“Lui zawng zawng hi tuifinriatah a luang lut veka; tlângchhîp pawh kawng tam takin a pawh vek tho”
Hetiang chiah hian “sakhaw hrang hrangte hian a tawpah chuan mi zawng zawng a bâwk khawm dâwn thova, chatuan chawlhna hmun chu min hruai thleng vek dâwn tho” tih ngaihdan a awm a; a lehlamah chuan “sakhaw hrang hrangte hi bâwmkhata khung vek chi an ni lo” tih ngaihdan a awm bawk si a.
A khawi zawk hi nge pawmawm zawk tih chu ngun taka ngaihtuaha, thutlukna fel tak siam tur a ni ngei ang. Hetah hian chhia leh ṭha hriatna fîm tak hman a pawimawha, mimal ngaihdan leh tawnhriat (experience) chauh ‘dikber’ teh nana hman chu a dik dawn bawk silo.
Sakhaw hrang hrang hian vanram emaw chatuan chawlhna hmun emaw min hruai thleng vek dawn a nih chuan eng sakhua pawh zawm ila ka tisual hauh dawn lo tihna a ni. Amaherawhchu, kawng dik tak hi pakhat chauh a awm a nih a, ka sakhaw thlan a fuh loh vaih chuan a pawi turzia chu sawiin a siak lo.
Chatuan nunna leh thihna chungchang a ni tlat a ni. Chuvang chuan sakhua dik pakhat chauh a awm tia pawm phawt mai hi a him em em tih a chiang reng mai. Sakhaw dik pakhat chauh a awm tih ka pawm chuan chu chu eng sakhua ber nge ni ang tih ngaihtuah a lo ngai leh ta. Sakhaw lian ber ber pali te hi ka han bih thuak thuak teh ang.
Sakhaw intluktlanna sawifiah nana tehkhin thu hman fo pakhat chu Hindu-te thawnthua mitdêlte leh sâi chanchin hi a ni awm e. Mitdêl, sâi lu khawihtu chuan sâi chu hlumbêlah a ngai a; a nâwn khawihtuin pipe/hose; a beng khawihtuin hmai-zahna; chutiang zelin brush, ban, bang, hruizênah te — sâi kha an hriatdan a hrang nuaih mai a ni.
An hriatdan ṭheuh kha dik bera an hriat avangin an inhnial ta vak mai a. Hetiang deuh hian Pathian pawh hi sakhaw hrang hrang ten an hriatdan a inan loh avangin dik ber nih an inchuh mai mai niin an ngai a ni.
Hei hi Hindu sakhaw vuantute pawmdan chu a ni a, religious pluralism leh New Age philosophy rim a nam viau tih pawh mi sawi ka hre tawh. Hinduism hi thiangzau sakhua ti ila kan sawisual kher lo vang. Kristianna ngei pawh hi an sakhaw chhungkuah an senglût hreh hauh lo (Kristianna chauh hi sakhaw dik a ni tih hi Kristian ten an hnawl theih chuan). Hinduism-ah chuan pathian tam tak biak (polytheism) a leng a, pathian pakhat chauh rinna (monotheism) a leng bawka, milem biakna leh atheism thleng paw’n a leng vek a ni.
Vedic age-ah kha chuan vedic gods tam tak an awm a, Upanishad period-ah chuan Ultimate reality pakhat Brahman a awma, pathiante chu he Brahman tisaa a lo channa (incarnation/avatar) niin an ngai a ni. Hemi hnu hian Hindu Theism a lo piang leh a, an pathian chu Krishna niin (krishna hi an pathian Vishnu avatar pariat-na a ni a, Vishnu pawh Brahman avatar pakhatna ala nih leh zêl bawk), an lehkhabu pawimawh ber chu Bhagavad Gita a ni.
Krishna bâka an biak chu Vishnu leh Shiva (a nupui Kali/Durga paw’n biak a hlawh hle) te an ni. Heta ṭang hian Hindusim hi chuan sakhaw intluktlanna a pawm hi thil àwm tak pawh a ni tih a chiangin, an tân chuan pathian chu hriat ngaihna a awm tlat loh avangin an rindan dânin an pawm mai a ni.
