Psalms 119:105 by Rev. Vanlalzuata
Bible hi bu 66 infin khawm a ni a, a bu mal tinte hian hlutna bik an nei theuh va, an hlutnate chu hmun khatah a infin khawm vek bawk a, Lal Isuaah a luang khawm vek a ni.
I thute hi ka ke atante hian khawnvar a ni a, ka kawng atan eng a ni (Sam 119:105).
H.P. Baker-a chuan a pangpar huana thil thleng chi thumte atangin Bible zir dan chi thum a hmu chhuak a, a hmuh chhuah dan chu hetiang a ni : Hmanhmawh takin phengphehlep a lo thlâwk a, a huana pangparte chu a rawn bawm a. Rei lo te te a fu lâwr den den a, pangpar zu pawh dâwt hman lovin hmun dangah a thlâwk sawn leh ta a. Chumi hnuah chuan thlai chanchin zir mi (botanist) pakhat chu enlenna (microscope) kengin a lo kal leh a.
Pangpar chu chiang takin a en kual a, a kuhmumte chu a kau lâwr a, a hmuh dan chu a note-buah chuan a ziak zel a, a kal leh ta a. Chumi hnuah chuan khuai riltam tak mai hi a lo kal ve a, pangpar chhungah chuan a lut hmak mai a, bungbu chungin pangpar zu chu a dâwt ngar ngar a, a puar hnu chuan lungawi takin a kal leh ta a. Heta tang hian Bible zir dan kawng thum a hmuh chhuahte chu –
Mi thenkhatte chu phengphehlep hmanhmawh ang hian Bible hi kan chhiar ve bawk na a, kan chhiar lâwr dun dun a, Genesis atangin Thupuan thlengin kan thlâr phei zut zut a, kan khup leh mai a. Bible-ah hian kan nun chawmtu leh min tilawmtu tak tak hmu lovin kan khup tha a, hmun dangah hlimna zawngin kan thlâwk bo va.
Mi thenkhat chuan thlai chanchin zirtu ang hian Bible hi chik takin kan zir a. A ziaktu leh a ziak hun te, a ziak laia khawvel awm dan te, a thuchah leh a sawi tum tak te kan zir a. Mi thenkhat chuan khuai riltam ang hian Bible hi kan chhiar a, kan thlarau riltam tan chaw a tlinzia kan hria a, kan ei a, kan puar a, hmun dangah chaw kan zawng kawi tawh lo.
Aelfric-a chuan, “Kan tawngtai hian Pathian kan bia a, Bible kan chhiar hian Pathianin min bia a ni,” a ti a. Pathian biak taimak hi a tha a, chumi tlukpui chuan Pathianin min biakna hre thei turin Bible kan chhiar taima tur a ni. Pathian aw kan hriatna hnâr tha ber chu Bible hi a ni a, hmun dangah Pathian aw kan hria a nih pawhin Bible nen a inrem em ? tiin kan aw hriat chu Bible atangin kan teh fiah tur a ni ang. Bible atanga teh fiah theih loh a nih chuan pawm lo ngam ila, kan tifuh zel ang.
Bible hi rinna leh thiltih tehna dik lo thei lo a ni tiin thurinah kan pawm a ni. Beroia khuaa mite pawh khan an khuaa Pathian thu hriltu lo kal chu an thusawi dik leh dik lo hriat nan ni tinin Pathian Lehkhaah an zawng thin a nih kha (Tirh. 17:11).
Kan ram Kristiante hian Bible hi chu a hlutzia kan hre theuh va; amaherawhchu kan nun teh nan kan hmang tawk lo deuh niin a lang. Lal Isua ngei pawh khan, “Pathian Lehkha in chhiar ngun thin, a chhungah chatuana nunna awma in rin avangin: chung Lehkha chu ka chanchin hriattirtu chu a ni si a. Nimahsela nunna nei turin ka hnenah in lo kal duh si lo,” min ti a (Joh. 5:39). Lehkhabu dangte aiin Bible hi hriat harsa kan ti thin a, a chhan eng nge ni ang ?
