mi(sual).com

Kristian nun a min ti hrilhhai fotu chu a changa Pathian ngawi tlat ṭhin hi a ni. Pathian hnena thinlung leih baw veka ka ṭawngṭai chuan chhhanna ka beisei ṭhin a. Eng ang chhanna pawhin lung a tiawi thei mai ang. Mahse, a ngawi vung vung mai si! Nang pawh beidawn chang i neih ve ṭhin ka ring. Thil mak tak nia ka hriat chu, ka mamawh ber laia Pathian ngawi tlat ṭhin hi a ni. Mittui sur zung zung khawp hiala Pathian ka auhin, kam khat pawhin aw rawn nei sela a thlamuan thlak dawn tehreng nen – a ngawi leh vung vung ṭhin.

Tun laia buaina tam tak lo thleng ṭhinte hi Bible keuva han chinfel mai theih lohte pawh niin a lang a. Chung harsatna tawk tute tan chuan Pathian aw kam-hnih-khat lek pawh a ṭangkai dawn tehlul nen- a ngawi tlat si ṭhin. A chang chuan zawhna mawl tak tak ka neih ṭeuhte hi rawn chhang turin Pathianin angel rawn tir se te ka ti hial ṭhin. Heng hun ah hian Pathian chuan, “Kei ka awm alawm,” rawn ti mai se chuan a va han thlamuanthlak dawn em! Mahse, a ngawi leh tlat ṭhin!

Hriat thiam tiharsa lehzual turin, Bible chuan kan thil duhte chu Pathian hnena kan dil chuan min pe ang tih min hrilh a. A mite hnenah chuan a awm ṭhin a, a ṭanpui ṭhin tih Bible-ah kan hmu bawk a. Pathian chu hmangaihtu Pathian a ni tiin Bible-in min hrilh a. Kan dil chuan min pe ṭhin ang tih min hrilh bawk a. Hei vang hian kan dilna chhan a nih lohin hriatthiam a har ṭhin. Chung hunah chuan Pathian kan ngai em em ṭhin a, mahse a ngawi vung vung si. ‘Pathian nghah‘ tih hian awmzia a nei lo a ni ang, ti hialin ngaihdan siam chang kan nei te pawh a ni mai thei e.

Lu i sûn emaw, vanduaina rapthlak takin a tlakbuak che emaw a ni mai thei. I vanduaina chu Pathian remruat a ni tih rin hram hram i tum a, Pathian chuan a theihnghilh hauh lo che a, kawng ala kawhhhmuh ngei dawn che a ni tih rin i tum hram hram a ni mai thei e. Mahse, heti chung hian i rilru chhungrilah chuan i bei a dawng a, Pathian awm hial pawh i ringhlel rum rum a, awm pawh ni se a ngaihsak lo che a ni ang tih i ring hial pawh a ni maithei e. Eng emawti talin rawn inlan se chuan a fel duak mai tur a le!

“Harsatna namen lovin min tlakbuak a, Amah kan ngaih ngawih ngawih lai hian Pathianin enge a tih ṭhin?”

“Engtin nge kan tih ang”

Hengtiang hun atan hian Josefa nun hi kan ngaihtuah pui ve ngai emaw, tleirawl kum 17 anih aṭangin a harsatna a rawn in ṭana kum 30 a nih hma zawng kha chu a nun kal zel dan tur ah khan Pathianin eng thu mah a rawn thlen sawi leh tur a awm lo. “A ni te chu Pathian mi ruat a lawm” kan ti a ni maithei e, amah ah khan chutianga chiang taka hriat tirna reng reng a nei lo a ni. A naupan laiin chianglo ruai in mumang chu a nei ve bawka, khang zawng zawng te kha a rilru ti mangang tu leh a unau te leh a pa hial ti thinur tu a ni a. A unaute huat hlawh phahna mai piah lamah an tihhlum hial duhna a hring chhuak a, an u ber zangaihna vangin an ti hlum lo ta hlauha. Ismael khualzin ho hnen ah an hralh a, Potiphar-a sal ni turin an hralh leh ta a ni a. Naupang mai ala ni, a mangang ve hle in a rinawm.

Pathian a ring a thuawih leh rinawm takin a pu hna a thawk a, duhsakna a dawng nghal mai bik lova kum engemaw zat chu chhiahhlawh junior ah a awm ngeiin a rinawm a. A thil khawih apiang a hlawhtlin ṭhin avangin a pu chuan mi danglam a ni tih a hre ta a, inchhung hotuah a siam ta hial a. Potiphara rintlak ni tur hian eng ang taka nasa in nge a thawh ang. A khawih apiang a hmuingil a ni tih hriat theih tur hian engtia rei nge a thawh anga, eng engte nge a thawh ang, heti taka Potiphara ti lawma a dinhmun ang luah thei hial tur hian?

Potiphara in enkawltu leh hotu ber dinhmun alo chan tak ah chuan, ‘Pathian malsawmna leh hruaina hlawhtling a ni e’ tih theih tawh awm tak a nih laiin atan chhiatna rapthlak zawk ko chhuak tu/hringtu a ni leh tlat si. Potiphara nupuiin dawt a puhin jail ah khung a ni a. Heti lai ah hian a chanchin hi han rek bung ta mai ila Josefa nuna Pathian chetdan hi kan hriatthiampui lo hle in a rinawma, mak kan ti ve ngei ang. Ani pawhin zawhna tam tak a inzawt ve ngeiin a rinawma, a pu Abraham-a Pathianin mal a sawm dan te, a pu Isaka chunga Pathian thu thlen dan leh a pa Jacoba a biak dan te pawh a bel em em in a rinawma. “Engatinge hetia manganna ka tawh lai hian min lo biak ve loh le” ti tepawhin a in zawt ve ngei ang.

