Lal Isua’n Theipui Kung A Hau Hlum! {Sunday Pual}

September 30th, 2012 6:00 am by Dr John

1. Thuhmahruai
Kum 1994 khan, Seminary-a ka awm laiin, ka Vai-thian-te zinga pakhat chu Kristian-a siam ngei rilruk-in, muslim mah nise, ka kawm ve hram hram a, ka inseng ve nual hman a. A kum tel a liam hnu chuan, kan innel ta viau-a ka hriat avangin Lal Isua ring ve mai turin ka sawm ta alawm le! A nuih hi a han za mai mai khawp a. Min han nuih-sawh vak phawt a! Ka ngaih a ţha lo hman viau tawh a. Thil lian tak ka tisual emaw ka lo inti hman hial a.

Mahse, min nuih vak hnu chuan, Lal Isua chungchang avanga a nuih a zat thu min hrilh ta a!  Heti hian min ti ta alawm mawle, “In Pathian Isua khan a rah loh avang ringawtin theipui kung kha a hau hlum nia! Pathian ve si, a thinchhe e! In Pathian ve hi in Bible-ah pawh A rah hun a ni lo reng a, ti na na na, a rah beisei-a a va zawng tlat leh a rah hun loh laia rah tura a beisei hrim hrim kha a dik lo…Pathian pawh a ni lo, engmah a hre lo tihna a ni mai, zui tlak a ni thlawt lo” tiin, min liak ta hrep mai a nih chu…a hunlai chuan hnar a lian duh teh mai a nia! He Muslim thian-pa ang rilru pu hi Kristian inti zingah pawh kan awm mai thei a ni. He thu hi Matthaia 21:18-21, leh Marka 11:11-14, 20-25-ah a inziak a, a pawimawh si a, thiam tawkin lo sawi zau dawn teh ang.

2. Theipui Rah Hun A Ni Lo Reng A Ni! Eng Rah Nge A Zawn Si?
Palestine ramah khuan March thla tawp lam emaw, April thla tir lamah emaw hian Theipui rah-hmasa {buds/first fruit} a rah ţhin a. Hei hi Theipui rah tak tak (normal crop of figs) a rawn chhuah chuan an ral ve mai ţhin. He Theipui rah-hmasa tak hi Isua’n a zawn zawk tak chu a ni ta a ni. Rah-hmasa hi Israel-te leh Khualzin-ten “ţam-hnem” a tana an zawn ţhin a nihzia an hrechiang hle. Rah-hmasa hi a awm loh chuan Theipui hi a rah dawn lo tihna a ni bawk. He Rah-hmasa hian Rah-hnuhnung awm tur dinhmun kha chiang takin a hril lawk tihna a nih chu. Rah-hmasa a awm chuan Rah-hnuhnung pawh a ţha dawn tihna a ni. Ruah hmasa leh ruah hnuhnung a awm ang deuh khan.

Tichuan, Marka 11:13 thu-a “Theipui rah hun a ni lo reng a ni” tih hian, Theipui rah tak tak rah hun chu a ni lova, Rah-hmasa (buds/first-fruit) emaw, Rah-hmahruai emaw rah hun chu a nih tlat avangin Lei leh Van Lal Isua pawh khan he Rah-hmasa hi hmuh beiseiin a rawn zawng reng a ni. Hemi thu tifiah leh zual tur hian Mizo thei rah zingah hetianga chhawng hnih-a rah chi (rah-hmasa leh rah-hnuhnung nei chi) hi hriat kan neih chuan thawh-belh ta ila a lawmawm hle ang.

3. Theipui Kungin Isua A Bum! Hnah A Awm, Mahse A Rah Silo!
Palestine rama Juda-te leh Lal Isua ngei pawhin an hriat sual ngai loh thil pakhat awm chu, Theipui chu a hnah a chawr nova, a duah hluah a nih chuan… rah hmasa a awm ţhin a, chu rah hmasa chu a awm ngei tih miten an hmuh a, an hriat theihna tur langsar tak pakhat chu a ‘hnah’ chu a ni. Theipui hnah duah hluah si, rah hmasa hmuh tur awm lo chu… thil mak a ni. Hei hian a entir pakhat chu, he Theipui hi a rah dawn lo tihna a ni! Chuvangin, Theipui kung mi bum hmang a ni tihna a nih chu! He Theipui kung hian engmah a sawi lova, a ngawi reng na a, Theipui kung sual tak, mi bumhmang tak a ni tihna a nih chu…