Thawnthu bu kan chhiar chuan a thuah kan cheng a, kan tel ve nghal a, kan hre ta vek mai a. Bible kan chhiar chuan a thuah kan cheng lo va, a sawi anga nun tumna pawh kan nei tehchiam lo va, kan hre reng thei lo a ni. Nunpui tum tak takin Bible hi chhiar ila chuan tun ai hian kan hre thei khawp ang.
Bible hi bu 66 infin khawm a ni a, a bu mal tinte hian hlutna bik an nei theuh va, an hlutnate chu hmun khatah a infin khawm vek bawk a, Lal Isuaah a luang khawm vek a ni. Chu chu hetiang hian lo thlir ila –
1. Genesis bu hi Workshop Department a ni a. Mistiri thiam ber Pathianin lei leh van a siam dan chanchin kan hmu a.
2. Exodus, Leviticus, Numbers leh Deuteronomy bute hi Law Department an ni a. Pathianin a mihring siamte a enkawl zui dan te, an zawm tur Dan a siamsak thu te, ram leh hnam a humhalh dan te, hruaitu a ruatsak dan te kan hmu a.
3. Josua atanga Estheri bu thleng hian History Department kan hmu a. Hnam leh chhungkaw thlah chanchin te, lal leh an rorel dan te, an rorel hun chhung te, indo thu leh an inrem leh dan te, mi mal chanchin tam tak nen kan hmu.
4. Joba bu hi Philosophy Department a ni a. Mihring inhnialna thu khirh tak, dik ve ve si, dik zawk awm si kan hmu a. A dik zawk chu dik lo zawk anga a lan lai a awm a, ngaihtuahna hmanga thu dik zawn chhuah tur a awm a, a tawpah chuan, Ka hmu ta che,” tiin thu dik chu pawm a ni ta a.
5. Sam bu hi Music Department a ni a. Mi lawmte sak chi a awm a, mi lungngaite sak chi a awm a, mi mawl leh mi fing ber berte sak chi a awm bawk.
6. Thufing bu hi Business Department emaw, Wisdom Department emaw kan vuah thei ang. Rorel thiamna leh ngaihtuahna dik hmang duhtute tan hei aia thufing hi a awm thei lo a ni. Thufing innghahna laipui ber chu ‘Lalpa tih hi finna bul a ni,” tih a hi.
7. Thuhriltu hi Research Department a ni a. He khawvela thil thleng leh a dawngtu mihringten an chunga thil thleng an dawn dan kan hmu a. Finna leh âtna kan tih te, hausakna leh retheihna awmzia te, thihna leh nunna awmziate hi chiang taka zir a ni a. A tawpa hmuh chhuah tâk chu, Pathian tel lo chuan engmah lo mai mai vek a ni tih hi a ni.
8. Hla Thlankhawm bu hi Love Department a ni a. Hring nun innghahna laipui chu hmangaihna a ni a. Hmangaihte bula awm chu vanram a ni a, hmangaih lohte bula awm chu hremhmun tem lawkna a ni bawk. A tlang kawmna chu Pathian hmangaihna hlutzia a ni.
9. Zawlnei lehkhabute hi Isaia atanga Malakia thleng hian Telecom Department an ni a. Van leh lei inbiak pawhna hrui pahnihte chu Zawlnei leh Puithiam te an nih thu kan hmu a. Pathianin zawlneite hmangin mihringte a rawn bia a, mihringten puithiamte hmangin Pathian kan bia a ni.
10. Chanchin |ha bu lite hi Labour & Employment Exchange Department an ni a. Lalte Lal, hotute Hotu Lal Isua chuan chhiahhlawh rawngbawl hna a rawn thawk a. Heta tang hian Thuthlung Hluia Zawlnei, Puithiam leh Lalte an chawl zo tawh a, Isua chu kan Zawlnei, kan Puithiam leh kan Lal a ni.
11. Tirhkohte Thiltih bu hi Power & Electricity Department a ni a. Chanchin Tha meichher eng chuan Palestina ram chauh ni lovin, Asia minor te, Rom ram leh Spain ram thlenga a enzia kan hmu a.
12. Lehkhathawn zawng zawng hi Communication Department an ni a. Infuihna leh inzilhna thu te, lawmthu inhrilh tawn thu te, thu pawimawh ziaka inhrilh tawn thu kan hmu a.
