Pari chu nulât hre ve tan, kum 16 mi vêl a ni a, nula tawngtam lêm lo leh mi pawisawi lêm lo a ni. A hmêl a tha lêm lo va, a nungchang a chhe lêm lo bawk. Nau hmeichhia pakhat, Kimi a nei a, ani phei chuan Bawihi ti hlîrin a koh thîn nghe nghe a. A nau hi kum 6 mi lek a ni a, a naute pahnih dang erawh chuan naupang të an nih laiin a boralsan tawh a ni.
An chhûngkua hi khawchhak lam aṭanga lo chhuk an nih avângin an chênna, an khua anga an lo chhâl ngeiah chuan hmusit an tâwk nasa hle a, ‘Paihte râltlân’ tih hi an ṭawngkam hriat khât loh pâwl tak a ni. A nu hi nu hrisèl tawh lo tak mai niin hna hram pawh a thawk thei tawh lovin thlai hmun a siam a, chumi enkawl chu a nitin hna leh tih theih tâwk a ni. A pa, kum upat avânga lu-a kelsam ṭo vo tawh mai lo neiin an chhûngkua a châwm tâwk tâwk a ni.
An chhûngkaw khawsak a harsat êm avângin Pari chuan pâwl 5 thleng bâk lehkha a zir thei lo va, a nau Kimi erawh chuan pâwl khat a zir ve mêk thung. Lo lama a ṭûl hle chungin ina hmeichhe hna zawng zawng chu a kuta awm a ni a, a nau sikul kal hruai ngai bawk nen an chhûngkaw engkima engkim a ni hawt e.
Inrinni vawikhat chu Pari chu thawmhnaw suin tuikhurah a awm mêk a. A nau neihchhun, Kimi chu a ṭhiante nen an in kawt leh a chhehvêlah an lo inkhualtelem mai mai a. A nu leh pa chu an hna ve ve-ah an chhuak tawh a. An kawtah hian theiria kung lian tak a ding a, a kungah chuan khawivanrial a kai bawk a. Mahse, a kawlh lêm lo. Chumi hnuaiah chuan a nia, Pari Bawihtei leh a ṭhiante chu an inkhualtelem ni. Chu chu an sikul kai loh ni-a an nilêng hun hman thin dân a ni a, thil thar a ni lo.
Pari chu a insu zo ṭêp tawh, chawhnu lam dâr hnih vêlah chuan mangang taka naupang ṭap ri a hria a, a han ngaihthlâk chian chuan a nau Kimi âw chu hai rual a ni lo. A rang a rangin a han ngaihven a. A thil hmuh chuan a barakhaih kher mai!
A nau hmangaih em em chu lainatna tel miah lovin an kawt theiria kunga kai, khawvanrial chuan an lo vir mup mup a. Tlànchhiat ngaihna hre lovin mangang takin khuaiah pawh a zûk na ber pâwl, khawivanrial zûk chu a lo tuar tlawk tlawk chu niin!
Pari chuan mangang taka au chungin a han pan vat a, a ṭhiante chuan an tlànchhiatsan vek a ni tih a han hmu nghâl a. A nau awmna a han thlen meuh chuan a bawihtei, a nau neihchhun chu ṭap pawh ṭap hleithei lo, din pawh ding ngîl hleithei lovin a lo ding ṭai a. A hmai a lo sen vek tawh a, a samah te chuan khuai nunrâwngte chuan bu an lo chhep a. Pari a han thlen veleh ani pawh chu an lo bâwr ve nghâl a. A au vawn vawn a, nâ a va ti tak em!
A nau chu a pawm lawk a, chhuk zâwngin khuai an thlâwk hleithei lo tih a hriat avângin thlang lamah a tlànthlâkpui ta chiam a. Mahse, an tlànna chin zêlah khuai rual chuan an vir thla mep mep zêl si. A mangang na ti lutuk chu, “Min chhan r’u.. Min chhan r’u..” tiin a ṭap hawm hawm a. Chhantu a hmuh loh avângin a tlànthla zêl a..
