mi(sual).com

Khawvel lei lung leh a chhunga chengte lo inher dang lam zel hian kan chenna boruak leh kan khawsak dante pawh a tidang lam ve zel a. Scientist mifing tak takte’n kan khawvel leh pawn lama thil thleng/awm mak deuh deuh an hai chhuaka, chu anthiamna hmang vek chuan khawvel mipuite leh keini ang mimawl berte  hmuh/hriat thiam theih turin an han pharh chhuak leh zel a, rin phak bakin an lo fingin thil an lo tithei chu a nih hi. Tun hmain Scientist-hovin Khawlthluaknei (computer) an siam chhuak an tih lai khan awih harsa kan tia hmuh theih leh khawih phakah awm hek lo le. Chu tih hnu rei loteah keini thingtlangah pawh TV(black&white ngat) kan han thlir ve theih takah chuan kan thu lo hriat thinte pawh kha a ni thei dawnin kan hria kan awih ve tan ta a.

Hun a lo inher zela mithianho pawhin an thil siam chhuah computer an tih ngei pawh chu an siam hmasa atangin a chi dang dangin a siam chhuak zela mipui/ mimal hman theih leh lei theih tura an siam chinah chuan le(h) khawvel hmun tin a fang chhuak nghal ta mai a. Keini zofate ngei pawh hian hmuh theih leh khawih theih hun tur thlirin duh thu kan sama kan nghak hlel zek zek a nih kha. A man a lo tha hnem ema mi nazawngin kan lei leh thei lo va, mahse tun hmaa mihausa fate chauhina an neih theih kha tunah chuan keini zofate mipui/ mi nazawng pawhin tual chai nan kan hmang chu a ni ta ber mai.

Khawlthluaknei an tih ngei mai kan han thut chilh chiah mai chu khawih tur leh tih tur a pui a lo tam ngang mai! www. -a han luh leh ngat phei chuan tun hmaa kan hmuh leh hriat ngai loh chhiar tur leh hmuh tur, ennawm mak sak pui pui a lo tam ta sia rilru zawng zawng hi a la peng vek emaw tih tur hialin, chhungte chaw ei hun leh mut hunah pawh thurualpui hlei thei lovin ka ang hau hian kan thlir dauh dauh reng mai. E-mail chatting kan han thiama thiante Id kan inpea chhungte mut reh vek tawh hnuah pawh kan tuk ri kauh kauh, chu mai a la ni lo he hmaibu teh hrep a rawn chhuak zet phei chu! Hui.. ham… mihring nih man hi a va han awm teh lul em! Thil dang neuh neuh chu sawi tawh lovang he Hmaibu hi ka ngainain tha ka tih em vangin ka rawn fak hluap ange tun min sel lo se..

Dot com a zawngah chuan mi zawng zawng hian kan lawm ber leh ngaih hlut ber a ni hial awm mange ka ti thin, a thain a hlu em a ni hi. Mahni infak leh ahranpa taka inhmel hriat tir a ngai tawh lo va, thian tha u leh nau te, nu leh pate min zawn pui kan ngai tawh hek lo. Kan profile-ah kan nihna leh eng kim kan tar lan tawh a hnu lo chhiar ve tawh mai se ni mai. Ka taksa mawina leh pian zia, hmel that zia engkim lanna thlalak kan dah vek tawh a hnu a duh chuan min rawn zawm ve tawh mai rawh se.. Thlalak kan inen saka duh leh duh kan inzawma kan ti ti luama zan khua tlaivarin duh thu aiang kan sam hmangaih bia thu kan inhlan, chumai duh tawk lovin chu lai hmunah chuan aw tih atangin tiam tlatein a zawm nghal. Kawppui zawnnan a tha tek tek.. tha tak a ni, mahse hmaikawr hmang erawh an awm fimkhkur a ngai. Hei chauh hi a la ni lo a mal te tein ka sawi zel dawn menah min lo thlak mai lo u la..

Mite’n misual tiin lo hnawlin tui thlar che mahse pawi ti reng reng suh misualte ngai dama hmangaih taka enkawltu misual.comlover-ah hian han lut la i hrehawmna zawng zawng an lo chul dam hiau hiau ang che..a va nuam teh lul em! He lai ang tho hian Pu H.V leh Kawlhawkte’n an hmel ngai an la pu, hei aia lan thatna pic an nei lo ni ngei ang.

