mi(sual).com

Tin, Theipui kung hnah nei hla takah a han hmu a,.. (Marka 11:13)

Marka bung 11 ah hian thil mak ang reng tak kan hmu a. Lal Isua ropui taka Jerusalem a luh hnu khan, tlai lamah Bethani khuaah an kal a. A tukah chuan, Bethani atangin an chhuak leh a, Jerusalem lam panin an kir leh ta a. Engemawchen an kal hnuin Mihring fapa chu a ril a lo tam ta a ni. Chutia a ril a lo tam tak viauah chuan eitur remchang a melh ruai ani ngei ang. Hla deuh takah chuan Theipui kung hnah nei hlap mai chu a va hmu ta a ni. Tichuan phur takin “a rah ka hmu dah law maw?” tiin a va pan ta ruak ruak mai a. Nimahsela, an va thlen hnaih chuan, a hnah chauh lo chu a rah reng reng an hmu ta hauh lo mai a. Chutia, rin anga lo awm lo lutuk chu a thin a ur ve ta phat ni ngei tur a ni. Isuan Theipui kung chu a bia a, “Tun chinah kumkhuain I lakah tuman rah ei tawh suh se,” tiin. A zirtirte lah chuan an lo hre kar mai a.
Jerusalem an han luh leh chuan, Pathian biak inah a va lut leh a, a rin leh beisei loh lutuk thil a va hmu leh pek a, Thinlung leh tihtak zeta tawngtai leh Pathian thu ngaithla a va hmu dawn amaw a tih laiin Tangka thlengtute leh thil eng ilo, Thuro tih vel zuara lo buai nuai nuai a va hmu leh ta bawk si chu, a thin a ur thlu ngang a niang, an dawhkan te leh thutphahte chu a nam thlu ta rum rum mai le. Hetih lai hun vel hian, Jerusalem leh Bethani inkar vel hi an kar tawn sek niin a lang a, Tukkhat, an zing chhuah chuan Isua Theipui kung hau kha a zung thlenga lo thi ro ta vekin an va hmu ta mai a ni.

Helai Bible thu hian Kan Lal Isua hmai hi a tibal thei dawn ava ang ta ve!. Temple a Lo sumdawng luih luih mai a tlawh darh leh namthluk sak rem rum kha chu a la hriatthiam theih deuh a. Engatinge Theipui pawisawi miahlo ni a lang kha a hau hlum kher le? Isua hi a va thinchhiain a va sual awm ve? Tih zawhna a lo lut thei ta tlat mai. Engtin nge kan han sawifiah tak ang le?

Helai a kan chhinchhiah tur chu, ‘Theipui kung hnah nei’ tih lai tak hi a ni ang. Palestine ramah khuan Bible a ‘Theipui’ a tih ang hi a par leh kuhmum lai vel hi a zik pawh a chawrno hunlai a ni a, a hnah hlui a til thin a. a lo rah khan a hnah kha a lo thang ve zel a, a rah hmin hun lai vel chuan a hnah pawh a awm hlap thin alo ni awm e. Khatia Kan Lal Isua riltamin hla tak atanga Theipui kung a va hmu; hnah nei hlap mai bawk si kha chu, a rah pawh puarna khawp awm ngei turah a beisei kha a wm reng a lo ni(Theipui rah hun ni chiah lo mah sela, a hnah a awm hlap si kha chuan, Theipui rah hma fal deuh emaw, rah tlai fal deuh emaw tih mai kha thil awm tak a ni ta a ni. Pawi ta ber erawh chu, Kan Lal Isuan ‘ei tur’ hmuh a in beisei em em lai a, ei tur reng reng a lo awm ta si lo kha a ni.

Lal Isua hian va rah tura a beisei te hnena rah hmuh tur reng awm si lo hi a huat zawng tak a ni. Johana bung 15 ah khan chiang takin kan hmu a, amah kan zawm reng chauhvin kan rah thei a, amah zawm tha lo chu rah chu sawi loh an lo vuai a, sah thlaka awmin hal ral mai tur hial an lo ni thei a ni. Lal Isua tana rah chhuah thei tur chuan a kungpui amah Lal Isua hi kan zawm reng a ngai a ni.

Kristian kan inti a, Mizoram pelin Ringlo mite karah kan khawsa a, Lal Isua mitah chuan Theipui hnah nei Rah chhuah thei leh Rah ei tur awm ve ngei turin kan lang ngei ang. Nimahsela, a saseh tak takah, tuma mitmei ven tur awm lohna hmunah chuan Vairengte kan pel dek dek a, Lal Isua nena kan inzawmna hi kan lo tichat leh mai thin ang tih hi a va hlauhawm em. “Keimah lovin engmah in ti thei si lo” tiin chiang takin min hrilh a, va rah chhuah tur chuan Lal Isua nena kan inzawm reng hi a ngai a ni. Chuti nilova, a hming ringawta Kristian, Theipui hnah nei hlup Rah awm mang si lo hi kan lo ni hlauh palh ang e. Lal Isua Grep kungpui nen hian englai pawha inzawmin I awm ang u; Tichuan Rah kan chhuah thei dawn zu nia.

Similar Posts:

• Lal Isua’n Theipui Kung A Hau Hlum! {Sunday Pual}
• Balhla chi hrang hrangte
• Zakaia
• Mizote Rawng Siam Dan
• Mulching

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Sunday, November 6th, 2011 at 1:30 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.