An kawmthlangte in zâwn a thlen chuan kawngka bul aṭangin, “Ka pu, khawngaih takin min chhan rawh. Ka pu, kawng min lo hawn rawh,” tiin a ngên lawm lawm a, mahse, in chhûng aṭang chuan tukverh leh kawngka khâr ri ṭhuai ṭhuai thâwm leh, “Thlang lamah tlànthla zêl rawh u..” tih bâk chhànna a dawng lo va, kawng hawntu tur a hmu lo.
A nau duhtak chu a kai a, a tlànthla zêl a, “A nâ, a nâ,” tiin a ṭap hawm hawm a. Râlkhat aṭangin a ngaihna hriat loh hmêl takin mi ṭhenkhat chuan an lo thlîr reng a. Tuman ke an pên lo, khawvanrial zûk nat zia an hriatchian vâng te pawh a ni mahna.
An thâwm a zawi tial tial a, minute 20 hnu vêlah chuan eng thâwm mah hriat tur a awm tawh lo. Pari-te unau chu engtin nge an awm tih pawh tuman an hre lo hek lo. A khât tâwka boruaka khuai thlâwk an hmuh mai loh chu, khawnge unau khawngaihthlâkte kha an awm?
Nakin tlai lam deuhvah chuan râlkhat aṭang lo thlîrtute chuan thlang lam pana hmanhmawh taka nu pakhat tlànthla hlawk hlawk an hmu a. A rawn lêt leh lama naute pakhat pawm chung leh tleirâwl pakhat puaa a rawn chho pawh an hmu bawk.
Zualko hmêl duhawm lo an hmuh avângin a nu hrisèl lo tak mai leh a pa tar tawh tak mai chu a hmanhmawh thei ang berin an lo haw a. In pawh lût hmasa lovin Samari miṭhate inah chuan an tlang nghâl a. A nu leh pate chuan an fa duhtakte pahnih, engmah hre lova khuma an lo mut chu an va hmu ta a.
An tawrh a va na em! Minute 10 vêl hnuah chuan Samari miṭha chuan a nu leh pate hnênah thil awmzia a hriat ang ang chu a hrilh a —
“Ka vawkchaw la in ka thleng chuan khaw thlang lama hmeichhe ṭap ri hawm hawm leh ‘min chhan r’u’ tia au thâwm ka hria a, ka phur ka dah hnuin ka thâwm hriatna lam panin ka tlànthla nghâl a. Kawnga mi ka hmuhte chu thil awmzia ka zâwt a, anni chuan khuaiin Pari te unau a zûk thu min lo hrilh a. Thinrim taka hau mawlh mawlh chungin in hnai bera samkhuih ka la lawk a, ka tlànthla hlawk hlawk a. Hetih lai hian an thâwm ka hre tawh lo.
“Ka chhukthla zêl chu field bul kawr ka zu thleng a. Hmun khata tui lo tling pamah chuan Pari te unau lo tlu dûn chu ka zu hmu ta a ni. Kei chuan rang takin ka va pan hnai a, Pari chuan a nau chu a lo kuahbet tlat a. An unauvin tui ata ka la chhuak a, zawi të tëa, ‘A nâ, a nâ..’ tia Pari phun sep sep ri chuan min dêng na kher mai!
“Ka theih ang angin an sama khuai bet tlatte chu ka khuihthlâksak a, hetih lai hian khuaiin min zûk nge min zûk lo tih pawh ka hre lo. Tichuan, Pari hi ka pua a, Kimi pawm chungin kan in lam ka panpui a. Avil kan pe vat a, zu a ṭha an tih avângin zu kan zawng a, kan pe bawk a, an tha leh vat mai ang,” a ti a.
A nu lungchhia chuan engmah rëng a sawi thei lo. A pa mit aṭang chuan thinrimna leh lungngaihna thûk tak a hmuh theih bawk a. Nakin deuhvah chuan an zâwnchhuak a. Enkawl a awlsam zâwk nan tiin an in lama dah lovin an health worker-te inah an zâwn lût ta tawp a, anni’n theihtâwpin an lo enkawl a. Chumi zân chuan an khawchhûngah titi dang a lêng lo chiang teh e.
Zân dâr 9 vêl a ni tawh a, tlangvâl nula rîmte pawh an haw tan tawh a. Chutih lai chuan YMA Information Centre atang âw a lo chhuak a.
