[Thuhma awm lovin kan tan ve chawt ange aw.]
Zankhat (Sept. 2008) chu ruah a tla cherh cherh a, mahse kan lo tum lawk angin hawlhrawk hawlh tur chuan kan chhuak lui ta tho va! Ruah asur hian tui anu a, kaikuang hi man a awl bik an ti lehzel a (tak tak ni maw)!
Aizawl New Market atangin len-sin chi metre khat leh a chanve kan lei a, len lung erawh kan hawlhrawk hlui ami a rin theih avangin kan lei tel lo. Uluk taka chhun lama lenlung an lo vuah tawh chu kan hman hmasak berna tur a nia, vanneihna min thlen kan ring ve thlarawk a. Kan inghahna hmunah chuan hawlhrawk ngul tur thingtuai mar deuh a van avangin mau kan hmang ta zawk a. A ngul pahnih kan vuah hnu chuan lui pan chuan kan chhuak phei ta a.
Kan lui beih hi a khawkrawk deuhva, lung sum atam nen fimkhur angai hle mai. Meichher chu diesel kan hnianghnar bawk a, kan indaihin kan siam a, pahnih chu kan chhi rual nghal a. Sairilzo lui hi LAD Picnic spot bul atanga luh chhoh mai khu ani a, a laili ang reng a, midang pawh an lo kal ve thin aniawm a. Darkar chanve vel kan hawlh hnu pawh chuan Kg 0.50 vel awm chauh kan la man a. Kan hlawhchham ngei dawn e ka ti hman tawh a.
Hawlhrawk hi la hawlh ngai lo tan han sawifiah dawn ila tha ang. Naupan laia thosilen chhia a luitea sangha kan dawl ang deuh kha a ni ber mai. Li lian deuh hrut nan len kha a sir leh lam leh lamah thingtuai/mau hmangin a vawn fung an siam a, li-a len dan azirin a vawn fungah khan a len kha an tel tawma. Tin, lenlung hi li mawng hrut chhuahnan len hmawrah an vuah a, han hawlh paha li mawng a hrut theihnan ani ber ang chu.
(more…)
