Thli thaw heuh heuh chuan min rawn chhem a. Van dumpawl thiang kuk mai karah chhumvar
thianghlim ser mai Thlangra tia vel thlir a ka thut reng lai chuan, Ni chu Kawlah a lo her liam tep tawh mai a. Ka awmna vel chu ‘Ber’ thla Ni tla tur chuan a lo en riai a. Ka chhungril chu sawifiah thiam rualloh hian a ruak huai hian ka hria a. Awmngaihna hrelo chaun ka hawi vel ruai a.
Chutih lai chuan Losul haw ko Thereng chu a lo hram vawl vawl a.Kan hawi chhuak a, kawlkil ah chuan Thal Romei zing chuan tlang a lo bawh paw chiai a, Nungcha -a te ber thlenga aw rawl tawp a hramri chiah chiah te, sava ten an riahna tur thing bel a an thlawk kual delh delh te, Thingzara Nauban khawhar tak a a par vul chiai te, ka piah lawk a Zo Luite fim kik kek a luang dem dem te, hnim kara a theih tawp chhuah a ram pangpar lo par ve chek te chu ka thlir reng a.
Khawvel hrehawmna leh Natna ten a khawihnat phak rualloh khawp a nuam tihna leh thlamuang em em a inhriatna in ka khat a.
Ka rilru chu a vak kual nasa viau mai le..Zoram buai hma a kan hnam Nunte ka ngaihtuah a, Favang a lo hnai a.Lawmrual in hlim taka hlo thlo a sir an sawn te, Losul hawng in an Bial Nu/Bial Pa te chhawl an inthuai lai nun te, hah pawh hrelo lek a Nula leh tlangval Feh haw hlim tak a an nui ri hawm hawm thin te, rualawhna chhumpuiin a chim veloh Nun thianghlim tak te mi ngaihtuah tir mek lai chuan-Favang Ni tla tur chuan mangtha na niawm a mawiin keimah leh ka vel Thing leh hnimte, Nungcha te chu a Kawl ah min her liamsan tum in a chanve ngawt mai chu kawlkilah a lo liam hman a..Nitla tur a zawngah hian a mawi chungchuang ber hian ka ring a ni. Kohdin rih ka chak zia min hriatpui hauhlo chuan Kawlah min her liam san ta ruai ruai mai le…
Ka chhungril chu khawharna in min bual hlup hlup ni ber hian ka hria a. Mimal tumah ngaih bik sawi tur hre si lo chuan ka Lung chu a leng ngawih ngawih mai bawk si. Awmngaihna hrelo a ka hawi raui raui lai chuan..’hei ngei hi a nih hi ” Khawtlang Lunglen” an tih chu.’ tiin ka inngaihtuah harh ta a.
Padma Shree Pi Lalsangzuali (L) hla phuah, H.Lalthakima’n thiam tak mai a a sak chu ka rilru ah a lo lang a, ka sa ka sa ta mai a. A phuahtu thinlung ka ngaihtuahin ka hriatthiampui rualin, amah ka ngaihsanna a zual a, ka duh zual lai, changkhat leh a thunawn chauh hi kan ziak ang a..chhiartute’n thinlung leh tihtak zet a in chhiar ve atan…
NUNHLUI LIAM HNU.
Zantlai khawthiangah, mahte’n zai ka sa,
Suihlung a leng mang e, lunglam ka vai ruai e.
Nunhlui liamhnu ka dawn, ngaihbik awmlo a leng si aw…
Ka hrilthiam lul lo, Khawtlang Lunglen em ni..
Vansang Mu ang khian, thlawkin leng thiam ila,
Hawivel ka nuam amang e, mualtin tlang hrutin aw.
Nunhlui liam hnute kha, kan va tawng dah law-maw.
Lenrual fam hnute kha….
September 2nd, 2011 at 5:25 pm
chawnghilh #50 ivan veh chhuak fuh vele, a mawi hle mai
Report this comment
September 2nd, 2011 at 7:48 pm
@ Chawnghilh..i Lunglen zia tur hi ka hria a lawm..mahse, Leipui neih kha chu i hlawhchham ve chiang..in fehdun pic. te kha ka hmu a lawm.
Kei chu..’Thingtlang Lo’ kan tih ang hi 1999 khan chiang takin ka hria a..Ram Tin 8 hmun kan Lei a, Kuhva huan tur..tichuan kan vah tir a..Lo turin kan nei ve a..midang pawh kan offer a, chuan, Lo atan ka duh min thlan tir a, a hnai ber..Lo Lu ber ka thlang a, min lo nuihzat viau a..mahse ka Buh a thar tha ber a.
Chuan, Lo hian ka Lung a tilengin, Ka lo zir tawh leh Zirtir tawh chu a takin ka tawng ta a..A lo Lunglen thlakin, ‘Sawmfang’ tih tawngkam leh chhawlthuai te kahriain kan hmu chu…ka var uarh mai..
Chuan..Zirtirna ah hian Teaching Aids pawimawh zia pawh ka hre leh zual..
Ka Lung ti Leng em em tu a ni ta tlat a…
Report this comment
September 3rd, 2011 at 12:42 am
good post
Report this comment