13. Thupuan bu hi Judgement Department a ni a. A bul bera Law department kan hmuh kha hei hian a tlang a zial dawn a ni. Department zawng zawng rorelna chu hetah hian a luang khawm vek dawn a, lalberte Lalber thutthleng hmaah mi zawng zawng an kal khawm ang a, an thiltih ang zela relsak an ni ang.
French philosopher ropui tak Voltaire-a chuan Bible hi tihbo tumin nasa takin a bei a, hman lai thawnthu (history) ang leka siam a tum nasa hle a. A thih hnu kum 50-na 1828-ah chuan Geneva Bible Society chuan a in leh a Press chu Bible chhut nan an hmang ta hlauh va, amah chu history-ah an siam ta zawk a ni. Lew Wallace-a chuan Pathian rintlak lohzia ziak a tum mek laiin thingthiin a tawngtai ta thut a, Kristiante tana thu ngaihnawm tak mai ‘Ben Hur’ an tih hi a ziak ta hlauh zawk a.
Chutiang bawk chuan Frank Morrison-a pawhin Lal Isua thawhlehna thu hi ziak bo a tum laiin a rilru a inthlak danglam thut a, ‘Lung hi tuin nge lum sawn?’ (Who moves the stone) tih bu a ziak ta hlauh zawk a. Rav Shanker-a pawhin India ram map lian tak a ziak malh malh laiin a tum hauh lohvin a phenah Lal Isua kraws a ziak a, chutah chuan a map ziak chu a khengbet ta ve mai a.
Heng a chunga kan sawite hi a mak hle a, a mak lo bawk a. A chhan chu Pathianin a thu hi a humhim tlat a, dotute chu an tlawm lo thei lo. Bible ziaktute hi mi 36 vel an ni a, a ziak hun chhung hian kum 1500 chhung zet a awh a. A ziaktu mi thenkhatte an thih daih tawh hnuah a ziaktu mi thenkhatte chu an la piang lo va. A ziaktute hian mi dangin an ziak ve nge ziak ve lo tih reng reng pawh an inhre tawn lem lo bawk. An ziakna hmun pawh hi hmun hrang hrang a ni a, lal in atang te, thlaler leh puk chhung atang te, thliarkar leh luikam atang te, lung in atangtein an ziak a.
A ziaktute lah hi mi chi hrang hrang- politician Mosia te, sangha mantu Petera te, ranrual vengtu Amosa te, sipai General Josua te, Babulon lal Assistant Nehemia te, Prime Minister Daniela te, Doctor Luka te, Lal Solomona te, chhiahkhawntu Matthaia te, mi thiam, Gamaliela ke bula seilian Paula te, mi chi hrang hrang 40 rual an ni a.
Kan Bible hi khawvel lehkhabu naran chu ni sela, a ziaktute leh an ziak dan kan en hian lehkhabu pakhata chhun fin chi a ni hauh lo mai. Amaherawhchu heng zawng zawng hi tum lawk ang thlapin a infin nalh bawk si a. A ziaktute hi inchen lo hle mah se, Doctor ziak leh sangha mantute ziak chu a hlut lam a inchen reng bawk si a. Mi tinten kan chanchin ziakna angin kan ngai thlap thei a, hnam hrang hrangten keimahni hnam mamawh a sawiin kan hria a, kan harsatna chi tin rengte hi a hneh dan nen a sawi kim vek bawk a.
Nun dan tur peng chi tinreng min kawhhmuh a, thih dan min zirtir a, thih hnua awm zui dan tur chi hnih min hrilh bawk a. Lal Davida pawhin, “I Lehkha buah chuan ka p>ngte zawng zawng hi ziak vek a ni…pakhat mah a la awm hmain,” tiin a sawi tawp a ni (Sam 139: 16). Bible thute hian min tilui lo va, duhthlanna erawh min dil a, ro hlu bera neitu tan chuan a aia hlu a awm thei tawh lo va. A hawtute tan erawh chuan chatuana thiam loh channa bu a ni thung.
