mi(sual).com

Chhiar tûr : Gen. 1:26,27; Sam 8:4-6; Kol. 3:9-11

Kan Kohhran (PCI) Thurin nambar palinain ‘Lei leh vân leh a chhûnga thil awm zawng siamtu Pathian chuan mihring hi, hriatna, felna leh thianghlimnaa Ama anpuiin mipaah leh hmeichhiaah a siam a. Mi zawng zawng hi bul thuhmun leh chhûngkaw khata unau anga inthui khâwm vek kan ni,” tiin mihring dinhmun ropuizia a sawi a ni.

A thu bul intanna ‘Lei leh vân leh a chhûnga thil awm zawng zawng siamtu Pathian’ tih hi Apostol-te Thurin bul intanna ‘Engkimtithei Pa Pathian, lei leh vân siamtu chu ka ring’ tih thu nên thuhmuna ngaih theih a ni. Pathian hi engkim siamtu, engkim nunna bul leh hnâr a nihzia puan chhuahna a ni. Khawvêl mi fing (philosopher leh scientist)-hoten lei leh vâna thil awmte hi Pathian siam ni lovin, anmahnia lo zi chhuak emaw, thil dangte nêna an inkhawih tawnna atanga lo awm chawp ang deuh tein an sawi a. Kan Kohhran Thurin erawh hi chuan chutiang ngaih dân chu hnâwlin, Bible zirtîrna leh Calvin-a’n a sawi fiahna zuiin engkim hi Pathian siam leh ama ropuina atâna siam a nih thu min zirtîr a ni. Grik mi fingte chuan thil, mita hmuh leh khawih theihte hi sual nêna inzawm nia an ngaih avângin Pathian kutchhuak ni theiin an ngai lo. Chu ngaih dân pawh chu Pathian engkim siamtu a nih thu hian a thiat nghâl bawk a.

Kan Kohhran Thurin hian mihring, mipa leh hmeichia hi Pathianin ama anpuia a siam a nih thu fiah takin a sawi a. Genesis bung 1:26-28; Genesis bung 2:7 leh Sam 8:4-6 thu behchhana puan chhuah a ni. Genesis bung 1:26-28 thu hi mihring hi Pathian siam kan nihzia sawina a nih mai bâkah, a tîra mihring dinhmun ropuizia târlanna a ni. Genesis bung 2-ah Pathianin mihring hi lei vaivuta a siam a nih thu leh a hnâra nunna thaw a zuk thâwk luh tâk hnua mi nung a lo nih thu kan hmu bawk a. Sam 8-nain mihring hi Pathian siam a nih thu a târlang bawk a. Bible hmun hrang hrangah mihring hi Pathian kutchhuak kan nih thu sawina kan hmu bawk.

Bible leh Kohhran Thurinin mihring, mipa leh hmeichhia hi Pathian anpuia siam a nih thu an sawi laiin, kan sawi lan tawh angin khawvêl finna leh sakhaw thenkhatte erawh chuan mihring hi Pathian siam a nih an ring lo va. A tîra mihring nihna leh a dinhmun ropuizia an hre pha lo hle. Khawvêl finna chi khat Scientific Materialism (science-ti-fic ma-ti-ria-li-zim) an tih chuan a tîra mihring dinhmun hi a hmu nêp hle. Evolutionary theory (E-vo-liu-sawn-na-ri thea-ri) pawhin mihring hi zâwng chi khat a\anga lo piang chhuak niin a ngai a. Chutianga zâwng a\anga mihring lo pian chhuah hun chhûng chuan kum rei tak awhin a ngai bawk a ni. Sakhaw thenkhat Hindu leh Buddhist sakhuate hian mihring thlarau hi Pathian atanga chhuak nia an zirtîr laiin, an zînga hnam hnuaihnung zâwkte chu Pathian atanga chhuak ni ve lovin an zirtîr a. Hêng science leh sakhaw dang zirtîrnate hi kalhin, kan thurin hian a tîra mihring nihna ropuizia min zirtîr a ni.

Mihring, Pathian anpuia siam chungchângah hian hrilhfiah dân chi hrang hrang erawh a awm a. A hmasa berin Genesis bung 1:26 thua ‘kan anpui’ tih thu leh ‘keimahni ang’ tih thu te hi awmze hrang neiin Kohhran pate khân an lo hrilhfiah \hîn a. An hrilhfiah dân erawh a inang lo. Tertulian-a leh Ireneaus-a chuan ‘kan anpui’ (image of God) tih hian mita hmuh leh khawih theih taksa pianhmanga Pathian anna kâwkin an hrilhfiah a. ‘Keimahni ang’ (likeness of God) tih erawh hi chu thlarau lama Pathian anna kâwkin an lo hrilhfiah \hîn a ni. Thlarau lam thila Pathian annate chu felna bulpui (original righteousness) – thianghlimna te, felna te leh hriatna dikte bâkah chhia leh tha hriatna te, finna te, ngaihtuahna fîm te leh thatna te pawh huam tela hrilhfiah a ni. He hrilhfiahna hi Kohhran Pate zînga mi, Athanasius-a te, Ambrose-a te leh John of Damascus-ten an thlâwp laiin, Kohhran pate zînga mi Origen-a leh Clement of Alexandria te chuan ‘kan anpui’ tih chu thlarau lam thatna kâwka hrilhfiah tûr niin an ngai a, ‘keimahni ang’ tih chu rilru lam thatna sawina kâwkin an hrilhfiah thung a ni. He hrilhfiahna hi Augustine-a pawhin a thlâwp nghe nghe a ni.

