Hun thawl hek hawka Film/Movies hmuhnawm tak mai han en veng veng mai hi nuam ka tih zawng tak mai a ni a. Football ngat phei chu zankhaw tairek thleng thleng min men tirtu a ni fo mai. Korean Drama hote hi a hmuhnawm thawkhat aniang, nuhoin an han en tak tak hi chuan an chaw chhuan lai theihnghilh thakin an en thei a, an chhuang ut rem ruam mai thin chu a nih hi.
Korean ho film chan dan hi hautaklo leh insengso tam silo, hmuhnawm tak si an nih hlawm avang hian an ngaihsanawm hranpa riau a. An hmelthatna hian mi a lem viau bawk. Zu an leklam lutuk erawh hi chuan mit a tikham deuh thin mai pawh a.
Khawvel pum ngaihtuah pawha hmuhnawm leh mak Taj Mahal ropui zia leh hmuhnawm dan chu sawifiah mai theih pawh a ni lova. Mihring kutchhuak a ni ang tih rinhlelhawm rum rum khawpa hmuhnawm a ni. History lam atanga thlir chuan a hmuhnawm dan hi a rapawm thei deuh roh nghe nghe.
School naupangte, School Uniform mawi tak nena an han thelh siau siau mai hi hmuhnawm leh mit ti tlai tak mai an ni a. Kan ram rohlu, nakin atana kan nghahfak, kan ram min la hruaitu turte an ni tih ngaihtuahna mit nena thlir phei chuan an mawina a zuala; an hmuhnawm ngawih ngawih mai.
Sipai, an ralthuam leh uniform famkim nena an han inthuam, kalrem hla nena an han parade thup thup mai hi an hmuhnawm thlawt bawk mai. Kan ram leh hnam humhimtu, thih pawh tih lova kan tana chhun leh zan thlu lova an hun hmang thintute an ni tih ngaihtuahna thinlung pu chunga thlir phei chuan an hmuhnawmna hian lung hial a tichhe thei nia. Tlangval hrisel pangngai tana nula zei leh hmeltha tluka hmuhnawm thildang hi a vang duh khawp ang.
Phuloh leh chan phak reng reng loh tur tih chiang rengte pawh hi an hmuhnawmna a nep chuang lova. Rilru ngaihtuahna an ti bing chuk chuka, suangtuahna ramah min hruailutin ‘hisap’ thui luat awm lek lova tisa chakna kaithotu an ni fo. He hringnun khawvelah hian hmuhnawm leh mit ti tlaitu hi a va’n tam tehreng em ! Eng hi nge hmuhnawm kan tih ber thin le ? Mimal ngaihdan a hrang nuaihin a rinawm.
Hmanni lawk khan Bihari nu pakhat, dum leh hmelchhe berh ve tak, pawr chep chawp tak mai, in leh lo mumal pawh nei lova kawngsir leh hmun remchang apianga riak mai thin hian kawngsirah a fa sente, bawk lil lel, ring rek leh lu lawk ber maite hi duat tak maiin a lo pawm a. A khat tawkin a biang leh hmuiah fawpin a en ngawih ngawih mai thin a. Lehkhakhawng them hian a zap dai hliau hliau bawka.
Khawdang pawh hawisan rei thei lovin chu a naute chu enin a nuih leh ver ver thin. Chu nu che vel chu hmuhnawm ti angreng takin ka thlir deuh reng a. Ni, khanu nen khan kan hmuhnawm tih zawng alo inang reng mai ! Ka fate hi ka tan chuan he damlai khawvela ka tana thil HMUHNAWM ber an ni si a.
Keimah ang bawk hi mi tam tak an awm ang tih ka hria.Nupuiten nau an pai tih kan han hriat tirh phat atang hian nupuite dul/pum chu hmuhnawm leh ngaihtuahna peng pakhat luahtu a ni nghal chat a. Naute, a nu pum chhunga lo thang lian ek ek chu a chanchin hriat zel chakin zantin khumlaizawlah nu pum kan chul heuh heuh a.