Zanah khawnvar eng angin,
I thu hian rilru a en;
Ro tha aiin a hlu em e,
Thinlungah ka vawng ang.
Similar Posts:
- Bible Departments (Sunday pualin)
- Ka hmangaih ber kan Bible
- Bible chhiarchhuahah lungthu ka kim
- Bible hi aw….
- Engtin nge ni ang?
June 20th, 2011 at 10:05 pm
Report this comment
June 20th, 2011 at 10:06 pm
Rev.Zuata hi puithiam ho ziang ah chuan ka ngaihsang pawl ani.
Report this comment
June 20th, 2011 at 10:11 pm
Pu Zuata chu a va khaikhawm tawi thiam em em ve
A aw hi a per chhe ve tih lohah chuan thusawi thiam ka tih pawl tak a ni.. Rev Zosangliana nen hian.
Sam 119 hi
Report this comment
June 20th, 2011 at 10:13 pm
Va dik teh thlawt hlawm ve.
Bible thlir dan tur dik tak niin ka hria.
“Thuthlung Hlui leh Thuthlung Thar bute hi Pathian thu a ni a, heng chauh hi rinna leh thiltih tehna dik lo thei lo a ni.”
Post
Report this comment
June 20th, 2011 at 10:21 pm
“Pathian aw kan hriatna hnâr tha ber chu Bible hi a ni a, hmun dangah Pathian aw kan hria a nih pawhin Bible nen a inrem em ? tiin kan aw hriat chu Bible atangin kan teh fiah tur a ni ang. Bible atanga teh fiah theih loh a nih chuan pawm lo ngam ila, kan tifuh zel ang”
Hei hi tha ka va ti em ve aw … ‘thinlunga lang tlat’ nazawng Pathian aw emaw tih hi thil hlauhawm tak a ni.
Report this comment
June 20th, 2011 at 10:21 pm
Genesis hi Geologist, Astronomist lehkhabu a ni. Anthropologist leh archeologist te in hmuhchhuahna a ni bawk.
Report this comment
June 20th, 2011 at 10:29 pm
solomona hla=kamasutra…lolz
Report this comment
June 20th, 2011 at 10:29 pm
Tha hle mai. Ka save hmak e.
Report this comment
June 20th, 2011 at 10:34 pm
Report this comment
June 20th, 2011 at 10:35 pm
A tir para then dan khi, a thu hlawm ang deuh a then ve awm…..
A tha hle mai, HP baker-a hmuh hmaih erawh ka hmu,phengphehlep ang a kan han en puat hnu ah, chik taka pangparte chu kan zirchian hnu ah, a thlumna te a kan han inhnangfak hnu ah, a pangpar huan pumpui mai lantheihna hla deuh de daw atang thlir a, a mawina avanga a siamtu Pathian faktheihna thinlung put ngei ngei tur.
Bible hi systhesis level,a pumpui lan theihna thlirna tlang kan thlen thinloh avang hian chang thenkhat lak fawr leh lak kawih avangin khawvel ah doctrine diklo tamtak a lo piang ta. Kan bih hnaih(analysis) lai leh a zu thlum kan dawt dan(experience) a zir a chu pangpar huan pumpui mai jugdement pek chu a dik ziktluak ngai si lo.
He post hi ka
lutuk e.
Report this comment
June 20th, 2011 at 10:43 pm
Ava ngaihnawm leh pek ve aw. Post hi ka save leh e.
Amah Pu Zuata khan a tia lawm- SL&PB Office-a Editor a nih lai khan Kristian Tlangau Bu-a zawhna kha a chhang thin a. Mahse chhan harsa a tihzia te, Bible rilzia leh tangkaiziate kha a sawi thin a ni. ‘Ka chhiar tam poh leh ka la hriattlemzia ka inhmuchhuak tulh tulh a, Thlarau Thianghlim min pui tur hian ka sawm thin e’ a tih kha.
Zokhaw(Thingtlang) lam pangin Bible thu chhuak an nitin nun kaihruaitu atana an hman nasat avanga zawhna an ngah lutuk kha mak a ti. Hemi avang hian amah kha Theologian ni mahse a nitin nunah Bible thu kha a hman nasat leh zual phah a ni awm e(A insit viau thu a sawi bawk a ni). A thusawi dikzia lanna chu- Bible chungchang a ziakna reng reng hi ni tin nun chawm zawngin a ni tlat zel.
