mi(sual).com

En teh Duhtak! Ka lunglenna kaitho tur rengin em ni Siamtun, heng tlangsam par chena an par mawina an tharthawh leh tan tak hi? An mawi chungchuang ngei e, vahkhuai chena an inchhai leh tak dial dial mai hi.

Eng ang nge ka cho rual loh hawilopar thliak a, lunglohtui min dâwn san tak mai le? Heng thlasik kut vawt te hian min hmet leh tan tawh a, chung leng si-ar chenin thlasik kawng an màwi leh tak khi. He thlasik kut vawt hi ka cho mawlh lova, khing chung si-ar te pawh khi i tel lovin ka thlir ngam dawn em ni le?

Ih e, fam tawhte fam rolungmualah tap chungin ka rawn au che a, ka rawn zawng che asin. Min chhan zai rel reng an awm si lo. I hming ka lam apianga nui seih a min chhang thin tu kha, chhawn zai reng a rel tawh mawlh lo. Ka kianga awm i thlahlel a, hetah nangmaha i zal leh tak mai.

Chhawn zai reng an rel dawn lovem ni tia tapin ka vai ruai a. Mahse e, ngawi reng chung si leh chiang êm êm siin, i thlanlung chuan ti hian min lo hrilh asin.

“Kan lawm lai”
Mami
“Hnukchahna leh inthenna khawvel hnu chhawnin, chatuan ramah min chawlh san ta. Ngaiin tap rih mah ila, Lalpa khawpuiah hlimten min lo hmuak ang a; kan intawk leh ang” tiin.

Chung tur ni pawh nau ang nuarin, kawlah a liam leh dawn tak khi. Ka hnenah awm turin ka sawm a, mahse, a liam dawn ta. Hmana ni tla tur kan thlir dun naah khan ka va kal a, vawiin ang maiin an lo thar leh a. Kha thing hnuaiah ngei khan, ban vuan meuhvin he thu hi min tiam a nih kha a ni si a-
” He Ni her liam leh thin hian, kan inhmangaihna liam ve ngai lo tur min tiam a. Tahna ten an bawm che ka phal ngai lovang a, i banah vuanin ka kal san ngai reng reng lovang che”

Zan lungmawl leh lainatna nei lo te an lo inlar leh tan ta. En teh, lengdang zawngte chu hlim ten chhailai di tang an belh leh tak hi. Nang zawng thihna kut vawt a mi vawn tak mai le. A va na em!! I tel lova Krismas hman hi ka zuam mawlh lova, ka cho mawlh lo. Theih nise, i kiangah ngei he hun duhawm hi hman ve ka nuam e.

Mittui nen i hlimthla ka thlir kir a, i rauthla tal i rawn tir dawn lawm ni? Mahse, ka hmel ngui riai leh mittui i hmu a nih pawhin min ngaidam ang che aw. A chhan chu i hria ang tih ka ring e.

Kawt thler mawiin sen mei an chhi leh tan ta. I tel lovin a kiangah ka khur boh boh va, i kut nem thep maia mi vawn vawng vawng lai kha a lo thar zual thin a lo ni. Lenrualte pawh zah zo lovin, biangah mittui a lo luang chhuak a. Mahse e, nangmah avanga ka tahna hi min dem lovang tih ka hria.

Nangngaia ka tah avangin, he khawvel hian min dem a nih pawhin; a pawi ka ti reng reng lo. A duhtawkin khawvel chu iakin chiap rawh se, nang ka ngaihna che hian thlan min thlah thleng lovang tih ka hlau hlel love. Pawi tihna reng reng ka nei lo, chutah chuan nang i awm dawn si.

Han thlir teh. Ka lunglen hnem turin em ni vanlai zawlah khi Chhawrthlapui khi i lo tirh le? Mahse maw demna che ka nei, ka lunglen ti zualtu mai a lo ni e. Thlasik kawng dungthulin a her zel ang a, nang ang bawkin min liam san leh ang. Thlei bik reng nei lovin a engmawi chhuah mah se, a liam leh dawn si a.

Damlai pialralah thihna pialral ngaiin ka tap a. Nang erawh thihna pialralah hlimten i leng si. Ngaiin tap rih mah ila, ka tahna kawlkung zamual a liam hun chuan pialral kawngka-ah min lo hmuak la. Churam ka lo thlen hun chuan, ka lungngaih mittui a hul tawh ang a, thihna ten min then leh tawh ngai lovang.

Ngaiteh, Lal piancham lawm tumin lenrualte nau ang an nuihza saw. A kawp tein damlai pialral an chên a, hmangaihna thilpek ropui an inhlan mawlh mawlh asin. Thil pek ka phut mawlh lova che, thilthlawn pek Fapa ka dawng dawn si a. Thil pek ka pe a che, heta hi i tân- Mittui.

Naupiang Chibai buk turin Dar an khawng ri bawl bawl ang a, ngaihthlak a va hreawm dawn tak em!
Chu dar ngei mai chu ka tan erawh, inthenna dar ang maiin a ri a mawi lovang a. Hmanlai chang tawh hnu kha, vawiin ang maiin a thar leh dawn a lo ni.

A tawp berah chuan, mi chanhaite leh fahrahte nu leh pa ang bera inngai thin nang i awm tawh dawn loh avangin; i tel lova Krismas hman an zuam mawlh love. Nang i awm tawh dawn loh avangin, ka theihtawkin ka lo enkawlin; ka lo hmangaih kep dawn che nia.

Hei hi i tân-

“Dar ang nuihlai ngaiin,
Lal piancham ropuiah hian;
Nang ngaiin chhing mittui a lo luang e,
Kir zai reng i rel si lo.

Naupiang Chibai buk turin,
Chawmkhuang iang dar khawng e;
Kei ka tan chuan maw,
Inthenna dar ang mai lo ni.

I ngaiin ka kiu ruai a,
Chhawn zai rel mawlh nem maw;
Rûn chhung ngui ruaiin,
Fam khawpui ngaiin ka kur diam e.”

I tel lova Krismas hman ka zuam mawlh lo asin.

Similar Posts:

• A liam ta si
• Kha naupang kha….
• Naktuk hi ka tan awm ta lo se
• Just when I needed you most
• Leh mai rawh

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Saturday, October 22nd, 2011 at 11:02 am and is filed under Christmas, More than words. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.