Chutiang bawkin midang pawmdan pawh dik lo tiin an sawi ngai lem lo. Hei hi a chhan ber chu Pathian inpuanna bik (special revelation) dawngtu an ni lova, chutiang pawhin an inchhal ve lem lo bawk. Hindu scholar leh sanyasis te’n Bible an quote nasat em em dan te hi — “The Autobiography Of A Yogi” kha ati chiangtu a ni. Hinduism chu mahni duhdan leh ngaihdan dâna pathian duh duh biak theihna sakhua a ni a, belh tlâk a ni em tih chu ngaihtuah zuiah ka han dah phawt teh ang.
Hetih lai hian Pathian inpuanna bik dawngtua inchhâl chu Kristian, Muslim leh Juda sakhua vuantute hi an ni a, an ni ho hi ka’n bih leh dêk dêk teh ang. Heng sakhaw pathumte hi rindan leh pawmdanah inan-na tam tak pawh an nei a, Judate leh Kristiante phei chuan sakhaw bu inṭawm an nei nghe nghe a ni awm e.
Amaherawhchu Kristiante’n Messia-a an pawm Isua Krista chu Judate hian an pawm ve loh avangin heta ṭang hian an peng hrang ta a. Abrahama hnena Pathian thutiam Messia lokal tura kha Isua Krista khan ‘amah chu ka ni e’ tia thilmak leh chhinchhiahna tamtak a ti chung pawh khan an pawm lova, Pathian sawichhetua ngaiin an tihlum ta hleuh zawka. Amaherawhchu Juda ho zinga mitlêmte, khawtlangah pawh eng ni lem lo, mi rethei tê tê te chuan Isua chu ringin Lal leh chhandamtu atân lo pawmin, chungte chu Kristian tia koh an ni ta a — an zârah mi tamtakin Isua Krista chanchin an lo hre ve ta bawk a.
Mak ang reng Ka tih chu Juda ten an pawm loh Isua Krista kha “Messia a ni ngei e” tiin Islam sakhua-in a pawm ve hmiah thung hi a ni. An sakhaw bu Quran chuan Isua kha Messia a nih thu vawi 10 chuang a sawi te chu an la ti ta deuh deuh a.
Example (English hian dah mai ang):
O Mary! Lo! Allah gives you glad tidings of a Word from him, whose name is Al-Masih (the Messiah), Jesus son of Mary, illustrious in the world and the hereafter. (Surah 3:45)
Isua Krista, Messia leh Pathian zawlnei ngei nia pawm si chu Kristian nih ve mai awm tak a ni a, an ni silo hi mak ka ti em em bawk. A chhan bulpui ber ni-a ka ngaih chu Muslim ho hian Muhammad-a kha Isua aia ropui zawka ngaiin, Isua ngei pawh khan zawlnei Muhammad-a lokal tur thu a sawi lawkin an hre bawk ang a; tin, Kristiante hian an Bible an tidanglam niin an ngai nghet tlat bawk ni tur a ni.
Engtin nge an tihdanglam, tute nge tidanglam, eng hunlai khan nge an tihdanglam, a original message chu enge ni, khawiah nge a original chu a awm tiin zâwt ta ila chuan, hawi lawl lawl bak sawi tur an hre lem lo maithei te ka ti thlarawka. A thu hrimah anmahni ngeiin ‘Pathian chauh loh chu a thu tidanglam thei an awm lo’ tiin an sawi a; Kristian te’n chu thutak chu an tidanglam tiin an sawi leh bawk si hi, a ngaihna ka hre lo — ka mawl vang a ni ngei ang.
Hinduism ang lo taka Islam chuan an sakhaw bu chu Pathian hnen aṭanga lokal nia an chhâl avangin uluk leh chik deuh zawkin Islam sakhua hi a rintlak em tih an sakhaw bu aṭang hian ka han thlir teh ang: ‘Quran tih chu ‘recital’ tihna a ni e’ an ti a, hei hi Muslim hovin an chhuan em em nachhan pawh a ni awm e.
Mihring irâwm chhuak tel miah lo, pathian vantirhkoh-in Muhammad-a hnena a rawn dictate niin an sawi a; hei mai ni lovin, a dictate ang chiahin ziak a ni em tih fiah turin kumtin vantirhkoh hian Muhammad-a hi a sawipui (recite pui) ṭhin an ti. Chuti a nih chuan a chhunga thuziak pawh inang vek tur niin, version dang emaw thuziakdan (a message pawh inang se) kalhmang hran a awm thei lo ang.