“Chhiat thawh thu kan han puang ang e. Nula Lalrampari, kum 16, Pu Zokhuma fanu chu zanin dâr 8 khân khuai zûk avângin a boral a, zaninah tlaivârpui a ni ang,” tih chu.
Nula leh tlangvâl, nu leh pate chuan khawhar in lam an pan zut zut a. Chu’ngho chuan Pari ruang bula a nu leh Pu Zokhuma lungngaihna vâwrtâwp tuara lo ṭap rãwih rãwih chu an zu hmu hlawm a. Hetih lai hian a naupang zâwk, Pari’n duat taka ‘Bawihi’ a tih thin, Kimi chu khaw MHIP President inah an enkawl mêk bawk a. A hringtute lungngaihna an va tithuahhnih tehlul em!
A tûk khua a lo vâr a. Mi zawng zawngin tûkṭhuan an ei lai mêkin Pari nu chuan an in leh MHIP President in an kârtawn zak zak a. A fanu ruang bula a awmin nikhaw hre lova a awm mêk, a fanu a mitthla a, a fanu engmah hre lo bula a awmin engtik lai maha a hmuh tawh ngai loh tur, a fanu ruang a mitthla lo thei si lo. A va harsa tehlul em!
Chaw ei kham hlim vêlah chuan YMA Information Centre atang bawk chuan âw a lo chhuak leh ta a.
“Chhiat thawh thu kan han puang ang e. Lalrinkimi, kum 6, Pu Zokhuma fanu chu nichin dâr 8 khân khuai zûk avângin a boral leh a, khawtlâng mipuite kan inhriattîr a ni e.”
A va mak zozai em!
Pari leh a nau hmangaih em em ruang chu kuang pakhata inkuah riala zalhin thlahliam an lo ni ta a ni. Engtin nge putar chak lo tak mai leh nu hrisel lo tak chu an khawsak chhunzawm tâk ang le?
A hnua an khaw tlangvâl pakhat thusawi chuan an khawtlâng titi a siam leh ta. “Khuai bu kha chhak lam aṭangin an vawm a nih kha. A vawmtu pawh ka hria, mahse, thihna rapthlâk tak a thlen avângin ka sawi lovang,” tih chu.
Thubelh: Phuahchawp a ni lo va, thil thleng ngei a ni. Hming lo lang zawng zawngah erawh hminglem hman a ni. He post ka hmuh avangin, ziahna chu rei deuh tawh mah se, ka rawn post leh a ni e.
Similar Posts:
- Naupang inawkhlum Vanlalpeka chanchin
- Hei hi kan tlai lam hmeh tùr ni se
- Ka âwm nghêngin a ṭap
- Tu thiam loh nge?
- Pari Zun shakes Delhites
November 22nd, 2011 at 9:01 pm
Ka hawng e..
November 22nd, 2011 at 9:06 pm
thui ve 😛 lr hlonchhing hi min tih khalh ziah mai 😛 CHHIAR ANG 😀
November 22nd, 2011 at 9:21 pm
An va lainatawm ve, a tuartu tan chuan rilru chu a na ve duh ngawt ang le..
November 22nd, 2011 at 9:22 pm
‘Post tha tak a ni’ in ti leh phot te’ng. I phuah rang hri2 nge i phuah sa zawk aw! Kezungpui post related ni awm tak i rawn dek chhuak rang hle a, tha hri2. Le chhiar ang aw!
November 22nd, 2011 at 9:28 pm
Ka chhiarchhuak. Min vel tihtih. A lungchhiatthlak a, a thinrimthlak bawk. Mizoram chhung a thleng ngei, thudik i ti bawk si a, chu khua chuan mualpho a phu ka ti kei chuan. Khawi khua nge hriat a va chakawm ve.
November 22nd, 2011 at 9:30 pm
Rilru an ti na. A nau khuaiin a zuk lai a han hmuh lai vel khi ka khawngaih lutuk…
November 22nd, 2011 at 9:32 pm
An va khawngaihthlak tak ve maw le. Han inchhan ngaihna a awm lem lo si a ni, inchhan pawh nise; a chhantute kha an lo seh ve vak awm si a.
November 22nd, 2011 at 9:47 pm
“Thian chhan thih ngam” intih fo pawh hi a inthlahrun awm sawt hle mai. Hetiang chhiar hi chu tih theih nei mang si lovin thin a rim tun thin a. Pawngsual te pawh hi chhan ngamlo pa/tlangval kan tam awm e a.
