mi(sual).com

Mi NUN a ni lova, kan NUN a ni. Sawifiah tumna lamah sawi buai nuai a hlauhawm. Ka sawi aiin in thinlung lamah ‘Khawtlang NUN’ chu a fiah daih zawk. Kan khaw hming a inang lova a intiat bawk hek lo; Kan nunphung leh sukthlek pawh a inang vek hek lo.

Chutiang a nih reng lai chuan kan mizo khawtlang nun hian hlawm khatin min tuam vek tho a ni.
Khawtlang nun chu a chhunga chengte nungchang leh chet dan in a lo lang chhuak thin a. A him lo thei a, a ralmuang lo thei a, a hahdam lo thei bawk. A tha zawng thung chuan a thlamuanawm thei a, a nuam thei a, a hahdam thei bawk.

Anchhedawng khawvel a ni miau a, sualin khawtlangah kua a hreuh a hreuh a. Ruihhlo chi hrang hrangin kan nun min tihchhiatsak a, ruk ruk, hlemhlet, duhamna leh hurna te chu thangthar ten khawtlang nun tur ve reng emaw an ti mai ang tih hlauhawm khawpin an langsar a.

Aia upa zahna kan nei tlem tial tial a, chu chu sawi loh mahni hringtu Nu leh Pa ngei pawh zah tawh hauh lo, Nu leh Pa tena an hlauh tlawn tawh zawk nula leh tlangval thawh peih nei lo, eitur duh tui, top up heh tak kan tam ta hle.

Kohhrana kan Motto chu sawi loh, YMA thuvawn leh Motto theihnghilh thak khawpin leh mahni dinhmun pawh theihnghilh thak khawpin kan mit hmuh leh beng hriat te copy in ka mawipui em?ka inmil ve em? tih pawh ngaihtuah lovin kan inbel ve a, kan hum changkang ve em em a…khawtlangnun tibaltu leh tinuihzatthlaktu a ni zawk mah lawng maw!!!

Ruihhlo avangin fanu, fapa in ama inchhung a rawk a, pawn lamah phei chuan pawisak an nei tawh lo. Kan khawtlang nunah hian pindan chhungril leh pawn ler thlengin engmah hi a him tawkin kan hre lova, chung sualna te chuan khaw eng hi an zah hauh lo. Kan khawlai ah kan hmeichhiate thla a ngam lova, kumtling lo naupangte ngei pawh an him hek lo.

Chutiang chu kan nih mek lai hian, chungte chu mi nun an ni vek lova, kan nun a ni ve a, vawiina YMA Member lo kal khawm te hi khawtlang nun chawk nu tu ah hian kan tel ve tih i pha lovang u.

KAN MAWHPHURHNA:
Hun liam ta te leh vawiin thleng mai hian he khawtlang NUN kan tih hi TISA NUN emaw kan ti a, ralkhat thlir kan tum a, khawtlang nunah kan inthlahrung a, kan inkiltawih a, khawtlang nunin min hrut vek tho si a, khawr takin kan awm a, zim nih te pawh kan hlawh lek lek chang a awm thin a.

Khawtlang nun kan hmuh tisa runna hian Khawtlang Nun Siamthatna kawnga beihpui thlakna kawngah harsatna a siam phah fo thin. Kohhran ho te pawh kan inenchiana kan inbihchian a tul tak meuh meuh.

Lusun khawhar te hnem turin kan aw kan chhuah tur a ni a, thlan laihna ah hian YMA thalai mipa te thlan tui a far tam tur a ni. Khawhar in riahah Thalai khawhar In riak rual ten neitu chan an chang tur a ni a, damlo thisen pek ngaih hunah YMA Member ruihhlo laka fihlim te thisen thinghlim hlutzia hi lanchhuahtir tur a ni. Nula ten Mizo taka enge ka tih tur kan hriatchian a ngai. Lusun khawhar te tan thlamuanpuiawm i ni mawlh teh ang u.