Vantirhkoh recite/dictate ang ang khan a awm mai tur a nih hmel. Hei hi Muslim ho rindan leh inzirtir dan tak pawh a lo ni awm asin; Kristian Bible thuziak dan kalhmang hrang hrang tam lutuk te hi anlo nuihzat bûr reng a — Pathian thu chhuak ni ve si, inang vek lo chu a ngaihna an hre lo ni tur a ni.
Muslim tam takin an hriat loh hriat rûk ka nei ve khauh — an ngaih angin, Koran hi a tirah thuziak inang pêt pêt a ni bik hauh lo tih hi. Tuna an hman lai hi Zaid-a kutchhuak a ni a, Zaid-a kutchhuak lo hi midang kutchhuak a awm ṭeuh a ni awm e. Chungte chuan Muhammad-a hnên aṭanga a chham dan (recite dan) an zir an ziak niin an sawi vek bawk. Thil chhinchhiah tlâk tak mai ni-a ka hriat chu hei hi a ni:
Heng Koran bu hrang hrangte hi vantirhkohin Muhammad-a hnena a dictate ang anga ziak ni-a an sawi kha, a chhunga thuawmte an inang pêt pêt hauh lo alo ni awm asin. An inan loh avangin Iraq leh Syria rama Muslim-te chu a recite dan chungchangah an inhnial buai a, Khalif pathum-na Uthman khan inhnialna awm lo tur chuan Koran version pakhat chauh a awm a ṭûl tih hriain Zaid-a kutchhuak ni lo Koran dang zawng chu a halral ta vek mai tih Muslim scholar-te sawi ka hria a ni — Pathian hnen aṭanga an dawn tia an chhal kha an HAL a nih chu.
Zaid-a kutchhuak hi a dik ber vanga zuah pawh a ni lem lo — a aia senior fê Abdullah kutchhuak kha a rintlak zawk nia sawina Islamic tradition bu (Hadith) tam takah a inziak tlat a ni. Abdullah khan Sura bung 70 zên zâwn (Koran-ah hian Sura 114 a awmin ka hria) by-heart-a a recite par par theih tawh lai khan Zaid hi Muslim pawh ala ni ve lo an tih hi a dikin ka ring tlat. Chutichuan thil awmzia chu pathian tirh vantirhkohin zawlnei hnena a rawn dictate, dik lo thei loa an ngaih kha halral vek a lo ngai ta a nih chu. Zaid-a codex leh Abdullah codex danglamna an sawi pahnih khat lek:
1) Zaid-a codex-ah chuan Sura 2:275-ah ‘tiang hian a sawi a: “sûm puktir eiral tute chu an ding chhuak lo vang” a tih laiin, Abdullah codex chuan, “rorelna ni-ah chuan sûm puktir eiral tute chu an ding chhuak lo vang” a ti thung a. Hei hi danglamna em em awm lo mahse, dictated message-ah chuan a text content emaw wording emaw hi a danglam tur a ni lovang ka ti deuh.
2) Zaid-a codex-ah Sura 33:6 chuan, “a nupuite chu (Muhummad-a nupuite), an (Muslim ho) nu-te an ni” a ti a. Abdullah leh Ubayy (Koran transcribe tu dang) te manuscript-ah chuan “ani (Muhammad-a) chu an pa a ni” tih a tel thung. Dictated text-ah chuan chhâl kher lo se chu a pawmzam theih turah ka ngai; mahse dictated message ni si, hetianga inang lo hi pawm a harsa hle in ka hria.
Koran hi khawi aṭanga lokal nge ?
1) Judate thawnthu ziakna bu pakhat Midrash Rabbah an tih-ah chuan Abrahama chanchin hetiang hian a inziak a: Abrahama pa Tera chu milim (idol) siamtu a ni a. Ṭumkhat chu khawiah emaw a kal dawn avangin Abrahama chu a milemte lo veng turin a ti a. Chutia a kal bo hlan chuan hmeichhe pakhat hian chhangphut rawn kengin milemte hmaah chuan a rawn dah a.
Abrahama chu a tho lawka, tiang la-in milemte chu a vaw chhe ta vek mai a; a tiang chu a vuakchhiat ve loh milim lian ber chu a ken tir a. A pa lo haw chuan thil awmzia a han zawh chuan Abrahama chuan, “chhangphut ei an inchuh a, a lian ber khan a dangte kha a vaw chhe ta mai a lawm le” tiin a chhang a. A pa chuan, “hêngte hian chutiang tihna châng an hria ang em ni?” a han tih chuan Abrahama chuan, “kapa, i thil sawi chu i hria maw?” a ti e an ti. “Engmah tihna châng hre lo te pathiana i biak hi engti zia nge?” a tihna ni berin ka hria.
