Rangbawl lam hi chu phur thut tih lovah chuan ramriah nikhuaa awlsam thei angbera bawl ṭhin ka nih vangin hmasawn ngaihna vak a awmlo khawp mai. Eng chaw mai pawh hi tuiti takin ka ei thei zel mai a, ei leh in lamah hi chuan ka awlsam viau reng a ni.
Vawiin, Pawlkut Thla (January) ni 18 zing chu engemaw ka hriat tehreng ni, pizza siam chakna ka nei tlat pek alawm mawle. Dawrah pizza urna tur pizza stone ka va lei a, a hming ka hriat lar ve chhun pepperoni fun khat, Italian sausage, cheese zai dipsa leh dawidim (yeast) tlep 3 ka lei tel bawk a. Chutichuan in lamah phur ve fe chuan ka haw ta a ni.
Pizza stone an tih hi a pizza chhang urna tur a siam a ni a. Lung thawrawng (ti mai ang), entirnan lungtat tha chu han hip ila a rawn thaw ser serin a hriat hi,chutiang chu a ni. Kawtlai vel a lungphek, brick ang deuh mahse a chung tih tlet loh pawh hi a hman theih tho bawk. Tih tlet tawh kha chu a tle atang khan natna thalo a kai theih vangin hman chi a nilo. Tin, Lungtat tura tha lung dang pawh hi siam phek a, mei sa a ngam chuan a that lohna tur ka hre chuanglo.
Tichuan tui tlemteah chuan dawidim (yeast) fiante khat awm vel chu ka phul a, minute 5 vel ka nghah hnu chuan ala tuiral loh vangin ka chawk ral ta vek a. Olive oil fiante 2 thlakin chi tlem ka telh nghal bawk a, chini piai 2 lek ka telh nghe nghe bawk. Maida ka thlak leh a tichuan ka nuai pawlh a, khal mawi tawk anih chuan saranga khuhin hmun vawt lem lovah darkar chanve ka dah ta vang vang a; ka chiahpuam a ni. Inchhung a vawh deuh chuan oven tih lum zawkah dah mai pawh a remchang phian ang.
Ka maida nuai (dough) chiahpuam chu alet a lian alo ni tawh a, chumi chu ka nuaina (peel) turah chuan maida dang phulin (atta nuai tur angin) ka vawm thum thla dawp a..a khu luih.
Chhang nuaina hman kher a ngai lova, ka kutin maida mum chu ka nawr phek a, a lai aṭanga ṭanin ka nuai phek hlai telh telh a. Hetah hian inchhah hleih emaw kha ngaih pawimawh angailo, a tlang phei chu chhah mah mah sela a chung a dah tur (topping) a luangliam lo zawk, an ti.
Chumi zawh chuan olive oil in maida nuai phek chung chu ka’n chulh thiak thuak a, heihi a chunga ka dah tur tomato sauce in a chiah tui pur (soggy) lohna tur a ni.
Ka oven tih sat lawk (450.F/232.22°C) chu ka hawng a, pizza stone-ah chuan cornmeal ka phul ṭhet ṭhet a (a beh lohna turin), pizza tur chu ka nuaina hmang chuan ka dah thla ta a ni. Tichuan, oven chu 500.F (260.C) a sain ka dah chhova, thlahlel tak leh misual.com rawn comment zeuh zeuh pah chuan minute 15 ka nghak ta a. Kan hawng chhin chu ka pizza vawikhat siamna atan chuan ka lung a awi hle aniang, biangki hmu phalo chauvin ka nui vur vur mai alawm. Yum yum, a tui ve phian mai ka ti, topping erawh duhthusam ni turin ka nei ṭhalo thung… a dang chu home minister leh Janis ei atan (surprise) kan khek tawh ang e 
In peih chuan siam ve rawh u, a awlsam phian mai. Topping atan hian mahni duh zawng eng pawh a dah theih.
PS: ka zirna… Google.com Yay
Similar Posts:
- Thluak chhaih !!
- Darthlalang kan nei tha em..?
- ‘SUUU’in ti,’SEEE’ ah kan ngai!
- Mobile Phone ka nei ve a
- Chemtatrawta
February 17th, 2012 at 11:59 am
A van bengvar thlak em, ka chhuang lutuk che
Report this comment