Jail ah hian kum 7-8 vel bawr vel a tang niin sawi a ni a. Ram danga lung inah, thubuai sawi hun tur pawh awm chuang lovin, a kum tel tang turin han inngaihtuah teh. Josefa chu sal a ni a; a thiamthu sawi thei pawh a ni lo. Pharoa hnena sawipuitu tur tumah a nei lo va; chhungte kan tu tur a nei hek lo. Bible a kan hmuh dan ah chuan Jail ah pawh taima tak leh rinawm takin hna a thawka, heta kan hriat tur chu eng chen nge misual lung in tang pangngai anga a awm kan hre lo tih a ni. Hemi chhungzawng hian Pathian chuan aw a nei hauh lo a ni.

Josefa chanchin rawn tidanglamtu chu lal uain petu leh chhang siamtu te an ni a. An mumang a hrilfiaha pakhat zawk chuan a dinhmun ngai a luah leh dawn tih a hria a chuvangin a chhuah hun ah a chanchin sawi pui turin a ngen ve lawm lawm a ni. He thu aṭang hian a mangang ve em em a chhuah a chak ve tawh hle a ni tih a hriat theih awm e

“I chan that leh hunah chuan mi han hre reng la, khawngaih takin khawngaihna ka chungah rawn lantîr la, Pharaoa hnênah ka chanchin han sawi la, he in ata hi mi hruai chhuak ang che: Hebrai-ho ram ata mi’n rûka mi rûk bo ka ni a: he ramah pawh hian rip chhûnga mi khûngna khawp engmah ka tisual hek lo” Gen 40:14-15

A sawi ang chuan lal uain pe tu chuan a dinhmun ngai a luah leh a mahse “Josefa chu a hre reng ta awzawng lo va, a theihnghilh ta mai a” Gen 40:23. Josefa tan beidawnna ti zual tu mai a lo ni;

Pathianin a theihnghilh ta che niin i hre ve ngai em? I ṭawngṭaina ten siling bak a thleng lo ni tein i ngai ṭhin em? Ringtute hian Pathianin min theihnghilh ta nia kan hriat chang emaw, thil dangah a buai lutuk a, min ngaihtuah ve hman lo a ni ang, tih chang emaw kan nei fo ṭhin.

NGAWI RENG MAH SE, A AWM MAI MAI LO

Josefa chunga thil lo thleng hi mumang pawhin a man phak ngai loh a ni ngei ang. Pathian chuan khawvel chhandamna tura a remruatna chu amah hmangin a rawn thawk ṭan tih pawh a hre hek lo vang. Josefa chanchin zawng zawng kan sawi seng lo mahse a nun aṭanga kan hmuh chiang em em mai chu ‘Pathian chu a ngawih vung vung pawhin min theihnghilh ta tihna a ni lo; min ngaihsak lo tihna a ni lo’ tih hi a ni. A thawm kan hre lo a ni mai thei e; mahse, a awm mai mai lo. Pathian che chang lova kan hriat avanga engmah ti lova kan ngaih ṭhin hi a dik lo va; kan hmuh theih leh kan hriat theih aṭang chauhva a thiltih kan chhut ṭhin hi a dik lo a ni.

Chutiang bawkin ham ṭhatna kan tawh leh tawh loh a zirin kan nuna Pathian a inrawlh leh inrawlh loh kan chhut ṭhin a, hei pawh hi a dik lo. Thil engkim tluang taka a kal lai chuan Pathian chu kan hneah a awmin kan hria a; min enkawl a, min veng a, kan mamawh engkim min petuah kan ngai ṭhin. Amaherawh chu harsatna kan tawh veleh “Lalpa, khawiah nge i awm? Engatinge min ṭanpui loh? Min va ngaihsak lo ve,” kan ti leh si ṭhin.

Kan nuna Pathian inrawlh dan chu kan chunga thil lo thlengte aṭang ringawta teh chi a ni lo. Thil pahnihin a teh theih: Kan nunin hma a sawn dan aṭang leh a remruatna a hlawhtlin leh tlin loh aṭangin. Josefa chu kum 13 lai harsatna hrang hrang tawkin a awm a; a harsatna tawh zawng zawngah hian Pathian chu a inrawlh reng a ni. Josefa harsatna tawh hmang hian a ni Pathian chuan a remruatna ropui tak chu a tihhlawhtlin ni. Chutiang bawk chuan Pathian chuan kan harsatna hmangin a thil ruahman chu a tihlawhtling dawn a ni.

[Source:- How to Handle Adversity (by Charles Stanley) + Asteric]

Similar Posts:

• Please help: “NOKIA tih alang vung vung”
• First Love Never Dies
• Zawhna sawm………..
• THIAN RINAWM
• Hmeltha

Recent Posts:

• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :
• Kawnpui dai sex video a leakout!

This entry was posted on Sunday, November 20th, 2011 at 4:30 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.