Hemi ang deuh chiah hi Koran-ah a awm ve a mahse a version tlêmin a dang a. Sura 21: 62-68-a a inziak dan chuan Abrahama chhuahchhal tu hi a pa ni lovin a chipuite an ni thung.
2) Pirke Rabbi Eliezer, Judate rabbinical writing pakhatah chuan: Kaina’n Abela a thah khan Adama-te chuan Abela ruang chu engtia tih tur nge tih an hre lova — inphûm nachang an la hre si lova. Chutih lai chuan choâk hi a lo kal a; a kawppui thi chu leiin a rawn vûr ta a. Adama pawh chuan chutiang chuan Abela chu a phum ve ta a ni.
Hetiang deuh chiah hi Sura 5:34-ah a lo lang leh a. Koran-ah hi chuan Abela phûmtu hi Kaina a ni thung. Hetah hian thil chhinchhiah tur chu Judate hian an thawnthu hi Koran aṭanga an lâk a ni thei lo — Islam (622 CE) pian hma daiha an neih a ni.
3) Apocrypha bu ṭhenkhatah chuan he thawnthu hi a awm a: Emperor Decius hunlai vel khan Christian 7 chu tiduhdahna nasat avangin pûk-ah an biru a, an muhil zui ta a. Kum 200 teh meuh an mut hnua an lo harhchhuah leh chuan tiduhdahna pawh a lo reh fel tawh a ni.
Hetiang deuh tho hi Sura 18:9-26-ah a awm leh a. Koran-ah chuan pûk-a tlanchhiate hi Kristian tih a sawi lo thunga, an zât chiah hi a sawi lo bawk. Koran chuan “a ṭhenin 3 an ti a, a ṭhenin 5, midangin 7” (Sura 18:22) tiin a sawi ringawta, an zat a hre lo a nih loh paw’n a sawi ṭha duh lo a ni ang (vantirhkoh meuhin a rawn hrilh a nih chuan vantirhkoh thil hre lo tak a ni ngei ang ka ti ve tlat).
Thil awmzia nia ka hmuh dan: Sura bung 18-na hi Pathian engkim ti thei leh engkim hria hnen aṭanga lokal ni lovin, Muhammad-a’n Judate leh Kristiante thawnthu khingbâi taka a hriat a sawi ve mai mai a ang ka ti. Hetiang thu mai mai Pathian hnen aṭanga special taka dawng ni-a inchhâl zawlnei hi rin ngam chi a ni ang em ka ti ta deuh a ni. Dawheh tak a nih loh chuan bumtû an awm a nih ka ring.
Historical evidence aṭang chuan Muhammad-a hi mi rintlak em em niin a lang bawk si. Bible-in “Setana meuh pawh êng tirhkohah a insiam” a tih hi a lo va dik dawn em! New Age Movement-a pâwl active tak Theosophical Society-a an hotunu Hellena Blavatsky pawh khan lehkhabu ṭhahnem tak a ziaka, chûng a thuziakte chu ramhuai pakhat Dhwaj Khul a tih chuan a dictate ṭhin niin a sawi ve bawk tak e. Mak deuh chu, theosophist-te hian Bible hi an ngaina viau nge ni, Bible hi an quote nasa-in an thuziakte pawh Bible nena inzûl a tam viau laiin Kristianna erawh chu an haw viau thung.
Kristiante hi chuan an Bible hi Pathian rawn dictate ni lovin, zawlnei te’n Thlarau kaihhruainain an ziak a, mihring element pawh a tel ve a ni tiin an pawm a; chuvangin a message a danglam loh chuan a record danah hawrawp inang diak diak tura ngaih tur niin ka hre lo.
Koran erawh chu mihring element tel miah lova, van atanga lo tla, dictated message a nih avangin a record dan hi engti kawng mahin a danglam lo tur a ni a, chu chu Muslim-te pawmdan pawh a niin, tuna an hmanlai Koran Arabic version pawh hi a inang vek rèng a ni. Chutih rual erawh chuan a tira record erawh an ngaih anga inang vek a ni si lo.
