champhai-Hnahlan bus, MZ-04 2686, C Vanlaltura, Hnahlan ta chu Aizawl aṭanga Champhai pana a tlan laiin, Champhai thlen hma km 9 vela hla lei tlahniamah steering ṭhat loh avangin a tlan liam a, bus-a chuang Chuaukunga (50), Hnahlan chu a hmunah a thiin Driver Lalhmangaihzuala (25) leh Daisiampauva te’n hliam an tuarin, Champhai damdawi-inah enkawl an ni.

23rd. Monday: Vairengte leh Chhimluang inkara NH-54 kawngpui sirah Zairemmawii (32) d/o. Ralkapthangi, Edenthar Veng, Aizawl ruang chhar a ni. A bulah ruihhlo engemawzat hmuh a nih avangin drug over dose vang a nih rin a ni.

24th. Tuesday: Brig. SK Verma, DIG Hqrs 23th. Sector, Assam Riﬄe chuan Lungleia AR hmunah Military Civic Action Project hnuaiah thingtlang khaw 4 heng: Bualte, Hauruang, Vanhne leh Mausen te hnenah thosi len 30 ṭheuh a sem.

25th. Wednesday: Kolasib New Diakkawn CP Road-a Lalruatsanga inah Lalhmangaihzuali (25) d/o Zamtinthanga, Leisenzo khua chu thia chhar a ni. A kapah inchiuna ni awm tak lapua a inbel hmuh anih avangin drug over dose vang a nih rin a ni.

26th. Thursday: Mizoram sorkar chuan Mizoram Public Service Commission (MPSC) Chairman atan Vanengmawia, IAS (Rtd) a ruat thar. Vanengmawia hi Mizoram sorkarah Secretary hna chelhin kumin March 31st. khan pension-in a chhuak a ni.; MPCS Chairman-ah hian thla tin Rs. 80,000/- (fixed) a hlawh ang a, hamṭhatna awm thei ang ang a dawng bawk ang.

27th. Friday: Seling atanga Champhai lam kawng, km. 4 vela hlaa quarry a chim a, quarry-a hnathawka awm mek, R Dawngliana, Thingsul Tlangnuam fate pahnih; Lalbiakthanga (35) leh a nau Lalthatluanga (30) a delh hlumin vanneihthlak takin an milai Lianthangpuia (32) erawh chu a tlanchhiat hman avangin a him thung. Helai hmunah hian quarry awmna ram neitu Darhlupuii fapa, Rohmingliana chu kum 2005 khan lung tlain a lo delh hlum tawh bawk.

28th. Saturday: Tourism department leh Mizo Cultural Organisation huaihawtin Reieka Tourist Resort-ah Mizo Hnam Kutpui vawi khatna hman a ni a, Tourism Minister, S Hiato chu khuallian niin, Parliamentary Secretary H. Zothangliana chu khualzahawm a ni. Mizo Hnam Kutpui hmannaa sensote hi sorkar laipuia Ministry of Tourism-in a tumsak a ni a; MCO branch leh club 47 atangin 34 an tel a, hnam lâm leh zaite entir a ni

29th. Sunday: Saiha College Venga N.Pachhunga, Sr. RO, MADC in tur RCC-a rel mek, chhawng thum chu a chhak lama leiminin a hnâwl chhe vek.

30th. Monday: Central Anti Drugs Squad (CADS)-in an man khawm ruihhlo chi hrang hrang, Rs. 7,86,450/- man hû chu Central YMA Hall kawtah Chief Minister Lal Thanhawla’n a hâl ral. He hunah hian CM nupui, Lal Riliani’n CYMA President, Lalchungnunga hnenah CADS tanpui nan Rs. 55,000/- a hlan nghal a ni.

31st. Tuesday: Sihphir – Aizawl (Aizawl City Bus) MZ 01-A5840 chu Aizawl pana a tlan laiin Durtlang leh Bawngkawn inkarah break fail avangin kopang a sut hnuah kawnglaiah a let. Thi an awm lova; mi 10 in hliam an tuar. Hliam zinga na zual pahnihte chu damdawi inah dah anni. Ngaihtuahawm lutuk erawh anni lo.

Ka lawm e.