November 22nd, 2011 at 9:50 pm
Punctuation marks i thiam kher mai, TuaiSial. A thu chhiar pawh a nuam. Kei lah hi ka thiam thei ve si lo.
November 22nd, 2011 at 9:50 pm
Blog lamah ka dah tawh a, mahse, ka post link dah tak nen khian a inang deuh em a, ka rawn dah a ni. Phuahchawp a ni lo. Thil thleng ngei a ni a, a thlenna erawh a rei ta deuh e. A khaw hruaitute khian recommend nachang hria sela chu a u zawk khi huaisen lawmman dawng thei tur a ni. Khi an vanduaina tawh avang khian zangnadawmna dawng tura sawi an ni a, mahse, chu chu tang ang mai a ni.
November 22nd, 2011 at 9:51 pm
Ava han pawi thin tak em. An khua ah hian kan awm ve anga, an tih ang chiah hian ka ti ve ang tih ka hlau ngawih2. An hre reng thin awm si a, kawng lo hawn duh lo tu pa/nu hi chuan an thihna ah hian mawh a phur ve ngei ani tih a hre ve ngei ang le.
November 22nd, 2011 at 9:52 pm
:-O
November 22nd, 2011 at 9:53 pm
Lo tanpui duh loh tute khi mizo dik tak an ni dawn maw ni le, an khua hi mizoram laili a nih ka ring lo ve ringawt, ramri bul vel a niag 🙂
November 22nd, 2011 at 9:53 pm
Ka chhiar nawn leh….ka mittui a tla.. ka van lainat tak! An khaw tlangval sawi khi a dik angem le?
November 22nd, 2011 at 9:56 pm
Dolly i va vang ve?
November 22nd, 2011 at 10:03 pm
@Ts, tunah nangman buaipui thar leh la. Mi te paw’n thih hnu ah huaisen lawmman te chu an dawng fo alawm. Nachang hrelo ho chu va hrilh teh.
I post mai mai chuh…fiction nilo thil thleng ngei hi chuan min hneh hma a, mood a cool ruih mai. Min ti hrehawm ;-(
November 22nd, 2011 at 10:03 pm
lr, tunlai chu hna lamah ka buai ve em atin ni.
November 22nd, 2011 at 10:06 pm
@dolly: Khuai kaina hi an in kawt lawkah a nia. A bul leh a hnuai vel hi a hma zawng pawhin infiam nan an hmang thin, an zûk ngai lo. A nu leh pate pawh khian an in atanga a hnaih vang leh a hlauhawm em avangin a khuai neitu/hualtute hnenah la turin an ngên châmchi a, an lak mai duh loh avangin khitiang thil khi a lo thleng ta a ni. A zûk zanah a khuaia chu an la/hâl nghal chûk chûk a, a tuk lamah a kaina thingkung, theiria chu an kit bawk.
November 22nd, 2011 at 10:11 pm
post a mi ang hian khuaii min bawr ve tase eng tia tih nge tha ber ang le?..
November 22nd, 2011 at 10:18 pm
@Telphawka: Chi-ai loh tur.
1. Thlang lam pana tlan vak tur.
2. Inchhunga tlanluha meikhu siam vak tur.
3. Khuai rauhna vela awm chuan chet miah loh tur.
4. Thawmhnaw sen hi khuaiin an hre hle tih hriat a tha.
November 22nd, 2011 at 10:18 pm
engtik hunlaia thleng nge @TuaiSiala
November 22nd, 2011 at 10:23 pm
hetiang rilru kan put dawn chuan mahni pawn kan tuar thei vek dawn a nih hi, khuaizuk kherlo pawh, misualin min bei ta se chhun pachangah, tiang hian kan inkal pel mai mai trep tawh niin a lang,tu emaw natuarin tranpui ngaiin khawlaiah vial2 ta se tranpui kan hmanlo in midang tih a kan kalsan zel dawn chuan mahni chung a a thlen ve hunah a pawingawt ang.