Duh aiin a sei ta mah mah e. Kimchang lo hle mahse heta ṭang hian eng sakhua hi nge belhchian tlak ber ang tih chu bengsika ka ngaihtuah chuan ka hre mai. Sakhua zawng zawng hi an thuhmun vek lo tih hi ka thutlûkna a ni a, chuvang chuan pakhat chauh ka thlan a ngai ta a ni.
Mahni phâktâwk anga kiltin aṭanga ka thlir hnuin (sakhaw hrang hrang rinna, an lehkhabu, thurin leh zirtirna te) AD 30 bawr vela keini ang misual min hmangaiha min tlantu, thi-a tholeh, thiltihtheihna leh ropuina nasa tak nena rorel tura lokal leh tur ISUA KRISTA kohhran rawn din Kristianna hi a thlanawm ber tih hi ka thutlûkna a ni ta.
Judate Scripture-in a chanchin bâng lova a lo sawilawk, a tak a lo thlen meuha an hai tâk tlat si, an unau Muslim (half-brothers) tena ‘amah chu a ni ngei e’ tia Messia a nihna pawm si a, Lal atâna an hnawl tlat si RINGTU kan ni thei tlat mai hi KHAWNGAIHNA liau liau a va ni tehlul em!! Rin theihna pawh hi Pathian hnen aṭanga kan dawn tho a lo ni.
“Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni” — Ephesi 2:8
Similar Posts:
- Isua hi Pathian a ni
- Khawvel thuthar (Ka rilru luahtute)
- Kristian ka ni em?
- Zo Sakhaw Zepui
- Hnam Sakhua: Ka chhiar ve e!
October 22nd, 2011 at 1:33 pm
‘Pawlah chhandamna a awmlo’tih ngai a nia; mitin (Sakhaw tin) hian chatuan nunna chu kan beiseiin keini Kristiantena kan sawi lar em em inlarnate lah hi milem bia’ kan tih Hindu-te, Krista ringlotu Juda-te thleng thlengin an hmuh thu sawi tur an awm ve fo tho bawk si. Chuvangin, mitinin tihtakzeta kan biak Pathian ṭheuh kan biak hian Pathian chu a lawm maiin ka ring. A chhan chu heng sakhaw hrang hrangte’na kan biaka hi van chungsanga kan Pathian vek khi a ni si a.
Report this comment
October 22nd, 2011 at 1:43 pm
A ni khawp mai.
Report this comment
October 22nd, 2011 at 1:57 pm
Lal Isua thusawi hi rinhlelhna tinther tiat pawh ka la nei chhin ngai lo va, ka ringhlel ngai bawk lo vang. “Kei hi kawng leh thutak leh nunna ka ni. Keimah a kal lo chu tumah Pa hnen an thleng ngai lo” – “kei hi beram vengtu tha chu ka ni… Kei hi Kawngkhar chu ka ni…bang a lawn liam chu Rukru leh Suamhmang a ni”- “Pathianin Khawvel a hmangaih em em a, chutichuan a fapa mal neihchhun a pe a. Amah(Isua) chu tupawh a ring apiang an boral lohva, Chatuana nun an neih zawk nan.” Hei bakah, Thupuana “Tu hming pawh ‘Nunna bu’ a chuang/ziak an hmuh loh apiang, hremhmunah an paih ta a” bazar atangin ka rawn on line a, tawk phawts.
Report this comment
October 22nd, 2011 at 1:58 pm
a va han ngaihnawm dap2 ve le!! Good Post! tin i thlan fuh pawh ka ring
Report this comment
October 22nd, 2011 at 2:11 pm
Comment bak ka chhiar hman rih lo, zan 9pm hnu lamah ka hman leh uluk zawkin ka la chhiar mai ang. 1@chhana leh 3@PKfanai comment atanga ngaihdan ka siam ve thlangawt danah chuan, liberal leh conservative kan insu deuh dawn a ni mai awm mang e ka ti thlangawt a?
3 @PKfanai
Report this comment
October 22nd, 2011 at 2:14 pm
Tha hle mai.
Lui tuifinriat a luang lut ve lo kha a awm tlatin ka hria, a hming ka chiang ta lo tlat.
Report this comment
October 22nd, 2011 at 2:18 pm
#3: PKfanai
Report this comment
October 22nd, 2011 at 2:27 pm
BSI hi kawng tam taka Bible ti danglam hret hret tu an ni mai awm mang e.
Version thar a chhuak reng a, a danglam tial tialin a lang.