Report this comment
June 20th, 2011 at 10:56 pm
Ka’n OT lawk.Pu Zuata’n ‘mizoin enge maw ka ei chak mahse ka hre si lo kan tih hi chhangban a ni ei ila a reh vek” a tih ka la hrereng.
Report this comment
June 20th, 2011 at 10:57 pm
Pathian hi mistiri thiam tak nen tehkhina a ropui dan chhut ka thiam vak lo hle mai a….@1
a tha khat e …(Y)
Report this comment
June 20th, 2011 at 11:03 pm
#12:
Report this comment
June 21st, 2011 at 12:02 am
Zawlnei Ropuiber Mosia.
Report this comment
June 21st, 2011 at 12:25 am
Ka lo vei ve thin – Bible hi chhiar chhuah pawt ringawt tura siam ani lo – tih thiam takin tehkhinna tanpuina nena ziah ani hi a ropui e, a ziaktu leh post tu an ti lawmawm e. Pathianin malsawm zel rawh se.
Bible a lehkhabu tin hian ‘message’ an neih avangin, chhiar chhuah ngawt lam aiin, zir chian a tul em em ani.
Isua hmangaih lo te tan amahah chhandamna a awm lo. A thu leh a thu tum hre lo leh zir lova, a chanchin zir hek lo tan ‘ka hmangaih’ tih ngawt theih ani lo. Kan hmangaihte chanchin chu –
1. Kan chik thin a,
2. Kan hre kham ngai lova,
3. Hre tura nawr luih kan ngai bawk lova,
4. Tih tur tul a ngaih vanga ti ang ni lovin,kan hmangaihna tuihalna avang zawkin thlaler a mi dangro dangchar in dai fim tlem far pawh am taka an dawt ngawih ngawih ang hian, kan hmangaihte chanchin sawina hlek hmun ah chuan kal kan phur sarh renga. Tin,an chanchin inziahna (love letter te poh aniang chu) te chu uluk takin, a thumal tin te – a dawt in kan dawt vawng vawng thin ani.
Chuvangin kan LALPA ISUA HNAIH DUH LEH, HMANGAIH DUH TAN CHUAN –
1. Mahni a Bible chhiar leh zir
2. A chanchin an sawina leh sawitu apiang ngainatna
3. A thu ngaichang tura inkhawm a, thuhriltu leh hla sakte etc. hmangin ‘message’ thar min rawn thawn dah lawm maw? ti a lo chan reng
4. Min duh dan a awm thei tur leh kan tawngtaina chhanna hmu thiam thei tura a aw ngaihthlak peih
– te hi an pawimawh mai ni lovin, an tello chuan RINGTU NUN hian, ringlotute nun lakah danglamna a nei dawn lo tihna a lo ni e.
Report this comment
June 21st, 2011 at 12:31 am
#16:
Report this comment
June 21st, 2011 at 12:59 am
A va tha in a va ngaihnawm em ve le.
Report this comment
June 21st, 2011 at 1:06 am
a va han ngaihnawm thin tak em aw!! Mahse ka Bible chhiar dan ka han hmu khi,hrehawm ka ti hle mai,phengphehlep ang mai ka lo ni, khuai ang nih chang awm ve thin mah ila
Report this comment
June 21st, 2011 at 2:05 am
Ava han ngaihnawm leh pek em!Pu Vanlalzuata nge nge!
Report this comment
June 21st, 2011 at 3:50 am
Isua zara chhandam kan nihna, vanram chang ve thei tur nihna hi kan rohlu ber niin, Bible hi kan guide book tha ber a ni, ka ti thin.
Therefore, The Kingdom of Heaven is the greatest treasure for all Christians.
All scripture is given by inspiration of God, and is profitable for doctrine, for reproof, for correction, for instruction in righteousness:That the man of God may be perfect, thoroughly furnished unto all good works. The Bible also helps guard against errors of various kinds. Its value is immeasurable in many ways.