Nu pum chhunga a che telh telh leh a lo thanlen deuh hnua a han in leng bat bat maite chu hmuhnawm tawp hi a ni ringawt ! Khawvel eng hmachhawna tap chunga a rawn chhuah laite chu ngaihnawm leh hmuhnawm a ni zel a. A hmel a chhiat a that emaw, a ngo leh a han thu emawin mi a ti buailo. “Ka rila rah, ka thisen anih avangin ka tan chuan a tha ber a ni ringawt”
Lawma nuih nachang an hre tante, an han bawhkhup theih tante chu hmuhnawm a ni zel a. Bawkkhup chunga an han tleng theite leh bawkvak chunga kal an han thiam tan. “Ding le le” tih hnuah “Kal chhet chhet” tih ruala an han pen chhet chhet te chu a va’n hmuhnawm tehlul em ! Nitina an nungchang rawn inher danglam chho tial tialte hi nu leh pa tan chuan “Ennawm mak thar” a ni ta zel thin a nih hi.
Thildang mitin a hmuh, mit titlai leh hmuhnawm kan tih thin tam takte hi kan kianga awm, englaipawha kan hmuh theih ni ta se ‘ninawm’ emaw ‘hne-awm’ emaw an ni thuai thin a. Chutiang anih loh pawhin kan mit hian ngaiah neiin hmuhnawm tihna mit nen thlir a har tawh thin a ni.
Mahni rila rah, Pathian laka kan rochan, malsawmna min pek, kan FANAUTE erawh hi chu kan damchhung atana hmuhnawm an ni dawn si a.
Nang enge hmuhnawm i tih ber thin le ?
Similar Posts:
- Mizo Idol – ka ngaihdan
- TAP SUH, NGAIHSAKTU I NEI
- Thlasik Malsawmtu
- Enkawl ngai ka ni em!?
- Lawmna tur hlir a lo ni….em??
A lawmawm thin e…
September 13th, 2011 at 6:31 pm
Sawi tur a tam ang, naupang hlim taka an infiam te, thinlung leh tihtak zeta Pathian fakna hla sa te…
Report this comment
September 13th, 2011 at 6:34 pm
Ka rin loh dan daih!
Report this comment
September 13th, 2011 at 6:34 pm
Naute nui ker ker ri ringtone ah ka hmang.
Report this comment
September 13th, 2011 at 6:46 pm
I post ngaihnawm em mai, kan luangliam chiam teh ang hairehai
Ka fanu hi hmuhnawm ka ti ve ngang mai. Mi mitah chuan alo hmeltha vaklo pawh ani thei e, ka tan erawh hmuhnawm ber a tling chiang alawm.
A chaw ei laia a khabe che vel ringawt te, a lehkha zir melh2 te, a infiam lai te, a muhil thleng mai hian ka thlir deuh deuh reng mai ani e. Tui tak maia a muhil kan thlir te hian, Pathian malsawmna ka dawn zia min hriatchhuah tir nawn awn awn thin. Anu leh pa thlazar hnuaiah thlamuang tak maia a hlim thei te hi a hmuhnawmin a lawmawm thlawt a ni.
Hnathawk kan han bang a, inlam haw min tiphur tu chu ka nupui leh ka fanu te an ni a. In kan thleng a ka fanu in, “Apa apa” tiin min lo kuah chung chung mai te hian nun a tihlim a, nun ka thlahlel phah bawk. Thahnem ngai taka hnathawh te hi avan nuam tak em, mitthlaah thawh tituitu awm tlat hek le…. huisss sawi tur ka hre hnem lutuk ka luangliam zo dawn ka duhtawk mai ang,in lo ning palh dah ang e.
Ka van luangliam nasa vele hairehai
https://i56.tinypic.com/fknt3b.jpg
Report this comment
September 13th, 2011 at 7:01 pm
a van ngaihnawm dauh2 ve aaaa!
exam lehkha zir ngaih lai cuan table sir vela sweet kawr fanghmir in thahnemgai tawp a an zawn laih2 lai poh a hmuhnom em em mai sin!
