mi(sual).com

Krismas chu ni hnih chiahin a dang tawha, mitin mai chu he ni ropui tak mai hmuak hian an in buatsaih sung sung hlawma. Dawr eng pawh mai chu a lun vek maia. Chawhmeh dawr atanga thawmhnaw man to zawrhna thleng chuan lun lo pakhat mah a awm lo. Ka hmazawna dawr pakhatah chuan nupa tuak khat hian an fanu kum 7 mi vel hi kaiin an lo bazaar puia, hlim takin an chhungkua chuan an duhzawngte chu an en kual hlawm a. Ngaihtuahna a ti thui ngei mai. Ka chhungkua ka mitthlah an lo langa, chung mi tam tak karah chuan keimah chiah chu lungngai a kun awm chhun niin ka inhria.

Kum khat lai a liam ta, kan nu hi inchhunga a chet velnaah a che suala, ho te anga lang kha a lo ho huah lo maia, rin ai takin a lo na a, a tluk sualna avang chuan khum betin a awm phah ta a. Kei kut hnathawk ka ni a, ka hlawh chhauh tlemte chu kan nu damdawiah leh kan ei leh in atan a ral nghal vek zel a. Kan nu a dam that lai chuan kan nupain kan la inpeizawna, khawsak harsa lutuk loin kan awm thei thin, mahse a chetsual tak atang hi chuan kan khawsak chu a rawp tial tiala, kan ei tur che che kan nei ta chauh maia. Hnathawh tur a awm remchan loh phei chuan kan nghei lo chauh ta maia.

Kirsmas kan thleng tep tawh tih hian kan fanu kum 7 mi chu a rawn daamlo leh ta tlat maia. Damdawiina dahna tur ka nei tawh si lo, huphurh tak chung leh hreh tak chung chuan in lamah ka enkawla, kar khat lai a liam tawha, ziaawm lam a pan thei bawk si lo. An damdawi atan chuan ka sum neih zawng zawng chu ka hmang zo ti tih tawha, ei tur leina tur takngial pawh kan nei zo dawn ta lo. Rilru mumal ka pu thei tawh lo reng renga.

Kei chuan riltam chu ka la tuar thei ngei mai, mahse khawvela ka ro neih chhun pahnihte tam tur chu ka hmu thei thlawt lo. Han pur tur leh han tahawh tur chhungkhat hnai neih kan nei si lo, rilrui buai taka ka awm lai chuan ngaihtuahna tha lo tak ka nei ta. Krismas lo thleng tur chu ka nuna ka thil duh lo ber ti tur chuan ka rilru ka siam ta tawp mai. Loh theih lohnain min nan tawh avang chuan hreh tak chung chuan ka thil tum chu kal tlang pui ka tum ta a.

Zan dar 10:00 PM a ri tawha, boruak pawh a vawt var var tawh khawp mai. Ka kawrlum hak chu a hlui tawhin a chhe tawh hle na a, ka  thil tih tum chuan ka chhungrila min man tlat avangin vawt tih aiin ka sahal huam huama. Ka nuna a vawikhat nan ruk ruk ka tum a ni. Ka dawr rawk tum pawh chu ka thlang fel tawha, ka fanu leh ka nupui te riltama awm reng chu ka hmuh theih tawh thlawt loh avanign ka nuna ka la tih ngai hauh lo chu tih ka tum ta a ni. Kei chuan tuar mah I la ka nupui leh fanu te riltamna a hnem dawn chuan pawi tihna ka nei tawh lo.