“Bible society kan tanpui hian, bible tidanglam turin kan tanpui ang a ni. Pa hming leh fapa hming lah an phuah thar reng mai lehnghal a, Gabriela’n Mari hnena a sak ang kha chu a ni lem lo.
Rev. Charles Supergeon, thuhriltu hmingthang Baptist Union of Great Britain and Ireland chuan Revised Version an buatsaih khan an Modernism lutuka a hriat avangin a awmna kohhran a chhuahsan nghe nghe. Tunlai Bible lehlin chu Modernism bakah an duhdan anga an siam rem a ni tawh zawk” tiin ka lehkhabu rawn hian a sawi (tlanchhe nghal daih ang)
Report this comment
October 22nd, 2011 at 2:33 pm
6@Chhuaklinga
“Lui tuifinriata luang lut ve lo” i tih chu Mississippi em ni? Mississippi hi Gulf of Mexico-ah a luang lûta, direct chuan tuifinriat a pawh lo a ni maithei; mahse Gulf of Mexico hi Atlantic nen a inpawh tho a lawm
“Lui zawng zawngte chu tuipuiah an luang lut a, Mahse tuipui chu a khat chuang lo” — Thuhriltu 1:7
Report this comment
October 22nd, 2011 at 2:54 pm
India ram chhungah khuan kawng tamtak a bikin ‘National highway’ tamtak chu a awm ngei a. kan kal tumna a zir-in kawng zawh tur ka thlan a ngai.
Mizoram lo thleng tur chuan NH 54 (Em ni kha aw?) zawh char char a ngai a, NH 54 ai a nuam leh tha zawk Highway hrang hrang awm in awlsam zawk mahse, Mizoram kal tum tan chuan NH 54 kher a ngai, NH 54 a kal lo chu Zoram an thleng thei lovang ti ila, thlawhna (Kingfisher vel) in anlo lut daih thei lawi si.
Pa (Pathian)hnen erawh chu, King fisher vel chuan a thlawh thlen theih hmel loh…Rel or Lawng a kal thlen chi a ni ve bawk si lo…..a thlen theihna awm chhun chu
Lal Isua chauh a ni….Chu chu Pathian remruat leh Lal Isua lokal chhan a ni e.
Report this comment
October 22nd, 2011 at 3:19 pm
Lunglei kal tur Silchar Road lama i kal chuan i kal thui pauh leh Lunglei i hlat tial tial tihna nimai.
Hengtiang Shape leh Size neilo a awmna zira luanga luang lo thei, tui(water) mai mai chet dan hi mihringin vanram kan zawhna kawng atana tekhin nan chuan eng zirtirna atan pawh a pamhai lua e.
Tui ang a luangkhawm leh vek tur ni ila chu sakhua na in awmzia a awmlo ang a, zirtirna neih hran pawhin awmzia a nei hek lovang. Eng rinna nei pawhin chu chu a tran chhan theih tlat si chuan.
Tehkhinna awmze neilo ah ka ngai
Report this comment
October 22nd, 2011 at 3:34 pm
#11 Asteric
I sawi dik vei roh fi mai
Chutak chu he post-in sawifiah a rawn tum chu a ni a, ISUA KRISTA chauh hi KAWNG a nih zia, Kristianna chauh hi chu mi chanchin ṭha kengtu sakhua a nih zia tarlanna a ni e.
Report this comment
October 22nd, 2011 at 3:40 pm
Isua Krista, Messia leh Pathian zawlnei ngei nia pawm si chu Kristian nih ve mai awm tak a ni a, an ni silo hi mak ka ti em em bawk. A chhan bulpui ber ni-a ka ngaih chu Muslim ho hian Muhammad-a kha Isua aia ropui zawka ngaiin, Isua ngei pawh khan zawlnei Muhammad-a lokal tur thu a sawi lawkin an hre bawk ang a..
Islam sakhua hi zawlnei Muhammad-a hmuhchhuah ni lovin Isua (An ngaiha zawlnei tho) hmuhchhuah nita zawk sela chuan Kristian an ni ngeiin ka ring. Chutiang bawkin keini Kristian inti te sakhaw zawm hi Isua (Pathian Fapa a ringtu ten) zirtirna atanga sakhaw din te kan nih vangin Islam zirtirna chu diklo/famkimlo zawkah kan ngai ve leh thung a ni maiin ka hria.