Theipui kung chunga Lal Isua a ţuan tak vakna chhan hi Theipui kung hian Lal Isua a bum vang a ni! Hei hian thlarauvah Entir ropui tak a la nei zui lehnghal. Hemi chungchang hi kan la sawi chhunzawm ang. Pawnlam landan maia Lal Isua zuitu, rawngbawltu, han belhchian-a ringtu dik tak (genuine Christian) ni tak tak si lo, chhungril lama an nun, thiltih leh khawsak dan zawng zawnga Lal Isua ring tak tak silo-te dinhmun a nih duh hmel khawp mai! Thinlunga ring tak tak si lo hian pawnlamah hian kan inti ringtu ţha viau em? Pathian bum tum kan ni reng tihna a nih chu…! Kan hmabak chu ‘hau-hlum’ (Meidil-a kal?) a ni mai ang e?

4. Lal Isua’n Theipui Kung A Hau Hlum!
Ka Muslim-ţhian sawi ang deuh khian, Lal Isua hi a insum vel peih lo hle tih a hriat khawp mai. Theipui kung hian a bum a ni tih a hriat-chhuah rual hian a hau-hlum nghal tawp mai a nih chu! A rapthlak hle a ni. A pawimawhna leh a entir-te hre ve lo tan chuan “Lal Isua hi a thinchhia, a insum thei lo, a râpthlak em mai…” tih mai chu awl tak tur a ni. Mahse, Pathian hian a der, ţha der, a tak anga lang der (hypocrites/pretenders) hi a haw em em a. Pharisai-te pawh kha a dim lo khawp mai. “Nangni Pharisai verhvek te u, thlan pawnlam hnawih var, a chhunglam tenawm si…He mite ho hian an kain min chawimawi a, an thinlung erawhchuan min hlat si…Lalpa, Lalpa mi ti na zawng chu vanram an lut lovang, ka pa vana mi duhzawng titu chauh an lut ang” (Mat.23:13-15, 23-29; Mat.15:8; Mat.7:21-23) tiin frank tak takin a thling baw-hawk khawpin a khawih mai ţhin a nih kha.

Laodikei khuaa Kohran hnena a lehkhathawn-ah phei chuan a khawih nâ khawp, “Nang mitdel, pachhia, rethei, mitdel, saruak …i zahmawh a lan loh nan…” (Thup.3:15-18) te a ti hial anih kha. Chuvangin, Lemchang Kristian hi Lal Isua’n a haw hle tih a lang a. Theipui kung a hau-hlum pawh hi a der, a tak lem chang a nih avangin Lal Isua hian a haw em em a, chance pek chi pawh a ni lo, rah a chhuah dawn lo hrim hrim tih a hriat-chian em avangin a hau-hlum tawp mai a ni. Eng ang ringtu chiah nge ka nih? tih hi in enfiah nan kan hman a pawimawh khawp mai.

Tirhkoh Paulan, hetiang ringtu lemchang chanchin hi chiang deuhvin a sawi tawh bawk, “Pathian ngaihsak anna an nei ang a, nimahsela, a thiltihtheihna erawh an awih lovang” (2Tim.3:5) a tih-te kha an ni. Biak inah chuan kristian ţha tak anga lang, inkhawm, kohhran program, thilpek leh kohhran thiltihna-ah pawh an langsar em em a, a kul-a-taiah an ţang a. Mahse, chhungrilah chuan Pathian nghenchhan tak tak silo-te an ni. Heng mite hi mihringte chuan kan hre thei (recognize) mai lovang, Mahse Pathian chuan a hre em em a, ţul a tih hunah Theipui kung a hau-hlum ang hian ala hau-hlum ve dawn a ni.