Report this comment
September 13th, 2011 at 7:04 pm
Ka fapa upa ber hi ka mitah chuan thil mawi leh duhawm ber ani thin. A kal thei har lutuk a, a zir pawh a zir chhin eih lova, kum 1 leh thla 2 ani tawh si; mang a ang ru khawp tawh mai a ni. Tumkhat, Long chair a muzal pahin lehkhabu ka chhiar laíin a ding tual tual a, a rawn kal thut mai a, a tluk hlauvin min rawn bawh rawk a, a nui hawk bawk a. Kha thil thleng tluk a hmuhnawm kha a vang khawp mai, kei ka tan hian.
Report this comment
September 13th, 2011 at 7:08 pm
Fa ka la nei ve lo bawka kei chu World War II behchhan(true story) a film an siam hi hmuhnawm ka ti bon let top top
a ngaihna awm lo 
Report this comment
September 13th, 2011 at 7:11 pm
#6 ka mitthla thiam deuh roh
Report this comment
September 13th, 2011 at 7:25 pm
Nula hmeltha pianalh bawk c hi hmuh nawm ka ti, ram ngaw hring dup mai hi hmuh nawm ka ti bawk ve mai2 a..
Report this comment
September 13th, 2011 at 7:36 pm
Fate tluka hmuhnawm hi chu an awm lo e, an che vel reng reng hi a hmuhnawm fai vek a, tui taka an muhil lai te hi thlir ninawm lo chu a ni chiang khawp mai.
Chutah le tupa ka han nei a, a hmuhnawm dan a dang leh zar mai. A han bawk vak thei a, a han kal thei leh a, a ma tawk tein a han ninhlei ve tran a, a va hmuhnawm em. Tawng a’n zir ve a, fiah lo riai hian ‘Apu’ a han ti ve ta mai phei chu a ri a va mawi tak em, bengah hian a cham veng veng mai mawle.
Report this comment
September 13th, 2011 at 7:44 pm
Fate hi chu an hmuhnawm mai piah lamah hian rilru hi an luah reng a ni ber maiin ka hria.
phai hlo han thlawh tak tak a chawhnu herah kawng kham tawh lamah hi chuan, rite hruihtlang vel a lawi tla mai mai pawh hi hmuhnawm a tling thin khawp mai..huiha
Report this comment
September 13th, 2011 at 7:50 pm
Eee, i ril tulh tulh mai ka ti. A tha hle mai.
Report this comment
September 13th, 2011 at 7:51 pm
A ngaihnawm ngei mai…a tha tel bawk a.
Thinlung atanga kan thlir hian thil hmuhnawm kan hmu thin a lo ni.
Report this comment
September 13th, 2011 at 7:51 pm
Korean film hi kei chu ka ning deuh. A sei hlawm si, an hmel a tha in an thianghlim ngei mai a, mahse, Korean film kalphung hrim hrim hi ka tui zawng anilo. An character hi a tlangpuiin an create lem lutuk ka tia. Tin love story anih pawh an rilru an lanchhuah tir dan hi ka duhkhawp lo thin. Emotional taka thil thleng tura lo beisei lai te hian an in kalsan leh daih zel a!!!
Fate tluka hmuhnawm an awm love kan ti tlang anih hmel e. An hmel te hi a tha ber a, an nalh ber a, ‘a tlawm lai ber kha a mawi lai ber’ tih ang deuhin an famkim lohna tak te hi hmangaihna tizualtu ania.
Report this comment
September 13th, 2011 at 8:05 pm
pu H.V, i fanu ami?
Report this comment
September 13th, 2011 at 8:07 pm
ReMpY_ScisSoR #15 nih ve kha
Report this comment
September 13th, 2011 at 8:21 pm
Ka fanu hi chu mi nau pawh nise hmeltha ka ti tho ang
Report this comment
September 13th, 2011 at 8:27 pm
Ziak hmuhnawm..ahkhaih….ngaihnawm khawp mai…hmuhnawm kan tih zawng a in ang e…fa erawh ka la neilo..
Report this comment
September 13th, 2011 at 8:27 pm
ninja #17
Report this comment
September 13th, 2011 at 8:45 pm
Ka fate hi hmuhnawm ka ti ber a. A dawtah ka nupui… Nula tituai nalh deuh pawh hi hmuhnawm ka ti ve tho
Report this comment
September 13th, 2011 at 9:30 pm
#5@Rempy sawi khiiii…ka nui chhuak huk mai, a sawi ang khi hmuhnawm ka lo ti ve tawh thin..hahaha
Mr & Mrs HV chu fanu in nei cute hle mai, malsawmna in dawng e.