Kut khur zawih zawih chung chuan kawngkhar chhut chhiatna atana ka ken tuboh chu ka lek kanga, ka han hawi kual leha tumah an awm lo tih ka han chian leha, tumah an awm lo tih ka han chian leh hnu chuan chhut ka tum ta a. Ka chhu dawn chiah tih chuan ka hnung lam atang hian aw ngaihnobei leh zaidam, khawngaihna khat tih hriat ngawih ngawih hian, “Ka fapa enge I tih dawna?” tiin min rawn ko ta thut mai a. Ka hlau lutuk chu ka khawng vek ni berin ka hria, min rawn man ta a nih hi ka ti a, tlan chhiat ka tum ta a. Chutia tlan ka tum lai chuan, “Ka fapa tlan chhe suh, ka hlauhawm loh a nia” a rawn ti leha. Ka ding ta chawta, ka lehhawi ta a.

Ka hmaah chuan ka mi hmuh tawh a zawnga la zahawm ber leh ngainatawm ber mai hi a lo dinga. Khabe hmul mawi tak a neia, kum 33 mi vel niawm a ni. A hmelah chuan zahngaihna, khawngaihna, lainatna leh thlamuanna a awma, hmangaihna pawh a lang tel bawk. A hmel ka hmuh chuan keimah chu ka inhmu chiang em em rignawt mai a. Ka zak hle mai. “Ka fapa, lo hnai teh, enge kha laiah khan tih I tuma” tiin min zawt leh. Keimah aia nuapang awm ni mahse, Ka fapa ti a min koh dan chuan Pa in fapa a koh anga duhawm leh mawi a nit lat mai.Min tina dawna ka hriat loh avang chuan ka pan hnai ta a.

Kawng sira thutna awmah chuan min thutpuia, kan titi dun ta a, ka rilru hahzia leh, kan chhungkaw dinhmun zawng zawng chu ka hrilh ta a. Uluk takin min ngaihthlak saka, chutianga a hnena ka harsatna ka sawi lai chuan ka rilru hahna leh ka phurrit tak chu a kiang huai hian ka hria a. Kan titi tawp lamah chuan a ni chuan, “Zanin chu kan intawng fuh khawp mai, krismas a hnai tawh si a, tanpui tur ka neih takah tiin ka sum khawl tlemte hi tanpui ngaite hnena pek ka lo tuma, pek tur ka zawn kual reng laiin nang ka tawng che chu ka lawm hle mai. Kha hei hi la rawh a ti a.” a ipte atang chuan cheque hi a rawn phawrha min pe a.

Ka lawm bawk si, lungchhe bawk si ka hnuk a ulh teuh maia. “Lawmthu sawi dan pawh ka hre lo, ka lawm lutuk a ni tawp mai” tiin ka sawi a, a ni chuan, “lawmthu sawi a ngai lo, lawm tur chu keimah zawk hi a ni, tanpui theia ka awm che hi ka lawm asin” a ti a. Kan inthen ta a. Ka hlim bawk si lawm bawk si chu rilru mumal pawh ka pu thiam lo hial zawka. Thui vak lo ka kal hnu chuan chutianga min tanpuitu a hming pawh zawt lo a  ka kal chu ka inthiam lo lutuka, a la kal sawn ka rin loh avangin kan thutna lamah chuan ka lehhawi leha.

Hmuh tur reng a lo awm tawh lo, ka han hawi vela tumah an awm bawk si lo. Kan thutna ah chuan lehkha them hi a lo awma, Ka la a. He thu hi a lo inziaka, “Hmanni a biakinah pawh lut ngam lo a, biakin gate kianga zana I tawngtai kha ka hria asin, ka fate tawngtaina hi ka thlahthlam ngai lo, ka thil pek che kha naktuk tuk leh lawka lo thleng tur ka piancham puala ka pek che a nih kha..Nazareth Tlangval” tih hi a lo inziaka. Ka chhiar zo chu ka mittui a tla ta zawih zawiha.

Similar Posts:

• TawiNawi-III
• Hmangaihna
• I beinawn leh mai dawn nia
• Thanchhingi & Son dawr tlak an ni em?
• Khuai vs Mizo Tlawmngaihna

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, December 23rd, 2011 at 3:00 pm and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.