5. Kan Tan Engnge A Pawimawhna?
Lal Isua hian Theipui chungchang a sawi reng reng hian Israel-te chanchin a sawina a ni e an ti ţhin, hei hi a dik viau (Cf. Matt.24:32, Marka 13:28, Luka 13:7). Zirtirten Theipui thi ta an hmuh chuan, mak an ti êm êm a. Lal Isua’n thil awmzia a hrilhfiah a, rinna pawimawh zia a sawi ta a ni. Theipui hian Israel-te dinhmun a entir a. Pathianin Israel fate chu a rawngbawl tur leh atan êng ni turin a kochhuak a Mahse, Pathian kohna chu hnawlin, Pathian tirh, Messiah, Lal Krista pawh an ring duhlova, Pathian thiltum leh koh chhan an tih hlawhtlin duh loh avangin Pathianin hrehawm takin ala siam dawn a ni tih a entir a ni an ti (Isaia 45; John 1).

He Theipui kung hau-hlum aţang hian ringtu dinhmun enfiah nan lo hmang dawn ta ila. Ringtu ţhenkhat chu thlêmna leh harsatna-te lo tawkin thil lo tisual palh ta mah se, chance pek chuan an in-siam ţha chho zel a, rinna kawngah hmasawn phah nan an hmang ţhin. Heng mite hi chu nâ taka hau emaw, zilh emaw pawh an ngai lem lo. Fapa Tlanbo ang khan, an dinhmun ţha lo tak an hmu thiam a, mahni inhriat (inngaihtuah) chhuah nachang an hre ţhin a ni (Luka 15:17).

Ringtu inti ţhenkhat thung chu, an dinhmun ţha lo tak leh hlauhawm tak pawh an hrethiam chuang lova. Chance pek pawhin an sual zual deuh deuhva, an lut thuk tulh tulh zawk ta ţhin a. Zuruih a, buaina siam ţhat loh zia te, Eiruk ţhat lohzia te, Inneih hmaa sex hman ţhat loh zia te, Kutkem neih leh rukruk ţhat loh zia te, etc. chu hre reng mah sela, ataka a nunpui theih tlat loh avangin atawp khawkah chuan Pathian rorelna fel tak chuan, he khawvel aţanga mualpho taka seng (hau-hlum) a, Meidila kal tura a thlarau senghawi mai chu kan Pathian tih tur awm chhun a ni ta ţhin a ni.

Inti ringtu ţha êm êm, pawnlamah fel êm êm si, thlarau lamah erawhchuan rah-chhuak hmuh tur pakhat mah awm si lo, nun-a ei tur awm bawk lo, thlarau lama ching tlat, thlarau lam fa hring thei reng reng lo dinhmun hi he Theipui rah lo hian a entir a ni (Cf. Jer.8:13; Hosea 9:10, 16; Mika 7:1, Marka 11:27-12:40). Chuvangin, Lal Isua khan Theipui kha lo hau-hlum lo chi a lo ni lo! Keini pawh hi hau-hlum ngaiin kan lo awm palh ang e, I fimkhur ang u.

Similar Posts:

Recent Posts:

19 Responses to “Lal Isua’n Theipui Kung A Hau Hlum! {Sunday Pual}”

  1. 1
    La lawma Says:

    Chhiar ang u.

    Report this comment

  2. 2
    La lawma Says:

    a ngaihnawmin a bengvarthlak khawp mai. Post hlu leh tha tak a ni.

    Report this comment

  3. 3
    lrpa Says:

    Kan chhiar chhuah ve ngial chu le! (Pathian thu rawngkai hi ka chhiar peih vak lo a!) Sermon tha tak anih hi.
    A lem hi a dik leh dik lo inkar ami ani a, a huatthlala awm ber reng ani! Ni amng si lo, nilo mang si lo!..:)

    Report this comment

  4. 4
    chhana Says:

    A bengvarthlak e, nia, keipawh hriatthiam har ka lo ti thin a, i rawn sawi fiah a, ka lawm e. (Y)

    Report this comment

  5. 5
    PKfanai Says:

    He thu hi tawi te leh fiah lo zetin ka lo ziak tawh a(similar post ah a awm khi). Famkim tha takin i rawn post a, a lawmawm ka ti hle mai. (Y)

    Report this comment

  6. 6
    century child Says:

    (Y)

    Report this comment

  7. 7
    Dr John Says:

    Pu Pkfanai #5, ka Post hnu daih khan ka ngaihtuah chhuak leh a, Post in-ang a lo awm em tih ka browse kual a, i Post khi ka hmu a, ka chhiar a, tha ka ti khawp mai a. I Post kha a Famkimlohna ka hre lo. A History lam kha i chhui tha khawp mai leh nghal a. Application i lak dan pawh ka duh lutuk. Tuna ka rawn thlur lam hi, ka rilru-a tunlaia ka vei ve dan lam a ni a. I Post nen pawh a inkalh lova ka hriat avangin ka Post ta hram a ni. Thanks :-)

    Report this comment

  8. 8
    Dr John Says:

    (Y) lrpa #3, :-D :-P :-$ I van sawifiah thiam tak, “Ni mang si lo, ni lo mang si lo!” :-D

    Report this comment

  9. 9
    Ignatia (33-115 AD) Says:

    A ngaihnawm hle mai a. (Y)

    Muslim hi an mak khawp mai. Helaia ka hmelhriat thar pawh hian ka KJV a lo hawh thin a, pakhat chu ka pe nghe nghe. Tumkhat chu Isua tehkhinaa sawi chungchanga specialist a nih thu min hrilh mauh mai. Mak ti tak chungin ka’n ti ti ta a. Mahse ka tluk lo khawp mai. A quote pawp pawp a, a diklo awm lai a hre khawp mai. Bible a lo zir ve reng a lo ni a mahse a zir tak erawh Bible diklohna lam pang. Muslim hi an tang ve khawp mai.

    Hmanni khan Fapa tlanbo behchhanin Farisate dinhmun atangin ringtu puitling tawhte awm dan tur kan chhui ho va, a nuam khawp mai. Vawiinah pawh ringtu puitling tawhte dinhmun bawk kan hawlzau leh a. A lawmawm hle mai. Mahni inen miah lova Pathian thu sawi vak vak hi awl deuh mai a ni.

    Report this comment

  10. 10
    donald Says:

    Theipui kung hauh hlum leh Temple then thianghlim chungchangah hian zirtur pawimawh tak a awm reng a; Lal Isua side B lam a lang chiang hle a ni. Pathian hmangaihnaa khat leh zaidam tak a nih rual hian a duh loh zawngah chuan PA tak leh dynamic tak a ni ve tho tih a chiang em em mai. Theipui kung rah lo a’n hau hlum phawt a, Temple-ah hruihrual nen a’n che mai kha chu ‘Isu nunnem’ tih nen chuan a inhmeh lem lo khawp mai. AICS lecturer Rev. Lalhmingchhuanga khan helaia Isua ‘bonra’ zia hi chu a sawi thiam.

    Post-in a sawi theipui rah-hmasa Lal Isua’n a beisei khi ‘taksh’ an ti a, mi rethei zawkten’a chaw atana an hman ber a ni nghe nghe. Bible-ah hian theipui hi Israel nena khaikhin a ni fo thin a, theipui hi pachhia te tana chaw a ni ang hian Israel pawh thlarau lama pachhiate tana chaw ni tura Lalpa hnamthlan an ni a. Mahse Lalpa kohchhan anga awm lovin mahni duhzawng leh mahni ropuina leh mawina ngawt uma, taksa, rilru leh thlarauva Pathian an hmangaih loh vangin AD 70-ah hauh hlum an ni ve ta. Israelte kha langsar takin sual an ti lem lo, pawn lama tang phei chuan sakhawmi tak an ni a, mawi tak an ni. Han intih ropui leh lanmawi dan pawh thiam tak an ni. Riltam leh pachhiate tana eitur leh belhtlak tak an ni miah si lo kha Lalpa huat em em chu a ni zawk. Pawl emaw mimal anga intih ropui leh lanmawi tumna hi Pathian huat zawng tak a ni.

    Tunlai context-ah chuan Israel chu kohhran hi a ni a, Lalpa hminga khawvel tieng tu turte kan ni. Theipui kung anga ropui tak leh mawi taka lang si hian, belhchian tlak miah lo kan nih hi hlauhawm tak a ni… Lal Isua zirtirna te leh entirna hman thin te hi a makna em em chu hrilhlawkna (prophecy) an ni tel tlat zel hi a ni. Rorelna chu Lalpa chhungteah tan a ni dawn si a.. fimkhur a hun e.