Chuta tang chuan Zoram Thlirtuah han lut leh la zoram leh a chhunga cheng thil chi tin reng mai hi a lo lang uar anga, Zoram khawvel chan chin tharah zofa, kawlkil thleng pawha inzar pharhin an awmna hmun kil tin kil tang a tanga chan chin thar hlam tha tak; a lalum khu vet vet nitin darkar tin leh minutes tina chhiar tur awm reng hi i chhiar chuan zing tin tuk tho nilum ainaah thiante hmaa news puangtu i ni thei ngei ang.

I vei lamah han inher leh deuh hret la Zoram Political History atang khan kan politician-te din hmun leh chan chin tawi, an thu kal lam leh haw lam i hriat duh te, History hlui tak takte pawh han zawt dil chhut la i chhiar peih loh khawpin an lo pharh duai mai ang.

History kal phung i ngaihthlak atanga i ngaih dan ni lo deuh leh dan(Law) an hmang dik lo deuhin i hriaa i hre chiang duh anih chuan Legal Forum ah theuh lut la Lawyer fel tak takte enkawl a ni bawka dan ang thlapin i hriat tum aia thui an lo kek kawk ang che nga chu chuan nangmahah huaisenna a pe ngei ang che.

Tuna i hman mek i computer/cell phone i hmang rim lutka harsatna i tawk a nih pawhin thla phang reng reng suh. Mizo I.T. Helpline (hei hi hman ni deuh khan mi then khat kut hlei deuhin an lo sawisaa a dintu(admins)te pawh an lo paih then vel zu nia.. a titute hi YMA -in zawn chhuaha eng Acts emaw awrh tira MHIP tak pawha zilh deuh an ngai ang) a buai lawk a vangin a dang I.T.Problem Solver chu mi tlawmngaite’n an siam leh nghal vat a. Zofate ngei mai an zirthiamna leh experience neih te mahni hnam puitetan tiin inhawng tak leh rilru zau tak puin i harsatna pui bawm tur chein an in peih reng  a nia, an va han chhuan awm tak em!

Eng tiang khawpa hmun pialral leh daktawr rawn phak lohvah awm mah la, i taksa a lo chaua i awmkhua a lo nuam lo pawh a ni thei lungngaiin kun mai lo la Hriselna Huangah hian i dam lohnate fel fai takin ziak lut la Samari mitha tan pui ngaite tan puia an hliamte tuam dam saktu April Renthlei leh Puii Chawngthute’n thlum tak si dam diaiin an lo siai jeuh ang che nga Hnapchipuks leh David-a(daktawr dang pawh an awm teuh a nia) ten chiang fahranin dam dawi eidan tur an lo hrilh ang chia daktawrte’n an lo vil veng reng ang che.

Fanau rilah rah mah ni se an harh ltuka thu an awih loh chuan ben zawt bakah tawngkam mawi lo tak taka auh khum hi a awl teh a nia. Angaihna hre lovin intilung ngai duh suh la S.VoX ah hian lut la naupang tan thawn thu ngaih nawm tak tak zo tawnga leh lin( an peih fel tawhin ka ring) hmang hian i fate chu han awi la an thu/mu meng ker mai ang, tichuan nu/pa tha leh zai dam, nau awm thiam i lo ni mai dawn a nih chu.

A tha lo lama hmang pawh an awm nuala hmeichhia pawh mipa pawh mahni taksa mawina, mirilru la thei ang bera insiamin an inpho chhuak del dula, hetiang lam hi chu keini zofa, Kristiante hi chuan tih ve lo hram ila, atiate hnim hnai loh tum ila a tha ngawt ang. Misualho zingah hian hei lo dang a thatna emaw, a that lohna e maw sawi tur hria pawh kan awm teuhin ka ring. A chunga tarlan tiphil phual atang hian tangkaipuina pa 1 tal kan lo chhar mial mahna, keiaia hria tam tak awm tawh tho mahse hre lo kan la awm hlauh chuan a tha dawn emai tiin ka rawn post ve tawp a ni e.

Similar Posts:

• Mihring siamtute zawng hmu turin NASA in mithiam rual van thengrengah tir
• Chi thlah
• KA MITTUI A TLA!
• Thu thehdarhtu lo pawimawh zia hi
• KA PENDRIVE.

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Tuesday, December 13th, 2011 at 5:00 am and is filed under Lifestyle, More than words. You can follow any responses to this entry through the RSS 2.0 feed. You can leave a response, or trackback from your own site.