Tin, he post hi ka
Report this comment
September 13th, 2011 at 9:36 pm
fate zawng an hluin anlo hmuhnawm zawng a ni e, keipawh hei ka fanu thla li mi hi, an nui ri ve ngei mai a, ‘eh’ tihpah in an bawkkhup nghal a, a thil duhzawng an ban ve te, a atam mai a nu hnute ansuala an petfan vak mai thin te hi aw…
Report this comment
September 13th, 2011 at 10:23 pm
Fa te Exam Result chhuah ni a,Pathian zarah result tha tak nen hlimtak a an rawn haw hi hmuhnawm ka tiin ka hlim takzet thin.
Report this comment
September 13th, 2011 at 10:45 pm
Keizawng tlai ni tla tur ruah phingphisiau han tla seng seng hi hmuhnawm ka ti thlawt. Chuan Champions League hmuhnawm ka ti a, ka en bawk ang zanin hian hei2. Fergie en ang aw…
Report this comment
September 13th, 2011 at 10:47 pm
Nu leh pa mitah chuan fate hi a ‘ber’ an ni lo thei lo. Tin, kan nau chhungkua leh khawtlangin kan buaipui laih2 khawpa sualin a bawih beh tlat mai, nunphung pangngai pawh zawh leh theia kan rin loh kha tuk khat a zing tho a inthiar zo lo chhuakin “ka u, ka piangthar, ka sualna zawng2 pathianin min ngaidam, a chhandam fa ah min vuah ve ta.. a ma rawng chauh ka bawl tawh ang..” kan in ko khawm a, chhungkaw hmaah pathian hnena lawmthu sawina leh a rawngbawl tura a intiam a, a tawngtai lai kha hmuhnawm ka van ti em! Ka mitthlaah hian a cham reh thei lo.
Report this comment
September 13th, 2011 at 11:41 pm
I ziak ngaihnawm hle mai; Hv.i fanu chu a duhhawm reuh bawk.
Ka rin aiin i ziak tha ti tawp teh ang. Nia, fate an han kaltir hi hmuh zawng a nuam thlawt.
Report this comment
September 13th, 2011 at 11:54 pm
Kei pawh ka fate ho hi an hmuhnawm ka ti ve khawp mai:
https://i56.tinypic.com/98wyvp.jpg
Report this comment
September 14th, 2011 at 12:15 am
@rempy.#5: a nih duh hmel.. naupan deuh lai, curent an awm lo ngei mai a, mombati eng hnuaiah lehkha kan han zir ve bawk a, mombati kha kan va sawisa nasa thei tak. Compas hmawr zum kan rawh sa a, kan hawlh chik hrup zel. a laiah leh a sir velah kan han hawlh tlang vel thin kha a lo nuam mai2 ngawt mai. Lehkha zirna bula rannung fanghmir etc. Lo kal, mombati tui lo far ka ching thin khawp mai. Suahsualthlakin…
Report this comment
September 14th, 2011 at 4:53 am
Tui tawk in ka comment ve a a luh miah loh chu le..
ka hmuhnawm tih ve….
Zin khawthawn changa ‘kawngpui’ mawlh mai hi ka hmu duh thin kei chu…daih mai a…Meghalaya leh Nepal kawng te hi a mawi ka ti thin khawp mai…thing a sir tawn2 a a’n ding sung a kawng han in kham phei put mai te hian min ti hahdam in a hmuhnawm ka ti thin khawp mai,kawng thlalak hi ka nei hnem tawh khawp mai…huhu! Ho in ti awm mange..!
Report this comment
September 14th, 2011 at 6:43 pm
Ka thuziak min hlut saka comment tha leh ngaihnawm tak tak petute lawmthu ka hrilh a che u.
Ti hian hnu kan khar daih teh ang. Khawvel mawina leh hmuhnawmnate hi reilote atan a ni a. Nakinah ennawm chuai ve tawh lo tur enin he lei mawinate hi hriatreng ani tawh lovang.
Report this comment
September 14th, 2011 at 7:58 pm
La khar lovang hairehai
Report this comment