Report this comment
June 21st, 2011 at 4:50 am
Hei chu a thui deuha nakina chhiarah ka tia ka save tawh tho nangin he lai ah hian ka tawp hrih teh ang
4. Joba bu hi Philosophy Department a ni a. Mihring inhnialna thu khirh tak, dik ve ve si, dik zawk awm si kan hmu a. A dik zawk chu dik lo zawk anga a lan lai a awm a, ngaihtuahna hmanga thu dik zawn chhuah tur a awm a, a tawpah chuan, Ka hmu ta che,” tiin thu dik chu pawm a ni ta a.
A summarize dan hi 100% in ka va duh em. Joba hi Pathian mi a ni tih hresa in emaw a tawpa a chan tur leh a chunga Pathiam remruat hre sa lo in chhiar ila a thiante thlirna hi hriatthiam zawk pawh a awl khawp mai.
Tunlai khawvel ah pawh hian Joba thiante mizia ang pu hi kohhran mi leh sa tak te zing ah ka hre nual mai.
Report this comment
June 21st, 2011 at 5:27 am
Higher leh college vel ka kal lai khan science zir ka nih avangin “science ah chuan hriatthiam tuma ngaihtuaha kan chhiarloh chuan kan theihnghilh leh mai thin” tih kha ka hriaa, Bible ka chhiar in hriatthiam tum emaw ngaihtuah miahloha khawilai amaw chang ka lo chhiar hian ka rilru pek lohna lai atang ka let a ka chhiar nawn leh ngat thin. Pawl 12 ka kal laiin Leviticus(sunday a kan zir avangin) tihloh chu a tir atang a indawtin ka chhiar chhuak vek a, ka chhiar pahin ka chang duhlai ka kutziak ngeiin ka copy thla pah zel bawk a, chu chuan vawiin ni thlengin Bible thu hriatna ah hian minpui thin. Chumi bak chu a indawta chhiar chhuah ka la nei lo, kumin hian ka tum leh mek a ni.
Vawikhat chhiar chhuak ah chuan ka chhiar hmasak ber kha rilru ka pek nasat ber tum niin ka hriaa, vawi tam tak chhiar tawh aiin ka vawng rei daih zawk thin a ni.
Samuela, Sam leh Thuthlung thar lam hi chu ka repeat ve nual tawh, rilru pe lova chhiar hi ka tumlo viau nangin ‘Thlahtu chhui’ vel hi chuan ka mut a ti chhuak thei khawp mai.
Report this comment
June 21st, 2011 at 6:08 am
Rawngbawltu dik tak chuan a kut veilamah Newspaper a keng tel ni tin ve ngei tur a ni; a kut dinglamah Bible keng reng thin mah se.
Report this comment
June 21st, 2011 at 6:36 am
Hmanni chu Aizawlah Holy Bible lei tur kan hmu zo der lo mai. A awm tawh angem aw
Report this comment
June 21st, 2011 at 8:12 am
Tunlai chu Pu Zuata sermon te hian ka nun a châwm nasa khawp mai. Chhiar laite hian ka tim mer mer thei nia mawle.!
Report this comment
June 21st, 2011 at 11:32 am
Van tha veee.. Phengphehlep ang mai kalo ni e..
Report this comment
June 21st, 2011 at 11:54 am
Ka chhiar thuak thuak a a tha kher mai.
Pu Zuata hi a ngaihsanawm ka ti mihring tak pawhin, mi inngaitlawm etc a ni a. Hetiang ang mi hnungzui tutur hi Mizoram Kohhran te hian engzat nge kan neih le?
Report this comment
June 21st, 2011 at 1:30 pm
Pu Zuata nge nge. Esauva anga ngaihtuah mang lova thil ti puat puat chuan malsawmna a hnawl bo va, Pu Zuata te ang mi dilchhut hi chu midang tan malsawmna an ni ngei ngei zel.
Report this comment
June 23rd, 2011 at 1:53 pm
Heng Hla te lyrics hria in awm chuan min han pe thei em?:-
1. Krista chuan Baptist turin min tir si lo
2. Ka lalpa hnung zui tur hian channa emaw ka lo ti
3. Sakhi luite tui chak, thaw huam huam ang mai hian.
Report this comment