Juda sakhuana leh Kristian sakhuanaa awm tam lutuk lo, vanlam indona hi Hindu sakhuaah hian a tam angreng khawpin ka hria. Ancient UFO/alien theorists te phei chuan space war ang lampangah an chhuiluh daih hlawm kha!
hairehai
Report this comment
October 22nd, 2011 at 4:46 pm
Donald chu va khawih ril ve.. a hnu khar dan hi a tha lutuk !
Report this comment
October 22nd, 2011 at 5:18 pm
9@donald, ka chiang ta tlat lo mai. Thlaler a luang tawp ta mai mai kha a awm tlatin ka hria a ni.
Report this comment
October 22nd, 2011 at 5:28 pm
Mifing deuh tan a chian phah ngei ang…keini ang tan chuan Kraws thu kha a tawk mai e.
Report this comment
October 22nd, 2011 at 6:24 pm
#3 AMEN!
Report this comment
October 22nd, 2011 at 7:29 pm
Christian apologetics kut hnu ang thlarh mai a lawm le. A zau halh mai a a ngaihnawm zual.
(Blaise Pascal-a “The Wager” te pawh min ti hre chhuak rum rum e.)
“Kei hi kawng leh thutak leh nunna ka ni. Keimah a kal lo chu tumah Pa hnen an thleng ngai lo” tih ang thlengte pawh a in ziak ta deuh deuhva, lung si em em in ka lo “Amen” dual dual reng a ni. Chuvang chuan Christian nih hian thlamuan thlakna tam tak a nei reng a ni.
Report this comment
October 22nd, 2011 at 9:04 pm
@bulaya chu apologetics lamah i mikhual vak lo a ni maw
Pascal’s gambit hi a mawl viauin a lang a, ngaihtuah chet chetin a reasonable tulh tulh mai a… atheist patuai deuh hmin nan chuan a tangkai khawpin ka ring asin.
Report this comment
October 22nd, 2011 at 9:28 pm
Enge i intention chu ka hre lova mahse kan soi lui tho teh ang……………
Tha khop mai, atheist hi chu buai na chi vak a nilo, Apologetics emaw, ecumenical a ni emaw adt adt poh lo nise…………a poimoh berah chuan Rinna a ni mai, chumi chu kan chianna tur ber a nih mai hmel e a…………….Pathian tih thu an soi rual chiah hian a thumal ‘Pathian’ tih awm na chhan an sawi chiang ni ber in a lang,awm lo seng chuan ‘Pathian’ tih thumal hi a awm hauh in a rinawm loh. Hemi hian a awm chian zia a hriat a, awm lo seng chuan ‘Pathian’ tih thumal hi a awm a rinawm loh……………..
Chumi piah lamah chuan thil engmah in sawifiah na tur/behchhan awm lova a awmna hian a awmna chu a ti chiang lehzual in a hriat. Mi lem emaw, he khawvel thil a in nghahna awm map lo leh kan rinna a in nghat chauh a nih na hian kan zalenna a ti lang bawk in ka lo hre ve mai2. kan rinna a in nghat a nih miau avang hian in nghah chhan na tur he khawvelah hian a mamawh lem lovin a hriat,ama thil siam ah in nghah kha a in nghahna tur a n ih a rinawm loh. Chumi rual chuan thil siam hmuh hi chuan loh theih loh vin a rin loh theih loh thin ti ve ngawt teh ang engmah nilo mah ila. evolution theory chi hrang2 pawh awm mahse.
Report this comment
October 22nd, 2011 at 9:39 pm
@20
I sawi dik e nangpawh. Rinna hi a pawimawh ber chu a ni — Isua Krista rinna hi. Chu chu a ni he post thupui pawh. Ka intention chu post hi chhiar la chuan i hriat mai ka ring.
Comment #12-ah khian ka intention chu ka sawi e.
Report this comment
October 22nd, 2011 at 11:49 pm
A va han tha siah siah tak em! Ka lo hmuh ve dan chuan I presentation hi a awmzia ka ti hle mai.
Kan zingah hian lo tel zel rawh.
Report this comment
October 23rd, 2011 at 12:25 am
Ignatia, i ti lawmawm e. A hrethiam tura ka beisei tlemte zinga mi i ni reng a ni.
Report this comment
October 23rd, 2011 at 11:50 am
Ka’n chhiar chhuah dap chu a. A ngaihnawm tluanparh niin ka hria.
Report this comment