@19 Telphawka, tiangah hi chuan ka rindanin meichherin invai vel ila a thrat ka ring, hetiang hmuh chuan thil alh duh deuh lianpui chhit vat a khuai ho hliau emaw,meikhu a ur a,khuai rim leh mihring rim hriathran theihloh khawp qa meikhu rim a ur a thra maithei, ka la tichhin bikmiahlo nain 😀
November 22nd, 2011 at 10:24 pm
Khawi khua nge tih sawi hram teh, ka ngen a che
November 22nd, 2011 at 10:27 pm
Nau hmeichhia pakhat, Kimi a nei a, ani phei chuan Bawihiti hlîrin a koh thîn nghe nghe a. A nau hikum 6 mi lek a ni a, anaute pahnih dang erawh chuan naupangtë an nih laiin a boralsan tawh a ni. 😮
apa ts, a awmzia ka hrethiam lo.
tren tren.
November 22nd, 2011 at 10:30 pm
TS, thil thleng tak tak i tih avangin ka rilru a hrehawm. Mizo te hi “Thian chhan thih ngam” kan in ti dup dup ani lawm ni?. A takah kan va nep leh si ve.. 😛
Khawchhak lam atanga lo chhuk hmuhsit ngawt te hi ka ngaihdan a ni ve lo bur. An chhungkua hi ka lainat in ka khawngaih hle mai. An nu leh pa hi an tuar hi na ka tihpui, puih theih ngaihna ka va duh em…
November 22nd, 2011 at 10:32 pm
A pa Chhuakling, a eng ber kha nge aw i hriatthiam loh ni ang le? ‘Nau hmeichhia pakhat’ ka tihna chhan chu a naute pahnih dang boral tawhte ka chhiar tel loh avang a nia. A hnuaiah a naute pahnih dang thi tawh an awm thu ka ziak leh ta a ni mai a. 🙂
November 22nd, 2011 at 10:32 pm
Tlem a ka in zawh ruk deuh chu, ‘engatinge an mahni inah an tlan luh mai lo?’ ‘An kawmthlangte in zâwn a thlen chuan…tih khi i ziak lang bawk si a..
Engpawhnise, hmarcha rawt thleng rawt sawm vek ka chak ve dawn mai a lawm le 🙁
November 22nd, 2011 at 10:36 pm
@lrpa: Rilru chi-ai phili tawh an nia, manganga chhan a ni tawh a, a chhantu tan a chhuahna lama let leh aiin an hma lama tlang nghal mai kha a awlsam zawk a ni.
November 22nd, 2011 at 10:36 pm
R.I.P
November 22nd, 2011 at 10:40 pm
Hmanni khan kan in bula thingkungah, Khawivanrial an rawn lawi a, ka lo hre ve pek lo a. A hnuaiah naupang ho an infiam nasa si, lung vawm mai mai an ching bawk si. Ka staff te zing ami tlangval fel tak hian awlsam tein a zuk hal a, a No a lo tak em em zui. Ka inthiamlo deuh viau na a, kan lo tifuhin ka hre leh hnuhnawh e. A lo hlauhawm em mai.
November 22nd, 2011 at 10:40 pm
#24 mamboihi: ‘Thian chhan thih ngam’ hi Mizote’n kan that lohna aia kan thatna kan hmuh len zawk niin ka hria.
November 22nd, 2011 at 10:49 pm
Mittui an ti tla thei dawn mai alawm, thinrim leh rilru na takin kan chhiarchhuak thei hram e. A khua hi i sawi chuan mi tam takin an dem dawn si. Mahse midangte chhan nana nunna chantu hi chu chawimawi a phu ngawih ngawih a ni. he thil thlen hun hi ala rei loh a, hriatpuitu an awm chuan hmalak harsa tak anih ka ringlo deuh.
November 22nd, 2011 at 10:51 pm
khawivanrial hi ka va mitthla thiam mai lo e… lian dum deuh chi kha ni em?
November 22nd, 2011 at 10:54 pm
#20 @ tuaisiala, k lawm e, ka fing leh ta sawt mai.
November 22nd, 2011 at 10:55 pm
@zony: Kum 10 a liam tawh.
@aduhi: A lian tih chu ka hria a, a dum chiah paw’n ka hre lo. Sen-duk lam rawng a kai deuh lo maw?
November 22nd, 2011 at 10:58 pm
Ka hre lo le. Ka la hnimhnai lo khawp mai. Senduk kha hlauh luatah a dum angin ka lo hmu a niang.