Sumdawng leh Office-a YMA Member te dawhkan chu a danglam bik tur a ni a, a dawrtute thinlung a dam ngei tur a ni. Eng thil pawh ti ila,eng hna pawh thawk ila, YMA Member sulhnu awmna chu a rinawm a, a fel a, a dik a, a belhtlak a, mit tlung tak a ni tih lanchhuahtir zel ila, kan khawtlang nun chu avan mawi zual dawn em.

YMA Member ten nun dawngdah leh thatchhiatna hnu chhawn ngam ila, mahni thawhchhuah phu lova khawsak hi mi khawngaihthlak te nun a ni tih hriain mahni intodelh tum hi a YMA em em a, a Mizo em em a ni tih i hre thar leh teh ang u.

Tin, ngaihhlut tur kan thlan thiam te pawh hi a pawimawh ta hle mai. Kut tling lova hausa te, Thawh that tum silova, hmingthat chiah duhna thinlung pu mi te, mahni khawsak phu lova fashion, vehicle leh mobile phone neia in chhekarbawm te hian an mawng an hlim a ni tih hriaa ngaihhlut loh thiam a tul ta. Zirna, eizawnna, sumdawnna, hnathawhna leh politics-a mi hmingtha, chawimawi phu te chawimawi thiam hi a tun lai a, a Mizo hliah hliah bawk a ni.

Khawtlang rawngbawlna NGO, Politics leh Association dangah pawh YMA Member te kan tel ve thin. Thu inchuh a awm mai thei – finna tinrenga remhria, YMA ten rilru dam kan put reng a ngai, thutlukna siam nan kan rintlak tur a ni. Hamthatna insem tur ah, Politics ah chuan’Kei tih tur’ tih hi YMA Member te chuan ‘Nang zawk le’ tiin let chhuak ila, a van duhawm tak em.

YMA tlangval ten feh kawngah upa zawkte ritphurh an chhawk ang hian, i lirthei Two wheeler emaw three/four wheel pawh nise a mamawhtu midang te an leng tur a ni.

Aia upa zahna a bo ta kan ti maw, a bo vek lo tih hi YMA Member ten kan lantir tur a ni. Pawn lamah te, kan nitin nunah te, keimahni in chhung, Kohhran chhungah ngei te pawh hian lanchhuartir a van tul tak em.!! Aia upa zahna tih a nih rual hian pawl angah chuan hruaitute hruaitu nihna hrethiama kan zahna lantir hi YMA te zia tur a ni.

Kan khawtlang boruak (Environment) mipui te hip hi a hrisel a ngai a, a thianghlim a ngai. Chumi boruak kengtu NGO leh vantlang hruaitu te, keimahni mimal tin ten kan hriatreng a tul a ni. Khawtlang tana thil tangkai leh ro tling, enkawla, venhimna kawngah pawh nang leh kei hi a kila lung pawimawh kan ni tih i in hre thar leh teh ang u.

Khua leh tui tha khawtlang inrelbawlna leh inkaihhruaina te zahthiam a, tihlawhtlingtu nih hi YMA te mawhphurhna a ni tih kan hriat reng a tul. Vantlang duh loh zawng leh khap thil te tih luih leh luhlul chhuah tlat hi YMA/Mizo suak zia a ni.

Remna siam tur hian a hahthlak chang a awm a, a hlauhawm chang a awm a, chan leh heu phah a ngaih chang a awm. Amaherawhchu, a rah chhuah hi a hlu em a, Lal Isua duhzawng a nih avang hian hnathawh nuam tak a ni. khawtlanga remna siam hi YMA ten kan mawhphurhna a ni tih i hre thar leh ila.

Kan Pu, kan Pa rual ni tawh khawpa Upa te hian khawtlang Nun siamthat hna an thawk ang a, keini thalai mawng zang zawk te hi kan thu mai mai dawn em ni…Kan khawtlang hi nun nuam, nun hahdam leh hmasawnna rahbi tharah i hlangkai leh teh ang u.

Similar Posts:

• Khawtlang nun siamthat leh tunlai Mizo khawtlang nun
• Khawtlang nun siam thatnan inkhawm
• Val-Upa
• Khawtlang leh Kohhrana hruaitu nikawp te
• Dawn ve teh

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Tuesday, July 19th, 2011 at 11:30 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.