Kohhran siam\hatnaa sûlsutu Luthera leh Calvin-a te erawh chuan Pathian anna thuang hnih (image of God leh likeness of God) kawh hrang neia an lo hrilhfiah thin la kawpin, ‘kan anpui’ tih leh ‘keimahni ang’ tih thu te hi thil thuhmun, thlarau lam sawina niin an ngai a. Tichuan, Pathian anna (image/likeness of God) chuan felna bulpui hi a ken pawimawh tak niin an hrilhfiah a. Calvin-a phei chuan felna bulpui – felna, thianghlimna leh hriatna dik bâkah Kohhran pate zînga thenkhat sawi angin ngaihtuahna fîm, chhia leh tha hriatna, duh thlan theihna leh finna te pawh Pathian anna hian huam telin a zirtîr a. Kan Kohhran Thurin palinain a sawi dân hi Calvin-a ngaih dân kan tih khi a ni.

Kan Thurin nambar palinaah Pathian anna – hriatna, felna leh thianghlimna tia sawi lante hi sawi fiah zui nghâl a tha âwm e. Felna leh thianghlimna tih te hi felna bulpui an tih thin te kha an ni a, hriatna dik pawh keng tel nghâla ngaih a ni. Pathian pêk, chung lam atanga mihringin a dawn (supernatural gifts emaw external gifts) emaw anga sawi fiah thin a ni. Suala mihring a tlûk ni atanga a hloh tâk, Lal Isua tlanna hnathawh leh Thlarau Thianghlim hnathawh azâra ringtuten an rin tirh atanga an dawn leh nia sawi a ni. Pathian nun, thianghlim leh dik leh tha sawina tawngkamte an ni.

Hriatna tih hian chhia leh tha hriatna te, ngaihtuah theihna te, duhthlan theihna te a keng ve thung a. Mihring pianpui (natural gift) anga sawi fiah a ni a. Mihring suala a tlûk hnu pawhin he mihring pianpui hriatna hi chu a bo lo. Amaherawhchu, tihkhawloh (depraved/corrupted) leh tihnat (deceased)-in a awm a. John Bunyan-an Indona Thianghlim tih bua a sawi ang deuh khân chhia leh tha hriatna te, ngaihtuahna te leh duhthlan theihna te hi sual bâwih, sual hmanrua ni hial khawpin an nih tûr ang a ni ta lo va. Mahse, Thlarau Thianghlimin chhandamna hna a thawh hian hriatna -chhia leh \ha hriatna te, duhthlan theihna leh ngaihtuahna te tihnun leh tihchaka lo awmin, Pathian leh mihring inrem lehna thlentu hmanraw pawimawh tak a lo ni leh ta a ni.

Mihring, Pathian anpuia siam a nih thu hian mihring, mipa leh hmeichhia te hi Pathian kutchhuak kan nihzia leh Pathian rinchhana a duhzâwng ti tûra siam kan nihzia a lantîr a. Chutih rual chuan thil siam dangte laka mihring chungnunzia leh ropui bîkzia a târlang nghâl bawk a, a tîra mihring dinhmun ropuizia leh zahawmzia pawh a târlang tel bawk a ni.

Mihring Pathian anpuia siam a nih thu hian mi zawng zawng hi bul thumun leh unau vek kan ni tih min hriattîr nghâl a ni. Khawvêla mihringte hi kan zavaiin Pathianin ama anpuia a siamte kan ni vek a. Mihâng leh mingo, rethei leh hausa, hnam ropui leh hnuaihnung zawng zawngte pawh kan zain Pathianin ama anpuia a siamte kan ni. Paula chuan, “Lei chung zawng zawnga awm tûrin bul hmun khat vekin hnam tin mi a siam a, an tân hun bite a ruat a, an awmna rite pawh a khamsak a,” tiin a sawi (Tirh. 17:26). Sualna leh politics avângtein mihring zîngah indona te chhuakin, in\henna te lo awm \hîn mah sela, mihring hi a tîra Pathian anpuia siam, bul thuhmun, unau vek kan ni tih hi kan Thurin zir hian min hriattîr a ni.

Sawi ho tûr
Kan Kohhran dinhmun ngaihtuahin, mihring, mipa leh hmeichhia Pathian anpuia siam kan nih thu hi a pawimawh dân sawi ni se. Mi zawng zawng bul thuhmun leh unau vek kan nih thu hi tûnlai kan ram dinhmun ngaihtuahin a pawimawhna nia kan hriatte sawi ni bawk se.

From: https://zothlifim.com/forum-topic/mihring-pathian-anpuia-siam-september-15-2011-1316028792.html

Similar Posts:

• Ruatlawk Theology (Chhandam tawh nge Anchhedawng sa a piang?)
• Thinlung thianghlim, Isua zirtir dan
• Bible Hi …
• Kimkimi
• Kristian Chi 2 Te {Sunday Pual}

Recent Posts:

• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :
• Kawnpui dai sex video a leakout!

This entry was posted on Thursday, September 15th, 2011 at 10:30 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.