November 22nd, 2011 at 11:00 pm
33. Aduhi, Chhuaklingan kei aiin a hre zawk mai thei a; dum deuh khuk hi chu, ‘Ngalfek’ anniin ka hria. Khawivanrial hi chu an sen uk deuh khukin ka hria.
November 22nd, 2011 at 11:17 pm
#16 Sheldon: Kum 10 chuang a liam tawh a, a tharthawh leh chi tawh loh maithei zawk.
November 22nd, 2011 at 11:33 pm
#33 Pi aduh, lian dum deuh chu “Khuaivanrial” ni lovin “Negrovanrial” alawm… I mitthla thiam tawh em? :p :pil bo nghal:
November 22nd, 2011 at 11:35 pm
kawlhawk lah hi hetiang lam bak hi sawi tur a hre thlawt lo
November 22nd, 2011 at 11:35 pm
Ka tah a chhuak ;-(
November 22nd, 2011 at 11:38 pm
aduh, a thawnthu hi hnukulh teuhin ka chhiar a, lungkuai deuha komen pek ka tum laiin i komen ka hmu a tum loh lamah ka peng ta alawm maw le… 😀
November 22nd, 2011 at 11:40 pm
I rilru hi a peng sa hrim hrim alawm kawlhawk. Kha ho tee pawh i lo ngai kawi zel a.
November 22nd, 2011 at 11:46 pm
A ngaihnawm, a zialo thung :-S
November 22nd, 2011 at 6:17 pm
Naaa… a pengsa bik lo, a peng thut alawm…
Nikum hmasa khan champhai bulah khawivanrial-in ka thianpa u leh a fapa an zuk a, a pa a borala a fapa erawh a dam chhuak hlauh. Ram vahnaah ka tawng ang tih ka hlauh zawng tak.
November 22nd, 2011 at 6:29 pm
Khuai laka in chhan hi chu rirru fim tak pu lo chuan hlauhawm tak ani. Kan tetlai in ka nu chhanchhin bu chhiar ka hriat chu naupang infiam khuai chawl in an lo zuka. A u tlangval thinrim chuan ava hawl darh vak maia amah a tih phah thu ania, in chhan dan tha hi ngaihtuah hmasak a ngai thin.
November 22nd, 2011 at 6:47 pm
Khuai hualtu te hi an thiam lo anih deuh ber hi. Miin an ngam loh tlat chuan an tanpui ngei ngei kha phut chi pawh ani chiah bik lo.
November 22nd, 2011 at 7:44 pm
He chanchin chu Tuaia phuahchawp ni zawk se ka va ti em. A va lungchhiatthlak em.
November 22nd, 2011 at 7:49 pm
As_Khiangte, a dik ngawt mai, thawnthu phhuahchawp nise ka ti ngawt mai kei pawh
November 22nd, 2011 at 7:59 pm
Hei chu hman zan ka chhungte i tih kha ani maw…ava lungchhiat thlakin ava thinrim thlak ve.
In khawmthlangpa leh a khuai vawmtu te pawh chu i haw viau ang,a loh theih loh. Mahse maw..anni pawh an dam chhungin ‘guilt’ an nei tawh dawn a har hle mahse an tan han tawngtai sak hlauh ta che. Tichuan i lallukhum i belhchhah zel dawn asin ti raw…a lungchhiat thlak hle mai.
November 23rd, 2011 at 1:30 am
phek thar lamah chhunzawm ang uu
November 23rd, 2011 at 9:50 am
Khawnge tlawmngaihna? Ka thin a va rim tak em! A lungchhiat thlak kher mai.
November 23rd, 2011 at 10:38 am
Hei pawh chu
November 23rd, 2011 at 10:10 pm
Hei chuan rilru a va khawih ve maw le! Insehruh ṭeuh chunga ka chhiar chu le.
Hetiang khuaah hian ka pem ang tih a nia ka hlauh ni! Hmanlai mite zingah khan khawsa ta se la an khua chu rûn pawh ngai lova lak mai theih chi a nih dawn hi a. Khumlaizawla kawihzangthala pa ṭawng ṭawng an tih ang chi hi hemi khuaah hian an tam viau dawn anih hi le.