    Report this comment

  11. 11
    Ignatia (33-115 AD) Says:

    Pu Donald: (Y) (Y)

    Pu Chhuanga chuan hmui sawi kawi vekin a sawi leh emaw a ni anga ngaihnawm leh phian ang. (H)

    Report this comment

  12. 12
    donald Says:

    hahaha Ignatia … tun tum kha chu a aw a chiangkuang lova, a uar ve phian bawk sia, a rawn tial ta thin a :-D

    ‘ka Hebrai aw hi lo hrethiam mai teh u’ a tih kual tak vel mai mai kha.

    Report this comment

  13. 13
    Ignatia (33-115 AD) Says:

    Pu Donald a za hle mai a… (H)

    A ni thei lutuk ang. Tum khat pawh a student-te nena hun an hmannaah ka inkhawm palh hlauh mai a. Thiam takin thu a sawi a. A tawpah hla tho tha tak – ka chiang ta lo Aw mi sang tamtak zaite u tih anga tang at ang chi hi a thlang a. A naute kha zai hruaitu an ni a. Mahse duh aiin an hla lak kha a tang tha lo khawp mai. Ani lungawi ta lo… Pulpit tlang atangin a naute kha class room emaw tiin hau ta hmiah mai..hahaha CHuan amah ngeiin hla chu a la tan ta a, a ban vei meuhin… :-D tang et awtin kan sak tak kha… Ani hian chanchin nuihzatthlak deuh deuh a ngah ve khawp mai. Nangpaw’n i ngah ang. Pastor chuan an ngah vek. (H)

    Kan OT ta deuh. Mahse a hlimawm ve a lawm le… (H)

    Report this comment

  14. 14
    donald Says:

    LOlzzz..Ignatia !!! a thinrim lo a in chek anga, thinrim chunga hla lak chu sawi loh.. ka zai thei lo hrim hrim :-P

    Nia.. kan fiamthu hriat ve zawng kan han hlimpui teh hluai a.. Dr John paw’n min lo hrethiam aniang chu (*)

    Report this comment

  15. 15
    Ignatia (33-115 AD) Says:

    Pu Donald, thinrim tihreh dan tha deuh chu zai hi a ni e an tih kha…hahaha

    Hei chiah lo OT tawh ang. Kumin nipui chawlha ka hawn khan MZU lama thiante/naute ka zu tlawh e ka tia. Tanhril lam anni bawk a, AICS ho nen kohhran khatah an lo lawi a ni awm e. Chuan an rawngbawl dante an sawi zel a. Tu emaw ni khan Pastor Chhuanga hi kan tawngtai pui nasa thin khawp mai a lo ti zeuh pek a. Kei lah pek chuan chaklohna a ngah anga an tawngtai pui thin emaw ka tia…ka zawt chiang zel a. An zavaiin tihtakzetin an tawngtaipui thin tu min hrilh zel a. An zingah ka uang ve ngai lova min zah avangin an tawngtaipui chhan chu min hrilh duh hauh lo mai.

    Amah nena kan inhriat chian thute ka hrilh zel a. A tawpa tawpah an zinga upa deuh ber hian zawi sepin ‘ Fanu hmeltha deuh a nei a chuvangin kan tawngtaipui thin, camping leh crusade vela a speaker dawn phei chuan kan tang leh zual thin’ a lo ti keuh a. ‘Ín ho mai mai e a’ ka tia topic dang ka sawi ta daih a nih kha… Ka rilru-a lo lang ta chu – pastor fanu nei hmeltha leh tha lo kar a hla deuh dawn a ni maw tih hi a ni…hahahaha

    Report this comment

  16. 16
    Dr John Says:

    (Y) Pu Donald & Pu Ignatia (Y) Pu Chhuanga chu… :-P

    Report this comment

  17. 17
    vakul Says:

    hei chu a va han tha em!! post tha leh Bible zirna tha tak a ni e. (Y)

    Report this comment

  18. 18
    Chhuaklinga Says:

    Ka chhiar ve chiah. Ka chhiar lohvin a liam ang tih ka hlau hnuhnawh khawp mai. A tha kher mai. (Y)

    Report this comment

  19. 19
    Dr Mahminga Sailo Says:

    Pu PK-a post emaw tiin ka chhiar char char a. Comment ka chhiar thlak hnuin post-tu ka en tha leh a, ka hre chiah… :-) NOI..

    Sermon tha tak a ni e… (Y)

    Report this comment

Leave a Reply

You must be logged in to post a comment.